1Որդի ամաց ութից Յովսիա ՚ի թագաւորել իւրում, եւ երեսուն եւ մի ամ թագաւորեաց յԵրուսաղէմ. եւ անուն մօր նորա Յեդիդա. դուստր Յեդիդայ ՚ի Բասուրովթայ։ 2Եւ արար ուղղութիւն առաջի Տեառն, եւ գնաց յամենայն ճանապարհս Դաւթի հօր իւրոյ. եւ ո՛չ խոտորեցաւ յաջ կամ յահեակ։ 3Եւ եղեւ յամի ութուտասներորդի Յովսիայ արքայի Յուդայ, յամսեանն եւթներորդի առաքեաց արքայ զՍափան զորդի Եսելիա զորդւոյ Մեսողոմայ զդպրապե՛տ տանն, եւ ասէ. 4Ե՛րթ առ Քեղկիա քահանայ մեծ, զի ձուլեսցեն զարծաթն մտեալ ՚ի տուն Տեառն, զոր ժողովեցին պահպանեալքն կշռով ՚ի ժողովրդենէն. 5եւ տայցեն զայն ՚ի ձեռս գործաւորաց գործոյն ցվերակացուս տանն Տեառն։ Եւ ետուն ցգործաւորս գործոցն ՚ի տանն Տեառն, զօրացուցանել զբեդեկ տանն Տեառն, 6ցհիւսունս եւ ցշինօղս եւ ցճարտարս, գնել փայտ եւ քարինս կոփածոյս՝ առ ՚ի կազմելոյ զբեդեկ տանն Տեառն։ 7Բայց ո՛չ առնէին համար արծաթոյն տուելոյ նոցա. քանզի յաւատ գործէին։ 8Եւ ասէ Քեղկիա քահանայ մեծ՝ ցՍափան դպրապետ. Մատեա՛ն օրինաց գտի ՚ի տան Տեառն։ Եւ ետ Քեղկիա ցՍափան. եւ ընթերցաւ զայն, 9եւ տարաւ առ արքայ զպատգամն, եւ ասէ. Ձուլեցին ծառայք քո զարծաթն գտեալ ՚ի տան Տեառն. եւ ետուն զայն ՚ի ձեռս գործաւորաց գործոյն վերակացուաց ՚ի տան Տեառն։ 10Եւ խօսեցաւ Սափան դպրապետ ընդ արքայի՝ եւ ասէ. Մատեա՛ն մի ետ ցիս Քեղկիա քահանայ. եւ ընթերցաւ զայն Սափան առաջի արքայի։ 11Եւ եղեւ իբրեւ լուաւ արքայ զբանս մատենի օրինացն, պատառեաց զհանդերձս իւր։ 12Եւ պատուէ՛ր ետ արքայ Քեղկիայ քահանայի, եւ Աքիկամայ որդւոյ Սափանայ, եւ Աքոբերայ որդւոյ Միքէի, եւ Սափանայ դպրապետի, եւ Յասայեայ ծառայի արքայի՝ եւ ասէ. 13Երթա՛յք խնդրեցէ՛ք ՚ի Տեառնէ վասն իմ եւ վասն ամենայն ժողովրդեանդ՝ եւ վասն ամենայն Յուդայ, վասն բանից մատենիդ գտելոյ այդորիկ. զի մեծ բարկութիւն Տեառն բորբոքեալ է ՚ի մեզ. փոխանակ զի ո՛չ լուան հարք մեր բանից մատենիդ այդորիկ առնել ըստ ամենայն գրելոցդ զմէնջ։ 14Եւ գնաց Քեղկիա քահանայ, եւ Աքիկամ, եւ Աքոբովր, եւ Սափան, եւ Յասայիա, առ Ողդա մարգարէ՝ կի՛ն Սելլովմայ որդւոյ Թեկուեայ, որդւոյ Արասայ պատմուճակի. եւ նա բնակէր յԵրուսաղէմ ՚ի Մասենա. եւ խօսեցան ընդ նմա։ 15Եւ ասէ ցնոսա. Ա՛յսպէս ասէ Տէր Աստուած Իսրայէլի. Ասացէ՛ք ցայրն որ առաքեաց զձեզ առ իս. 16ա՛յսպէս ասէ Տէր. Ահա ես ածեմ չարի՛ս ՚ի վերայ տեղւոյդ այդորիկ, եւ ՚ի վերայ բնակչաց դորա ըստ ամենայն բանից մատենին զոր ընթերցաւ արքայ Յուդայ. 17փոխանակ զի թողին զիս, եւ արկանէին խունկս աստուածոց օտարաց. զի բարկացուսցեն զիս գործովք ձեռաց իւրեանց. եւ բորբոքեսցի սրտմտութիւն իմ ՚ի տեղւոջ յայդմիկ, եւ մի՛ շիջցի։ 18Եւ ցարքայ Յուդայ որ առաքեաց զձեզ խնդրել զՏէր, զա՛յս ասասջիք. ա՛յսպէս ասէ Տէր Աստուած Իսրայէլի. Բանքն զոր լուար՝ ա՛յս են. 19փոխանակ զի կակղացաւ սիրտ քո, եւ պատկառեցեր յերեսաց Տեառն իբրեւ լուար զոր ինչ խօսեցաւ ՚ի վերայ տեղւոյդ այդորիկ, եւ ՚ի վերայ բնակչաց դորա լինել յապականութիւն եւ յանէծս, եւ պատառեցեր զհանդերձս քո, եւ լացեր առաջի իմ. եւ ես լուայ՝ ասէ Տէր։ 20Վասն այդորիկ ես յաւելում զքեզ առ հարս քո, եւ ժողովեսցիս ՚ի տեղւոջ քում յԵրուսաղէմ. եւ ո՛չ տեսցեն աչք քո զչարիսն զոր ես ածից ՚ի վերայ տեղւոյդ այդորիկ։