1Եւ եղեւ յամին երրորդի Ովսէի որդւոյ Ելայ արքայի Իսրայէլի. թագաւորեաց Եզեկիա որդի Աքազու արքայի Յուդայ։ 2Որդի քսան եւ հինգ ամաց էր ՚ի թագաւորել իւրում, եւ քսան եւ ինն ամ թագաւորեաց յԵրուսաղէմ. եւ անուն մօր նորա Աբութ՝ դուստր Զաքարայ։ 3Եւ արար ուղղութիւն առաջի Տեառն, ըստ ամենայնի զոր արար Դաւիթ հայր նորա։ 4Նա՛ եբարձ զբարձունսն, եւ խորտակեաց զամենայն արձանսն, եւ կոտորեաց զանտառսն, եւ զօձն պղնձի զոր արար Մովսէս, զի մինչեւ ցա՛յն աւուրս զոհէին նմա որդիքն Իսրայէլի, եւ կոչեցին զնա Նեեսթան։ 5՚Ի Տէր Աստուած Իսրայէլի յուսացաւ. եւ յետ նորա նման նմա ո՛չ եղեւ յամենայն թագաւորս Յուդայ, եւ յեղեալսն յառաջագոյն քան զնա։ 6Յարեցա՛ւ ՚ի Տէր, եւ ո՛չ մեկնեցաւ ՚ի գնացից նորա. եւ պահեաց զպատուիրանս նորա զոր պատուիրեաց Մովսէս։ 7Եւ էր Տէր ընդ նմա. յամենայնի զոր ինչ առնէր՝ խելամո՛ւտ լինէր։ Եւ նշկահեաց զարքայն Ասորեստանի եւ ո՛չ ծառայեաց նմա. 8եւ նա եհար զայլազգիսն մինչեւ ցԳազայ եւ մինչեւ ցսահմանս նորա, յաշտարակէ պահապանացն մինչեւ ցքաղաքն ամուր։ 9Եւ եղեւ յամի չորրորդի Եզեկիա արքայի. ա՛յն է ամ եւթներորդ Ովսեայ՝ որդւոյ Ելայ արքայի Իսրայէլի, ել Սաղմանասար արքայ Ասորեստանեաց ՚ի վերայ Սամարեայ, եւ պաշարէր զնա. 10եւ ա՛ռ զնա ՚ի կատարել ամաց երից, յամի վեցերորդի Եզեկիայ արքայի. ա՛յն ամ իններորդ էր Ովսեայ արքայի Իսրայէլի։ Ա՛ռ զՍամարիա. 11եւ խաղացոյց արքայն Ասորեստանեաց զՍամարիա յԱսորեստանեայս, եւ նստոյց զնոսա յԱլաթ, եւ յԱբովր՝ առ գետովն Գովզանայ՝ եւ լերամբքն Մարաց. 12զի ո՛չ լուան ձայնի Տեառն Աստուծոյ իւրեանց, եւ անցին զուխտիւ նորա՝ ըստ ամենայնի՛ զոր պատուիրեաց նոցա Մովսէս ծառայ Տեառն, ո՛չ լուան եւ ո՛չ արարին։

13Եւ յամի չորեքտասաներորդի արքայի Եզեկիայ, ել Սենեքերիմ արքայ Ասորեստանեաց ՚ի վերայ ամուր ամո՛ւր քաղաքացն Յուդայ, եւ ա՛ռ զնոսա։ 14Եւ առաքեաց Եզեկիա արքայ Յուդայ հրեշտակս առ արքայ Ասորեստանեաց ՚ի Լաքիս՝ եւ ասէ. Մեղա՛յ, դարձի՛ր յինէն. եւ զոր ինչ դիցես ՚ի վերայ իմ բարձի՛ց։ Եւ եդ արքայն Ասորեստանեաց ՚ի վերայ Եզեկիայ արքայի Յուդայ երեքարեւր տաղանտ արծաթոյ՝ եւ երեսուն տաղանտ ոսկւոյ։ 15Եւ ետ Եզեկիա զամենայն արծաթ գտեալ ՚ի տա՛ն Տեառն, եւ ՚ի գանձս տան թագաւորին։ 16՚Ի ժամանակի յայնմիկ կոտորեաց Եզեկիա զդրունս տաճարին Տեառն՝ եւ զսեամսն զոր պատեաց ոսկւով Եզեկիա արքայ Յուդայ, եւ ե՛տ զայն արքային Ասորեստանեաց։ 17Եւ առաքեաց արքայ Ասորեստանեաց զԹարաթա՝ եւ զՌաբսարիս՝ եւ զՌափսակ ՚ի Լաքիսայ առ արքայ Եզեկիայ զօրու ծանու ՚ի վերայ Երուսաղեմի. եւ ելին եւ եկին յԵրուսաղէմ, եւ կացին ՚ի վերայ ջրմղին վերնոյ աւազանին, որ է ՚ի ճանապարհի ագարակին թափչի. 