1Զգուշասջի՛ր ամսոյն կանխոց, եւ արասցես զատի՛կ Տեառն Աստուծոյ քոյ. զի յամսեանն կանխոց ելէք յԵգիպտոսէ ՚ի գիշերի։ 2Եւ զենցես զզատիկն Տեառն Աստուծոյ քում. ոչխա՛րս եւ արջառս, ՚ի տեղւոջն զոր ընտրեսցէ Տէր Աստուած քո անուանել զանուն իւր անդ։ 3Մի՛ ուտիցէք ընդ նմա խմորուն, զեւթն օր բաղա՛րջ կերիցես ընդ նմա, հա՛ց չարչարանաց. քանզի տագնապաւ ելէք յԵգիպտոսէ. զի յիշիցէ՛ք դուք զօրն ելից ձերոց յերկրէն Եգիպտացւոց՝ զամենայն աւուրս կենաց ձերոց։ 4Եւ մի՛ եւս երեւեսցի ՚ի քեզ խմոր յամենայն սահմանս քո զեւթն օր. եւ մի՛ ագցի ՚ի մսոյն զոր զենուցուս յերեկորեայ յաւուրն առաջնոյ ցայգ։ 5Եւ մի՛ ժտեսցիս զենուլ զզատիկն ՚ի միում ՚ի քաղաքաց քոց՝ զորս Տէր Աստուած քո տացէ քեզ. 6այլ ՚ի տեղւոջն զոր ընտրեսցէ Տէր Աստուած քո անուանե՛լ զանուն իւր ՚ի նմա, ա՛նդ զենցես զզատիկն առ երեկս ընդ արեւմուտս, ՚ի ժամանակին յորում ելե՛ր յԵգիպտոսէ։ 7Եփեսցե՛ս եւ խորովեսցե՛ս, եւ կերիցե՛ս ՚ի տեղւոջն զոր ընտրեսցէ Տէր Աստուած քո. եւ դարձցիս ՚ի վաղիւն երթիցես ՚ի տուն քո։ 8Զվե՛ց օր կերիցես բաղարջ, եւ յաւուրն եւթներորդի ե՛լք տօն Տեառն Աստուծոյ քոյ. մի՛ գործեսցես ՚ի նմա զամենայն գործ, բայց որ ինչ գործիցի՛ անձին։ 9Եւթն եւթներորդս համարեսցիս քեզ, ՚ի սկսանելոյ մանկաղի քոյ յոճ, սկսանիցիս համարե՛լ եւթն եւթներորդս. 10եւ արասցես տօ՛ն եւթներորդաց Տեառն Աստուծոյ քում, որչափ կարօ՛ղ իցէ ձեռն քո ըստ ինչի՛ն զոր տացէ քեզ՝ որպէս զիարդ օրհնեսցէ զքեզ Տէր Աստուած քո։ 11Եւ ուրա՛խ լիցիս առաջի Տեառն Աստուծոյ քոյ, դո՛ւ եւ ուստր քո եւ դուստր քո, ծառայ քո, եւ աղախին քո. եւ Ղեւտացին որ ՚ի քաղաքս քո. եւ եկն եւ որբն եւ այրին որ ՚ի ձեզ. ՚ի տեղւոջն զոր ընտրեսցէ Տէր Աստուած անուանե՛լ զանուն իւր անդ։ 12Եւ յիշեսցե՛ս զի ծառա՛յ էիր յերկրին Եգիպտացւոց. եւ զգուշասցի՛ս եւ արասցես զպատուիրանս զայսոսիկ։ 13Տօ՛ն տաղաւարահարա՛ց արասցես զեւթն օր. ՚ի ժողովել քեզ ՚ի կալոյ քումմէ եւ ՚ի հնձանէ քումմէ։ 14Եւ ուրա՛խ լիցիս ՚ի տօնի քում. դո՛ւ եւ ուստր քո եւ դուստր քո, ծառայ քո եւ աղախին քո. եւ Ղեւտացին, եւ եկն եւ որբն եւ այրին որ իցեն ՚ի քաղաքս քո։ 15Զեւթն օր տօնեսցես Տեառն Աստուծոյ քում, ՚ի տեղւոջն զոր ընտրեսցէ Տէր Աստուած քո ՚ի նմա։ Եւ եթէ օրհնեսցէ զքեզ Տէր Աստուած քո յամենայն արմտիս քո, եւ յամենայն գործս ձեռաց քոց, եւ լինիցիս ուրա՛խ։ 16Զերիս ժամանակս ՚ի տարւոջ յանդիմա՛ն լիցի ամենայն արու քո՝ առաջի Տեառն Աստուծոյ քոյ ՚ի տեղւոջն զոր ընտրեսցէ Տէր։ ՚Ի տօնի՛ բաղարջակերացն. եւ ՚ի տօնի՛ եւթներորդացն. եւ ՚ի տօնի տաղաւարահարացն. եւ ո՛չ երեւեսցիս առաջի Տեառն Աստուծոյ քում ունայնաձեռն. 17իւրաքանչիւր ըստ կարի՛ ձեռաց իւրոց՝ ըստ օրհնութեան Տեառն Աստուծոյ քո զոր ե՛տ քեզ։

18Դատաւո՛րս եւ ատենադպի՛րս կացուսցես յամենայն քաղաքս քո՝ զոր Տէր Աստուած քո տացէ քեզ՝ ըստ ցեղի՛ց. եւ դատեսցե՛ն զժողովուրդն դատաստան արդար. 19եւ մի՛ աչառիցեն երեսաց. եւ մի՛ առնուցուն կաշառս։ Քանզի կաշառ՝ կուրացուցանէ՛ զաչս իմաստնոց. եւ ապականէ զբանս արդարոց։ 20Արդարութեամբ արասցես զիրաւունս, զի կեցէք, եւ մտանիցէք ժառանգել զերկիրն զոր Տէր Աստուած տացէ ձեզ։

21Մի՛ տնկեսցես քեզ անտառս զամենայն փայտի առ սեղանով Տեառն Աստուծոյ քոյ։ 22Եւ մի՛ արասցես ինչ քեզ ձաւնի։ Եւ մի՛ կանգնեսցես քեզ արձան զոր ատեաց Տէր Աստուած քո։