1Պա՛ւղոս առաքեա՛լ Յիսուսի Քրիստոսի կամօքն Աստուծոյ, եւ Տիմոթէոս եղբայր. եկեղեցւոյդ Աստուծոյ որ է ՚ի Կորնթոս՝ սրբովքդ ամենեքումբք՝ որ են յամենայն կողմանս Աքայեցւոց։ 2Շնո՛րհք ընդ ձեզ եւ խաղաղութի՛ւն յԱստուծոյ Հօրէ մերմէ, եւ ՚ի Տեառնէ Յիսուսէ Քրիստոսէ։

3Օրհնեա՛լ է Աստուած եւ Հայր Տեառն մերոյ Յիսուսի Քրիստոսի. Հայր գթութեանց, եւ Աստուած ամենայն մխիթարութեան. 4որ մխիթարէ՛ն զմեզ յամենայն նեղութիւնս մեր. առ ՚ի կարօղ լինելո՛յ մեզ մխիթարել զայնոսիկ, որ յամենայն նեղութիւնսն իցեն, մխիթարութեամբն որով մե՛ք մխիթարիմք յԱստուծոյ։ 5Զի որպէս առաւելա՛ն չարչարանքն Քրիստոսի ՚ի մեզ, նո՛յնպէս եւ ՚ի ձեռն Քրիստոսի առաւե՛լ լիցի եւ մխիթարութիւնն մեր։ 6Զի եթէ նեղիմք, վասն ձերո՛յ մխիթարութեան եւ փրկութեան, եւ եթէ մխիթարիմք, վասն ձերո՛յ մխիթարութեան. որ յաջողեալն է համբերութեամբ նոցին չարչարանաց, զոր եւ մե՛քն չարչարիմք. 7եւ յոյսն մեր հաստատո՛ւն է վասն ձեր. քանզի գիտեմք՝ եթէ որպէս կցորդ ե՛մք չարչարանացն, նոյնպէս եւ մխիթարութեանն։ 8Քանզի ո՛չ կամիմ տգէտ լինել ձեզ ե՛ղբարք՝ վասն նեղութեան մերոյ եղելոյ յԱսիա. զի առաւել քան զկար մեր ծանրացաք, մինչեւ անյո՛յս լինելոյ մեզ եւ ՚ի կենաց։ 9Այլ անձամբ յանձինս զվճի՛ռ մահու ընկալաք. զի մի՛ յանձինս ապաստան իցեմք, այլ յԱստուած որ յարուցանէ զմեռեալս. 10որ յայնպիսի մահուանէ փրկեաց զմեզ՝ եւ փրկեսցէ՛. 11քանզի յուսացեալ եմք, եթէ տակաւին փրկեսցէ՛ օգնականութեամբ աղօթից ձերոց վասն մեր։ Զի ՚ի բազմադէմ շնորհացն՝ որ ՚ի մեզ, բազմօ՛ք յաճախեսցեն գոհութիւնքն վասն մեր։ 12Քանզի պարծանք մեր ա՛յս են. վկայութիւն մտաց մերոց. զի սրբութեամբ եւ ստուգութեամբ Աստուծոյ, եւ ո՛չ մարմնեղէն իմաստութեամբ, այլ շնորհօքն Աստուծոյ շրջեցաք յաշխարհի. բայց առաւել եւս առ ձե՛զ։ 13Քանզի ո՛չ եթէ ա՛յլ ազգ ինչ գրեմք առ ձեզ, այլ զոր ընթեռնուցո՛ւքն՝ եւ գիտա՛կ լինիցիք. քանզի յուսամ, թէ մինչեւ ՚ի վախճա՛ն գիտիցէք. 14որպէս եւ խելամո՛ւտ եղէք մեզ փոքր ՚ի շատէ. զի պարծա՛նք ձեր եմք՝ որպէս եւ դուք մեր, յաւուրն Տեառն մերոյ Յիսուսի Քրիստոսի։ 15Եւ յայս ապաստան, կամէի նախ առ ձե՛զ գալ. զի դուք կրկին շնորհս ընդունիջիք. 16եւ ՚ի ձէնջ երթա՛լ ՚ի Մակեդովնիա. եւ դարձեալ ՚ի Մակեդովնիայ գալ առ ձեզ, եւ ՚ի ձէնջ յուղարկել ՚ի Հրէաստան։ 17Իսկ եթէ զայս խորհեցայ՝ մի թէ՝ թեթեւութեա՞մբ ինչ գնացի. եւ կամ զոր խորհիմս, ըստ մարմնո՞յ ինչ խորհիցիմ, այլ զի եղիցի՛ յինէն կողմանէ, այոն՝ այո՛, եւ ոչն՝ ո՛չ։ 18Հաւատարի՛մ է Աստուած. զի բանն մեր որ առ ձեզ եհաս՝ ո՛չ է այո, եւ ոչ։ 19Քանզի Որդին Աստուծոյ Յիսուս Քրիստոս, որ ՚ի ձեզ մեւք քարոզեցաւ, ինեւ եւ Սիղուանոսի՛ւ եւ Տիմոթէիւ, ո՛չ եղեւ այո եւ ոչ. այլ այո՛ն ՚ի նմին եղեւ։ 20Զի որչափ աւետի՛քն Աստուծոյ են ՚ի նմա Այոն. վասն որոյ եւ նովին Ամէնն մեւք ՚ի փառս Աստուծոյ։

21Այլ որ հաստատեացն զմեզ ձեւք հանդերձ ՚ի Քրիստոս, եւ օ՛ծ զմեզ, Աստուած է. 22որ եւ կնքեացն զմեզ, եւ ետ զառհաւատչեայ Հոգւոյն ՚ի սիրտս մեր։ 23Այլ ես վկայ զԱստուած կոչեմ անձին իմոյ. զի վասն խնայելո՛յ ՚ի ձեզ՝ ո՛չ եւս եկի ՚ի Կորնթոս. զի ո՛չ եթէ տիրեմք հաւատովքս, այլ գործակի՛ց եմք շնորհացդ ձերոց. քանզի հաւատո՛վք հաստատեալ կայք։