1Եւ եթէ յառնիցէ՛ ՚ի միջի քում մարգարէ կամ երազահա՛ն երազոց, եւ տացէ քեզ նշա՛ն կամ արուեստ. 2եւ լինիցի նշանն կամ արուեստն զոր խօսեցաւ առ քեզ, եւ ասիցէ երթիցուք պաշտեսցուք զաստուածս օտարս՝ զորս ո՛չ ճանաչիցէք։ 3Մի՛ լսիցէք բանից մարգարէին այնորիկ, կամ երազահանին երազոց. զի փորձէ՛ զքեզ Տէր Աստուած ճանաչել, թէ սիրիցէ՞ք զՏէր Աստուած մեր յամենայն սրտէ ձերմէ՝ եւ յամենայն անձնէ ձերմէ։ 4Զկնի Տեառն Աստուծոյ ձերոյ երթիջիք, եւ ՚ի նմանէ երկնչիջիք, եւ զպատուիրանս նորա պահեսջիք, եւ ձայնի՛ նորա լուիջիք, եւ ՚ի նա՛ յարեսջիք։ 5Եւ մարգարէն այն կամ երազահանն երազոց՝ մեռցի՛. զի խօսեցաւ ապստամբեցուցանե՛լ զքեզ ՚ի Տեառնէ Աստուծոյ քումմէ՝ որ եհան զքեզ յերկրէն Եգիպտացւոց, որ փրկեացն զքեզ յերկրէն ծառայութեան. մերժե՛լ զքեզ ՚ի ճանապարհէն՝ զոր պատուիրեաց քեզ Տէր Աստուած քո գնա՛լ ընդ նա. եւ բարձցե՛ս զչարն ՚ի միջոյ ձերմէ։ 6Եւ եթէ աղաչեսցէ զքեզ եղբայր քո առ ՚ի հօրէ կամ առ ՚ի մօրէ քումմէ, կամ ուստր քո, կամ դուստր քո, կամ կին ծոցոյ քոյ, կամ բարեկամ հանգո՛յն անձին քոյ, գա՛ղտ՝ եւ ասիցէ. Երթիցո՛ւք պաշտեսցո՛ւք զաստուածս օտարս, զորս ո՛չ ճանաչիցես դու եւ հարք քո. 7յաստուծո՛ց ազգացն որ շուրջ զձեւք իցեն, ՚ի մերձաւորացն քոց կամ ՚ի հեռաւորաց, ՚ի ծագա՛ց երկրին մինչեւ ՚ի ծագս երկրին։ 8Մի՛ հաւանիցիս նմա, եւ մի՛ լուիցես նմա, եւ մի՛ խնայեսցէ ակն քո ՚ի նա, եւ մի՛ գթասցիս ՚ի նա, եւ մի՛ ծածկեսցես զնա։ 9Պատմելով պատմեսցե՛ս զնմանէ. ձեռք քո նա՛խ լիցին ՚ի նա սպանանել զնա, եւ ապա՛ ձեռն ամենայն ժողովրդեանն. 10եւ քարկոծեսցե՛ն զնա քարամբք եւ մեռցի. զի խնդրեաց ապստամբեցուցանե՛լ զքեզ ՚ի Տեառնէ Աստուծոյ քումմէ. որ եհա՛ն զքեզ յերկրէն Եգիպտացւոց ՚ի տանէ ծառայութեան։ 11Եւ լուեալ ամենայն Իսրայէլի զարհուրեսցի՛. եւ ո՛չ եւս յաւելուցուն առնել ըստ բանին այնորիկ չարի ՚ի միջի ձերում։ 12Եւ եթէ լսիցես ՚ի միում ՚ի քաղաքացն՝ զորս Տէր Աստուած քո տացէ քեզ բնակե՛լ անդ. ասել. 13եթէ ելին արք անօրէնք ՚ի մէնջ. եւ ապստամբեցուցի՛ն զամենայն բնակիչս քաղաքին իւրեանց. եւ ասեն. Երթիցուք եւ պաշտեսցո՛ւք զաստուածս օտարս՝ զորս ո՛չ գիտիցէք. 14եւ քննեսցե՛ս եւ հարցանիցե՛ս եւ յուզեսցես յոյժ. եւ ահա ստո՛յգ եւ հաւաստեաւ իցէ բանն, եւ եղեալ իցէ գարշութիւնն ՚ի ձեզ. 15կոտորելով կոտորեսջի՛ք զամենայն բնակիչս երկրին այնորիկ կոտորմամբ սրոյ. եւ նզովելով նզովեսջի՛ք զնա, եւ զամենայն ինչ որ ՚ի նմա, եւ զանասուն նոցա ՚ի բերա՛ն սրոյ։ 16Եւ զամենայն կապուտ նորա ժողովեսցե՛ս յելս նորա. եւ այրեսցե՛ս հրով զքաղաքն, եւ զամենայն զաւա՛ր նորա համօրէն առաջի Տեառն Աստուծոյ քո. եւ եղիցի աւերա՛կ յաւիտեան, եւ ո՛չ եւս շինեսցի։ 17Եւ մի՛ կռուիցի ՚ի ձեռին քում ՚ի նզովից նորա. զի դարձցի՛ Տէր ՚ի բարկութենէ սրտմտութեան իւրոյ. եւ տացէ քեզ ողորմութիւն, եւ ողորմեսցի՛ քեզ եւ բազմացուսցէ՛ զքեզ. զոր օրինակ երդուաւ Տէր հարցն քոց։ 18Եթէ լսիցես ձայնի Տեառն Աստուծոյ քոյ, պահել զամենայն պատուիրանս նորա, զոր ես քեզ պատուիրեմ այսօր. առնել զբարի՛ն եւ զհաճոյ առաջի Տեառն Աստուծոյ քոյ։