1Եւ Գոդողիա մա՛յր Ոքոզիայ, ետես եթէ մեռան որդիք նորա, կորո՛յս զամենայն զաւակ թագաւորութեանն։ 2Եւ ա՛ռ Յովսաբէէ դուստր արքայի Յովրամայ եղբայր Ոքոզիայ, զՅովաս զորդի Ոքոզիայ, եւ գողացաւ զնա ՚ի միջոյ որդւոցն արքայի սպանելոցն, զնա՛ եւ զդայեակ նորա ՚ի սենեկի ընկողնոց, եւ թաքոյց զնա յերեսաց Գոդողիայ՝ եւ ո՛չ մեռաւ։ 3Եւ է՛ր ընդ նմա ՚ի տան Տեառն թաքուցեալ ամս վեց. եւ Գոդողիա թագաւորեալ էր ՚ի վերայ երկրին։ 4Եւ յամին եւթներորդի առաքեաց Յովիդայէ, եւ ա՛ռ զհարիւրապետսն, եւ զքոռին եւ զռասիմ, եւ ած զնոսա ՚ի տուն Տեառն, եւ ուխտեաց նոցա զուխտ Տեառն. եւ եցոյց նոցա Յովիդայէ զորդին արքայի։ 5Եւ պատուէ՛ր ետ նոցա՝ եւ ասէ. Ա՛յս բան է զոր առնիցէք. երրո՛րդ մասն ՚ի ձէնջ մտցէ շաբաթամուտ. եւ պահեսջի՛ք զպահպանութիւն տանն արքունի ՚ի դրանն. 6եւ երրորդ մասն ՚ի դրան ճանապարհացն. եւ երրորդ մասն ՚ի դրան զկնի օժընդակացն՝ պահեսջիք զպահպանութիւն տանն։ 7Եւ երկու ձեռք ՚ի ձեզ. ամենայն որ ելանիցէ ընդ շաբաթամուտսն զգուշանալ տանն Տեառն. զգուշասցի՛ պահպանութեամբ տանն Տեառն արքայի. 8եւ պատեսջի՛ք զարքայիւ. ա՛յր, եւ գործի իւր ՚ի ձեռին իւրում. եւ որ մտանիցէ ՚ի սադերովթն՝ մեռցի. եւ ինքն էր ընդ արքայի ՚ի մտանելն նորա եւ յելանելն նորա։ 9Եւ արարին հարիւրապետքն՝ զամենայն զոր պատուիրեաց Յովիդայէ իմաստուն. եւ առնոյր այր զարս իւր, եւ զմտօղսն ՚ի շաբաթամուտսն հանդերձ ելողօքն ՚ի շաբաթամտէն։ եւ մտանէր առ Յովիդայէ քահանայ։ 10Եւ ե՛տ քահանայն հարիւրապետացն գեղարդունսն, եւ զբովանդակ զէնն արքայի Դաւթի որ կայր ՚ի տանն Տեառն։ 11Եւ յարեան օժընդակքն՝ ա՛յր եւ գործի իւր ՚ի ձեռին իւրում. յաջոյ ուսոյ տանն, մինչեւ ցձախոյ ուս տանն եւ սեղանոյն, եւ տանն արքունի շուրջանակի։ 12Եւ առաքեաց զարքայորդին, եւ եդ ՚ի վերայ նորա զյեզերն եւ զվկայութիւնն. եւ թագաւորեցոյց զնա՝ եւ օծ զնա. եւ ծա՛փս եհար եւ ասէ. Կեցցէ՛ արքայ։

13Եւ լուաւ Գոդողիա զձայն ընթանալոյ ժողովրդեանն, եւ եմուտ առ ժողովուրդն ՚ի տունն Տեառն. 14եւ ետես, եւ ահա կայր ՚ի վերայ սեանն՝ ըստ օրինի իւրում, եւ երգիչք եւ փողարք շուրջ զարքայիւ. եւ ամենայն ժողովուրդք երկրին խնդային, եւ փողս հարկանէին փողովք. եւ պատառեաց Գոդողիա զհանդերձս իւր, աղաղակեաց եւ ասէ. Դա՛ւ է, դա՛ւ է։ 15Եւ պատուէ՛ր ետ Յովիդայէ քահանայ հարիւրապետացն ոստիկանաց զօրուն՝ եւ ասէ ցնոսա. Հանէ՛ք զդա ՚ի ներքուստ սադերովթայդ, եւ որ մտանիցէ զկնի դորա՝ մեռցի՛ սրով. քանզի ասաց քահանայն թէ մի՛ մեռցի ՚ի տանն Տեառն։ 16Եւ արկին ձեռն ՚ի նա, եւ մտին ընդ ճանապարհ մտից երիվարաց տանն արքայի, եւ մեռաւ անդ։ 17Եւ ուխտեաց Յովիդայէ ուխտ ՚ի մէջ Տեառն՝ եւ ՚ի մէջ արքայի, եւ ՚ի մէջ ժողովրդեան, ※ լինել ժողովուրդ Տեառն եւ ՚ի մէջ արքայի եւ ՚ի մէջ ժողովրդեանն։ 18Եւ եմուտ ամենայն ժողովուրդ երկրին ՚ի տուն Բահաղու, եւ կործանեցին զնա՝ եւ զսեղանս նորա, եւ զպատկերս նորա խորտակեցին մանր. եւ զՄաթան զքուրմսն Բահաղու սպանին յանդիման սեղանոյն։ Եւ եդ քահանայն ոստիկանս ՚ի տան Տեառն։ 19Եւ ա՛ռ զհարիւրապետսն՝ եւ զքոռին՝ եւ զռասիմ, եւ զամենայն ժողովուրդ երկրին, եւ իջուցին զարքայ ՚ի տանէ Տեառն. եւ եմուտ ընդ ճանապարհն սուրհանդակաց դրան տանն արքունի, եւ նստոյց զնա յաթոռն թագաւորաց։ 20Եւ ուրա՛խ եղեւ ամենայն ժողովուրդ երկրին. եւ քաղաքն դադարեաց. եւ զԳոդողիայ սպանին սրով ՚ի տա՛ն արքայի։ 21Որդի եւթն ամաց Յովաս ՚ի թագաւորե՛լ իւրում։