1Եւ խօսեցաւ Եղիսեէ ընդ կնոջն զորոյ կեցոյց զորդին՝ եւ ասէ. Արի՛ գնա՛ դու ՚ի տուն քո՝ եւ լե՛ր պանդուխտ ուր եւ պանդխտիցիս, զի կոչեաց Տէր սո՛վ ՚ի վերայ երկրիս. քանզի ե՛կն իսկ սով զեւթն ամ ՚ի վերայ երկրին։ 2Եւ յարեաւ կինն եւ արար ըստ բանին Եղիսէի. եւ գնաց ինքն եւ տուն իւր, եւ պանդխտեցաւ յերկրին այլազգեաց եւթն ամ։

3Եւ եղեւ յե՛տ կատարելոյ ամացն եւթանց, դարձա՛ւ կինն յայլազգեաց, եւ եկն բողոք հարկանել առ արքայ վասն տան իւրոյ եւ վասն անդւոց իւրոց։ 4Եւ արքայ խօսեցաւ ընդ Գեեզեայ պատանեկին Եղիսէի առնն Աստուծոյ եւ ասէ. Պատմեա՛ դու ինձ զամենայն մեծամեծսն զոր արար Եղիսեէ։ 5Եւ եղեւ ՚ի պատմելն նորա արքայի՝ թէ ո՞րպէս կենդանացոյց զորդին զմեռեալ, եւ ահաւանիկ առաջի՛ անկաւ կինն զորոյ կենդանացոյց զորդին նորա Եղիսեէ. աղաղակէր առ արքայ վասն տան իւրոյ եւ վասն անդոց իւրոց. եւ ասէ Գեեզի. Տէ՛ր արքայ, ա՛յս կին է, եւ ա՛յս որդի դորա, զոր կենդանացոյց Եղիսեէ։ 6Եւ եհարց արքայ ցկինն՝ եւ պատմեաց նմա. եւ ետ նմա արքայ ներքինի մի եւ ասէ. Դարձո՛ դմա զամենայն զարդիւնսն, եւ զամենայն զարմտիսն անդոյն, յօրէ յորմէ եթող զերկիրս մինչեւ ցայժմ։

