1Ցուցանեմ ձեզ ե՛ղբարք զշնորհսն Աստուծոյ, որ տուեալ են եկեղեցեացն Մակեդովնացւոց. 2զի մեծա՛ւ հանդիսիւ նեղութեան՝ առաւելութիւն խնդութեանն նոցա, եւ ծա՛նր աղքատութիւնն նոցա առաւե՛լ եղեւ ՚ի մեծութիւն առատութեան նոցա։ 3Զի ըստ կարի նոցա վկայեմ, եւ աւելի՛ քան զկար. 4ինքնակա՛մ բազում աղաչանօք աղաչէին զշնորհսն, եւ զհաղորդութիւն պաշտամանն որ ՚ի սուրբսն՝ տա՛լ ցմեզ։ 5Ո՛չ որչափ ա՛կն ունէաք, այլ եւ զանձինս եւս ետուն, նախ՝ Տեառն եւ ապա մե՛զ կամօքն Աստուծոյ. 6աղաչել զՏիտոս, զի որպէս սկսաւն յառաջագոյն, նոյնպէս եւ կատարեսցէ՛ ՚ի ձեզ եւ զա՛յդ եւս շնորհս։ 7Այլ որպէս յամենայնի առաւել էք հաւատովք, եւ բանիւ, եւ գիտութեամբ, եւ ամենայն փութով, եւ որ ՚ի մէնջ ՚ի ձեզ սէ՛րն է, զի եւ յա՛յդմ եւս շնորհի առաւե՛լ լինիցիք։ 8Ո՛չ որպէս հրաման տալոյ ասեմ. այլ վասն այլոց փութոյ, եւ վասն ձերոյ սիրոյ՝ զմտերմութիւնդ փորձեմ։ 9Քանզի գիտէ՛ք զշնորհսն Տեառն մերոյ Յիսուսի Քրիստոսի. զի վասն ձեր աղքատացաւ, որ մեծատունն էր, զի դուք նորա՛ աղքատութեամբն մեծասջիք։ 10Եւ խրա՛տ մի յայսմիկ տամ. զի ա՛յն իսկ յօգո՛ւտ է ձեզ. որք ո՛չ միայն զառնելն, այլ՝ եւ զկամե՛լն յառաջագոյն սկսայք ՚ի հերո՛ւն հետէ։ 11Բայց արդ՝ եւ զառնե՛լն իսկ կատարեցէ՛ք. զի որպէս յօժարութիւնն ՚ի կամա՛ց է, նո՛յնպէս եւ առնելն ըստ գոյին։ 12Զի եթէ յօժարութիւնն առաջի կայ, ըստ գոյին ընդունելի է, եւ ո՛չ եթէ ըստ չգոյին։ 13Զի ո՛չ եթէ այլոց հանգիստ կամիցիմ, եւ ձեզ նեղութիւն. 14այլ հաւասարութեամբ յայժմու ժամանակիս, ձեր առաւելութիւնդ ՚ի նոցա՛ պակասութիւնն. զի եւ նոցա առաւելութիւնն եղիցի ՚ի ձերո՛ւմ պակասութեանդ. զի եղիցի հաւասարութիւն, որպէս եւ գրեա՛լ է. 15թէ որ բազո՛ւմն առ՝ ո՛չ առաւելաւ. եւ որ սակաւն՝ ո՛չ նուազեցաւ։ * 16Բայց շնո՛րհք Աստուծոյ՝ որ արկ զնո՛յն փոյթ վասն ձեր ՚ի սիրտ Տիտոսի. 17զի զաղաչա՛նսն ընկալաւ, եւ փութացաւ յօժարագո՛յնս դիմեաց գա՛լ առ ձեզ։ 18Եւ առաքեցաք ընդ նմա զեղբայրն, որոյ գովութիւնն յաւետարանի՛ անդ է՝ ընդ ամենայն եկեղեցիս։ 19Եւ ո՛չ այսչափ միայն, այլ եւ ձեռնադրեալ յեկեղեցեաց անտի, նշդեհակի՛ց մեր եղեւ ՚ի շնորհս յայսոսիկ, որ պաշտին ՚ի մէնջ ՚ի փառս Տեառն, եւ ՚ի մեր յօժարութիւն։ 20Բայց զայս խղճեաք իսկ, թէ գուցէ՞ արատ ինչ ոք դնիցէ ՚ի հաստատութեանս յայսմիկ՝ որ պաշտեցաւս ՚ի մէնջ։ 21Քանզի խորհիմք զբարիս՝ ո՛չ միայն առաջի Տեառն, այլ եւ առաջի մարդկա՛ն։ 22Եւ առաքեցա՛ք ընդ նոսա զեղբայրն մեր՝ զոր ընտրեցաք ՚ի բազո՛ւմ իրս, բազում անգամ պինդ գտեալ. եւ առաւե՛լ եւս այժմ պնդագոյն յուսով մեծաւ ՚ի ձեզ։ 23Բայց եթէ վասն Տիտոսի ինչ բանք են, ի՛մ հաւասար է, եւ ձեր գործակի՛ց. եւ եթէ եղբարք մեր առաքեալքն եկեղեցւոյ, եւ փա՛ռք Քրիստոսի։ 24Եւ արդ՝ զհանդէս սիրո՛յ ձերոյ՝ եւ զմերոյ պարծանաց վասն ձեր, ՚ի դոսա՛ ցուցջի՛ք յանդիման ամենայն եկեղեցեաց։