1Եւ տարաւ ՚ի ներքս զտապանակն Աստուծոյ, եւ հաստատեաց զնա ՚ի մէջ խորանին՝ զոր պատրաստեաց նմա Դաւիթ. եւ մատուցին ողջակէզս՝ եւ զփրկութեանցն առաջի Աստուծոյ։ 2Եւ կատարեաց Դաւիթ մատուցանել զողջակէզսն՝ եւ զփրկութեանց. եւ օրհնեաց զժողովուրդն յանուն Տեառն։ 3Եւ բաշխեաց ամենայն Իսրայէլի յառնէ մինչեւ ցկին, ՚ի մարդ՝ հա՛ց մի ՚ի հացարարոցէ, եւ պատառ մի ՚ի կասկարայից։

4Եւ կարգեա՛ց առաջի երեսաց տապանակին կտակարանացն Տեառն, ՚ի Ղեւտացւոցն, պաշտօնեայս երգե՛լ ձայնիւ, եւ խոստովա՛ն լինել, եւ օրհնե՛լ զՏէր Աստուած Իսրայէլի։ 5ԶԱսափ առաջնորդ. եւ երկրորդ նմա Զաքարիաս, զՅեէլ, զՍամիրամովթ, զՅայէլ, զՄատաթիաս, զԵղիաբ, զԲանեաս, զԱբեդդովմ, եւ զԵսիէլ, նուագարանօք տաւղաց եւ քնարից. եւ Ասափ ծնծղայիւք նուագէր. 6եւ Բանեաս եւ Ոզիէլ քահանայք փողովք հանապազ առաջի տապանակի կտակարանացն Աստուծոյ։ 7Եւ յաւուրն յայնմիկ յայնժամ կարգեաց Դաւիթ, իսկզբանն օրհնել զՏէր, ՚ի ձեռն Ասափայ՝ եւ եղբարց նորա։ 8Երգ։ Խոստովա՛ն եղերո՛ւք Տեառն եւ կարդացէք զանուն նորա, ծանուցէ՛ք ժողովրդոց զգործս նորա։ 9Երգեցէ՛ք նմա եւ օրհնեցէ՛ք զնա, պատմեցէ՛ք ամենեցուն զսքանչելիս նորա զոր արար Տէր։ 10Օրհնեցէ՛ք զանուն սուրբ նորա. ուրա՛խ լիցի սիրտ՝ որ խնդրէ զհաճոյս նորա։ 11Խնդրեցէ՛ք զՏէր եւ հզօրք եղիջիք. խնդրեցէ՛ք զերեսս նորա յամենայն ժամ։ 12Յիշեցէ՛ք զսքանչելիս նորա զոր արար, զնշանս եւ զիրաւունս բերանոյ նորա. 13զաւա՛կ Իսրայէլի ծառայք նորա. որդիք Յակոբայ ընտրեալք նորա։ 14Նա՛ է Տէր Աստուած մեր, յամենայն երկրի են իրաւունք նորա։ 15Յիշեսցէ յաւիտենից զուխտ իւր, զբանն զոր պատուիրեաց ՚ի հազար ազգ. 16զուխտն զոր եդ ընդ Աբրաամու, եւ զերդումն իւր ընդ Սահակայ։ 17Հաստատեաց զնա Յակոբու ՚ի հրամանս, եւ Իսրայէլի յուխտ յաւիտենական. 18ասէ. Քե՛զ տաց զերկիրն Քանանու, զվիճակ ժառանգութեան ձերոյ։ 19Զի էին նոքա սակաւք թուով. եւ նուազք եւ պանդուխտք ՚ի նմա։ 20Գնացին նոքա ազգէ յազգ, եւ ՚ի թագաւորութենէ ՚ի ժողովո՛ւրդ յայլ։ 21Ո՛չ թող ա՛ռն հարստահարել զնոսա, եւ կշտամբեաց վասն նոցա զթագաւորս. 