1Եին ոմանք յԱնտիոք ըստ եկեղեցւոյն, մարգարէք եւ վարդապետք. Բառնաբաս՝ եւ Շմաւովն կոչեցեալն Նւգէր, եւ Ղուկիո՛ս Կիւրենացի, եւ Մանայեն դայեկորդի՛ Հերովդի չորրորդապետի, եւ Սաւղոս։ 2Մինչդեռ ՚ի պաշտաման Տեառն կային՝ եւ պահէին. ասէ Հոգին Սուրբ. Որոշեցէ՛ք ինձ զԲառնաբաս եւ զՍաւղոս ՚ի գործ՝ յոր կոչեցեալ է իմ զդոսա։ 3Յայնժամ պահեալ՝ եւ աղօթս արարեալ, եդին ձեռն ՚ի վերայ նոցա՝ եւ արձակեցի՛ն։ 4Եւ նոքա առաքեալք ՚ի Հոգւոյն Սրբոյ՝ իջի՛ն ՚ի Սելեւկիայ, եւ անտի նաւեցի՛ն ՚ի Կիւպրոս։ 5Եւ հասեալ ՚ի Սաղամինայ՝ պատմէին զբանն Աստուծոյ ՚ի ժողովուրդս Հրէիցն. ունէին եւ զՅովհաննէս պաշտօնեայ։ 6Շրջեալ ընդ ամենայն կղզին մինչեւ ՚ի Պափոս, գտին անդ այր զոմն մո՛գ, սո՛ւտ մարգարէ՝ Հրեայ, որում անուն էր Բարեյեսո՛ւս. 7որ էր ընդ փոխանակի բդեշխին Սերգեայ Պաւղոսի առն իմաստնոյ. նորա աղաչեալ զԲառնաբա՛ս եւ զՍաւղոս՝ խնդրէր լսե՛լ զբանն Աստուծոյ։ 8Ընդդէմ եկաց նորա Ելիմա՛ս մոգ, քանզի ա՛յսպէս թարգմանի անուն նորա. որ խնդրէր շրջե՛լ զփոխանակ բդեշխին ՚ի հաւատոց։ 9Իսկ Սաւղոս, որ եւ Պաւղոսն՝ լցեալ Հոգւով Սրբով, հայեցաւ ՚ի նա, 10եւ ասէ. Ո՛վ լի ամենայն նենգութեամբ եւ խորամանգութեամբ՝ որդի՛ Սատանայի, եւ թշնամի ամենայն արդարութեան, ո՞չ լռես ՚ի թիւրելոյ զճանապարհս Տեառն զուղիղս։ 11Եւ արդ՝ ահա ձե՛ռն Տեառն ՚ի վերայ քո, եւ եղիցես կոյր, չտեսանե՛լ զարեւ մինչեւ ՚ի ժամանակ մի։ Եւ անդէն անկա՛ւ ՚ի վերայ նորա մէ՛գ եւ խաւար, եւ շրջէր խնդրէր առաջնորդս։ 12Յայնժամ տեսեալ փոխանակի բդեշխին զիրսն որ եղեն, հաւատա՛ց, զարմացեա՛լ ընդ վարդապետութիւնն Տեառն։ 13Եւ ամբարձեալ ՚ի Պափէ Պաւղոսեանց՝ եկին ՚ի Պերգէ Պամփիլեայ։ Յովհաննէս մեկնեալ ՚ի նոցանէ դարձա՛ւ յԵրուսաղէմ։ 14Եւ նոքա գնացեալ ՚ի Պերգեայ՝ եկին յԱնտիո՛ք Պիսիդեայ. եւ մտեալ ՚ի ժողովուրդն յաւուր շաբաթու՝ նստան։ 15Եւ յետ ընթեռնլոյ զօրէնսն եւ զմարգարէս, առաքեցի՛ն առ նոսա ժողովրդապետքն՝ եւ ասեն. Ա՛րք եղբարք՝ եթէ իցեն ՚ի ձեզ բանք մխիթարութեան առ ժողովո՛ւրդդ՝ խօսեցարո՛ւք։

