1Եւ եղեւ յամին իններորդի թագաւորութեան նորա, յամսեանն տասներորդի որ օր տասն էր ամսոյն. ե՛կն Նաբուքոդոնոսոր արքայն Բաբելոնի, եւ ամենայն զօրք իւր ՚ի վերայ Երուսաղեմի, եւ բանակեցաւ զնովաւ, եւ շինեաց շուրջ զնովաւ պարիսպ։ 2Եւ պաշարեցաւ քաղաքն մինչեւ ցամն մետասաներորդ Սեդեկիայ արքայի, 3եւ ցամիսն իններորդ. եւ սաստկացաւ սով ՚ի քաղաքին, եւ ո՛չ գոյր հաց ժողովրդեան երկրին։ 4Եւ խրամատեցաւ քաղաքն. եւ ամենայն արք պատերազմի ելին արտաքս գիշերի ՚ի ճանապարհ դրանն ՚ի մէջ պարսպացն, որ էր առ պարտիզաւն արքունի. եւ Քաղդէացիքն պատեալ էին շուրջ զքաղաքաւն. եւ գնաց ընդ ճանապարհն Արաբայ։ 5Եւ պնտեցաւ զօրն Քաղդեացւոց զհետ թագաւորին, եւ հասին նմա յԱրաբովթ Երիքովայ. եւ ամենայն զօրք նորա ցրուեցան ՚ի նմանէ. 6եւ կալան զթագաւորն, եւ ածին առ արքայն Բաբելոնի ՚ի Դեբղ՚աթայ. եւ խօսեցաւ ընդ նմա դատաստանօք։ 7Եւ զորդիսն Սեդեկիայ սպանին առաջի նորա, եւ զաչսն Սեդեկիայ կուրացոյց. եւ կապեա՛ց զնա կապանօք եւ տարա՛ւ ՚ի Բաբելոն։

8Եւ յամսեանն հինգերորդի, որ օր եւթն էր ամսոյն. այն ամ ինն եւ տասներորդ էր Նաբուքոդոնոսորայ արքայի Բաբելացւոց. եկն Նաբուզարդան դահճապետ՝ յանդիմանակաց արքային Բաբելոնի յԵրուսաղէմ. 9եւ այրեաց զտունն Տեառն, եւ զտուն թագաւորին. եւ զամենայն տունս Երուսաղեմի, եւ զամենայն տունս այրեաց հրով։ 10Եւ զպարիսպն Երուսաղեմի շուրջանակի քակեցին ամենայն զօրքն Քաղդեացւոց որ ընդ դահճապետին։ 11Եւ զաւելորդս ժողովրդեանն զմնացեալս ՚ի քաղաքին, եւ զանկեալսն յարքայն Բաբելացւոց. եւ զա՛յլ եւս խուժան ժողովրդեանն, խաղացոյց Նաբուզարդան դահճապետ։ 12Եւ յաղքատաց երկրին եթող դահճապետն յայգեգործս եւ յարդիւնարարս։ 13Եւ զսիւնսն պղնձիս զերկոսին որ ՚ի տան Տեառն, եւ զմենքենովթսն, եւ զծովն պղնձի որ ՚ի տան Տեառն, խորտակեցին Քաղդէացիքն, եւ բարձին զպղինձ նոցա ՚ի Բաբելոն։ 14Եւ զսանսն, եւ զկատսայսն, եւ զտաշտսն, եւ զտուփս, եւ զամենայն անօթս պղնձիս որովք պաշտէին՝ առին։ 15Եւ զբուրուառսն, եւ զափսէսն արծաթիս եւ զոսկիս ա՛ռ դահճապետն։ 16Եւ զսիւնսն զերկոսին, եւ զծովն զմի. եւ զմեքենովթսն զոր արար Սողոմոն ՚ի տան Տեառն. եւ ո՛չ գոյր կշիռ պղնձոյ ամենայն անօթոցն. 17յութուտասն կանգնոյ բարձրութիւն միոյ սեանն. եւ քովթար պղնձի ՚ի վերայ նորա. եւ բարձրութիւն միոյ քովթարայ՝ յերից կանգնոց. եւ սաբակ, եւ նռնաձեւք ՚ի վերայ քովթարայն շուրջանակի ամենայն պղնձի. ըստ նմին օրինակի եւ սեանն երկրորդի ՚ի վերայ սաբաքին։ 18Եւ ա՛ռ դահճապետն զՍարայիա քահանայն զառաջինն, եւ զՍոփոնիա զերկրորդ քահանայ, եւ զերիս պահապանս կշռոյն. 19եւ ՚ի քաղաքէ անտի ա՛ռ ներքինի մի, որ էր ոստիկան արանց պատերազմողաց. եւ հինգ այր ՚ի յանդիմանակացաց արքայի գտելոց ՚ի քաղաքին. եւ զդպրապետ իշխան զօրուն զկարգիչ ժողովրդեան երկրին, եւ եւթն ա՛յլ այր ՚ի ժողովրդենէ երկրին զգտեալս ՚ի քաղաքին. 20ա՛ռ զնոսա Նաբուզարդան դահճապետ, եւ տարաւ զնոսա առ արքայն Բաբելոնի ՚ի Դեբլաթա։ 21Եւ եհար զնոսա արքայն Բաբելոնի, եւ սպան զնոսա ՚ի Դեբլաթա յերկրին Եմաթայ։ Եւ գերեցա՛ւ Յուդայ յերկրէ՛ իւրմէ։ 22Եւ զժողովուրդն որ մնաց ՚ի Յուդայ, եթող Նաբուքոդոնոսոր արքայ Բաբելոնի. եւ կացո՛յց ՚ի վերայ նոցա զԳոդողիա որդի Աքիկամայ որդւոյ Սափանայ։

