1Եւ Եղիսեէ մարգարէ կոչեաց զմի յորդւոց մարգարէիցն՝ եւ ասէ ցնա. Պնդեա՛ զմէջ քո, եւ ա՛ռ զսրուակ իւղոյս ՚ի ձեռին քում. եւ ե՛րթ յՌամաթ Գաղաադ։ 2Եւ մտցե՛ս անդր, եւ տեսցես դու անդ զՅէու զորդի Յովսափատայ զորդի Ամեսսեայ. եւ մտցես եւ յարուսցե՛ս զնա ՚ի միջոյ եղբարց իւրոց. եւ տարցի՛ս զնա սենեակ ՚ի սենեկէ. 3եւ առցես զսրուակդ իւղոյ, եւ արկցես ՚ի գլուխ նորա, եւ ասասցես. Ա՛յսպէս ասէ Տէր. Օծի՛ զքեզ թագաւոր ՚ի վերայ Իսրայէլի. եւ բացցե՛ս զդուռն եւ փախիցես, եւ մի՛ մնասցես։ 4Եւ գնաց պատանեակն մարգարէ յՌամաթ Գաղաադ, 5եւ եմուտ անդր. եւ ահա իշխանք զօրուն նստէին. եւ ասէ. Բա՛ն ինչ է ինձ ընդ քեզ իշխանդ։ Եւ ասէ Յէու. Առ ո՞ յամենեցունց ՚ի մէնջ։ Եւ ասէ. Առ քե՛զ իշխանդ։ 6Եւ յարեաւ եմուտ ՚ի սենեակն, եւ արկ զեւղն ՚ի գլուխ նորա. եւ ասէ ցնա. Ա՛յսպէս ասէ Տէր Աստուած Իսրայէլի. Օծի՛ զքեզ ՚ի թագաւոր ժողովրդեան Տեառն ՚ի վերայ Իսրայէլի. 7զի սատակեսցե՛ս զտունն Աքաաբու տեառն քո յերեսաց քոց. եւ առցե՛ս զվրէժ արեան ծառայից իմոց մարգարէից, եւ զարեանց ամենայն ծառայից Տեառն ՚ի ձեռաց Յեզաբելայ, եւ ՚ի ձեռաց ամենայն տան նորա։ 8Եւ սատակեսցես զտանն Աքաաբու՝ որ միզիցէ զորմով. եւ զնեղեալն եւ զմնացեալն յԻսրայէլէ. 9տա՛լ զտունն Աքաաբու իբրեւ զտունն Յերոբովամու որդւոյ Նաբատայ. եւ իբրեւ զտունն Բաասայ որդւոյ Աքիայ. 10եւ զՅեզաբէլ կերիցեն շունք ՚ի վիճակին Յեզրայելի. եւ ո՛չ ոք իցէ որ թաղիցէ։ Եւ եբաց զդուրսն եւ փախեաւ։ 11Եւ Յէու ե՛լ առ ծառայս տեառն իւրոյ. եւ ասեն ցնա. Ողջո՞յն է, զի՞ եկն առ քեզ մոլի՛ն այն։ Եւ ասէ ցնոսա. Դուք ինքնի՛ն գիտէք զայրն՝ եւ զբաջաղանս նորա։ 12Եւ ասեն. Անիրաւութիւն է այդ՝ պատմեա՛ մեզ։ Եւ ասէ ցնոսա Յէու. Ա՛յսպէս եւ ա՛յսպէս խօսեցաւ ընդ իս, եւ ասէ. Ա՛յսպէս ասէ Տէր. Օծի՛ զքեզ թագաւոր ՚ի վերայ Իսրայէլի։ 13Իբրեւ լուան՝ փութացան եւ առին իւրաքանչիւր զբաճկոն իւր, եւ եդին ՚ի ներքոյ նորա ՚ի վերայ միոյ աստիճանացն ուր նստէին. եւ փող հարին եղջերեաւն՝ եւ ասեն. Թագաւորեա՛ց Յէու։