16Յո՛տն եկաց Պաւղոս՝ շարժեաց զձեռն իւր, եւ ասէ. Ա՛րք Իսրայէլացիք՝ եւ ոյք երկնչիք յԱստուծոյ, լուարո՛ւք։ 17Աստուած ժողովրդեանս այսորիկ Իսրայէլի ընտրեա՛ց զհարսն մեր. եւ զժողովուրդն բարձրացո՛յց ՚ի պանդխտութեան յերկրին Եգիպտացւոց. եւ ՚ի բազուկ բարձր եհա՛ն զնոսա անտի։ 18Եւ իբրեւ քառասնամեայ ժամանակ կերակրեա՛ց զնոսա յանապատի. 19եւ քակեալ ա՛զգս եւթն յերկրին Քանանու՝ ժառանգեցո՛յց նոցա զերկիր նոցա՛ 20իբրեւ ամս չորեքհարեւր եւ յիսուն։ Եւ յետ այսորիկ ետ նոցա դատաւո՛րս մինչեւ ՚ի Սամուէլ մարգարէ։ 21Եւ անտի յառաջ խնդրեցին թագաւոր, եւ ետ նոցա Աստուած զՍաւուղ որդի՛ Կիսեայ, ա՛յր յազգէ Բենիամինի, ամս քառասուն։ 22Եւ իբրեւ փոխեաց զնա, յարոյց նոցա զԴաւի՛թ թագաւոր. որում եւ ասաց վկայութեամբ. Գտի զԴաւիթ որդի Յեսսեայ այր ըստ սրտի իմում, որ արասցէ՛ զամենայն զկամս իմ։ * 23՚Ի սորա՛ զաւակէ Աստուած ըստ աւետեացն յարոյց Իսրայէլի զՓրկիչն Յիսուս. 24ըստ յառաջագոյն քարոզութեանն Յովհաննու առաջի երեսաց մտի՛ նորա, մկրտութիւն ապաշխարութեան՝ ամենայն ժողովրդեանն Իսրայէլի։ 25Եւ իբրեւ լնոյր Յովհաննէս զընթացսն, ասէր. Զո՞ ոք կարծէք զինէն թէ իցեմ. չե՛մ ես այն. այլ ահա գա՛յ զկնի իմ, որում չե՛մ արժանի զկօշիկս ոտիցն լուծանել։ 26Ա՛րք եղբարք՝ որդի՛ք Աբրահամեան տոհմին, եւ որ ՚ի ձեզ երկիւղա՛ծք իցեն յԱստուծոյ. ձե՛զ բանս այս փրկութեան առաքեցաւ։ 27Բայց որ բնակեալ են յԵրուսաղէմ, եւ իշխանք նոցա՝ անծանօ՛թ եղեն ՚ի նմանէ. եւ ըստ բարբառոց մարգարէիցն, որ զամենայն շաբաթսն ընթեռնուին՝ դատեալ կատարեցին. 28եւ ո՛չ մի ինչ պատճառ մահու գտեալ՝ խնդրեցին ՚ի Պիղատոսէ սպանանե՛լ զնա։ 29Եւ իբրեւ կատարեցի՛ն զամենայն՝ որ վասն նորա գրեալ էր, իջուցեալ ՚ի փայտէն՝ եդի՛ն ՚ի գերեզմանի։ 30Այլ Աստուած յարո՛յց զնա ՚ի մեռելոց. որ երեւեցա՛ւ աւուրբք բազմօք այնոցիկ, 31որ ելեալ էին ընդ նմա ՚ի Գալիլեէ յԵրուսաղէմ. որք եւ արդ իսկ վկա՛յք են նորա առ ժողովուրդն։ 32Եւ մեք ձեզ աւետարանեմք զխոստումնն որ առ հարսն եղեալ էր։ 33Զի զնո՛յն Աստուած կատարեաց առ մեզ որդիս նոցա՝ յարուցեալ զՅիսուս. որպէս եւ ՚ի Սաղմոսին գրեալ է՝ յերկրորդում. Որդի իմ ես դու՝ ես այսօ՛ր ծնայ զքեզ։ * 34Եւ զի յարոյց զնա ՚ի մեռելոց, եւ ո՛չ եւս դառնալոց է յապականութիւն. ա՛յսպէս