1Եւ նստա՛ն զերեամ, եւ ո՛չ էր պատերազմ ՚ի մէջ Ասորւոց եւ ՚ի մէջ Իսրայէլի։ 2Եւ եղեւ յամին երրորդի է՛ջ Յովսափատ արքայ Յուդայ առ արքայ Իսրայէլի։ 3Եւ ասէ արքայն Իսրայէլի ցծառայս իւր. Ո՞չ գիտէք եթէ մե՛ր է Ռամաթ Գաղաադ. եւ մեք լռեալ կամք առնուլ զնա ՚ի ձեռաց արքային Ասորւոց։ 4Եւ ասէ արքայ Իսրայէլի ցՅովսափատ. Ելցե՞ս ընդ մեզ յՌամաթ Գաղաադու ՚ի պատերազմ։ Եւ ասէ Յովսափատ ցարքայն Իսրայէլի. Որպէս ե՛ս, նոյնպէս եւ դո՛ւ. եւ որպէս զօ՛րք իմ, զօ՛րք քո. եւ որպէս երիվարք իմ, երիվա՛րք քո։ 5Եւ ասէ Յովսափատ արքայ Յուդայ ցարքայն Իսրայէլի. Ա՛ղէ, հարցցուք այսօր զՏէր։ 6Եւ ժողովեաց արքայն Իսրայէլի զամենայն մարգարէս իւր իբրեւ արս չորեքարեւր. եւ ասէ ցնոսա արքայ. Երթա՞յց յՌամաթ Գաղաադու ՚ի պատերազմ, թէ զտեղի՛ կալայց։ Եւ ասեն. Ե՛լ, եւ տալով տացէ՛ Տէր ՚ի ձեռս արքայի։ 7Եւ ասէ Յովսափատ ցարքայն Իսրայէլի. Իցէ՞ ոք արդեւք աստ մարգարէ Տեառն՝ թէ չիցէ. եւ հարցցուք զՏէր նովաւ։ 8Եւ ասէ արքայ Իսրայէլի ցՅովսափատ. Է՛ աստ ա՛յր մի հարցանել նովաւ զՏէր, եւ ես ատեցի զնա, զի ո՛չ խօսի զինէն բարի, այլ չա՛ր. Միքիա որդի Յեմլեայ։ Եւ ասէ Յովսափատ արքայ Յուդայ. Մի՛ ասասցէ ա՛յդպէս արքայ։ 9Եւ կոչեաց արքայ Իսրայէլի ներքինի մի եւ ասէ. Վաղվաղակի ա՛ծ այսր զՄիքիէ որդի Յեմլեայ։ 10Եւ արքայ Իսրայէլի եւ Յովսափատ արքայ Յուդայ, նստէին այր իւրաքանչիւր յաթոռ իւրում վառեալ ՚ի դրունս Սամարեայ. եւ ամենայն մարգարէքն մարգարէանային առաջի նորա։ 11Եւ արար իւր Սեդեկիա որդի Քանանու եղջեւրս երկաթիս՝ եւ ասէ. Ա՛յսպէս ասէ Տէր. Սոքօ՛ք խեթկեսցես զԱսորիս մինչեւ սպառեսցին։ 12Եւ ամենայն մարգարէքն մարգարէանային նո՛յնպէս, եւ ասէին. Ե՛լ յՌամաթ Գաղաադու, եւ յաջողեսցիս. եւ տացէ՛ Տէր ՚ի ձեռս քո զարքայն Ասորւոց։

13Եւ հրեշտակն որ չոգաւ կոչել զՄիքա, պատմեաց նմա՝ եւ ասէ. Ահաւանիկ ամենայն մարգարէքն խօսին իբրեւ ընդ մի բերան բարի զարքայէ, արդ եղիցի բան քո իբրեւ զմիո՛յ ՚ի նոցանէն, եւ խօսեա՛ց բարի։ 14Եւ ասէ Միքա. Կենդանի՛ է Տէր, եթէ ո՛չ զոր ինչ ասասցէ ցիս Տէր, զա՛յն խօսեցայց։ 15Եւ եկն առ արքայ։ Եւ ասէ ցնա արքայ. Մի՛քիա, ելի՞ց յՌամաթ Գաղաադու ՚ի պատերազմ, եթէ զտեղի կալայց։ Եւ ասէ. Ե՛լ՝ եւ յաջողեսցիս, եւ տացէ Տէր ՚ի ձեռս արքայի։ 16Եւ ասէ ցնա արքայ. Դարձեալ կրկին երդմնեցուցեալ զքեզ, զի խօսեսցիս ընդ իս ճշմարտութեամբ յանուն Տեառն։ 17Եւ ասէ. Ո՛չ այդպէս է. Տեսի զամենայն Իսրայէլ ցրուեալ ընդ լերինս իբրեւ զհօտ՝ որոյ ո՛չ գուցէ հովիւ. եւ ասէ Տէր. Ո՛չ գոն դոցա տեարք, դարձցին իւրաքանչիւր ՚ի տո՛ւն իւր խաղաղութեամբ։ 18Եւ ասէ արքայն Իսրայէլի ցՅովսափատ արքայ Յուդայ. Ո՞չ ասացի քեզ թէ ո՛չ մարգարէանայ նա ինձ բարի, բայց թէ չար։ 19Եւ ասէ Միքեա. Ո՛չ այդպէս. ո՛չ ե՛ս ինչ, այլ լո՛ւր զպատգամ Տեառն. ո՛չ ապաքէն տեսի զՏէր Աստուած Իսրայէլի նստեալ ՚ի վերայ աթոռոյ իւրոյ, եւ ամենայն զօրք երկնից կային շուրջ զնովաւ յաջմէ եւ յահեկէ։ 20Եւ ասէ Տէր. Ո՞ պատրեսցէ զԱքաաբ արքայ Իսրայէլի, եւ ելցէ անկցի յՌամաթ Գաղաադու. եւ ասէ ցՏէր ոմն ա՛յսպէս, եւ ոմն ա՛յնպէս։ 21Եւ ել ոգի, եւ եկաց առաջի Տեառն՝ եւ ասէ. Ե՛ս պատրեցից զնա։ Եւ ասէ Տէր. Ի՞ւ։ 22Եւ ասէ. Ելի՛ց եւ եղէց ոգի սուտ ՚ի բերան ամենայն մարգարէից նորա։ Եւ ասէ. Պատրեսցես եւ կարասցես, ե՛լ եւ արա՛ այդպէս։ 23Եւ արդ ահա ետ Տէր ոգի սո՛ւտ ՚ի բերան ամենայն մարգարէիցդ քոց այդոցիկ. եւ Տէր խօսեցաւ ՚ի վերայ քո չարի՛ս։ 24Եւ մատեաւ Սեդեկիա որդի Քանանու, եւ եհար Միքայի զծնօտս նորա, եւ ասէ. Ո՞ր Հոգի Տեառն է այն, որ անց յինէն եւ խօսեցաւ ՚ի քեզ։ 25Եւ ասէ Միքա. Ահա դո՛ւ իսկ տեսցես յաւուր յայնմիկ յորում մտանիցես սենեակ ՚ի սենեկէ թաքչել։ 26Եւ ասէ արքայ Իսրայէլի. Կալա՛յք զՄիքիա եւ տո՛ւք ցԱմոն քաղաքապետ, եւ ցՅովաս որդի արքայի, 27եւ ասասջիք. Ա՛յսպէս ասէ արքայ. Դի՛ք զդա ՚ի բանտի, եւ կերիցէ հաց նեղութեան եւ ջուր նեղութեան արբցէ, մինչեւ դարձա՛յց խաղաղութեամբ։ 28Եւ ասէ Միքա. Եթէ դու դառնալով դարձցիս խաղաղութեամբ, ապա ո՛չ խօսեցաւ յիս Տէր. եւ ասէ. Լուարո՛ւք, զօրքդ ամենեքեան։ 29Եւ ել արքայ Իսրայէլի՝ եւ Յովսափատ արքայ Յուդայ ընդ նմա յՌամաթ Գաղաադու։ 30Եւ ասէ արքայ Իսրայէլի ցՅովսափատ արքայ Յուդայ. Այլակերպեցա՛յց եւ մտից ՚ի պատերազմ, եւ դու զգեցիր զի՛մ հանդերձս։ Եւ այլակերպեցաւ արքայն Իսրայէլի, եւ եմուտ ՚ի ճակատն։ 31Եւ արքայն Ասորւոց պատուէ՛ր ետ կառապետաց իւրոց եւ ասէ. Մի՛ մարտնչիցիք ընդ մեծի կամ ընդ փոքու, այլ միայն ընդ արքային Իսրայէլի։ 32Եւ եղեւ իբրեւ տեսին կառապետքն զՅովսափատ արքայ Յուդայ. եւ ասեն ցմիմեանս. Թուի թէ սա՛ իցէ արքայն Իսրայէլի։ Եւ պատեցի՛ն զնա