1Յամին երրորդի Յովասու որդւոյ Յովաքազու արքայի՛ Իսրայէլի, թագաւորեա՛ց Ամասիա որդի Յովասու թագաւոր Յուդայ։ 2Որդի քսան եւ հինգ ամա՛ց էր ՚ի թագաւորել իւրում. եւ քսան եւ ինն ամ թագաւորեաց յԵրուսաղէմ. եւ անուն մօր նորա Յովադի՛ն յԵրուսաղեմէ։ 3Եւ արար ուղղութիւն առաջի Տեառն, բայց ո՛չ իբրեւ զԴաւիթ զհայր իւր. ըստ ամենայնի զոր ինչ արար Յովաս՝ հայր իւր արար. 4այլ զբարձունսն ո՛չ եբարձ. եւ տակաւին ժողովուրդն զոհէր. եւ արկանէր խունկս ՚ի բարձունսն։ 5Եւ եղեւ իբրեւ հաստատեցաւ թագաւորութիւնն ՚ի ձեռս նորա, եւ եհար զծառայս իւր որ հարին զարքայ զհայր նորա. 6եւ զորդիս սպանողացն ո՛չ սպան. որպէս գրեալ է ՚ի գիրս օրինացն Մովսիսի. զորօրինակ պատուիրեաց Տէր՝ եւ ասէ. Մի՛ մեռցին հարք վասն որդւոց, եւ մի՛ որդիք մեռցին վասն հարց. այլ իւրաքանչիւրոք ՚ի մե՛ղս իւրում մեռցի։ 7Նա եհար զԵդոմ ՚ի Մայիլա տա՛սն հազար, եւ ա՛ռ զՎէմն պատերազմաւ. եւ կոչեաց զանուն նորա Յեկթովէ՛լ մինչեւ ցայսօր։

8Յա՛յնմ ժամանակի առաքեաց Ամասիա հրեշտակս առ Յովաս որդի Յովաքազու որդւոյ Յէուայ արքայի Իսրայէլի՝ եւ ասէ. Ե՛կ յանդիմա՛ն լիցուք միմեանց երեսօք։ 9Եւ առաքեաց Յովաս արքայ Իսրայէլի առ Ամասիա արքայ Յուդայ՝ եւ ասէ. Ակքան ՚ի Լիբանանէ յղեաց առ եղեւնափայտն որ ՚ի Լիբանան՝ եւ ասէ. Տո՛ւր զդուստր քո որդւոյ իմում կնութեան, եւ անցին գազանք անապատի որ ՚ի Լիբանան՝ եւ կոխեցի՛ն զԱկքանն։ 10Հարկանելով հարե՛ր զԵդոմ, եւ հպարտացո՛յց զքեզ սիրտ քո. մեծարեա՛ց եւ նի՛ստ ՚ի տան քում. ընդէ՞ր գրգռէ զքեզ չարութիւն քո, եւ անկանիցիս դու եւ Յուդայ ընդ քեզ։ 11Եւ ո՛չ անսաց Ամասիա։ Եւ ե՛լ Յովաս արքայ Իսրայէլի, եւ երեւեցան երեսօք ի՛նքն եւ Ամասիա արքայ Յուդայ ՚ի Բեթսամեւս Հրէաստանի։ 12Եւ պարտեցա՛ւ Յուդա յերեսաց Իսրայէլի, եւ փախեաւ ա՛յր իւրաքանչիւր ՚ի բնակութիւն իւր։ 13Եւ զԱմասիա զարքայ Յուդայ՝ զորդի Յովասու որդւոյ Յովաքազեայ՝ կալաւ Յովաս որդի Յովաքազու արքայ Իսրայէլի ՚ի Բեթսամեւս. եւ եկն յԵրուսաղէմ, եւ եհատ զպարիսպն Երուսաղեմի ՚ի դրանէ Եփրեմի մինչեւ ՚ի դուռն Անկեանցն, չորեքարեւր կանգուն։ 14Եւ ա՛ռ զոսկի եւ զարծաթ եւ զամենայն անօթս գտեալ ՚ի տանն Տեառն, եւ ՚ի գանձս տան թագաւորին, եւ զորդիս խառնակութեանցն. եւ դարձաւ ՚ի Սամարիա։ 15Եւ մնացորդք բանից Յովասու՝ եւ որ ինչ արար զօրութեամբ իւրով, եւ պատերազմն զոր պատերազմեցաւ ընդ Ամեսեայ արքայի Յուդայ, ո՞չ աւանիկ գրեալ են ՚ի գիրս բանից աւուրց թագաւորացն Իսրայէլի։ 16Եւ ննջեաց Յովաս ընդ հարս իւր, եւ թաղեցաւ ՚ի Սամարիա ընդ թագաւորս Իսրայէլի. եւ թագաւորեաց Յերոբովամ որդի նորա ընդ նորա։ 17Եւ եկաց Ամասիա որդի Յովասու՝ արքայ Յուդայ՝ յե՛տ մահուանն Յովասու որդւոյ Յովաքազայ թագաւորի Իսրայէլի՝ ամս հնգետասան։ 18Եւ մնացորդք բանից Ամասեայ՝ եւ ամենայն ինչ զոր արար, ո՞չ աւանիկ գրեալ են ՚ի գիրս բանից աւուրց թագաւորացն Յուդայ։ 19Եւ գումարեցան ՚ի վերայ նորա գունդք յԵրուսաղէմ, եւ փախեաւ ՚ի Լաքիս. եւ առաքեցին զկնի նորա ՚ի Լաքիս՝ եւ սպանի՛ն զնա անդ։ 20Եւ բարձին զնա ձիովք, եւ թաղեցա՛ւ յԵրուսաղէմ ընդ հարս իւր ՚ի քաղաքի՛ Դաւթի։

