1Եւ Աքաաբու էին որդիք եւթանասուն ՚ի Սամարիա. եւ գրեա՛ց Յէու հրովարտակ՝ եւ առաքեաց ՚ի Սամարիա առ իշխանսն Սամարիայ եւ առ ծերս եւ առ դայեակսն Աքաաբու՝ եւ ասէ. 2Իբրեւ հասանիցէ առ ձեզ հրովարտակդ այդ, ընդ ձե՛զ են որդիք տեառն ձերոյ, եւ ընդ ձեզ կառք եւ երիվարք՝ եւ ընդ ձեզ քաղաքք ամուրք՝ եւ զէնք. 3եւ տեսանիցէք զլաւ եւ զուղիղ յորդւոց տեառն ձերոյ, եւ հաստատեցէք զնա ՚ի վերայ աթոռոյ հօր իւրոյ. եւ տայցէ՛ք պատերազմ ՚ի վերայ տան տեառն ձերոյ։ 4Եւ երկեա՛ն յոյժ, եւ ասեն. Ահա երկու թագաւորքն ո՛չ կալան զդէմ նորա, եւ մեք զիա՞րդ ունիցիմք զդէմ։ 5Եւ առաքեցին ՚ի տանէն եւ ՚ի քաղաքէն, եւ ծերքն եւ դայեակք առ Յէու՝ եւ ասեն. Ծառա՛յք քո եմք մեք, եւ զոր ինչ ասասցես մեզ՝ արասցուք. եւ ո՛չ թագաւորեցուսցուք զոք, այլ զոր ինչ բարի՛ է առաջի քո՝ արասցուք։ 6Եւ գրեաց առ նոսա հրովարտակ երկրորդ՝ եւ ասէ. Եթէ ի՛մ էք դուք՝ եւ ձայնի իմում լսէք. առէ՛ք զգլուխս արանց որդւոց տեառն ձերոյ՝ եւ բերէ՛ք առ իս վաղիւ ՚ի սո՛յն ժամու Յեզրայէլ։ Եւ որդիք արքայի՝ էին ա՛րք եւթանասուն. եւ ճոխք քաղաքին սնուցանէին զնոսա։ 7Եւ եղեւ իբրեւ եհաս հրովարտակն առ նոսա, կալա՛ն զորդիսն արքայի՝ եւ սպանի՛ն արս եւթանասուն, եւ եդին զգլուխս նոցա ՚ի կողովս, եւ առաքեցին առ նա ՚ի Յեզրայէլ։ 8Եւ եկն հրեշտակն եւ պատմեաց եւ ասէ. Բերի՛ն զգլուխս որդւոցն արքայի։ Եւ ասէ. Դի՛ք զնոսա երկուս զրահանս արտաքոյ քաղաքին մինչեւ յառաւօտ։ 9Եւ եղեւ ընդ առաւօտն ե՛լ եւ եկաց, եւ ասէ ցամենայն ժողովուրդն. Արդա՛ր էք դուք. ահաւասիկ ես յարեայ ՚ի վերայ տեառն իմոյ եւ սպանի զնա. տեսէ՛ք զսոսա ափփով՝ ո՞ կոտորեաց. 10զի մի՛ անկանիցի ՚ի բանէն Տեառն յերկիր, զոր խօսեցաւ Տէր ՚ի վերայ տանն Աքաաբու, եւ Տէր արար զոր ինչ խօսեցաւ ՚ի ձեռն ծառայի իւրոյ Եղիայ։ 11Եւ եհար Յէու զամենայն մնացեալս ՚ի տանէ Աքաաբու ՚ի Յեզրայէլ, եւ զամենայն մեծամեծս նորա, եւ զծանօթս նորա, եւ զքուրմս նորա, առ ՚ի չթողլոյ նմա մնացորդ։ 12Եւ յարեաւ գնաց, եւ չոգաւ ՚ի Սամարիա։ Եւ մինչդեռ ՚ի Բեթակադ՝ հովուաց ՚ի ճանապարհին էր. 13եւ եգիտ Յէու զեղբարս Ոքոզիայ արքայի Յուդայ, եւ ասէ. Ո՞յր էք դուք։ Եւ ասեն. Եղբարք Ոքոզիա՛յ եմք մեք, եւ իջաք յողջոյն որդւոց արքայի, եւ որդւոց զօրացելոյս։ 14Եւ ասէ. Կալարո՛ւք զդոսա կենդանիս։ Եւ կալան զնոսա կենդանիս, եւ կոտորեցին զնոսա ՚ի Բեթակադ՝ արս քառասուն եւ երկուս. եւ ո՛չ մնաց ՚ի նոցանէ այր։

15Եւ գնա՛ց անտի, եւ եգի՛տ զՅովնադաբ որդի Ռեքաբայ ընդ առա՛ջ իւր, եւ օրհնեաց զնա. եւ ասէ ցնա Յէու. Եթէ իցէ՞ սիրտ քո ուղիղ իբրեւ զսիրտ իմ, ըստ սրտի քում։ Եւ ասէ Յովնադաբ. Է՛։ Եւ ասէ Յէու. Եթէ իցէ, տո՛ւր ցիս զձեռն քո։ Եւ ետ զձեռն իւր. եւ եհան զնա առ իւր ՚ի կառսն. 16եւ ասէ ցնա. Ե՛կ ընդ իս՝ եւ տե՛ս զնախանձ իմ վասն Տեառն։ Եւ նստոյց զնա ՚ի կառս իւր։ 17Եւ եմուտ ՚ի Սամարիա, եւ եհար զամենայն մնացորդս Աքաաբու ՚ի Սամարիա. մինչեւ ապականել նմա զնոսա ըստ բանին Տեառն զոր խօսեցա՛ւ ընդ Եղիայի։

