1՚Ի ժամանակին յայնմիկ ասա՛ց ցիս Տէր. Կոփեա՛ դու քեզ երկուս տախտակս քարեղէնս իբրեւ զառաջինսն, եւ ե՛լ ՚ի լեառնն. եւ արասցես դու քեզ տապանակ փայտեղէն. 2եւ գրեցի՛ց ՚ի տախտակսն զնոյն պատգամս՝ որ էին յառաջին տախտակսն զորս դո՛ւն խորտակեցեր. եւ դիցես զնոսա ՚ի նե՛րքս ՚ի տապանակին։ 3Եւ արարի տապանակ յանփուտ փայտից. եւ կոփեցի երկուս տախտակս քարեղէնս իբրեւ զառաջինսն. եւ ելի՛ ՚ի լեառնն, եւ երկու տախտակքն յերկոսին ՚ի ձեռս իմում։ 4Եւ գրեա՛ց յերկոսին տախտակսն ըստ առաջին գրոյն զտա՛սն պատգամսն զոր խօսեցաւ ընդ ձեզ Տէր ՚ի լերինն ՚ի միջոյ հրոյն. եւ ետ զնոսա ցիս Տէր։ 5Եւ դարձա՛յ իջի ՚ի լեռնէ անտի, եւ եդի զտախտակսն ՚ի նե՛րքս ՚ի տապանակին. եւ էին ա՛նդ որպէս եւ պատուիրեաց ինձ Տէր։ 6Եւ որդիքն Իսրայէլի չուեցին ՚ի Բերովթայ որդւոցն Յակիմայ ՚ի Սադիայ. եւ ա՛նդ մեռաւ Ահարոն եւ անդրէ՛ն թաղեցաւ. եւ քահանայացաւ Եղիազա՛ր որդի նորա ընդ նորա։ 7Անտի չուեցին ՚ի Գադգադ, եւ ՚ի Գադգադայ յԵտակա՛յ յերկիր վտակաց ջուրց։ 8Յայնմ ժամանակի զատոյց Տէր զցեղն Ղեւեայ բառնալ զտապանա՛կ ուխտին Տեառն, կա՛լ առաջի Տեառն՝ պաշտել եւ աղօթս մատուցանել յանուն նորա մինչեւ ցա՛յսօր։ 9Վասն այնորիկ ո՛չ գոյ Ղեւտացւոցն բաժին եւ ժառանգութիւն ՚ի մէջ եղբարց իւրեանց. զի Տէր ինքնի՛ն է մասն եւ ժառանգութիւն նոցա՝ որպէս եւ ասաց նոցա։ 10Եւ ես կացի ՚ի լերինն զքառասուն տիւ եւ զքառասուն գիշեր. եւ լուաւ ինձ Տէր ՚ի ժամանակին յայնմիկ. եւ ո՛չ կամեցաւ սատակել զձեզ։ 11Եւ ասէ ցիս Տէր. Գնա՛ չուեա՛ առաջի ժողովրդեանդ այդորիկ. եւ մտցե՛ն եւ ժառանգեսցեն զերկիրն զոր երդուայ հարցն դոցա տա՛լ դոցա։

12Եւ արդ՝ Իսրայէլ, զի՞նչ խնդրէ ՚ի քէն Տէր Աստուած քո. այլ երկնչե՛լ ՚ի Տեառնէ Աստուծոյ քումմէ. եւ գնա՛լ յամենայն ճանապարհս նորա, եւ սիրե՛լ զնա. եւ պաշտե՛լ զՏէր Աստուած քո յամենայն սրտէ քումմէ, եւ յամենայն անձնէ քումմէ. 13եւ պահե՛լ զպատուիրանս Տեառն Աստուծոյ քոյ, եւ զիրաւունս նորա՝ զոր ես պատուիրե՛մ քեզ այսօր, զի բարի՛ լիցի քեզ։ 14Ահաւասիկ Տեառն Աստուծոյ քո երկի՛նք՝ եւ երկնի՛ց երկինք, եւ երկիր եւ ամենայն որ է՛ ՚ի նոսա։ 15Բայց ընդ հարսն ձեր յառաջագոյն հաճեցաւ Տէր սիրել զնոսա, եւ ընտրեա՛ց զզաւակ նոցա յետ նոցա զձե՛զ քան զազգս ամենայն ըստ աւուրս ըստ այսմիկ։ 16Եւ թլփատեցէ՛ք զխստասրտութիւն ձեր, եւ զպարանոցս ձեր մի՛ եւս խստացուցանէք. 17զի Տէր Աստուած մեր, նա՛ է Աստուած աստուծոց՝ եւ Տէր տերանց. Աստուած մե՛ծ եւ հզօր եւ ահաւոր. որ ո՛չ աչառի երեսաց, եւ ո՛չ առնու կաշառ։ 18Առնէ իրաւունս եկի՛ն եւ որբո՛յ եւ այրւո՛յ. սիրէ՛ զնժդեհն, տա՛լ նմա հաց եւ հանդերձ։ 19Եւ սիրեցէ՛ք զպանդուխտն, զի եւ դուք պանդուխտք էիք յերկրին Եգիպտացւոց։ 20՚Ի Տեառնէ Աստուծոյ քումմէ երկիցե՛ս, եւ զնա՛ պաշտեսցես, եւ ՚ի նա՛ յարեսցիս, եւ յանո՛ւն նորա երդնուցուս։ 21Զի նա՛ է պարծանք քո, եւ նո՛յն Աստուած քո, որ արա՛ր ՚ի քեզ զմեծամեծսն եւ զփառաւորս՝ զոր տեսին աչք քո։ 22Եւթանասուն ոգւովք իջին հարքն քո յԵգիպտոս, եւ արդ ահա արա՛ր զքեզ Տէր Աստուած քո իբրեւ զաստեղս երկնից բազմութեամբ։