21Եւ ա՛ռ ամենայն ժողովուրդն Յուդայ զԱզարիա, եւ նա՝ էր ամաց վեշտասանից, եւ թագաւորեցուցին զնա փոխանակ հօր իւրոյ Ամասեայ։ 22Նա՛ շինեաց զԵլաթ. եւ դարձոյց զնա անդրէն ՚ի Յուդայ, յետ ննջելոյ արքայի ընդ հա՛րս իւր։

23Յամի հնգետասաներորդի Ամասիայ որդւոյ Յովասու՝ արքայի Յուդայ, թագաւորեաց Յերոբովամ որդի Յովասու արքայի Իսրայէլի ՚ի վերայ Իսրայէլի ՚ի Սամարիա՝ ամս քառասուն եւ մի։ 24Եւ արար չա՛ր առաջի Տեառն. եւ ո՛չ մեկնեցաւ յամենայն մեղաց Յերոբովամայ որդւոյ Նաբատայ՝ որ յանցոյցն զԻսրայէլ։ 25Նա՛ մերժեաց զսահմանս Իսրայէլի ՚ի մտիցն Եմաթայ մինչեւ ցծովն Արաբայ ըստ բանին Տեառն Աստուծոյ Իսրայէլի՝ զոր խօսեցաւ ՚ի ձեռն ծառայի իւրոյ Յովնանու որդւոյ Ամաթեայ մարգարէի ՚ի Գեթքոբերայ. 26զի ետես զտառապանս Իսրայէլի զյո՛յժ դառնութեան, եւ սակաւաւորս եւ նեղեալս, եւ անօսրացեալս եւ լքեալս, եւ ո՛չ ոք էր որ օգնէր Իսրայէլի։ 27Եւ ո՛չ խօսեցաւ Տէր ջնջել զզաւակ Իսրայէլի ՚ի ներքոյ երկնից. եւ փրկեաց զնոսա Տէր ՚ի ձեռաց Յերոբովամու որդւոյ Յովասու։ 28Եւ մնացորդք բանից Յերոբովամայ, եւ ամենայն ինչ զոր արար, եւ զօրութիւնք նորա զոր պատերազմեցաւ. եւ ո՞րպէս դարձոյց զԴամասկոս՝ եւ զԵմաթ անդրէն առ Յուդայ յԻսրայէլէ. ո՞չ աւանիկ գրեալ են ՚ի գիրս բանից աւուրց թագաւորացն Իսրայէլի։

29Եւ ննջեաց Յերոբովամ ընդ հարս իւր՝ ընդ թագաւորս Իսրայէլի, եւ թագաւորեաց Զաքարիա որդի նորա փոխանակ հօր իւրոյ։