7Եւ եկն Եղիսեէ ՚ի Դամասկոս. եւ որդի Ադերայ արքայ Ասորւոց հիւանդանա՛յր. եւ պատմեցին նմա եւ ասեն. Ե՛կն այրն Աստուծոյ այսր։ 8Եւ ասէ արքայ ցԱզայէլ. Ա՛ռ ՚ի ձեռին քում մաննայ, եւ ե՛լ ընդ առաջ առնն Աստուծոյ, եւ հա՛րց զՏէր նովաւ, եւ ասասցես, եթէ կեցցե՞մ ՚ի հիւանդութենէ աստի իմմէ յայսմանէ։ 9Եւ գնա՛ց Ազայէլ ընդ առաջ նորա, եւ ա՛ռ մաննայ ՚ի ձեռին իւրում, եւ զամենայն բարութիւնս Դամասկոսի բեռինս ուղտուց քառասնից. չոգաւ եկաց առաջի նորա եւ ասէ. Հա՛յր Եղիսեէ. որդի քո որդի Ադերայ արքայ Ասորւոց առաքեաց զիս առ քեզ՝ եւ ասէ, եթէ կեցցե՞մ ՚ի հիւանդութենէ աստի իմմէ յայսմանէ։ 10Եւ ասէ ցնա Եղիսեէ. Ե՛րթ եւ ասա՛ ցնա. Կելով կեցցես։ Եւ եցոյց ինձ Տէր զի մահու մեռանիցի։ 11Եւ եկաց առաջի երեսաց նորա պատկառեալ. եւ ելաց այրն Աստուծոյ։ 12Եւ ասէ Ազայէլ. Ընդէ՞ր լաս տէ՛ր իմ։ Եւ ասէ. Գիտե՛մ զինչ գործելոց ես ընդ որդիսն Իսրայէլի, զամուրս նոցա հրձի՛գ արասցես, եւ զընտիրս նոցա սրո՛վ կոտորեսցես, եւ զտղայս նոցա սատակեսցես, եւ զյղիս նոցա հերձցես։ 13Եւ ասէ Ազայէլ. Ո՞վ է ծառայ քո շո՛ւն մի, թէ առնիցէ զբանդ զայդ։ Եւ ասէ Եղիսեէ. Եցոյց ինձ Տէր թագաւորե՛լ քեզ ՚ի վերայ Ասորւոց։ 14Եւ գնաց յԵղիսէէ եւ եմուտ առ տէր իւր. եւ ասէ ցնա. Զի՞նչ ասաց Եղիսեէ։ Եւ ասէ. Ասա՛ց ցիս թէ կելով կեցցէ։ 15Եւ եղեւ ՚ի վաղիւ անդր՝ եւ ա՛ռ մաքման եւ եթաց ՚ի ջուր եւ արկ զերեսօք իւրովք՝ եւ մեռաւ։ Եւ թագաւորեաց Ազայէլ ընդ նորա։ 16Յամի հինգերորդի Յովրամայ որդւոյ Աքաաբու արքայի Իսրայէլի, թագաւորեաց Յովրամ որդի Յովսափատայ արքայի Յուդայ։ 17Որդի երեսուն եւ երկո՛ւ ամաց էր ՚ի թագաւորել իւրում. եւ ութ ամ թագաւորեաց յԵրուսաղէմ։ 18Եւ գնաց զճանապարհս թագաւորաց Իսրայէլի, որպէս արար տունն Աքաաբու. զի դուստր Աքաաբու էր նորա կնութեան. եւ արար չար առաջի Տեառն։ 19Եւ ո՛չ կամեցաւ Տէր ապականել զՅուդայ վասն Դաւթի ծառայի իւրոյ՝ որպէս եւ ասաց տա՛լ նմա ճրագ, եւ որդւոց նորա զամենայն աւուրս։ 20Եւ յաւուրս նորա նշկահեաց Եդոմ ՚ի ներքուստ ձեռին Յուդայ, եւ թագաւորեցո՛յց ՚ի վերայ իւր թագաւոր։ 21Եւ ե՛լ Յովրամ ՚ի Սիովր, եւ ամենայն կառք ընդ նմա. եւ եղեւ ընդ վաղայարոյցս լինելոյ գիշերոյն, եւ եհար զԵդոմն զպատեալն զիւրեաւ եւ զիշխանս կառացն. եւ փախեաւ զօրն յիւրաքանչիւր խորանս իւրեանց։ 22Եւ նշկահեաց Եդոմ ՚ի ներքուստ ձեռին Յուդայ մինչեւ ցայսօր։ Յա՛յնմ ժամանակի նշկահեաց եւ Ղ՚ոբնա։ 23Եւ մնացորդք բանից Յովրամայ, եւ ամենայն ինչ զոր արար. ո՞չ աւանիկ գրեալ են ՚ի գիրս բանից աւուրց թագաւորացն Յուդայ։

24Եւ ննջեաց Յովրամ ընդ հարս իւր, եւ թաղեցաւ ընդ հարս իւր ՚ի քաղաքի Դաւթի հօր իւրոյ. եւ թագաւորեաց Ոքոզիա որդի նորա ընդ նորա։ 25Յամի՛ երկոտասաներորդի Յովրամայ որդւոյ Աքաաբու արքայի Իսրայէլի թագաւորեաց Ոքոզիա որդի Յովրամայ արքայի Յուդայ։ 26Քսա՛ն եւ երկուց ամա՛ց էր Ոքոզիա ՚ի թագաւորել իւրում, եւ տարի մի թագաւորեաց յԵրուսաղէմ. եւ անուն մօր նորա Գոդողիա դուստր Ամրեայ արքայի Իսրայէլի։ 27Եւ գնաց զճանապարհ տանն Աքաաբու. եւ արար չար առաջի Տեառն որպէս եւ տունն Աքաաբու. քանզի փեսա՛յ էր տանն Աքաաբու։ 28Եւ գնաց ընդ Յովրամայ որդւոյ Աքաաբու՝ ՚ի պատերազմ ՚ի վերայ Ազայելի արքայի Ասորւոց յՌամաթ Գաղաադ, եւ հարին Ասորիքն զՅովրամ։ 29Եւ դարձաւ արքայ Յովրամ բժշկե՛լ ՚ի Յեզրայէլ՝ ՚ի վիրացն զոր խոցեցին զնա Ասորիքն յՌամաթ՝ ՚ի պատերազմել նորա ընդ Ազայելի արքայի Ասորւոց։ Եւ Ոքոզիա որդի Յովրամայ արքայ Յուդայ՝ է՛ջ տեսանել զՅովրամ որդի Աքաաբու Յեզրայէլ, զի հիւանդանայր նա։