23Եւ լուան ամենայն իշխանք զօրուն նորա՝ եւ արք նոցա՝ եթէ կացոյց արքայ Բաբելոնի ՚ի վերայ նոցա զԳոդողիա. եւ եկին առ Գոդողիա ՚ի Մասեփա. Իսմայէլ որդի Նաթանայ, եւ Յովնան որդի Կարէի, եւ Սարայիա որդի Թանայեմայ Սովփաթացի, եւ Յեզոնիա որդի Մաքաթու, ինքեանք եւ արք իւրեանց. 24Եւ երդուան Գոդողիայ՝ ինքեանք եւ արք իւրեանց. եւ ասէ ցնոսա. Մի՛ երկնչիք յասպատակէ Քաղդեացւոցն. նստա՛յք յերկրիս, եւ ծառայեցէ՛ք արքային Բաբելոնի, եւ բարի՛ եղիցի ձեզ։ 25Եւ եղեւ յամսեանն եւթներորդի, եկն Իսմայէլ որդի Նաթանայ որդւոյ Ելիսամայ ՚ի զաւակէ թագաւորաց. եւ տասն այր ընդ նմա, եւ հարին զԳոդողիա եւ մեռաւ, եւ զՀրէայսն եւ զՔաղդէացիսն որ էին ընդ նմա ՚ի Մասեփա։ 26Եւ յարեաւ ամենայն ժողովուրդն ՚ի փոքուէ՛ մինչեւ ցմեծ, եւ իշխանք զօրուն՝ մտին յԵգիպտոս. զի երկեան յերեսաց Քաղդեացւոցն։

27Եւ եղեւ յերեսներորդի եւ յեւթներորդի ամի գերութեանն Յովակիմայ արքայի Յուդայ, յամսեանն երկոտասաներորդի, ՚ի քսան եւ յեւթն ամսոյն, բարձրացո՛յց Իլմարուդաք արքայ Բաբելոնի յամին յորում թագաւորութեանց՝ զգլուխ Յովակիմայ արքայի Յուդայ. եւ եհան զնա ՚ի տանէ բանտին իւրոյ, 28եւ խօսեցաւ ընդ նմա քաղցրութեամբ. եւ արկ զաթոռ նորա ՚ի վերո՛յ քան զաթոռս թագաւորացն որ ընդ նմա ՚ի Բաբելոնի։ 29Եւ փոխեաց զհանդերձ բանտին նորա. եւ ուտէր հանապազ հաց առաջի նորա զամենայն աւուրս կենաց իւրոց։ 30Եւ ռոճիկ նորա ռոճիկ հանապազորդ տուաւ նմա ՚ի տանէ՛ թագաւորին, համարով օրըստօրէ զամենայն աւուրս կենաց իւրոց։