պատերազմել. եւ աղաղակեաց Յովսափատ։ 33Եւ եղեւ իբրեւ տեսին կառապետքն եթէ չէ՛ նա արքայն Իսրայէլի՝ դարձա՛ն ՚ի նմանէ։ 34Եւ ձգեաց մի ոմն կորովութեամբ զաղեղն իւր, եւ եհար զարքայն Իսրայէլի ընդ զրահսն եւ ընդ թոքառաջսն։ Եւ ասէ ցկառապետն իւր. Դարձո՛ զձեռն քո եւ հա՛ն զիս ՚ի պատերազմէս զի խոցեա՛լ եմ։ 35Եւ սաստկացա՛ւ պատերազմն յաւուր յայնմիկ. եւ արքայ կայր ՚ի վերայ կառացն ընդդէմ Ասորւոցն յայգուէ մինչեւ ցերեկոյ. եւ հոսէր արիւնն ՚ի վիրէ անտի, եւ լնոյր զծոց կառացն. եւ իբրեւ ընդ երեկս եղեւ՝ ե՛լ ոգին։ 36Եւ եկաց քարոզ զօրուն ՚ի բանակին՝ ընդ մտանել արեւուն՝ եւ ասէ. Իւրաքանչի՛ւր ՚ի քաղաք իւր՝ եւ յերկիր իւր, 37զի մեռա՛ւ արքայ։ Եւ եկն ՚ի Սամարիա, եւ թաղեցին զարքայ ՚ի Սամարիա։ 38Եւ լուացին զկառսն յաւազանս Սամարեայ. եւ լիզէին խոզք եւ շունք զարիւն նորա. եւ բոզք լուացան յարեանն, ըստ բանին Տեառն զոր խօսեցաւ։ 39Եւ մնացորդք բանիցն Աքաաբու, եւ ամենայն ինչ զոր արար. եւ տունն փղոսկրեայ զոր շինեաց, եւ ամենայն քաղաքքն զորս արար. ահաւանիկ գրեալ է ՚ի գիրս բանից աւուրց թագաւորացն Իսրայէլի։ 40Եւ ննջեաց Աքաաբ ընդ հարս իւր, եւ թագաւորեաց Ոքոզիա որդի նորա ընդ նորա։ 41Եւ Յովսափատ որդի Ասայի թագաւորեա՛ց ՚ի վերայ Յուդայ։ Յամին չորրորդի Աքաաբու արքայի Իսրայէլի. 42թագաւորեաց Յովսափատ. որդի երեսուն եւ հինգ ամաց էր ՚ի թագաւորել իւրում. եւ քսան եւ հինգ ամ թագաւորեաց յԵրուսաղէմ եւ անուն մօր նորա Ասուբա դուստր Սաղաղայ։ 43Եւ գնա՛ց յամենայն ճանապարհս Ասայի հօր իւրոյ, եւ ո՛չ խոտորեցաւ ՚ի նմանէ առնել ուղղութիւն առաջի Տեառն. 44բա՛ց ՚ի բարձանցն զի ո՛չ եբարձ՝ քանզի տակաւին զոհէր ժողովուրդն, եւ արկանէր խունկս ՚ի վերայ բարձանց։ 45Եւ խաղաղութեամբ էր Յովսափատ ընդ արքային Իսրայէլի։ 46Եւ մնացորդք բանիցն Յովսափատու, եւ զօրութիւնք զոր արար, եւ ո՛րչափ պատերազմեցաւ. ո՞չ աւանիկ գրեալ են ՚ի գիրս բանից աւուրց թագաւորացն Յուդայ։ 47Եւ զաւելորդս նուիրելոցն որ մնացին յաւուրս հօր նորա՝ քաղեաց յերկրէն։ 48Եւ թագաւոր ո՛չ գոյր յԵդոմ հաստատեալ։ 49Եւ արքայ Յովսափատ արար նաւսս Թարսսացիս, երթալ յՈվփիր զոսկւոյ, եւ ո՛չ գնացին՝ քանզի խորտակեցան նաւքն ՚ի Գասիոնգաբեր։ 50Յայնժամ ասէ Ոքոզիա որդի Աքաաբու ցՅովսափատ. Երթիցե՛ն ծառայք քո ընդ ծառայս իմ, եւ նաւք քո ընդ նա՛ւս իմ. եւ ո՛չ կամեցաւ Յովսափատ։ 51Եւ ննջեա՛ց Յովսափատ ընդ հարս իւր, եւ թաղեցաւ առ հարս իւր ՚ի քաղաք Դաւթի հօր իւրոյ. եւ թագաւորեաց Յովրամ որդի նորա ընդ նորա։