22մի՛ մերձենայք յօծեալսդ իմ, եւ ՚ի մարգարէսդ իմ մի՛ լինիք չար։ 23Օրհնեցէ՛ք զՏէր ամենայն երկիր. պատմեցէ՛ք օրըստօրէ զփրկութիւն նորա։ 24Պատմեցէ՛ք ՚ի հեթանոսս զփառս նորա, յամենայն ժողովուրդս զսքանչելիս նորա։ 25Զի մեծ է Տէր, եւ օրհնեալ է յոյժ. ահաւո՛ր է ՚ի վերայ ամենայն աստուածոց. 26վասն զի ամենայն աստուածք ազգաց կո՛ւռք են. եւ Աստուած զերկինս արար։ 27Փառք եւ գովութիւն առաջի երեսաց նորա. զօրութիւն եւ պարծանք ՚ի տեղւոջ նորա։ 28Տո՛ւք Տեառն տոհմք ազանց. տո՛ւք Տեառն փառք՝ եւ զօրութիւն։ 29Տո՛ւք Տեառն զփառս անուան նորա. առէ՛ք զպատարագս, եւ մատուցէ՛ք առաջի երեսաց նորա. եւ երկրպագեցէ՛ք Տեառն ՚ի սրահ սրբութեան նորա։ 30Եւ երկիցէ՛ յերեսաց նորա ամենայն երկիր. յաջողեսցի երկրի՝ եւ մի՛ սասանեսցի։ 31Ուրա՛խ եղիցին երկինք՝ եւ ցնծասցէ՛ երկիր. եւ ասասցեն ՚ի հեթանոսս. Տէր թագաւորեաց։ 32Հնչեսցէ՛ ծով լիութեամբն իւրով. փայտք անդաստանի եւ ամենայն որ է ՚ի նմա։ 33Յայնժամ ուրա՛խ եղիցին ամենայն ծառք անտառի, զի եկն դատել զերկիր։ 34Խոստովան եղերուք Տեառն՝ զի բարի է զի յաւիտեան է ողորմութիւն նորա։ 35Եւ ասացէ՛ք. Կեցո՛ զմեզ Աստուած փրկութեան մերոյ, եւ ապրեցո՛ զմեզ ՚ի թշնամեաց մերոց. զի օրհնեսցուք զանուն քո սուրբ, եւ պարծեսցուք յօրհնութիւնս քո։ 36Օրհնեալ Տէր Աստուած Իսրայէլի յաւիտենից մինչեւ յաւիտեանս. եւ ասասցէ՛ ամենայն ժողովուրն. Ամէն։ Եւ օրհնեցին զՏէր։ 37Եւ եթո՛ղ անդ առաջի տապանակի կտակարանացն Տեառն՝ զԱսափ եւ զեղբարս նորա, պաշտե՛լ առաջի տապանակին յամենայն ժամ օրըստօրէ։ 38Եւ Աբդոդոմ եւ եղբարք նորա վաթսուն եւ ութ. եւ Աբդոդոմ՝ էր որդի Իդիթունայ. եւ Ովսեէ ՚ի դռնապանսն։

39Եւ զՍադովկ քահանայ եւ զեղբարս նորա զքահանայսն առաջի խորանին Տեառն ՚ի Բամա՝ որ ՚ի Գաբաւոն, 40մատուցանել ողջակէզս Տեառն ՚ի վերայ սեղանոյ ողջակիզացն հանապազ առաւօտուց եւ երեկորին. եւ ըստ ամենայնի զոր ինչ գրեալ է յօրէնսն Տեառն՝ զոր պատուիրեաց որդւոցն Իսրայէլի ՚ի ձեռն Մովսիսի ծառային Աստուծոյ։ 41Եւ ընդ նմա Եման, եւ Իդիթովմ, եւ այլք ընտրեալք յանուանէ, օրհնել զՏէր՝ զի յաւիտեան է ողորմութիւն նորա. 42եւ ընդ նոսա փողք եւ ծնծղայք, նուագել քնարօք երգոցն Աստուծոյ. եւ որդիքն Իդիթունայ ՚ի դրանն։ 43Եւ գնաց ամենայն ժողովուրդն իւրաքանչիւրոք ՚ի տուն իւր. եւ դարձաւ Դաւիթ օրհնել զիւր տունն։