1Շմաւոն Պետրոս ծառայ եւ առաքեալ Յիսուսի Քրիստոսի, որոց հանգիտապատի՛ւ մեզ հասէքդ հաւատոց յարդարութիւն Աստուծոյ մերոյ եւ Փրկչին Յիսուսի Քրիստոսի։ 2Շնո՛րհք ընդ ձեզ՝ եւ խաղաղութիւն բազմասցի, գիտութեամբն Աստուծոյ՝ եւ Յիսուսի Քրիստոսի Տեառն մերոյ։

3Որպէս ամենայն ինչ մեզ՝ իւրոյ աստուածեղէ՛ն զօրութեանն առ ՚ի կեա՛նս եւ աստուածպաշտութի՛ւն շնորհեալ. ՚ի ձե՛ռն գիտութեան այնորիկ որ կոչեացն զմեզ յիւր ՚ի փառսն եւ ՚ի վայելչութիւն. 4որովք մեծամեծքն եւ պատուակա՛ն աւետիք պարգեւեալ են մեզ. զի նոքիմբք աստուածեղէն բնութեանն հաւատոցն լինիցիմք հաղորդակիցք, փախուցեալք ՚ի ցանկութեանց աշխարհիս եւ յապականութեանց։ 5Եւ սմին այսմիկ զամենա՛յն փոյթ ՚ի մէջ առեալ՝ ձերո՛վքն հաւատովք մատակարարիջիք զառաքինութիւնն, եւ առաքինուեամբն զգիտութիւն, 6եւ գիտութեամբն զժուժկալութիւն, եւ ժուժկալութեամբն զհամբերութիւն, եւ համբերութեամբն զաստուածպաշտութիւն, 7եւ աստուածպաշտութեամբն զեղբայրսիրութիւն, եւ եղբայրսիրութեամբն զսէ՛ր։ 8Զայսոսիկ ձեր յանձին կալեալ եւ ՚ի սո՛յն յաճախեալ, ո՛չ դատարկս եւ անպտուղս հաստատիցեն զձեզ ՚ի Տեառն մերոյ Յիսուսի Քրիստոսի գիտութիւնն։ 9Իսկ յոր ո՛չն իցեն սոքա մերձ, կո՛յր է եւ զաչացո՛ւ. ՚ի մոռացօ՛նս դարձուցեալ զսրբութիւն առաջնոց իւրո՛ցն յանցանաց։ 10Վասն որոյ ե՛ղբարք՝ առաւե՛լ փութասջիք՝ զի բարեացն գործովք հաստատուն զձեր կոչումնն եւ զընտրութիւն պահիցէք։ Զայս արարեալ՝ ո՛չ երբէք յանցանիցէք. 11զի այսպէս առատապէ՛ս շնորհեսցի ձեզ մուտ ՚ի յաւիտենական արքայութիւն Տեառն մերոյ եւ Փրկչի Յիսուսի Քրիստոսի։ 12Որով պատրաստիցեմ միշտ ձեզ յիշեցուցանե՛լ վասն սոցին, առաւե՛լ եւս գիտակա՛ցն եւ հաստատելոցն՝ եկեալ հասեա՛լ ճշմարտութեանն։

13Քանզի իրաւունս համարիմ մինչդեռ ե՛մ ՚ի մարմնի աստ՝ զարթուցանե՛լ զձեզ յիշատակօք։ 14Գիտեմ թէ վաղվաղակի՛ է լինելոց մերկանալ յինէն մարմնոյս. որպէս եւ Տէր մեր Յիսուս Քրիստոս եցոյց ինձ։ 15Եւ փութամ ճեպիմ միշտ զձեզ յորդորե՛լ. զի յետ իմոյ ելանելոյ յաշխարհէս՝ առնիցէ՛ք զյիշատակս այսոցիկ։ 16Քանզի ո՛չ եթէ պաճուճեալ ինչ առասպելեա՛ց զհետ երթեալ ցուցաք ձեզ զՏեառն մերոյ Յիսուսի Քրիստոսի զզօրութիւն եւ զգալուստն. այլ մեզէն եղեալ ականատեսք նորա մեծութեանն։ 17Քանզի առեալ յԱստուծոյ եւ ՚ի Հօրէ զփառս եւ զպատիւ. յեկեալ յայնպիսի բարբառոյ՝ մեծվայելչութեան փառաց անտի եթէ. Դա է Որդի իմ սիրելի՛ ընդ որ հաճեցայ։ 18Եւ զայս բարբառ մեք իսկ լուաք եկեալ յերկնից՝ որ ընդ նմա՛ իսկ էաք ՚ի սուրբ լերինն։ 19Եւ ունիմք հաստատագո՛յն զբանսն մարգարէականսն. որում եթէ անսայցէք՝ բարւո՛ք առնէք. իբրեւ ճրագի որ տայցէ լոյս ՚ի խաւարչտի՛ն տեղւոջ, մինչեւ տիւն լուսաւորեսցէ, եւ արուսեակն ծագեսցէ ՚ի սիրտս ձեր։

20Բայց նախ՝ այսմ գիտակ լինիջիք. զի ամենայն մարգարէութիւն իւրոց գրոց լուծումն ո՛չ ունի։ 21Քանզի ո՛չ եթէ ըստ կամաց մարդկան տուաւ մարգարէութիւն երբեք, այլ ՚ի Հոգւոյն Սրբոյ կրեալք՝ խօսեցան մարդիկ յԱստուծոյ։