14Եւ զօրաժողով եղեւ Յէու որդի Յովսափատայ որդւոյն Ամեսսեայ ՚ի վերայ Յովրամայ, եւ Յովրամ զգուշացեալ էր յՌամաթ Գաղաադ. ի՛նքն եւ ամենայն Իսրայէլ յերեսաց Ազայելի արքայի Ասորւոց. 15եւ դարձաւ Յովրա՛մ արքայ բժշկել ՚ի Յեզրայէլ՝ ՚ի վիրաց անտի զոր խոցեցին զնա Ասորիքն ՚ի պատերազմել նոցա ընդ Ազայելի արքայի Ասորւոց։ Եւ ասէ Յէու. Եթէ իցէ ոգի ձեր ընդ իս՝ մի՛ ելցէ փախստական ՚ի քաղաքէն երթալ պատմել ՚ի Յեզրայէլ։ 16Եւ հեծաւ Յէու եւ գնաց, եւ էջ Յեզրայէլ. զի Յովրամ արքայ Իսրայէլի բժշկէր ՚ի Յեզրայէլ ՚ի նետիցն զոր խոցեցին զնա յՌամաթ ՚ի պատերազմել ընդ Ազայելի արքայի Ասորւոց. զի նա զօրաւոր էր՝ եւ այր զօրութեան. եւ ննջեաց անդ. եւ Ոքոզիա արքայ Յուդայ էջ տեսանել զՅովրամ։ 17Եւ դէտն ե՛լ յաշտարակն Յեզրայելի, եւ ետես փոշի ՚ի գալն Յէուայ եւ ասէ. Փոշի՛ տեսանեմ ես։ Եւ ասէ Յովրամ. Ա՛ռ հեծեալ մի եւ առաքեա՛ ընդ առաջ նոցա, եւ ասասցէ. Ողջո՞յն է։ 18Եւ չոգաւ հեծեալն ձիոյ ընդ առաջ նորա՝ եւ ասէ. Ա՛յսպէս ասէ արքայ, թէ ողջո՞յն իցէ։ Եւ ասէ Յէու. Զի՞ կայ քո եւ ողջունի, դարձի՛ր զկնի իմ։ Եւ պատմեաց դէտն եւ ասէ. Եհա՛ս ՚ի նոսա հրեշտակն՝ եւ ո՛չ դարձաւ։ 19Եւ արձակեաց երկրորդ հեծեալ մի ձիոյ՝ եւ ասէ. Ա՛յսպէս ասէ արքայ, թէ ողջո՛յն իցէ։ Եւ ասէ Յէու. Զի՞ կայ քո եւ ողջունի, դարձի՛ր զկնի իմ։ 20Եւ պատմեաց դէտն եւ ասէ. Եհա՛ս ՚ի նոսա, եւ ո՛չ դարձաւ։ եւ որ ածէրն՝ ած զՅէու զորդին Ամեսսեայ. քանզի տագնապաւ եհաս։ 21Եւ ասէ Յովրամ. Լծեա՛։ Եւ լծեցին կառս. եւ ամբարձաւ Յովրամ արքայ Իսրայէլի, եւ Ոքոզիա արքայ Յուդայ՝ այր յիւրաքանչիւր կառս իւր, եւ ելին ընդ առաջ Յէուայ. եւ գտին զնա ՚ի վիճակին Նաբաւթայ Յեզրայելացւոյ։ 22Եւ եղեւ իբրեւ ետես Յովրամ զՅէու, եւ ասէ. Ողջո՞յն է Յէու։ Եւ ասէ Յէու. Զի՞նչ ողջոյն է, տակաւին պոռնկութիւն Յեզաբելայ մօր քոյ՝ եւ կախարդութիւն նորա յաճախիցե՞ն։ 23Եւ դարձոյց Յովրամ զկառս իւր եւ փախեաւ, եւ ասէ ցՈքոզիա. Դա՛ւ է Ոքոզիա։ 24Եւ ընդ գի՛րկս եմուտ, եւ եհար