1Եւ ա՛յս են բանք թղթոյն զոր գրեա՛ց Բարուք որդի Ներեայ որդւոյ Մաասայ որդւոյ Սեդեկիայ որդւոյ Ասադայ, որդւոյ Քեղկեայ ՚ի Բաբելովն։ 2Յամի՛ն հինգերորդի՝ որ օր եւթն էր ամսոյն, ՚ի ժամանակի յորում առին Քաղդէացիքն զԵրուսաղէմ, եւ այրեցին զնա հրով։ 3Եւ ընթերցա՛ւ Բարուք զբանս թղթոյս այսորիկ յականջս Յեքոնիայ որդւոյ Յովակիմայ արքայի Յուդայ, եւ յականջս ամենայն ժողովրդեանն որ գային ՚ի մատեանն. 4եւ յականջս զօրացն, եւ որդւոց թագաւորացն. եւ յականջս ծերոցն. եւ յականջս ամենայն ժողովրդեանն, ՚ի փոքուէ մինչեւ ցմեծամեծս. ամենեցուն որ բնակեալն էին ՚ի Բաբելովն, առ Սո՛ւդ գետով. 5եւ լային եւ պահէին, եւ կային յաղօթս առաջի Տեառն։ 6Եւ ժողովեցին արծաթ ըստ իւրաքանչիւր կարի. 7եւ առաքեցին յԵրուսաղէմ առ Յովակիմ որդի Քեղկեայ՝ որդւոյ Սաղովմայ առ քահանայ. եւ առ ա՛յլ քահանայս գտեալս ընդ նմա յԵրուսաղէմ։ 8Յառնուլ նորա զսպաս տանն Տեառն որ ել ՚ի տաճարէն՝ դարձուցանել յերկիրն Յուդայ, ՚ի տասներորդում Սիւան ամսոյ զսպասն արծաթեղէնս՝ զոր արա՛ր Սեդեկիա որդի Յովսիայ արքայի Յուդայ. 9յետ գերելոյ Նաբուքոդոնոսորայ արքայի Բաբելացւոց՝ զՅեքոնիա եւ զիշխանսն՝ եւ զկալանաւորակապսն՝ եւ զզօրաւորսն՝ եւ զժողովուրդ երկրին՝ յԵրուսաղէմ. եւ տարաւ զնոսա ՚ի Բաբելոն։ 10Եւ ասեն. Ահաւասիկ առաքեցաք առ ձեզ արծաթ. եւ գնեցէ՛ք արծաթոյդ ողջակէզս՝ եւ զվասն մեղացն, եւ կնդրուկ՝ եւ արարէ՛ք մաննա. եւ հանէ՛ք ՚ի սեղանն Տեառն Աստուծոյ մերոյ։ 11Եւ աղօթս արարէ՛ք ՚ի վերայ կենաց Նաբուքոդոնոսորայ արքայի Բաբելացւոց, եւ ՚ի վերայ կենաց Բաղտասարայ որդւոյ նորա. զի եղիցին աւուրք նոցա իբրեւ զաւուրս երկնից ՚ի վերայ երկրի։ 12Եւ տացէ մեզ Տէր զօրութիւն, եւ լուսաւո՛ր արասցէ զաչս մեր. եւ կեցցուք ընդ հովանեաւ Նաբուքոդոնոսորայ արքային Բաբելացւոց, եւ ընդ հովանեաւ Բաղտասարայ որդւոյ նորա. եւ ծառայեսցո՛ւք նոցա աւուրս բազումս, եւ գտցուք շնորհս առաջի նոցա։ 13Աղօ՛թս արարէք եւ ՚ի վերայ մեր առ Տէր Աստուած մեր. զի մեղաք Տեառն Աստուծոյ մերում, եւ ո՛չ դարձաւ սրտմտութիւն Տեառն եւ բարկութիւն նորա ՚ի մէնջ մինչեւ ցա՛յսօր։

14Եւ ընթերցջի՛ք զթուղթդ զայդ զոր առաքեցաք առ ձեզ, դնե՛լ ՚ի տունդ Տեառն՝ յաւուրս տօնի, եւ յաւուրս ժամանակի։ 15Եւ ասասջի՛ք. Տեառն Աստուծոյ մերոյ արդարութիւն է, եւ մեր՝ ամօթ երեսաց, որպէս յաւուրս յայսմիկ ա՛ռն Յուդայ՝ եւ բնակչաց Երուսաղեմի։ 16եւ թագաւորաց մերոց, եւ իշխանաց մերոց, եւ քահանայից մերոց, եւ մարգարէից մերոց, եւ հարց մերոց առաջի Տեառն։ 18Զի անհնազանդ եղաք նմա, եւ ո՛չ լուաք ձայնի Տեառն Աստուծոյ մերոյ գնա՛լ ըստ հրամանաց Տեառն՝ զոր ե՛դ առաջի մեր։ 19Յօրէ յորմէ եհան Տէր զհարսն մեր յերկրէն Եգիպտացւոց մինչեւ ցայսօր էաք անհնազանդք Տեառն Աստուծոյ մերոյ, եւ խուսափեալք չլսել ձայնի նորա։ 20Եւ պատեցան զմեւք չարիքն, եւ նզո՛վք զոր կարգեաց Տէր ՚ի ձեռն Մովսիսի ծառայի իւրոյ, յաւուր յորում եհան զհարսն մեր յերկրէն Եգիպտացւոց՝ տա՛լ մեզ զերկիրդ որ բղխէ զկաթն եւ զմեղր՝ որպէս եւ այսօր։ 21Եւ ո՛չ լուաք ձայնի Տեառն Աստուծոյ մերոյ ըստ ամենայն բանից մարգարէիցն զոր առաքեաց առ մեզ։ 22Եւ գնացաք իւրաքանչիւր ըստ մտաց սրտի իւրոյ չարի, հարկել աստուածոց օտարաց, առնել չար առաջի Տեառն Աստուծոյ մերոյ։