18Եւ ժողովեաց Յէու զամենայն ժողովուրդն՝ եւ ասէ ցնոսա. Աքաաբ ծառայեաց Բահաղու սակա՛ւ ինչ. Յէու՝ ծառայեսցէ նմա բազում։ 19Եւ արդ՝ ամենայն մարգարէք Բահաղու, զամենայն ծառայս նորա եւ զքուրմս նորա կոչեցէ՛ք առ իս. եւ այր ոք մի՛ վրիպեսցէ. զի զոհ մե՛ծ է Բահաղու. եւ որ վրիպեսցէ, մի՛ ապրեսցի։ Եւ Յէու արա՛ր խաբանօք, զի կորորեսցէ զծառայս Բահաղու։ 20Եւ ասէ Յէու. Սրբեցէ՛ք նուէրս Բահաղու։ Եւ քարո՛զ կարդացին։ 21Եւ առաքեա՛ց Յէու ընդ ամենայն Իսրայէլ, եւ եկին ամենայն ծառայք Բահաղու. եւ ո՛չ մնաց որ ո՛չ եկն. եւ մտին ՚ի տունն Բահաղու, եւ լցաւ տունն Բահաղու ծայր ՚ի ծայր։ 22Եւ ասէ Յէու ցմիսթաղսն. Հանէ՛ք զպատմուճանսդ ամենայն ծառայից Բահաղու։ Եւ հանին նոցա զպատմուճանս։ 23Եւ եմուտ Յէու՝ եւ Յովնադաբ որդի Ռեքեբայ ՚ի տունն Բահաղու. եւ ասէ ցծառայսն Բահաղու. Որոնեցէ՛ք եւ տեսէ՛ք՝ թէ իցէ՞ ոք աստ ընդ ձեզ ՚ի ծառայից Տեառն. բայց դուք միա՛յն ծառայք Բահաղու։ 24Եւ եմուտ առնել խո՛ւնկս եւ ողջակէզս Յէու։ Եւ Յէու կացոյց իւր արտաքոյ երեքարեւր եւ ութսուն այր, եւ ասէ. Այր որ ապրեսցէ՛ յարանցն զոր ես հանեմ ՚ի ձեռս ձեր, ա՛նձն նորա փոխանակ անձին նորա։ 25Եւ եղեւ իբրեւ կատարեաց առնել զողջակէզսն, եւ ասէ Յէու ցսուրհանդակսն եւ ցսպառազէնս. Մտէ՛ք հանէ՛ք զնոսա, եւ այր մի՛ ելցէ ՚ի նոցանէն։ Եւ հարին զնոսա սրով սուսերի. եւ ընկեցին սուրհանդակքն եւ սպառազէնք. եւ գնացին մինչեւ ցքաղաք տանն Բահաղու. 26եւ հանին զարձանն Բահաղու, եւ այրեցին զնա։ 27Եւ կործանեցին զարձանն Բահաղու, եւ քակեցին զտունն Բահաղու. եւ կարգեցին զնա ՚ի լուալիս մինչեւ ցայսօր։ 28Եւ ապականեաց Յէու զԲահաղ յԻսրայէլէ։ 29Բայց ՚ի մեղացն Յերոբովամու որդւոյ Նաբատայ որ յանցոյցն զԻսրայէլ ո՛չ մեկնեցաւ Յէու, յերնջոցն ոսկեաց, որ ՚ի Բեթէլ եւ ՚ի Դան։ 30Եւ ասէ Տէր ցՅէու. Փոխանակ զի քաջացար առնել ուղղութիւն առաջի իմ, ըստ ամենայնի՝ որ ինչ ՚ի սրտի իմում արարե՛ր տանն Աքաաբու. որդիք չորրո՛րդք նստցին քեզ յաթոռ Իսրայէլի։ 31Եւ Յէու ո՛չ զգուշացաւ գնալ յօրէնս Տեառն Աստուծոյ Իսրայէլի յամենայն սրտէ իւրմէ. եւ ո՛չ մեկնեցաւ ՚ի մեղացն Յերոբովամայ որ յանցո՛յցն զԻսրայէլ։ 32Յաւուրսն յայնոսիկ սկսաւ Տէր կոտորել յամենայն սահմանս Իսրայէլի. եւ եհար զնոսա Ազայէլ յամենայն սահմանս Իսրայէլի, 33՚ի Յորդանանէ եւ ընդ արեւելս, զամենայն երկիրն զԳաղաադ եւ զԳադայ՝ եւ զՌոբենի՝ եւ զՄանասէի. յԱրոյերայ, որ է յեզեր հեղեղատին Առնովնայ, եւ զԳաղաադ եւ զԲասան։ 34Եւ մնացորդք բանիցն Յէուայ եւ ամենայն ինչ զոր արար, եւ ամենայն զօրութիւն նորա, եւ ամենայն խումբքն զոր խմբեաց. ո՞չ աւանիկ գրեալ են ՚ի գիրս բանից աւուրց թագաւորացն Իսրայէլի։

35Եւ ննջեա՛ց Յէու ընդ հարս իւր, եւ թաղեցին զնա ՚ի Սամարիա. եւ թագաւորեաց Յովաքազ որդի նորա ընդ նորա։ 36Եւ աւուրք զորս թագաւորեաց Յէու՝ ՚ի վերայ Իսրայէլի ամք քսան եւ ութ ՚ի Սամարիա։