զՅովրամ ընդ մէջ թիկանց նորա, եւ ել նետն ընդ սիրտ նորա, եւ կծկեցաւ ՚ի վերայ ծնգաց իւրոց։ 25Եւ ասէ ցԲադեկար սպառազէնն իւր. Ընկեա՛ զդա ՚ի վիճակի ագարակին Նաբովթայ Յեզրայելացւոյ, զի յիշե՛մ մինչդեռ ես եւ դու հեծեալ էաք ՚ի զոյգս՝ զկնի Աքաաբու հօր դորա. եւ Տէր ա՛ռ ՚ի վերայ դորա զառածս զայս։ 26Եթէ ո՛չ զարիւնն Նաբովթայ՝ եւ զարիւն որդւոց նորա զոր տեսին երէկ՝ ասէ Տէր, հատուցի՛ց նմա ՚ի վիճակիս յայսմիկ՝ ասէ Տէր. եւ արդ ա՛ռ ընկեա՛ զդա ՚ի վիճակ այդր ըստ բանին Տեառն։ 27Եւ Ոքոզիա արքայ Յուդայ ետես՝ եւ փախեաւ ընդ ճանապարհն Բեթանգանայ. եւ պնդեցաւ զհետ նորա Յէու՝ եւ ասէ. Հա՛պա, եւ զդա եւս։ Եւ եհար զնա ՚ի կառսն մինչդեռ ելանէր ընդ զառ ՚ի վերն Բերայի, որ է Յեբղաամ. եւ փախեաւ ՚ի Մակեդդով, եւ ա՛նդ մեռաւ։ 28Եւ հանին զնա ծառայք իւր յԵրուսաղէմ. եւ թաղեցին զնա ՚ի գերեզմանի իւրում ընդ հարս իւր ՚ի քաղաքին Դաւթի։

29Եւ յամին մետասաներորդի՛ Յովրամայ արքային Իսրայէլի, թագաւորեաց Ոքոզիա ՚ի վերայ Յուդայ։ 30Եւ եկն Յէու Յեզրայէլ։ Եւ Յեզաբէլ լուաւ, եւ ծարրեաց զաչս իւր՝ եւ զարդարեաց զգլուխ իւր՝ եւ հայէ՛ր ընդ պատուհանն։ 31Եւ Յէու մտանէր ՚ի քաղաքն. եւ ասէ. Ողջո՞յն իցէ Զա՛մրի տիրասպան։ 32Եւ ամբա՛րձ զերեսս իւր ՚ի պատուհանն՝ եւ ասէ. Ո՞վ ես դու, է՛ջ առ իս։ Եւ հայեցան առ նա ՚ի խոնարհ երկու ներքինիք։ 33Եւ ասէ. Ընկեցէ՛ք զդա ՚ի խոնարհ։ Եւ ընկեցի՛ն զնա. եւ ցայտեցա՛ւ յարենէ նորա զորմովքն եւ զձիովքն։ եւ կոխեցին զնա առաթուր։ 34Եւ ինքն եմուտ՝ եկեր եւ արբ. եւ ասէ. Տեսէ՛ք զանիծեալն զայն՝ եւ թաղեցէ՛ք զնա զի դուստր թագաւորի՛ է։ 35Եւ չոգան թաղել զնա, եւ ո՛չ ինչ գտին ՚ի նմանէ, բայց զգագաթնն եւ զոտսն եւ զթաթս ձեռացն. 36եւ դարձան պատմեցին նմա. եւ ասէ. Բա՛ն Տեառն է զոր խօսեցաւ ՚ի ձեռն Եղիայի Թեզբացւոյ՝ եւ ասէ. ՚Ի վիճակի՛ն Յեզրայելի կերիցեն շո՛ւնք զմարմինս Յեզաբելայ. 37եւ եղիցի դին Յեզաբելայ իբրեւ զա՛ղբ ՚ի վերայ երեսաց անդոյ վիճակին. զի մի՛ լինիցի ասել նոցա՝ թէ ա՛յս է Յեզաբէլ։