52Եւ Ոքոզիա որդի Աքաաբու թագաւորեաց ՚ի վերայ Իսրայէլի ՚ի Սամարիա. յամին եւթնուտասներորդի Յովսափատայ արքայի Յուդայ. եւ թագաւորեաց Իսրայէլի ամս երկուս։ 53Եւ արար չա՛ր առաջի Տեառն. եւ գնաց զճանապարհս Աքաաբու հօր իւրոյ, եւ զճանապարհս Յեզաբելայ մօր իւրոյ, եւ ՚ի մեղս տանն Յերոբովամայ որդւոյ Նաբատայ որ յանցոյցն զԻսրայէլ.

Գլուխք Չորրորդ Թագաւորութեանց։

54եւ ծառայեա՛ց Բահաղիմացն, եւ երկի՛ր եպագ նոցա. եւ բարկացոյց զՏէր Աստուած Իսրայէլի ըստ ամենայնի եղելոցն յառաջ քան զնա։ Թէ հիւանդացեալ Ոքոզիա Աքաաբեանց առաքեաց հարցանել զՃանճիկ վասն կենաց. եւ եղեւ առ նա պատգամ մահու ՚ի ձեռն Եղիայի։ Զի իջոյց Եղիա հուր եւ եկէզ զյիսուն զօրականսն Ոքոզիա։ Թէ եւ զերկրորդ եւս յիսունսն այրեցեալ, էջ ապա ընդ երրորդին եւ խօսեցաւ ընդ Ոքոզեայ. որ եւ մեռաւ անորդի ըստ բանի նորին։ Զի թագաւորեաց Յովրամ եղբայր Ոքոզեայ ՚ի վերայ Իսրայէլի, յերկրորդ ամին Յովրամայ որդւոյ Յովսափատայ՝ ամս բժ. եւ արար չարիս։ (Եւ զայս զգուշեաւ կալ՝ զի կրկնաբանութեամբ իմն է գրեալն։) Վերանալն Եղիայի հրեղէն կառօք յերկինս, եւ զի դարձաւ Եղիսէէ յԵրիքով։ Բժշկեաց Եղիսէէ զմահագործ ջուրն Երիքովի. եւ անէծ զմանկտին անօրինաց, եւ եկն ՚ի Սամարիա։ Վերստին յիշէ զՅովրամ եղբայր Ոքոզեայ զորդին Աքաաբու, եւ զի հարկատու էր Աքաաբու Մովաբացին։ Գումարեցաւ Յովրամ Յովսափատ եւ Եդոմայեցին ՚ի վերայ Մովաբու, եւ ըստ բանին Եղիսէի առատացեալք ջրովն՝ հարին սաստիկ զՄովաբ, մինչեւ զոհեաց թագաւորն զորդին, եւ ՚ի բաց կացին ՚ի նմանէ։ Բողոք կալաւ կինն այրի առ Եղիսէէ, եւ նա աղօթիւք աճեցոյց զեւղն, որով հատոյց զպարտսն։ Զի յաղօթս Եղիսէի տուաւ որդի՛ կնոջն Սոմնացւոյ։ Թէ մեռաւ մանուկն, եւ աղօթիւք յարոյց զնա Եղիսէէ։ Զի վայրի բանջարով ընկալաւ զհեւրսն։ Զի սակաւ նկանակօք յագեցոյց զհարեւրսն բանիւ Աստուծոյ։ Զի առաքեաց արքայն Ասորւոց զՆէեման բորոտ առ արքայն Իսրայէլի սրբել զնա. եւ նա տարակուսեալ պատառեաց զհանդերձս իւր։ Զի սրբեաց զնա Եղիսէէ լուացմամբ ՚ի Յորդանան, եւ արձակեաց։ Զի դարձոյց զբորոտութիւն առնն ՚ի Գէէզի վասն ագահութեանն։ Զի վերացոյց փայտիւ զերկաթն ՚ի միջոյ Յորդանանու։ Զի շլացոյց զզօրսն Ասորւոց եւ ա՛ծ ՚ի Սամարիա, ետ կերակրել եւ արձակեաց։ Իրք մանկակեր կանանցն ՚ի սովի՛ պաշարման Սամարեայ, եւ զի մարգարէացաւ Եղիսէէ վասն փութով առատութեանն։ Զի խուճապեալ պաշարիչքն փախեան գիշերի, եւ ՚ի թողեալ ռոճկացն եղեւ առատութիւնն։ Պատո՛ւէր ետ Եղիսէէ կնոջն Սոմնացւոյ երթալ յերեսաց սովոյն պանդխտանալ յայլազգիս։ Զի յետ եւթն ամի դարձաւ կինն, եւ դարձոյց ՚ի նա Յովրամ զամենայն գոյսն վասն Եղիսէի։ Եկն Եղիսէէ ՚ի Դամասկոս, եւ մարգարէացաւ թագաւորել Ազայելի ըստ բանին Տեառն առ Եղիա։ Թագաւորեաց Ասորւոց Ազայէլ, եւ ՚ի Ե ամին Յովրամայ Աքաաբեանց՝ թագաւորէ Յովրամ որդի Յովսափատայ յԵրուսաղէմ, եւ արար չարիս. եւ ապստամբեաց ՚ի նմանէ Եդոմայեցին։ Մեռաւ Յովրամ յԵրուսաղէմ. եւ յերկոտասան ամին Յովրամայ Աքաաբու թագաւորեաց Ոքոզիա որդի Յովրամայ տարի մի յԵրուսաղէմ, եւ զՅովրամ Աքաաբու խոցեցին զօրքն Ազայելի ՚ի պատերազմի։ Առաքեաց Եղիսէէ մարգարէ մի յՌամաթ Գաղադու, եւ օ՛ծ զՅէու թագաւոր Իսրայէլի ըստ բանին Տեառն առ Եղիա։ Գումարեցաւ Յէու ՚ի վերայ Յովրամայ Յեզրայէլ. եւ սպան զնա ՚ի վիճակին Նաբաւթայ, ընդ նմին եւ զՈքոզիա թագաւոր Յուդայ։ Կրկնաբանութիւն վասն սպանելոց թագաւորացս։ Զի նշաւակեալ մահուամբ խնդրեցաւ ՚ի Յեզաբելայ մօրէն Յովրամայ վրէժն Նաբաւթայ։ Սպանան եւթանասուն որդիքն Աքաաբու, եւ քառասուն եւ երկու եղբարքն Ոքոզիայ։ Զի առաջի որդւոցն Ռաքաբու եհար Յէու եւ սպառեաց զտունն Աքաաբու։ Զի պատրանօք սպան Յէու զքուրմսն Բահաղու, եւ ետ յաղբոցս զԲահաղ. այլ յերնջոցն ո՛չ եկաց ՚ի բաց. բայց վասն վրիժուցն զոր խնդրեաց մինչեւ ՚ի չորս ազգս տուաւ նմա թագաւորել. եւ զի Ազայէլ նեղէր զԻսրայէլ։ Քսան եւ ութ ամ թագաւորեաց Յէու, եւ մեռաւ։ Գոդողիա դուստր Յեզաբելի թագաւորեաց յԵրուսաղէմ ամս եւթն. եւ զի օ՛ծ Յովիդա քահանայ մեծ զՅովաս թագաւոր Յուդայ։ Զի սպանաւ Գոդողիա, եւ պատուէր ետ Յովաս վասն կազմութեան սպասուց տաճարին. եւ զդիմումն Ազայելի յԵրուսաղէմ յետս դարձոյց պատարագօք։ Զի սպանին զՅովաս յԵրուսաղէմ, թագաւորեալ ամս քառասուն։ ՚Ի քսան եւ երկու ամին Յովասու թագաւորեաց Յովաքազ որդի Յէուայ. եւ սաստիկ նեղեալ յԱզայելէ՝ յոյժ աղքատացաւ եւ մեռաւ։ Յերեսուն եւ յեւթն ամին Յովասու թագաւորի