1Եւ այլազգիքն պատերազմէի՛ն ընդ Իսրայէլի. եւ փախեա՛ն արք Իսրայէլի յերեսաց այլազգեացն. եւ անկանէին վիրաւորք ՚ի լերինն Գեղբուա։ 2Եւ հասին այլազգիքն ՚ի Սաւուղ եւ յորդիսն նորա, եւ հարին այլազգիքն զՅովնաթան եւ զԱմինադաբ եւ զՄելքիսաւէ՛ զորդիս Սաւուղայ. 3եւ ծանրացա՛ւ պատերազմն ՚ի վերայ Սաւուղայ. եւ գտին զնա ա՛րք կորովիք աղեղնաւորք՝ եւ վիրաւորեցաւ ընդ կարաւանդսն ՚ի ներքս։ 4Եւ ասէ Սաւուղ ցկապարճակիրն իւր. Մերկեա՛ զսուր քո եւ խոցեա՛ զիս նովաւ. գուցէ՛ գայցեն անթլփատքն եւ խոցոտիցեն զիս, եւ խաղայցեն զինեւ։ Եւ ո՛չ կամեցաւ կապարճակիրն՝ քանզի երկեա՛ւ յոյժ. եւ ա՛ռ Սաւուղ զսուսերն իւր եւ անկա՛ւ ՚ի վերայ նորա։ 5Իբրեւ ետես կապարճակիրն եթէ մեռաւ Սաւուղ՝ անկա՛ւ եւ նա ՚ի վերայ սուսերին իւրոյ եւ մեռա՛ւ ընդ նմա։ 6Եւ մեռա՛ւ Սաւուղ՝ եւ երեքեան որդիք նորա, եւ կապարճակիրն իւր. եւ ամենայն արք նորա յաւուր յայնմիկ ՚ի միասին։ 7Եւ իբրեւ տեսին արք Իսրայէլի որ յա՛յնկոյս հովտացն, եւ որ յա՛յնկոյս Յորդանանու. եթէ փախեան արք Իսրայէլի, եւ թէ մեռաւ Սաւուղ՝ եւ որդիք նորա, թողին զքաղաքս իւրեանց եւ փախեան. եւ ելին այլազգիքն եւ բնակեցան ՚ի նոսա։ 8Եւ եղեւ ՚ի վաղիւ անդր եկին այլազգիքն մերկացուցանե՛լ զդիակունսն. եւ գտին զՍաւուղ եւ զերի՛ս որդիս նորա անկեալս ՚ի լերին Գեղբուայ. 9դարձուցին զնա, եւ մերկացուցին զհանդերձ նորա, եւ հատին զգլուխ նորա. եւ առաքեցին յերկիրն այլազգեաց շուրջանակի աւետաւորս ՚ի կուռս իւրեանց՝ եւ ՚ի ժողովուրդն։ 10Եւ եդին զկարասին նորա յԱստարտիոնն, եւ զմարմինս նոցա կախեցին զպարսպէն Բեթսանայ։ 11Եւ լուան զնոցանէն բնակիչք Յաբիսայ Գաղաադացւոց զոր ինչ արարին այլազգիքն ընդ Սաւուղ. 12եւ յարեան ամենայն այր զօրութեան, եւ գնացին զգիշերն ամենայն. եւ առին զմարմինն Սաւուղայ եւ զմարմինն Յովնաթանու որդւոյ նորա ՚ի պարսպէն Բեթսանայ, եւ բերին զնոսա Յաբիս. եւ այրեցին զնոսա անդ։

Գլուխք Երկրորդ Թագաւորութեանց։

13Եւ առին զոսկերս նոցա եւ թաղեցին զնոսա ընդ անդիւն Յաբիսայ. եւ պահեցին զեւթն օր։ Զի սպան Դաւիթ զայրն որ ասաց՝ թէ ե՛ս սպանի զՍաւուղ։ Ողբք Դաւթի ՚ի վերայ Սաւուղայ եւ Յովնաթանու։ Զի օծին զԴաւիթ ՚ի Քեբրոն ՚ի վերայ Յուդայ։ Զի թագաւորեաց Յեբուսթէ որդի Սաւուղայ ՚ի վերայ մետասան ցեղիցն։ Կռիւն ՚ի Գաբաւոն, ուր եւ սպանաւն Ասայէլ։ Զի զօրանայր տունն Դաւթի։ Տրտունջն Յեբուսթեայ, եւ սպառնալիքն Աբեններեայ։ Զի առաքեաց Աբեններ առ Դաւիթ՝ բանս ուխտի։ Զի խօսեցաւ Աբեններ յականջս ամենայն Իսրայէլի վասն Դաւթի թագաւորել նմա։ Մահն Աբեններեայ, եւ սուգն Դաւթի ՚ի վերայ նորա։ Զի սպան Դաւիթ զսպանօղսն Յեբուստեայ։ Զի օծին զԴաւիթ ՚ի վերայ ամենայն Իսրայէլի։ Ա՛ռ Դաւիթ զՍիոն, եւ արար ողորմութիւն կաղաց եւ կուրաց. եւ վասն որդւոց նորա։ Զի խրամատեաց Տէր զայլազգիսն առաջի Դաւթի։ Զի դարձեալ եհար զայլազգիսն ՚ի նշա՛ն անտառին։ Թէ մեռաւ Ոզա առ տապանակաւն, վասն որոյ խոտորեցոյց Դաւիթ զտապանակն ՚ի տուն Աբեդդարայ։ Զի եհան Դաւիթ զտապանակն յԵրուսաղէմ ՚ի խորանն զոր ինքն կազմեաց. եւ թէ անգոսնեաց Մեղքող զԴաւիթ։ Ասաց Դաւիթ ցՆաթան շինել տուն Աստուծոյ. եւ նա յորդորեաց զնա առանց Տեառն ՚ի նոյն։ Պատգամ Տեռան առ Դաւիթ՝ թէ որդի քո շինեսցէ ինձ տուն, եւ ես եղէց նմա ՚ի հայր, եւ նա եղիցի ինձ յորդի։ Գոհութիւն Դաւթի վասն այսր. եւ խնդրուածք վասն լնլոյ խոստմանն։ Կրկին հայցուած վասն այսոցիկ։ Զի տիրեաց Դաւիթ գետոյն Եփրատայ. եւ յաւարէ հեթանոսացն պատրաստեաց պղինձ յոյժ ՚ի նիւթ կահից տաճարին։ Սպան Դաւիթ զԱդրիազար. վասն որոյ առաքեաց նմա արքայն Անտիոքու՝ անօթս ոսկեղէնս։ Զի արար Դաւիթ ողորմութիւն Մեմփիբոսթեայ որդւոյ Յովնաթանու։ Առաքեաց Դաւիթ մխիթարել զՀանան արքայ Ամոնայ. որոյ նախատեալ զհրեշտակսն Դաւթի վարձեաց զԱսորիս կռուել ընդ Դաւիթ։ Զի առաքինացան ընդդէմ նոցա Յովաբ եւ Աբեսա. եւ նոքա դարձեալ գումարեցան։ Ա՛նդ առաքինացեալ Դաւթի, եւ թագաւորքն անձնատուրք ծառայք լինէին նմա։ Եմուտ Դաւիթ առ կինն Ուրիայ, ուստի յղացաւ կինն։ Եւ զի ՚ի պատերազմի անդ սպանաւ Ուրիա կամելո՛վ Դաւթի։ Թէ զի՞նչ դիմօք խօսեցաւ Նաթան ընդ Դաւթի վասն կնոջն Ուրիայ։ Զի ՚ի վճռելն Դաւթի զիրացն, սաստկացաւ առ նա բանն Տեառն. եւ զի յա՛նձն առ Դաւիթ զմեղանսն եւ ապրեցաւ։ Վասն մահու մանկանն, եւ վասն ծննդեանն Սողոմոնի։ Չոգաւ Դաւիթ եւ ա՛ռ զՌաբաթ Ամոնացւոց, եւ bյերկա՛թbd արկ զգերեալսն անտի։ Չար խրատ ետ Յովնադաբ Ամոնի վասն Թամարայ։ Զի բռնադատեաց Ամոն զԹամար, եւ եղեւ ընդ նմա։ Զի ել իրքն ՚ի վեր, եւ լուեալ Դաւթի բարկացաւ։ Զի ընդ նախատանաց քեռն՝ սպան Աբեսողոմ զեղբայր իւր զԱմոն։ Եւ զի փախեաւ Աբեսողոմ յերեսաց Դաւթի։ Զի ՚ի ձեռն բանեղ կնոջն զարթոյց Յովաբ զկամս Դաւթի զոր ունէր վասն Աբեսողոմայ։ Զի գիտաց Դաւիթ թէ ինքն Յովաբ եդ բանս ՚ի բերան կնոջն խօսել ընդ Դաւթի զԱբեսողոմայ։ Զի հրամանաւ Դաւթի ա՛ծ Յովաբ զԱբեսողոմ յԵրուսաղէմ, եւ վասն գեղոյ եւ հերաց նորա։ Զի այրեաց Աբեսողոմ զվիճակ գարւոյն Յովաբայ, եւ գնացեալ Յովաբայ եմոյծ զնա առ արքայ։ Զի նենգութեամբ պատրէր Աբեսողոմ, եւ քարշէր յինքն զԻսրայէլ։ Թէ խրատուն Աքիտոփելայ թագաւորեաց