1Յամի եւթնուտասներորդի Փակէի որդւոյ Ռոմելայ թագաւորեաց Աքազ որդի Յովաթամայ։ 2Որդի ամաց քսանից էր Աքազ ՚ի թագաւորել իւրում, եւ վեշտասան ամ թագաւորեաց յԵրուսաղէմ. եւ ո՛չ արար ուղղութիւն առաջի Տեառն Աստուծոյ հաւատարմութեամբ իբրեւ զԴաւիթ զհայր իւր. 3եւ գնաց զճանապարհ Յերոբովամայ որդւոյ Նաբատայ արքայի Իսրայէլի. նա՛ զորդիս իւր անցոյց ընդ հուր՝ ըստ գարշութեան ազգացն զորս եբարձ Տէր յերեսաց որդւոցն Իսրայէլի։ 4Եւ զոհէր՝ եւ արկանէր խունկս ՚ի բարձունս եւ ՚ի վերայ բլրոց, եւ ՚ի ներքոյ անտառախիտ ծառոց։ 5Յայնժամ ել Ռասոն արքայ Ասորւոց՝ եւ Փակէէ որդի Ռոմելայ արքա՛յ Իսրայէլի յԵրուսաղէմ ՚ի պատերազմ, եւ պաշարէին զնա ՚ի վերայ Աքազու. եւ ո՛չ կարէին պատերազմել 6՚ի ժամանակին յայնմիկ. եւ դարձոյց Ռասոն արքայ Ասորւոց զԱյիլաթ յԱսորիս. եւ եհան զՀրեայսն յԱյիլաթայ. եւ եկին Եդոմայեցիք յԱյիլաթ, եւ բնակեցին անդ մինչեւ ցայսօր։ 7Եւ առաքեաց Աքազ հրեշտակս առ Թագղ՚աթփաղսար արքայ Ասորեստանեաց եւ ասէ. Ծառա՛յ քո՝ եւ որդի՛ քո եմ ես՝ ե՛լ եւ փրկեա՛ զիս ՚ի ձեռաց արքային Ասորւոց, եւ ՚ի ձեռաց արքային Իսրայէլի յարուցելոց ՚ի վերայ իմ։ 8Եւ ա՛ռ Աքազ զարծաթ եւ զոսկի զգտեալս ՚ի գանձ տան Տեառն՝ եւ ՚ի տան թագաւորին, եւ առաքեաց արքային Ասորեստանեաց պատարագս։ 9Եւ լուաւ նմա արքայն Ասորեստանեաց. եւ ել արքայն Ասորեստանեաց ՚ի Դամասկոս եւ ա՛ռ զնա, եւ վարեաց զնա ՚ի գերութիւն ՚ի Կիւրէն. եւ զՌասոն սպան։ 10Եւ չոգաւ արքայ Աքազ ընդ առաջ Թագղ՚աթփաղսարայ արքային Ասորեստանեաց ՚ի Դամասկոս. եւ տեսեալ զսեղանն որ ՚ի Դամասկոս, եւ առաքեաց արքայ Աքազ առ Ուրիա քահանայ զնմանութիւն սեղանոյն, եւ զձեւ նորա. ըստ ամենայն գործուածոյն նորա։ 11Եւ շինեաց Ուրիա քահանայ զսեղանն ըստ ամենայնի՝ որպէս եւ առաքեաց արքայ Աքազ ՚ի Դամասկոսէ, նո՛յնպէս արար Ուրիա քահանայ մինչեւ ՚ի գալ արքայի Աքազու ՚ի Դամասկոսէ։ 12Ետես զսեղանն, եւ մատեաւ արքայ ՚ի սեղանն, ե՛լ ՚ի վեր եւ ճենճերեաց զողջակէզս իւր՝ եւ զզոհս. 13եւ նուիրեաց զնուէրս իւր, եւ եհեղ զարիւն խաղաղականաց իւրոց։ 14Եւ զսեղանն պղնձի որ կայր առաջի Տեառն փոխեաց յերեսաց տանն Տեառն ՚ի տեղւոջէ իւրմէ, եւ եդ զնա ՚ի կողմանէ սեղանոյն ընդ հիւսւսի։ 15Եւ պատուէր ետ արքայ Աքազ Ուրիա՛ քահանայի եւ ասէ. ՚Ի վերայ մեծի սեղանոյդ մատուցանիցես զողջակէզս առաւօտինս, եւ զզոհս երեկոյինս, եւ զողջակէզս արքայի եւ զզոհս նորա. եւ զողջակէզս ժողովրդեան երկրիս, եւ զոհս նոցա եւ զնուէրս նոցա, եւ զամենայն արիւն ողջակիզաց, եւ զամենայն արիւն զոհից՝ ՚ի վերայ նորա հեղուցուս. բայց սեղանն պղնձի եղիցի ի՛նձ յառաւօտինս։ 16Եւ արա՛ր Ուրիա քահանայ ըստ ամենայնի որպէս պատուիրեաց նմա Աքազ արքայ։ 17Եւ կոտորեաց արքայ Աքազ զաղխսն մեքենովթացն, եւ փոխեաց ՚ի նոցանէ զաւազանսն, եւ զծովն իջոյց ՚ի ցլուցն պղնձեաց երկոտասանեցունց որ ՚ի ներքոյ նորա, եւ եդ զնա ՚ի վերայ քարեղէն խարսխի։ 18Եւ զհիմն աթոռոյն շինեաց ՚ի տան Տեառն, եւ զմուտ թագաւորին զարտաքին դարձոյց ՚ի տուն Տեառն, յերեսաց արքային Ասորեստանեաց։

19Եւ մնացորդք բանից Աքազու զոր արար. ո՞չ աւանիկ գրեալ են ՚ի գիրս բանից աւուրց թագաւորացն Յուդայ։ 20Եւ ննջեա՛ց Աքազ ընդ հարս իւր, եւ թաղեցաւ առ հարս իւր ՚ի քաղաքին Դաւթի. եւ թագաւորեաց Եզեկիա որդի նորա ընդ նորա։