Յուդայ թագաւորէ Յովաս որդի Յովաքազու Իսրայէլի ամս երկոտասան, եւ յաղթեալ Ամասիայ արքայի Յուդայ՝ եհատ զպարիսպն Երուսաղեմի։ Մեռաւ Եղիշէ. եւ յոսկերս նորա հասեալ մեռելոյն՝ յարեաւ։ Զի խնայեաց Տէր յԻսրայէլ յերեսաց Ազայելի՝ վասն ուխտին Աբրաամու։ Զի յետ մահուն Ազայելի ա՛ռ Յովաս զքաղաքսն, զոր առին ՚ի Յովաքազայ հօրէ նորա։ Յերկրորդ ամին Յովասու արքայի Իսրայէլի թագաւորեաց Ամասիա որդի Յովասու ամս իթ յԵրուսաղէմ. սպան զսպանօղս հօր իւրոյ, եւ եհար զԵդոմ ՚ի ձորն Աղտից տասն հազար։ Գրգռեաց Ամասիա զՅովաս ՚ի պատերազմ, եւ պարտեցաւ ՚ի նմանէ. եւ յետ հնգետասան ամի սպանաւ Ամասիա յիւրոցն։ Թագաւորեաց Ոզիա յԵրուսաղէմ։ ՚Ի հնգետասան ամին Ամասիայ թագաւորեաց Յերոբովամ որդի Յովասու, եւ գնաց ՚ի չարիս, եւ նուաստացաւ Իսրայէլ. այլ ըստ բանին Յովնանու տակաւին խնայեաց Տէր յԻսրայէլ։ Մեռաւ Յերոբովամ, եւ թագաւորեաց Զաքարիա որդի նորա ամս վեց։ ՚Ի քսան եւ եւթն ամի Յերոբովամայ արքայի Իսրայէլի թագաւորեաց Ոզիա ամս յիսուն երկու. եւ արար բարիս. եւ էր բորոտեալ. եւ մեռաւ։ Յերեսուն եւ եւթն ամին Ոզիայ, թագաւորեաց Իսրայէլի Զաքարիա, որդի Յերոբովամայ, ամիսս վեց, եւ սպանաւ յիւրոցն, եւ հատաւ տունն Յէուայ։ Յերեսուն եւ ինն ամին Ոզիայ թագաւորեաց Սելլում յԻսրայէլ ամիս մի, եւ սպանաւ յիւրոցն։ Յերեսուն եւ ինն ամին Ոզիայ թագաւորեաց Մանայեմ ամս տասն, եւ եմուտ ընդ հարկաւ Փուայ արքային Ասորեստանեայց։ ՚Ի յիսներորդ (քառասներորդ) ամին Ոզիայ թագաւորեաց Իսրայէլի Փակէէ որդի Մանայեմայ ամս տասն. եւ սպան զնա Փակէէ որդի Ռոմելայ։ ՚Ի ծբ ամին Ոզիայ թագաւորեաց Իսրայէլի Փակէէ որդի Ռոմելայ ամս քսան։ Առ նովաւ գերեաց Թագղաթփաղսար զմասն ինչ Իսրայէլի. եւ սպան զՓակէէ Ովսէ որդի Ելայ։ Յերկրորդ ամին Փակէի թագաւորեաց Յովաթամ որդի Ոզիայ յԵրուսաղէմ ամս վեշտասան, եւ մեռաւ։ Յեւթնուտասն ամին Փակէի որդւոյ Ռոմելայ թագաւորեաց յԵրուսաղէմ Աքազ ամս տասն եւ վեց, եւ արար չարիս. եւ ետ ձեռս ՚ի Թագղաթփաղսար փրկել զնա ՚ի Փակէէ եւ յՌասոնէ։ Մեռաւ Աքազ եւ թագաւորեաց Եզեկիա։ Յերկոտասան ամին Աքազու թագաւորեաց Իսրայէլի Ովսէէ որդի Ելայ ամս ինն։ Առ նովաւ Սաղմանասար ՚ի սպառ գերեաց զԻսրայէլ վասն չարեացն զոր ամբաստանէ յերկար։ Ամբաստանէ կրկին եւս զԻսրայէլէ, եւ պատմէ վասն օտար ազգացն զորս