1Զայս ձեզ սիրելիք՝ երկրո՛րդ թուղթ գրեմ. որով զարթուցի՛ց ՚ի յիշատակ զհաստատուն միտս ձեր, 2յիշե՛լ զյառաջագոյն ասացեալ պատգամս ՚ի սրբոց մարգարէից, եւ յառաքելոցն ձերոց՝ զպատուէրս Տեառն եւ Փրկչին։ 3Բայց զայս նախ գիտասջի՛ք, զի յաւուրս յետինս եկեսցեն արհամարհօ՛ղք՝ այպանօ՛ղք, որ ըստ իւրեա՛նց ցանկութեանցն գնայցեն. 4եւ ասիցեն. Ո՞ւր են աւետիք գալստեան նորա. զի յորմէ հետէ հարքն ննջեցին՝ ամենայն ինչ նոյնպէս կայ մնա՛յ իսկզբանէ արարածոց։ 5Եւ զայն մոռացեա՛լ իցէ նոցա՝ որք զայսն կամին. եթէ երկինք՝ եղե՛ն իսկզբանէ, եւ երկիր՝ ՚ի ջրոց, եւ ջուրք՝ հաստատեալ կան բանիւն Աստուծոյ. 6վասն որոյ երբեմն աշխարհ ջրհեղեղա՛ւ ապականեալ կորեաւ։ 7Եւ այժմ երկինք եւ երկիր նովի՛ն բանիւ գանձեալ են. հրո՛յ պահեալք յօրն դատաստանի, եւ կորստեան ամպարիշտ մարդկան։ 8Եւ այս եւս մի՛ լիցի ՚ի ձէնջ ծածկեալ սի՛րելիք, զի մի օր Տեառն իբրեւ զհազա՛ր ամ է, եւ հազար ամ իբրեւ զմի՛ օր։ 9Ո՛չ յամեցուսցէ Տէր զաւետիսն՝ որպէս ոմանք յամրն համարին, այլ երկայնամի՛տ լինի առ ձեզ. քանզի ո՛չ կամի՝ եթէ ոք կորիցէ, այլ զամենեցո՛ւն հասանել յապաշխարութիւն։ 10Այլ եկեսցէ օր Տեառն իբրեւ զգո՛ղ. յորում երկինք տագնապա՛ւ անցցեն, եւ բնութիւնք հրո՛վ կիզեալ լուծցին, եւ երկիր՝ եւ որ միանգամ ՚ի նմա՛ գործք գտանիցին։ 11Եւ ՚ի լուծանել այսպէս այսր ամենայնի, որպիսի՞ ինչ պարտ իցէ ձեզ գտանել. այլ սուրբ եւ աստուածապա՛շտ կարգաւ՝ ակն ունել, 12եւ փութա՛լ հասանել գալստեան աւուրն Տեառն. յորում երկինք հրայրեացք լուծանիցին, եւ բնութիւնք հրդեհեալ հալիցին։ 13Նորոյ երկնից՝ եւ նորո՛յ երկրի՛ ըստ աւետեացն հայեցեալ սպասեմք, յորս արդարութի՛ւնն բնակէ։ 14Վասն որոյ սի՛րելիք՝ այսոցիկ սպասեալ, փո՛յթ յանձին ունիջիք՝ անբի՛ծք եւ անարատք գտանել նմա ՚ի խաղաղութիւն. 15եւ զՏեառն երկայնմտութիւնն՝ փրկութիւն համարեսջի՛ք։ Զոր օրինակ եւ սիրելի եղբայրն մեր Պաւղոս, ըստ շնորհելոյ իմաստութեանն նմա յԱստուծոյ՝ գրեա՛ց ձեզ. 16որպէս եւ յամենայն իսկ թուղթսն խօսի վասն այսոցիկ. յորս գտանի ինչ ինչ դժուարիմա՛ց, զոր անուսմունքն եւ յողդողդքն կամակորեն. որպէս եւ զամենա՛յն իսկ գիրս առ իւրեանց անձանցն կորուստ։ 17Դուք այսուհետեւ ս՛իրելիք՝ իբրեւ զկանխագէ՛տս զգուշասջիք, զի մի՛ անառակ մոլորութեամբն զգածեալք՝ անկանիջիք յաստեաց հաստատութեանն։ 18Աճեցէ՛ք շնորհօք եւ գիտութեամբն Տեառն մերոյ եւ Փրկչին Յիսուսի Քրիստոսի։ նմա փա՛ռք՝ եւ այժմ եւ յօրն յաւիտենից. ամէն։