1Որդի ամաց երկոտասանից Մանասէ՝ ՚ի թագաւորել իւրում. եւ յիսուն եւ ինն ամ թագաւորեաց յԵրուսաղէմ. եւ անուն մօր նորա Եփսիբա։ 2Եւ արար չա՛ր առաջի Տեառն ըստ գարշութեան ազգացն, զորս եբարձ Տէր յերեսաց որդւոցն Իսրայէլի. 3եւ դարձաւ շինեաց զբարձունսն զոր կործանեաց Եզեկիա հայր նորա. եւ կանգնեաց զսեղանն Բահաղու. եւ արար անտառս, որպէս արար Աքաաբ արքայ Իսրայէլի. եւ երկի՛ր եպագ ամենայն զօրութեան երկնից, եւ ծառայեաց նոցա. 4եւ շինեաց սեղան ՚ի տան Տեառն. որպէս ասաց Տէր. ՅԵրուսաղէմ եդից զաթոռ իմ։ 5Եւ շինեաց սեղան ամենայն զօրութեան երկնից յամենայն սրահս տանն Տեառն։ 6Եւ անցոյց զորդիս իւր ընդ հուր. եւ հմայէր, եւ հաւահարց լինէր. եւ արար վհուկս, եւ գէտս. եւ յաճախեաց առնել չա՛ր առաջի Տեառն առ ՚ի բարկացուցանելոյ զնա։ 7Եւ եդ զդրօշեալս անտառաց ՚ի տան Տեառն. զորմէ ասաց Տէր ցԴաւիթ եւ ցՍողոմոն որդի նորա, թէ ՚ի տանս յայսմիկ եւ յԵրուսաղէմ զոր ընտրեցի յամենայն ցեղից Իսրայէլի, եդի՛ց զանուն իմ յաւիտեան. 8եւ ո՛չ յաւելից շարժել զոտն Իսրայէլի յերկրէդ զոր ետու հարց նոցա. ոյք զգուշանայցեն առնել զամենայն որ ինչ պատուիրեցի նոցա, եւ ըստ ամենայն պատուիրանի բանին զոր պատուիրեաց նոցա ծառայ իմ Մովսէս, եւ ո՛չ լուան։ 9Եւ մոլորեցոյց զնոսա Մանասէ առնել չա՛ր առաջի Տեառն՝ առաւե՛լ քան զազգսն՝ զորս ապականեաց Տէր յերեսաց որդւոցն Իսրայէլի։ 10Եւ խօսեցաւ Տէր ՚ի ձեռն ծառայից իւրոց մարգարէից՝ եւ ասէ. 11Փոխանակ զի արա՛ր Մանասէ արքայ Յուդայ զգարշելիսդ զայդոսիկ զչարս առաւել քան զամենայն զոր արար Ամովրհացին առաջի իմ, եւ յանցեաւ Յուդայ կռովք իւրեանց. 12վասն այնորիկ ա՛յսպէս ասէ Տէր Աստուած Իսրայէլի. Ահա ե՛ս ածեմ չարիս ՚ի վերայ Երուսաղեմի եւ ՚ի վերայ Յուդայ, զի ամենայնի որ լսիցէ, հնչեսցեն երկոքին ականջք իւր։ 13Եւ ձգեցից ՚ի վերայ Երուսաղեմի զչափն Սամարեայ, եւ զկշիռ տանն Աքաաբու։ Եւ ջնջեցից զԵրուսաղէմ որպէս շիշ մի ջնջեալ որ կործանիցի ՚ի վերայ երեսաց իւրոց։ 14Եւ մերժեցից զմնացորդս ժառանգութեան իմոյ. եւ մատնեցից զնոսա ՚ի ձեռս թշնամեաց իւրեանց, եւ եղիցին յափշտակութիւն եւ յաւար ամենայն թշնամեաց իւրեանց. 15փոխանակ զի արարին չա՛ր առաջի իմ, եւ բարկացուցանէին զիս յօրէ յորմէհետէ հանի զնոսա յԵգիպտոսէ մինչեւ ցայսօր։ 16Նա եւ արիւն անպարտ եհեղ Մանասէ բազո՛ւմ յոյժ, մինչեւ ելից զԵրուսաղէմ ծա՛յր ՚ի ծայր. թո՛ղ զմեղս իւր որովք մեղոյցն զՅուդայ՝ առնել չա՛ր առաջի Տեառն։ 17Եւ մնացորդք բանից Մանասէի՝ եւ ամենայն ինչ զոր արար. եւ մեղք նորա զոր մեղաւ, ո՛չ աւանիկ գրեալ են ՚ի գիրս բանից աւուրց թագաւորացն Յուդայ։

18Եւ ննջեաց Մանասէ ընդ հարս իւր, եւ թաղեցաւ ՚ի պարտիզի տան իւրոյ, ՚ի պարտիզին Ոզայ. եւ թագաւորեաց Ամոն որդի նորա ընդ նորա։ 19Որդի քսան եւ երկուց ամաց Ամոն ՚ի թագաւորել իւրում, եւ երկոտասան ամ թագաւորեաց յԵրուսաղէմ. եւ անուն մօր նորա Մեսողոմիթ՝ դուստր Արուսայ Յետեբելայ։ 20Եւ արար չա՛ր առաջի Տեառն, որպէս արար Մանասէ հայր նորա. 21եւ գնաց յամենայն ճանապարհս յոր գնաց հայր նորա, եւ պաշտեաց զկուռս զոր պաշտեաց հայր նորա, եւ երկիր եպագ նոցա. 22եւ եթող զՏէր Աստուած հարց իւրոց, եւ ո՛չ գնաց ՚ի ճանապարհս Տեառն։ 23Եւ գումարեցան ծառայք Ամոնայ ՚ի վերայ նորա, եւ սպանին զարքայ ՚ի տան իւրում։ 24Եւ եհար ամենայն ժողովուրդն զամենայն գումարեալսն ՚ի վերայ արքայի Ամոնայ. եւ թագաւորեցոյց ժողովուրդ երկրին զՅովսիայ որդի նորա ընդ նորա։ 25Եւ մնացորդք բանիցն Ամոնայ զոր արար, ո՛չ աւանիկ գրեալ են ՚ի գիրս բանից աւուրց թագաւորացն Յուդայ։ 26Եւ ննջեաց Ամոն ընդ հարս իւր, եւ թաղեցին զնա ՚ի գերեզմանի իւրում ՚ի պարտիզին Ոզայ։ Եւ թագաւորեաց Յովսիա որդի նորա ընդ նորա։