Աբեսողոմ։ Զի փախեաւ Դաւիթ յԱբեսողոմայ. եւ զի դարձոյց յետս զտապանակն. եւ պատուիրեաց Սադովկայ գուշակել ինքեան զզիարդն։ Զի դարձոյց յետս զՔուսի, ցրել նմա զխորհուրդն Աքիտոփելայ։ Եւ զի եկն Սիբա պատանի Մեմփիբոսթեայ պատարագօք ընդ առաջ Դաւթի։ Զի անիծանէր Սեմէի զԴաւիթ. եւ նա չխստանայր։ Եկն Աբեսաղոմ յԵրուսաղէմ, եւ եկն առ նա Քուսի բարեկամ Դաւթի։ խթ. Եւ զի խօսեցաւ Քուսի ըստ մտացն Աբեսաղոմայ։ Չար խրատն Աքիտոփելայ ննջել Աբեսաղոմայ ընդ հարճս հօրն. եւ դժնեայ խորհուրդն նորա փութով հասանել սպանանել զԴաւիթ։ Զի ցրեաց Քուսի զնենգաւոր խորհուրդն Աքիտոփելայ։ Զի առաքեաց գուշակեաց Քուսի ամրանալ Դաւթի. զոր գիտացեալ Աքիտոփէլ խեղդամահ եղեւ։ ԶԱմեսայի կացոյց Աբեսողոմ ՚ի տեղի Յովաբու. եւ թէ ո՛յք էին որ կերակրեցին զԴաւիթ ՚ի փախչել անդ։ Զի պարտեցաւ զօրն Աբեսողոմայ ՚ի պատերազմի անդ առաջի զօրացն Դաւթի։ Նշաւակեալ մահն հայրազեղծն Աբեսաղոմայ։ Զի դադարեցոյց Յովաբ զպատերազմնն, եւ վասն արձանին Աբեսաղոմայ։ Զի եկն Քուսի առ Դաւիթ, եւ bասաց. Սպանաւbd Աբեսաղոմ։ Զի ողբաց Դաւիթ զԱբեսաղոմ, եւ խորշեցան ՚ի նմանէ զօրքն. եւ մեծաբանեաց Յովաբ ՚ի վերայ Դաւթի, եւ նա յանձին կալաւ։ Զի եկն ցեղն Յուդայ եւ այլքն դարձուցանել զԴաւիթ ՚ի տուն իւր. եւ կազմեցին զՅորդանան անցանել արքայի։ Զի անյիշաչար եղեւ Դաւիթ առ Սեմէի, թէպէտ գազանանայր Աբեսսա։ Թէ զի՞նչ փաղաքշեաց Մեմփիբոսթէ առաջի Դաւթի։ Թէ զի՞նչ խօսեցաւ Դաւիթ ընդ Բերզելեայ՝ որ կերակրեացն զնա։ Եկին տասն ցեղքն Իսրայէլի եւ կռուէին ընդ արս Յուդայ իբրեւ արհամարհեալք։ Ապստամբեաց Սաբէէ ՚ի Դաւթէ հանդերձ Իսրայէլիւ։ Վասն տասն հարճիցն. եւ զի առաքեաց Դաւիթ զԱմեսայի ժողովել զԻսրայէլ. եւ նա յամեաց։ Չոգան Յովաբեանք զհետ Սաբէի Բոքորեանց, եւ մահն Ամեսայայ ՚ի Յովաբայ։ Խօսեցաւ կինն իմաստուն՝ եւ թափեաց զքաղաքն ՚ի Յովաբայ հատմամբ գլխոյն Սաբէի։ Յարագեցին սպանին Գաբաւոնացիք զորդիս Սաւուղայ. եւ լուաւ Տէր երկրին. եւ վասն պատերազմացն եւ սատակմանն Ռափայնոցն։ կթ. Օրհնութիւն զոր օրհնեաց Դաւիթ զԱստուած որ փրկեաց զնա ամենայն ուրեք։ bԳովութիւնbd իրաւանցն Աստուծոյ մարգարէութեամբ հանդերձ։ Վերջին բանք ՚ի Դաւթայ ասացեալք։ Առաքինութիւնք քաջացն Դաւթի։ Զի նուիրեաց Դաւիթ Աստուծոյ զջուր ջրհորոյն Բեթղահէմի։ Անուանք զօրաւորացն Դաւթի նախաթուելովքն՝ երեսո՛ւն եւ եւթն։ Թէ գրգռեաց Տէր զԴաւիթ թուել զԻսրայէլ։ Պատգամն Աստուծոյ առ Դաւիթ վասն երից պատժոցն, յորոց ընտրեաց զմահն Դաւիթ. եւ զի կանգնեաց սեղան Տեառն, եւ դադարեաց մահն յԻսրայէլէ։