1Յամի՛ քսաներորդի եւթներորդի Յերոբովամայ արքայի Իսրայէլի, թագաւորեաց Ազարիա որդի Ամեսեայ արքայի Յուդայ։ 2Որդի վեշտասան ամաց էր ՚ի թագաւորել իւրում. եւ յիսուն եւ երկուս ամս թագաւորեաց յԵրուսաղէմ. եւ անուն մօր նորա Յեքելիա յԵրուսաղեմէ։ 3Եւ արար բարի՛ առաջի Տեառն ըստ ամենայնի զոր արար Ամասիա հայր նորա. 4բա՛ց ՚ի բարձանցն զոր ո՛չ եբարձ. եւ տակաւին ժողովուրդն զոհէր եւ արկանէր խունկս ՚ի բարձունսն։ 5Եւ արկ Տէր ձեռն ՚ի թագաւորն, եւ էր բորոտեալ մինչեւ ցօր մահուան իւրոյ. եւ նստէր ՚ի տան ափփուսովթ. եւ Յովաթամ որդի արքայի է՛ր ՚ի վերայ տանն դատել զժողովուրդ երկրին։ 6Եւ մնացորդք բանից Ազարիայ, եւ ամենայն ինչ զոր արար. ո՞չ աւանիկ գրեալ են ՚ի գիրս բանից աւուրց թագաւորացն Յուդայ։ 7Եւ ննջեաց Ազարիա ընդ հարս իւր, եւ թաղեցին զնա առ հարս իւր ՚ի քաղաքի Դաւթի. եւ թագաւորեաց Յովաթամ որդի նորա ընդ նորա։

8Յամի երեսներորդի եւթներորդի Ազարիայ արքայի Յուդայ՝ թագաւորեաց Զաքարիա որդի Յերոբովամայ ՚ի վերայ Իսրայէլի ՚ի Սամարիա ամիսս վեց։ 9Եւ արար չա՛ր առաջի Տեառն որպէս արարին հարք նորա, եւ ո՛չ մեկնեցաւ ՚ի մեղացն Յերոբովամայ որդւոյ Նաբատայ որ յանցոյցն զԻսրայէլ։ 10Եւ գումարեցան ՚ի վերայ նորա Սեղ՚ղ՚ում որդի Յաբիսայ, եւ Կեբդաամ, եւ հարին զնա յանդիման ժողովրդեանն եւ սպանին զնա. եւ թագաւորեաց Սեղ՚ղ՚ում ընդ նորա։ 11Եւ մնացորդք բանից Զաքարիայ, ահա գրեալ են ՚ի գիրս բանից աւուրց թագաւորացն Իսրայէլի։ 12Ա՛յս է բան Տեառն՝ զոր խօսեցաւ առ Յէու եւ ասէ. Որդիք չորրո՛րդք նստցին քեզ յաթոռն Իսրայէլի. եւ եղեւ այնպէս։

13Եւ Սեղ՚ղ՚ում որդի Յաբիսայ թագաւորեաց յամին երեսներորդի ութերորդի Ազարիայ արքայի Յուդայ. եւ թագաւորեաց Սեղ՚ղ՚ում ամսօրեայ մի աւուրց ՚ի Սամարիա։ 14Եւ ել Մանայեմ որդի Գադդայ ՚ի Թերսիլայ, եւ եմուտ ՚ի Սամարիա, եւ եհար զՍեղ՚ղ՚ում զորդի Յաբիսայ ՚ի Սամարիա, եւ սպան զնա, եւ թագաւորեաց ընդ նորա։ 15Եւ մնացորդք բանից Սեղ՚ղ՚ումայ, եւ գումարութիւնք նորա զոր գումարեցաւ՝ ահաւանիկ գրեալ են ՚ի գիրս բանից աւուրց թագաւորացն Իսրայէլի։

