Աստծու մեծությունը

1Նա, որ կենդանի է հավիտյան, ամեն ինչ ստեղծեց հավասարապես, և միայն Տերն է արդար համարվում։ Ոչ մեկին չի տրված պատմել նրա գործերը։

2Ո՞վ կքննի նրա մեծագործությունները։

3Ո՞վ կչափի նրա հզորության մեծությունը։

4Ո՞վ կհամարձակվի պատմել նրա ողորմության մասին։

5Հնարավոր չէ ո՛չ նվազեցնել, ո՛չ ավելացնել և ո՛չ էլ հետազոտել Տիրոջ զարմանահրաշ գործերը։

6Երբ մարդը համարի, թե ավարտել է, կզգա, թե նոր է սկսել, և երբ դադարի պատմելուց, ապշահար կմնա։

Մարդու ոչնչությունը

7Ի՞նչ է մարդը, և ի՞նչ է նրա օգուտը։

8Ո՞րն է նրա բարիքը, ո՞րն է նրա չարիքը։ Մարդու օրերի թիվը ինչքան էլ շատ լինի, հարյուր տարի է։ Ինչպես ջրի կաթիլը ծովի համեմատությամբ և խիճը՝ ավազի, այնպես տարիներն են սակավ հավիտենական օրերի համեմատ։

9Սրա համար է, որ Տերը համբերատար է նրանց նկատմամբ և նրանց վրա հեղում է իր ողորմությունը։

10Նա տեսավ և իմացավ նրանց կործանումը, որ դաժան էր։

11Սրա համար էլ բազմապատկեց իր ներողամտությունը։

12Մարդու ողորմությունն իր մերձավորի վրա է, իսկ Տիրոջ ողորմությունը՝ բովանդակ մարմնավորի։

13Տերը հանդիմանում, խրատում և ուսուցանում է և իբրև հովիվ՝ նրան իր հոտն է վերադարձնում։

14Ողորմում է նրանց, ովքեր ընդունում են խրատը և շտապում են լսել նրա վճիռները։

Տալու ազնիվ ձևը

15Որդյա՛կ, քո բարիքին արատ մի՛ խառնիր և քո տվածներին՝ տրտմության խոսքեր։

16Մի՞թե ցողը չի զովացնում տոթը. այդպես էլ լավ խոսքն ավելի լավ է, քան նվերը։ Շնորհալի մարդը երկուսն էլ ունի։

17Հիմարն ապերախտությամբ նախատում է,

18չարակամ մարդու նվերը արցունք է բերում աչքերին։

Իմաստունի խոհեմությունը

19Խոսելուց առաջ մտածի՛ր և դեռ չհիվանդացած՝ հո՛գ տար քո մասին.

20նախքան Տիրոջ դատաստանը քննի՛ր քո անձը և նրա այցելության ժամանակ ողորմություն կգտնես։

21Մեղանչելու ժամանակ ցո՛ւյց տուր, որ դարձի ես գալիս։

22Մի՛ հապաղիր ժամանակին կատարել խոստումդ և մինչև մահ մի՛ հետաձգիր արդարացումդ։

23Աղոթելուց առաջ նախապատրաստի՛ր քեզ և մի՛ եղիր այն մարդու նման, որ փորձում է Տիրոջը։

24Հիշի՛ր վախճանի օրվա ցասումը և վրեժխնդրության ժամանակը, երբ Տերը քեզնից կշրջի իր երեսը։

25Լիության ժամանակ հիշի՛ր աղքատության ժամանակը և հարստության օրերին՝ աղքատությունն ու նեղությունը։

26Առավոտից մինչև երեկո փոփոխվում է ժամանակը. Տիրոջ առջև ամեն ինչ հարափոփոխ է։

27Իմաստուն մարդն ամեն ինչում զգույշ կլինի և մեղքի ժամանակ կխուսափի բազում հանցանքներից։

28Ամեն խելամիտ մարդ ճանաչում է իմաստությունը և գոհություն կտա նրան, ով գտել է այն։

29Խելամիտ խոսքերով իրենք էլ են իմաստնանում և ճշմարիտ ու տեղին առակներ բերում։

30Որդյա՛կ, անձնատուր մի՛ եղիր հեշտասիրությանը

31և թշնամիներից ոտնակոխ չես լինի։

32Մի՛ ուրախացիր փափուկ կյանքով և մի՛ կապվիր դրան։

33Գրավ դրած և պարտք վերցրած փողերով մի՛ աղքատացիր, քանզի հարբեցող մշակը նույնպես հարստության չի հասնի։