1Եւ ժողովեա՛ց Դաւիթ զամենայն իշանսն Իսրայէլի, զիշխանս դատաւորացն, եւ զամենայն իշխան օրամտիցն, ՚ի սպաս անձնապահաց թագաւորին. եւ զիշխանս հազարաւորացն, եւ հարիւրաւորացն, եւ գանձապահացն, եւ որք էին ՚ի վերայ ստացուածոցն նորա. եւ զզօրաւորսն, եւ զպատերազմօղս զօրավարացն յԵրուսաղէմ։ 2Եւ եկաց Դաւիթ արքայ ՚ի մէջ եկեղեցւոյն՝ եւ ասէ. Լուարո՛ւք ինձ եղբարք իմ եւ ժողովուրդ իմ։ ՚Ի սրտի իմում եղեւ շինե՛լ տո՛ւն հանգստեան տապանակի ուխտին Տեառն, եւ կայան ոտից Տեառն մերոյ. եւ պատրաստեցի ես ՚ի բնակութիւնն յայն զկազմածդ զայդ. ոսկի, եւ արծաթ, եւ պղինձ, եւ արոյր, եւ երկաթ, եւ փայտ բազում. 3եւ ասաց Աստուած ցիս. Ո՛չ շինեսցես դու ինձ տուն, անուանել զանուն իմ ՚ի վերայ նորա. վասն զի ա՛յր պատերազմօղ ես դու, եւ հեղեր արիւն բազում։ 4Եւ ընտրեաց Տէր Աստուած յամենայն ազգաց զԻսրայէլ, եւ յամենայն Իսրայէլէ ընտրեաց զՅուդաս, կանգնել զթագաւորութիւնն իւր յաւիտենական. եւ ՚ի տանէն Յուդայ՝ ընտրեաց զտուն հօր իմոյ եւ յորդւոց հօր իմոյ՝ կամեցաւ զիս լինել թագաւոր ՚ի վերայ ամենայն Իսրայէլի։ 5Եւ յամենայն որդւոց իմոց՝ վասն զի որդիս բազումս ետ ինձ Տէր, ընտրեաց զՍողոմոն որդի իմ, նստուցանել յաթոռ թագաւորութեանն Տեառն ՚ի վերայ Իսրայէլի։ 6Եւ ասաց ցիս Աստուած. Սողոմոն որդի քո շինեսցէ զտուն իմ, եւ զսրահն իմ. վասն զի ընտրեցի՛ զնա լինել ինձ որդի, եւ ես եղէց նմա ՚ի հա՛յր. 7եւ ուղղեցից զթագաւորութիւն նորա մինչեւ յաւիտեան, եթէ զօրասցի պահե՛լ զպատուիրանս իմ եւ զիրաւունս իմ իբրեւ յաւուրս յայսմիկ։ 8Եւ արդ՝ դի՛ք առաջի երեսաց ամենայն եկեղեցւոյս Տեառն, եւ յականջս Աստուծոյ մերոյ. պահեցէ՛ք եւ խնդրեցէ՛ք զամենայն պատուիրանս Տեառն Աստուծոյ մերոյ. զի ժառանգիցէք զերկիրս բարի, եւ ժառանգեցուցանիցէք որդւոց ձերոց յետ ձեր մինչեւ յաւիտեան։ 9Եւ դու Սողոմոն որդի իմ, ծանի՛ր զԱստուած հարցն քոց, եւ ծառայեա՛ նմա կատարեալ սրտիւ, եւ մտօք կամաց քոց. վասն զի զամենայն սիրտ քննէ Տէր, եւ զամենայն խորհուրդս ճանաչէ. եթէ խնդրեսցես զնա, գտցի՛ քեզ. եւ եթէ թողցես զնա՝ լքցէ՛ զքեզ ՚ի սպառ։ 10Տե՛ս այժմ, զի Տէր ընտրեա՛ց զքեզ շինել նմա տո՛ւն ՚ի սրբութիւն. զօրացի՛ր եւ արա՛։ 11Եւ ետ Դաւիթ Սողոմոնի որդւոյ իւրում զօրինակ տաճարին՝ եւ սենեկաց նորա, եւ գանձարանաց նորա, եւ վերնատանցն, եւ շտեմարանացն ներքնոց, եւ տանն քաւութեան. 12եւ զօրինակ զոր ունէր ՚ի մտի իւրում, սրահից տանն Տեառն, եւ զամենայն շտեմարանացն շուրջանակի, յամբարս տանն Տեառն, եւ մթերից սրբութեանցն. 13եւ մնացորդացն, յօտարամտից ՚ի պաշտօն քահանայիցն, եւ Ղեւտացւոց յամենայն գործ պաշտամանց տանն Տեառն, եւ շտեմարանացն անօթոց սպասուց տանն Տեառն։ 14Եւ զմէտս կշռոց նոցա՝ զոսկւոյ եւ զարծաթոյ 15զկշիռ աշտանակաց ետ նմա. եւ զբազմականցն նմանութիւնս. 16եւ զկշիռս սեղանոցն առաջադրութեան. եւ զիւրաքանչիւր ուրուք ոսկեղէն սեղանոց. նոյնպէս եւ զարծաթեղինացն. 17եւ զմսահանացն, եւ զնուիրանոցացն, եւ զտաշտիցն ոսկեղինաց. եւ զկշիռս ոսկւոյ եւ արծաթոյ, եւ զտփոցն զիւրաքանչիւր ուրուք։ 18Եւ զսեղանոց խնկոցն ՚ի մաքուր ոսկւոյ զկշռութիւնն եցո՛յց նմա. եւ զօրինակ քերովբէիցն որոց տարածեալ էր զթեւսն իւրեանց, եւ հովանի՛ ունէին ՚ի վերայ տապանակի ուխտին Տեառն։ 19Զամենայն գրով ՚ի ձեռանէ Տեառն ետ Դաւիթ Սողոմոնի, ըստ եղելոյ ՚ի նմա իմաստութեանն եւ ըստ օրինակին։ 20Եւ ասէ Դաւիթ ցՍողոմոն որդի իւր. Զօրացի՛ր եւ քա՛ջ լեր, արա՛ եւ մի՛ երկիցես, եւ մի՛ զարհուրեսցիս. վասն զի Տէր Աստուած իմ է՛ ընդ քեզ. ո՛չ թողցէ զքեզ, եւ ո՛չ լքցէ՝ մինչեւ կատարեսցես զամենայն գործ սպասու տանն Տեառն։ Եւ ահա ա՛յդ է օրինակ տաճարին, եւ սենեկաց նորա, եւ սրահից նորա, եւ վերնատանցն, եւ շտեմարանացն, ներքնատանցն, եւ տանն քաւութեան. եւ օրինակ տաճարին Տեառն ա՛յդ է։ 21Եւ օրամտից քահանայիցն եւ Ղեւտացւոց, յամենայն ՚ի պաշտամունս տանն Աստուծոյ, եւ ընդ քե՛զ եղիցի յամենայն իրս, ամենայն ոք որ յօժարեսցէ իմաստութեամբ ըստ համօրէն արուեստից. իշխանքն, եւ ամենայն ժողովուրդդ յամենայն ՚ի բանս քո։