Սաղմանասար բնակեցոյց ՚ի Սամարիա. որք առին զօրէնս Աստուծոյ. եւ ո՛չ թողին զպաշտօնս իւրեանց։ Պատմութիւն աստուածպաշտութեանն Եզեկիայ, եւ դարձեալ ամբաստանութիւն զԻսրայէլէ. վասն որոյ գերեցաւն իսկ։ Ել Սենեքերիմ ՚ի Հրէաստան, եւ առաքեաց պատգամս գոռոզս առ Եզեկիա։ Զի խնդրեաց արքայ յԵսայեայ աղօթել առ Տէր. եւ յաւել Սենեքերիմ առաքել զՏեառնէ հրովարտակս նախատանաց։ Զի յաղօթս Եսայեայ եւ Եզեկիայ՝ եհար Տէր զզօրսն Սենեքերիմայ, եւ ինքն փախուցեալ սպանաւ ՚ի յորդւոցն։ Զի վասն բարձրութեան սրտի իւրոյ հիւանդացաւ Եզեկիա ՚ի մահ։ Ելաց Եզեկիա առաջի Տեառն. եւ լուաւ նմա եւ ետ նմա նշանակ կենաց զդառնալն յետս արեւուն։ Զի ելին առ նա Բաբելացիքն պատարագօք, եւ եթէ զի՞նչ խօսեցաւ Եսայի առ Եզեկիա։ Ամբաստանութիւն չարեացն Մանասէի, իսկ գերիլ նորա ՚ի Բաբելոն, եւ անդրէն դառնալն եւ ապաշխարել, պատմի ՚ի գիրս անդ Մնացորդացն։ Ամբաստանութիւն չարեացն Ամովնայ, եւ մահ նորին։ Գովութիւն աստուածպաշտութեանն Յովսիայ։ Զի սրբեաց Յովսիա զտաճարն եւ զաշխարհն բնաւին ՚ի կռոց, եւ այրեաց զոսկերս քրմացն, եւ արար զզատիկն։ Զի սպանաւ Յովսիա առ Եփրատ գետով ՚ի փարաւոնէ։ Թագաւորեաց Յովաքազ որդի Յովսիայ ամս երիս, եւ հա՛ն զնա Նեքաւով, եւ տարաւ յԵգիպտոս, որ անդէն մեռաւ։ Եղիակիմ որ եւ Յովակիմ եղբայր Յովաքազու, ամս տասն. ՚ի սորա երրորդ ամին ել զառաջինն Նաբուքոդոնոսոր, եւ հնազանդեաց զՀրէաստան. եւ տարաւ զԴանիէլ։ Եւ ՚ի մետասան ամին սորա ել դարձեալ Նաբուքոդոնոսոր, զԵղիակիմ սպան. եւ զՅեքոնիա թագաւորեցոյց։ Թագաւորեաց Յեքոնիա որ եւ Յովակիմ ամիսս երիս, եւ արար չարիս։ Ել երրորդ անգամ Նաբուքոդոնոսոր, եւ գերի վարեաց զՅեքոնիա որ եւ Յովակիմ. եւ զԵզեկիէլ ընդ նմա. եւ թագաւորեցոյց զՍեդեկիա որդի Յովսիայ։ Ել չորրորդ անգամ՝ ա՛ռ զԵրուսաղէմ, կուրացոյց զՍեդեկիա, եւ վարեաց ՚ի Բաբելոն։ Զի այրեաց Նաբուզարդան զտաճարն եւ զԵրուսաղէմ, եւ զկահն ամենայն բարձին ՚ի Բաբելոն։ Զի կացոյց Նաբուքոդոնոսոր զԳոդողիա ՚ի վերայ մնացորդաց երկրին։ Ժողովեցան մնացեալքն առ Գոդողիա. եւ եկն Իսմայէլ Նաթանանց եւ սպան զԳոդողիա, եւ որ մնացին չոգան մտին յԵգիպտոս։ Զի յերեսներորդ եւթներորդ ամի գերութեանն Յովակիմայ որ եւ Յեքոնիա, որդի Եղիկիմայ, զուարթացոյց զնա Իլմարուդաք։ Սա ծնաւ զՍաղաթիէլ. եւ նա զԶորաբաբէլ։