1Այլ ես իսկ Պաւղոս աղաչե՛մ զձեզ հեզութեամբ եւ հանդարտութեամբն Քրիստոսի, որ յանդիման ձեզ իբրեւ տառապեա՛լ մի եմ ՚ի միջի ձերում. բայց ՚ի հեռո՛ւստ համարձակիմ առ ձեզ։ 2Աղաչեմ, զի մի՛ ՚ի մօտո՛յ եւ եթ համարձակիցի՛մ վստահութեամբ. կամ համարիցիմ յանդգնե՛լ ՚ի վերայ ոմանց, որ կարծեն զմէնջ եթէ ըստ մարմնո՛յ գնայցեմք։ 3Զի թէպէտ եւ մարմնով գնամք, այլ ո՛չ եթէ ըստ մարմնո՛յ զինուորիմք։ 4Զի զէն զինուորութեան մերոյ ո՛չ է մարմնաւոր, այլ զօրաւո՛ր յԱստուծոյ, առ ՚ի քակելո՛յ զամուրս. զխորհուրդս քակե՛մք, 5եւ զամենայն բարձրութիւն հպարտացեալ ՚ի վերայ գիտութեանն Աստուծոյ. եւ գերեմք զամենայն միտս ՚ի հնազանդութիւն Քրիստոսի. 6եւ ՚ի պատրաստի՛ ունիմք խնդրել զվրէժ յամենայն անհնազանդութեան, յորժամ ձե՛ր եւս հնազանդութի՛ւնդ կատարեսցի։ 7Ըստ իւրաքանչիւր երեսաց դիտեսջի՛ք. եթէ ոք վստա՛հ յա՛նձն իցէ Քրիստոսի՛ լինել, զա՛յս խորհեսցի՛ դարձեալ ՚ի միտս իւր. թէ որպէս նայն Քրիստոսի է, նո՛յնպէս եւ մեք։ 8Զի թէ առաւե՛լ եւս պարծեցայց վասն իշխանութեանս մերոյ՝ զոր ե՛տ մեզ Տէր, ՚ի շինել՝ եւ ո՛չ ՚ի քակե՛լ զձեզ, ո՛չինչ ամաչեցից. 9զի մի՛ թուեցայց իբրեւ ա՛հ ինչ արկանել ձեզ թղթովքս։ 10Ասիցէ՞ք. Թո՛ւղթքս ծանո՛ւնք են եւ սաստիկք. բայց տեսիլ մարմնոյ տկար, եւ բա՛նն արհամարհեալ. 11զա՛յս խորհեսցի այնպիսին, զի որպիսի՛ք եմք բանի՛ւք թղթո՛ցդ ՚ի հեռուստ, նո՛յնպիսիք եւ ՚ի մօտոյ արդեա՛մբք։ 12Քանզի ո՛չ իշխեմք կշռե՛լ եւ հաւասարե՛լ զանձինս մեր ոմանց, որ զանձինս իւրեանց ձե՛զ ընծայեցուցանեն. այլ անձա՛մբ յանձինս՝ զանձինս չափեն եւ ՚ի կշռել անձա՛մբ յանձինս, ո՛չ առնուն ՚ի միտ։ 13Այլ մեք ո՛չ եթէ յանչա՛փս ինչ պարծեսցուք. այլ ըստ չափո՛յ կանոնին, զոր բաժանեա՛ց մեզ Աստուած չափով՝ հասանել մինչեւ առ ձեզ։ 14Իբր ո՛չ եթէ հասու ինչ չիցե՛մք ՚ի ձեզ, եւ ձկտեցուցանիցե՛մք զանձինս. քանզի մինչեւ առ ձեզ հասաք աւետարանա՛ւն Քրիստոսի. 15եւ ո՛չ յանչափս ինչ պարծիմք օտա՛ր վաստակօք։ Բայց յո՛յս մի ունիմք զաճմանն հաւատո՛ց ձերոց, այդրէ՛ն ՚ի ձե՛զ մեծանալոյ, ըստ կանոնիս մերոյ՝ յառաւելութիւն. 16՚ի վե՛ր եւս քան զձեզ աւետարանել. ո՛չ օտար կանոնաւ ՚ի պատրաստակա՛նս ինչ պարծել։ 17Զի որ պարծիցին ՚ի Տէր պարծեսցի։ * 18Զի ո՛չ եթէ որ զանձն իւր ընծայեցուցանէ, նա՛ է ընտրեալ. այլ զոր Տէրն ընծայեցուցանէ։