1Եւ եղեւ յետ այսորիկ՝ եհա՛ր Դաւիթ զայլազգիսն, եւ վանեաց զնոսա. եւ ա՛ռ զԳէթ՝ եւ զգեօղս նորա ՚ի ձեռաց այլազգեացն։ 2Եւ եհար զՄովաբ. եւ էին Մովաբացիքն ծառայք Դաւթի բերել ընծայս։ 3Եւ եհա՛ր Դաւիթ զԱդրաազար արքայ Սուբայ ՚ի յԵմաթ, յերթալ նորա հաստատել զձեռն իւր ՚ի վերայ գետոյն Եփրատայ. 4եւ ա՛ռ Դաւիթ զնորա հազար կառս՝ եւ եւթն հազար ձիոց՝ եւ քսան հազար արանց հետեւակաց. եւ քակեաց Դաւիթ զամենայն կառսն, եւ եթող ՚ի նոցանէ հարիւր կառս։ 5Եւ եկն Ասորին ՚ի Դամասկոսէ օգնել Ադրաազարայ արքայի Սուբայ. եւ եհար Դաւիթ յԱսորեացն քսան եւ երկու հազարս արանց։ 6Եւ եդ Դաւիթ ամրոց յԱսորիս ՚ի Դամասկոսի, եւ էին Դաւթի ծառայք՝ բերե՛լ նմա ընծայս. եւ ապրեցոյց Տէր զԴաւիթ յամենայն տեղիս ուր եւ երթայր։ 7Եւ ա՛ռ Դաւիթ զմանեակսն ոսկեղէնս, որ էին ՚ի ծառայսն Ադրաազարայ, եւ եբեր զայն յԵրուսաղէմ։ 8Եւ ՚ի Մատեբեթայ, եւ յընտիր ընտիր քաղաքացն Ադրաազարու՝ ա՛ռ Դաւիթ պղինձ բազում յոյժ. եւ ՚ի նոցանէ արար Սողոմոն զծովն պղնձի, եւ զսիւնսն, եւ զկահսն պղնձիս։

9Եւ լուա՛ւ Թովու արքայ Եմաթայ՝ եթէ եհար Դաւիթ զամենայն զօրութիւնսն Ադրաազարայ արքայի Սուբայ. 10եւ առաքեաց զԴուրամ զորդի իւր առ արքայ Դաւիթ հարցանել զնմանէ ՚ի խաղաղութիւն, եւ օրհնել զնա. վասն զի պատերա՛զմ տայր ընդ նմա Ադրաազար, եւ եհար զնա. քանզի այր թշնամի՛ էր Թովու՝ Ադրաազարայ. եւ ամենայն անօթք ոսկեղէնք եւ արծաթեղէնք ՚ի ձեռս նորա։ 11Եւ զա՛յնոսիկ սրբեաց Դաւիթ Տեառն ընդ արծաթոյն եւ ոսկւոյն զոր ա՛ռ յամենայն ազգացն. յԵդոմայ, եւ ՚ի Մովաբայ, եւ յորդւոցն Ամոնայ, եւ յայլազգեացն, եւ յԱմաղեկայ։ 12Եւ Աբեսսա որդի Սարուհեայ եհար զԵդովմ ՚ի հովտին Ելովնայ՝ ութուտասն հազար. 13եւ ե՛դ ՚ի հովտին ամրոց. եւ էին Եդոմայեցիք ծառայք Դաւթի. եւ փրկեաց Տէր զԴաւիթ յամենայն տեղիս ուր եւ երթայր։ 14Եւ թագաւորեաց Դաւիթ ՚ի վերայ ամենայն Իսրայէլի. եւ էր՝ առնել իրաւունս եւ արդարութիւն ամենայն ժողովրդեան իւրում։ 15Եւ Յովաբ որդի Սարուհեայ ՚ի վերայ զօրացն. եւ Յովսափատ որդի Աքիղ՚ուդայ՝ յիշատակաց դպիր։ 16Եւ Սադովկ որդի Աքիտովբայ, եւ Աբիմեղ՚էք որդի Աբիաթարայ՝ քահանայք. եւ Սուսա դպրապետ։ 17Եւ Բանեաս որդի Յովիդայայ՝ ՚ի վերայ քերեթեայն եւ ոփէլեթեայն. եւ որդիք Դաւթի առաջինք փոխանո՛րդք արքայի։