ասէ, թէ տա՛ց քեզ զսրբութիւնսն Դաւթի զհաւատարիմս։ * 35Քանզի եւ ՚ի միւսումն ասէ. Ո՛չ տացես Սրբոյ քում տեսանել զապականութիւն։ * 36Այլ Դաւիթ յազգի անդ իւրում պաշտեաց, եւ ՚ի կամս Աստուծոյ ննջեաց՝ եւ յաւելա՛ւ առ հարս իւր, եւ ետե՛ս զապականութիւն։ 37Բայց զոր Աստուած յարոյց, ո՛չ ետես զապականութիւն։ 38Յայտնի՛ լիցի ձեզ ա՛րք եղբարք, զի սովա՛ւ ձեզ թողութիւն մեղաց աւետարանի. եւ յամենայնէ յորմէ ո՛չ կարացէք օրինօքն Մովսիսի արդարանալ, 39սովաւ ամենայն որ հաւատայ՝ արդարանայ։ 40Զգո՛յշ կացէք, գուցէ՛ եկեսցէ ՚ի վերայ ձեր որ ասացեալն է ՚ի մարգարէս. 41Տեսէ՛ք արհամարհոտք՝ եւ զարմացարո՛ւք, եւ եղծարո՛ւք. զի գործ մի գործե՛մ ես յաւուրս ձեր. գործ՝ որում ո՛չ հաւատայցէք՝ եթէ ոք պատմեսցէ ձեզ։ * 42Եւ իբրեւ ելին անտի, աղաչէին ՚ի միւսում շաբաթու խօսե՛լ նոցա զնոյն բան։ 43Եւ իբրեւ արձակեցաւ ժողովուրդն, զհե՛տ երթային բազումք ՚ի Հրէից անտի, եւ ՚ի պաշտօնէիցն եկամտի՛ց զՊաւղոսի եւ զԲառնաբայ, որք խօսէին ընդ նոսա, եւ հաւանեցուցանէի՛ն զնոսա կալ մնա՛լ ՚ի շնորհսն Աստուծոյ։ 44Եւ ՚ի գալ միւսոյ շաբաթուն, գրեթէ ամենայն քաղաքն ժողովեցաւ լսել զբանն Աստուծոյ։ 45Իբրեւ տեսին Հրեայքն զամբոխն, լցա՛ն նախանձու. եւ ընդդէ՛մ դարձեալ ասացելոցն ՚ի Պաւղոսէ, հայհոյէի՛ն։ 46Համարձակեալ Պաւղոսի եւ Բառնաբայ՝ ասէին. Առ ձե՛զ նախ պա՛րտ էր խօսել զբանն Աստուծոյ. եւ քանզի դուք մերժէք զնա, եւ ո՛չ արժանի՛ս համարիք զձեզ կենացն յաւիտենից, ահաւասիկ դառնամք ՚ի հեթանո՛սս։ 47Զի ա՛յսպէս պատուիրեաց մեզ Տէր. Եդի զքեզ ՚ի լո՛յս հեթանոսաց, լինել քեզ ՚ի փրկութիւն մինչեւ ՚ի ծա՛գս երկրի։ * 48Զայս լուեալ հեթանոսացն՝ ուրա՛խ լինէին, եւ փառաւո՛ր առնէին զբանն Տեառն. եւ հաւատացին որք էին կարգեալ ՚ի կեանսն յաւիտենականս։ 49Եւ շրջէ՛ր բանն ընդ ամենայն գաւառն։ 50Բայց Հրեայքն գրգռեցի՛ն զպաշտօնեայ կանայս զգաստս, եւ գլխաւորս քաղաքին՝ եւ յարուցեալ հալածա՛նս ՚ի վերայ Պաւղոսի եւ Բառնաբայ, հանին զնոսա ՚ի սահմանացն իւրեանց։ 51Եւ նոցա թօթափեալ զփոշի ոտից ՚ի վերայ նոցա, եկի՛ն յԻկոնիոն։ 52Եւ աշակերտքն լնուին խնդութեամբ՝ եւ Հոգւով Սրբով։