16Յա՛յնմ ժամանակի եհար Մանայեմ զԹերսայ՝ եւ զամենայն ինչ որ ՚ի նմա, եւ զսահմանս նորա ՚ի Թերսայէ. քանզի ո՛չ բացին նմա, եւ եհար զնա՝ եւ զյղիս նորա պատառեաց։ 17Յամի երեսներորդի իններորդի Ազարիայ արքայի Յուդայ, թագաւորեաց Մանայեմ որդի Գադդեայ ՚ի վերայ Իսրայէլի ՚ի Սամարիա ամս տասն։ 18Եւ արար չա՛ր առաջի Տեառն. եւ ո՛չ մեկնեցաւ յամենայն մեղացն Յերոբովամու որդւոյ Նաբատայ՝ որ յանցոյցն զԻսրայէլ մեղօք իւրովք։ 19Եւ ե՛լ Փուա արքայ Ասորեստանեայց ՚ի վերայ երկրին. եւ Մանայեմ ետ Փուայ հազար տաղանտ արծաթոյ՝ լինել ձեռին նորա ընդ նմա, հաստատե՛լ զթագաւորութիւնն ՚ի ձեռն սորա։ 20Եւ արկ Մանայեմ զարծաթն ՚ի վերայ Իսրայէլի, ՚ի վերայ ամենայն զօրաւորի զօրութեամբ՝ տա՛լ արքային Ասորեստանեայց յիսուն սիկղ արծաթոյ առ այր մի. եւ դարձաւ արքայն Ասորեստանեաց՝ եւ ո՛չ եկաց յերկրին։ 21Եւ մնացորդք բանիցն Մանայեմայ, եւ ամենայն ինչ զոր արար. ո՞չ աւանիկ գրեալ են ՚ի գիրս բանից աւուրց թագաւորացն Իսրայէլի։ 22Եւ ննջեաց Մանայեմ ընդ հարս իւր։ Եւ թագաւորեաց Փակիա որդի նորա ընդ նորա։ 23Յամի յիսներորդի Ազարիայ արքայի Յուդայ, թագաւորեաց Փակէիա ՚ի վերայ Իսրայէլի ՚ի Սամարիա ամս տասն։ 24Եւ արար չա՛ր առաջի Տեառն. եւ ո՛չ մեկնեցաւ ՚ի մեղացն Յերոբովամայ որդւոյ Նաբատայ որ յանցոյցն զԻսրայէլ։ 25Եւ գումարեցաւ ՚ի վերայ նորա Փակէէ որդի Ռոմելայ սպառազէն իւր, եւ եհար զնա ՚ի Սամարիա առաջի տանն արքայի. եւ ընդ նմա Արգոբ, եւ ընդ նմա Արիէ, եւ ընդ նմա յիսուն այր ՚ի չորեքարիւրոցն. եւ սպան զնա, եւ թագաւորեաց ընդ նորա։ 26Եւ մնացորդք բանիցն Փակէի եւ ամենայն ինչ զոր արար՝ ահա գրեալ են ՚ի գիրս բանից աւուրց թագաւորացն Իսրայէլի։

27Յամի յիսներորդի եւ երկրորդի Ազարիայ արքայի Յուդայ թագաւորեաց Փակէէ որդի Ռոմելայ ՚ի վերայ Իսրայէլի ՚ի Սամարիա ամս քսան։ 28Եւ արար չա՛ր առաջի Տեառն. եւ ո՛չ մեկնեցաւ յամենայն մեղաց Յերոբովամայ որդւոյ Նաբատայ որ յանցոյցն զԻսրայէլ։ 29Յաւուրս Փակէի արքայի Իսրայէլի, եկն Թագղ՚աթփաղսար արքայ Ասորեստանեաց. եւ ա՛ռ զԱյին, եւ զԿաբեէլ, եւ զԲեթմաքա, եւ զՅանովթ, եւ զԿենէզ, եւ զԱսովր, եւ զԳաղաադ, եւ զԳալիլեայ, եւ զամենայն երկիրն Նեփթաղիմայ, եւ խաղացոյց զնոսա յԱսորեստանեայս։ 30Եւ գումարեաց գունդ Ովսէէ որդի Էլայ ՚ի վերայ Փակէի որդւոյ Ռոմելայ, եւ եհար զնա եւ սպան զնա, եւ թագաւորեաց ընդ նորա. յամի քսաներորդի Յովաթամայ որդւոյ Ոզիայ։ 31Եւ մնացորդք բանից Փակէի եւ ամենայն ինչ զոր արար, ահաւանիկ գրեալ են ՚ի գիրս բանից աւուրց թագաւորացն Իսրայէլի։

32Յամի երկրորդի Փակէի որդւոյ Ռոմելայ թագաւորի Իսրայէլի, թագաւորեաց Յովաթամ որդի Ոզիայ արքայի Յուդայ։ 33Որդի քսան եւ հինգ ամաց էր ՚ի թագաւորել իւրում, եւ վեշտասան ամ թագաւորեաց յԵրուսաղէմ. եւ անուն մօր նորա Յերուսայ դուստր Սադովկայ։ 34Եւ արար ուղղութիւն առաջի Տեառն՝ ըստ ամենայնի զոր արար Ոզիա հայր նորա. 35բա՛ց ՚ի բարձանցն զոր ո՛չ եբարձ. եւ տակաւին ժողովուրդն զոհէր եւ արկանէր խունկս ՚ի բարձունսն. նա՛ շինեաց զդուռն տանն Տեառն զվերին։ 36Եւ մնացորդք բանից Յովաթամայ՝ եւ ամենայն ինչ զոր արար, ո՞չ աւանիկ գրեալ են ՚ի գիրս բանից աւուրց թագաւորացն Յուդայ։ 37Յաւուրսն յայնոսիկ սկսաւ Տէր առաքել ՚ի Յուդայ զՌասոն արքայ Ասորւոց, եւ զՓակէէ որդի Ռոմելայ։

38Եւ ննջեաց Յովաթամ ընդ հարս իւր, եւ թաղեցաւ առ հարս իւր ՚ի քաղաքի Դաւթի հօր իւրոյ. եւ թագաւորեաց Աքազ որդի նորա ընդ նորա։