18եւ աղաղակեցին առ Եզեկիա։ Եւ եկին առ նա Եղիակիմ որդի Քեղկեայ հազարապետ, եւ Սովմնաս դպրապետ, եւ Յովաք որդի Ասափայ՝ որ ՚ի վերայ յիշատակաց։ 19Եւ ասէ ցնոսա Ռափսակ. Ասացէ՛ք ցԵզեկիայ, ա՛յսպէս ասէ արքայ մեծ՝ արքա՛յն Ասորեստանեաց. Զի՞նչ իցէ յոյսն յոր դու յուսացեալ իցես. 20բայց եթէ ասիցես՝ եթէ բա՛նք շրթանց եւ խորհուրդ՝ պատերա՞զմ վճարիցէ. եւ զօրութիւն պիտո՛յ իցեն ՚ի պատերազմ. եւ արդ՝ յո՞ յուսացեալ նշկահեցեր զիս։ 21Ահա յուսացեա՛լ իցես ՚ի ցո՞ւպն եղեգնեայ ջաղջախեալ յԵգիպտոս. յոր թէ յենուցու այր՝ մտանիցէ ընդ ձեռս նորա, եւ խոցիցէ զնա. ա՛յնպէս փարաւոն արքայ Եգիպտացւոց ամենայն յուսացելոց իւրոց։ 22Եւ զի ասացեր ցիս՝ թէ ՚ի Տէր Աստուած յուսացեալ եմք. ո՞չ դա ա՛յն է, զորոյ մերժեաց Եզեկիա զբարձունս նորա, եւ զսեղանս նորա. եւ ասէ ցՅուդայ եւ ցԵրուսաղէմ. Առաջի սեղանո՛յս այսորիկ երկիր պագէք յԵրուսաղէմ։ 23Եւ արդ՝ աղէ խառնեցարո՛ւք ՚ի տէր իմ արքայ Ասորեստանեաց. եւ տա՛ց քեզ երկուս հազարս երիվարաց, եթէ կարասցե՞ս տալ դու քեզ հեծեա՛լս ՚ի վերայ նոցա։ 24Եւ զի՞արդ կարիցես զդէմ ունել միոյ ուրուք կուսակալի ՚ի ծառայից տեառն իմոյ ՚ի յետնոց. զի յուսացեալդ ես յԵգիպտոս ՚ի կառս եւ յերիվարս։ 25Իսկ արդ՝ առանց Տեա՞ռն ինչ ելանիցեմք ՚ի տեղիս յայս ապականե՛լ զսա. Տէր ասաց ցիս. Ե՛լ յերկիրն յայն եւ ապականեա՛ զնա։ 26Եւ ասէ Եղիակիմ որդի Քեղկեայ, եւ Սովմնաս, եւ Յովաք Ասափայ՝ ցՌափսակ. Խօսեա՛ց ընդ ծառայս քո Ասորերէն, քանզի լսե՛մք մեք. եւ մի՛ խօսիր Հրեարէն յականջս ժողովրդեանդ որ կա՛ն ՚ի պարսպիդ։ 27Եւ ասէ ցնոսա Ռափսակ. Միթէ առ տէ՞րն քո՝ կամ առ քե՞զ առաքեաց զիս տէ՛ր իմ խօսել զբանս զայսոսիկ. ո՛չ ապաքէն առ ա՛րսդ որ նստին ՚ի վերայ պարսպիդ, ուտել զաղբ իւրեանց, եւ ըմպել զմէզ իւրեանց ձեւք հանդերձ։ 28Եւ յարեաւ Ռափսակ, եւ աղաղակեաց մեծաձայն Հրեարէն՝ եւ խօսեցաւ եւ ասէ. Լուարո՛ւք զպատգամս արքայի մեծի, արքային Ասորեստանեայց. 29ա՛յսպէս ասէ արքայ. Մի՛ հպարտացուսցէ զձեզ Եզեկիա, զի ո՛չ կարէ ապրեցուցանել զձեզ ՚ի ձեռաց իմոց. 30եւ մի՛ յուսացուսցէ զձեզ Եզեկիա ՚ի Տէր, եւ ասասցէ թէ փրկելո՛վ փրկէ զմեզ Տէր, եւ ո՛չ մատնեսցի քաղաքս ՚ի ձեռս արքային Ասորեստանեաց. 31մի՛ լսէք Եզեկիայ։ Զի ա՛յսպէս ասէ արքայն Ասորեստանեաց. Արարէ՛ք ընդ իս օրհնութիւն, եւ ելէ՛ք առ իս. եւ կերիցէ՛ այր իւրաքանչիւր զայգի իւր, եւ զթզենի իւր, եւ արբցէ՛ ջուր ՚ի ջրհորոյ իւրմէ. 32մինչեւ եկից եւ առից եւ տարայց զձեզ յերկիրն որ իբրեւ զերկիրս ձե՛ր է. երկիր ցորենոյ եւ գինւոյ, այգեաց եւ հացի, երկիր ձիթենեաց իւղոյ եւ մեղու. եւ կեցէ՛ք եւ ո՛չ մեռանիցիք. եւ մի՛ լսէք Եզեկիայ, զի խաբէ զձեզ եւ ասէ, թէ Տէր փրկեսցէ զմեզ։ 33Միթէ փրկելով փրկեցի՞ն աստուածք ազգացն զիւրաքանչիւր աշխարհ ՚ի ձեռաց արքային Ասորեստանեայց։ 34Ո՞ւր է աստուածն Եմաթայ եւ Արփաթայ. եւ ո՞ւր է աստուած Սեփարուիմայ քաղաքին, Անայ եւ Գաւայ. միթէ փրկելով փրկեցի՞ն զՍամարիա ՚ի ձեռաց իմոց. 35ո՞վ ոք յամենայն աստուածոց աշխարհաց, որ փրկեցին զերկիր իւրեանց ՚ի ձեռաց իմոց. զի փրկեսցէ Տէր զԵրուսաղէմ ՚ի ձեռաց իմոց։ 36Եւ լռեցին եւ ո՛չ ետուն նմա պատասխանի, զի պատուէ՛ր տուեալ էր արքայի թէ մի՛ տայցէք նմա պատասխանի։ 37Եւ եմո՛ւտ Եղիակիմ որդի Քեղկեայ հազարապետ, եւ Սովմնաս դպրապետ, եւ Յովաք որդի Ասափայ որ ՚ի վերայ յիշատակաց առ Եզեկիա, պատառեալ զհանդերձս. եւ պատմեցին նմա զպատգամս Ռափսակայ։