Փնտրել Աստծուն և փախչել մեղքից

1Սիրեցե՛ք արդարությունը, երկրի՛ դատավորներ։ Բարությա՛մբ խորհեք Տիրոջ մասին և պարզ սրտով փնտրե՛ք նրան։ 2Քանզի պիտի գտնի նրանց, ովքեր չեն փորձում իրեն, և պիտի երևա նրանց, ովքեր թերահավատ չեն իր նկատմամբ, 3քանզի անիրավ մտքերը բաժանում են Աստծուց, և Աստված հանդիմանում է անզգամներին, երբ փորձում են իր զորությունը, 4քանզի իմաստությունը չի մտնի չարանենգ անձի մեջ և ոչ էլ կբնակվի մեղսակենցաղ մարմնի մեջ, 5իմաստուն և անբիծ հոգին փախչում է նենգությունից ու մերժում անմիտների մտքերը, և երբ անիրավություն է վրա հասնում, հանդիմանում է այն, 6իմաստուն և մարդասեր հոգին չի արդարացնում նրան, ով հայհոյում է իր բերանով, որովհետև Աստված վկա է նրա ներքին ցանկություններին, նրա սրտի ճշմարիտ վերակացուն է և նրա լեզվի ունկնդիրը, 7Տիրոջ հոգին լցնում է տիեզերքը. նա, որ պահում է ամեն ինչ, գիտե, թե ով ինչ ձայն է հանում։ 8Նա, ով անիրավ բաներ է շշնջում, չի ծածկվելու և չի խուսափելու արդարացի դատաստանից։ 9Հարցուփորձի միջոցով ամբարիշտների մտքերի քննություն պիտի լինի, նրանց ասածների լուրը պիտի հասնի Տիրոջը՝ ի կշտամբություն իրենց անօրենությունների, 10նախանձախնդիր ականջը լսում է ամեն բան, և քրթմնջյունն ու շշնջյունն անգամ ծածուկ չեն մնա։

11Այսուհետև զգո՛ւյշ եղեք անօգուտ քրթմնջյունից և խնայե՛ք ձեր լեզուն բամբասանքներից, որովհետև գաղտնի շշնջյունը զուր չի անցնի, իսկ ստախոս բերանը կսպանի հոգին։ 12Ձեր կյանքի մոլորությամբ ձեզ մահ մի՛ ցանկացեք և մի՛ սպանեք ձեր անձերը և ձեր իսկ ձեռքերի գործերով ձեր անձերը մի՛ տվեք սպանության։ 13Աստված մահ չի ստեղծել և չի ուրախանում ողջերի կորստյան համար։ 14Ամեն ինչ հաստատել է լինելու համար, և աշխարհի գործերը փրկության համար են։ Մահաբեր թույն չկա նրանց մեջ և ոչ էլ դժոխքի թագավորություն՝ երկրի վրա, 15որովհետև արդարությունն անմահ է։

16Իսկ ամբարիշտները ձեռքով ու խոսքով կանչեցին մահը, բարեկամ համարեցին նրան, հալումաշ եղան և դաշինք կնքեցին նրա հետ. ուստիև իսկապես արժանի են նրան բաժնեկից լինելու։