Իմաստության խորհուրդը

1Ամեն իմաստություն Տիրոջից է, և այն կա և կմնա նրա հետ հավիտյան։

2Ո՞վ կարող է երբևէ հաշվել ծովի ավազը, անձրևների շիթերը և անցած օրերը։

3Ո՞վ կարող է քննել երկնքի բարձրությունը, երկրի լայնությունը և իմաստության խորքերը։

4Իմաստությունն ստեղծվեց ամեն ինչից առաջ, զգոնությունը և հանճարը հավիտենից կային։

5Իմաստության արմատները նրա մեջ հայտնվեցին։

8Իմաստությունը մեկ է և խիստ ահեղ, որ նստում է իր գովության աթոռին։

9Ինքը՝ Տերը, հաստատեց այն, տեսավ և չափեց այն ու հեղեց իր գործերի վրա,

10ամեն մարմնի վրա՝ ըստ իր պարգևի, և այն բաշխեց իր սիրելիներին։

11Տիրոջ հանդեպ երկյուղը փառք է ու պարծանք, ուրախություն է և ցնծության պսակ։

12Տիրոջ հանդեպ երկյուղը զվարճացնում է սիրտը և ուրախություն, խնդություն ու երկար կյանք պարգևում։

13Ով երկյուղ է կրում Տիրոջից, նա բարիք կստանա հետո և իր վախճանի օրը կօրհնվի։

16Իմաստության սկիզբը երկյուղն է Տիրոջից, որ հավատացյալների համար հաստատվել է մայրական արգանդից, մարդկանց հետ բնավորվել է հավիտենական հիմքից և հավատարիմ կմնա նրանց սերնդի հետ։

20Իմաստության լրումը երկյուղն է Տիրոջից. այն մարդկանց կսնի իր պտուղներով,

21մարդու ամբողջ տունը կլցնի ցանկալի բաներով և շտեմարանները՝ նրա վաստակով։

Լինել համբերատար և զուսպ

22Իմաստության պսակը Տիրոջ հանդեպ երկյուղն է։

23Նա է ծլեցնում խաղաղություն և կատարյալ առողջություն, տեսնում և քննում է ամեն բան։

24Նա բխեցրեց իմաստունի խրատը և գիտությունը, բարձրացրեց նրանց փառքը, ովքեր ունեն այն։

25Իմաստության արմատը երկյուղն է Տիրոջից, և նրա ոստերը՝ երկար կյանքը։

28Անիրավ զայրույթը չի կարող արդարանալ, քանի որ նրա զայրույթի ընթացքը նրան տանում է դեպի կործանում.

29համբերատարը առժամանակ զսպում է իրեն, և հետո դարձյալ ուրախությունը տիրում է նրան։

30Նա առժամանակ կթաքցնի իր խոսքերը, և շատերի շուրթերը կպատմեն նրա իմաստության մասին։

31Իմաստության գանձերի մեջ խրատի առակներ կան։

32Մեղավորի համար աստվածապաշտությունը գարշելի է։

33Եթե իմաստության ես ձգտում, պահի՛ր Տիրոջ պատվիրանները, և Տերը քեզ կպարգևի այն։

34Արդարև, իմաստության զգոնությունը Տիրոջ երկյուղն է, և հավատն ու հեզությունը հաճելի են Տիրոջը։

35Մի՛ անտեսիր Տիրոջ հանդեպ երկյուղը և նրան մի՛ մոտեցիր երկբայությամբ։

37Կեղծավորություն մի՛ արա մարդկանց առջև և զգո՛ւյշ եղիր քո շրթունքներից։

38Մի՛ բարձրացրու քեզ, որպեսզի չընկնես, քեզ վրա անարգանք չբերես, և Տերը չնվաստացնի քեզ,

40քանզի նրան չմոտեցար Տիրոջ երկյուղով, և քո սիրտը լի է նենգությամբ։