1Եւ պատուիրեա՛ց Մովսէս եւ ծերակոյտն Իսրայէլի՝ եւ ասեն. Պահեցէ՛ք զամենայն պատուիրանս զոր ես պատուիրեմ ձեզ այսօր։ 2Եւ եղիցի յաւուր յորում անցանիցես ընդ Յորդանան, յերկիրն զոր Տէր Աստուած քո տացէ քեզ. եւ կանգնեսցե՛ս անդ քարինս մեծամեծս, եւ բռեսցե՛ս զնոսա բռով։ 3Եւ գրեսցե՛ս ՚ի վերայ քարանցն զամենայն պատգամս օրինացս այսոցիկ, յորժամ անցանիցէք ընդ Յորդանան, ՚ի ժամանակի իբրեւ մտանիցէք յերկիրն՝ զոր Տէր Աստուած հարցն ձերոց տացէ՛ քեզ, երկիր որ բղխէ զկաթն եւ զմեղր. որպէս խոստացաւ Տէր Աստուած հարց քոց տա՛լ քե՛զ։ 4Եւ եղիցի յորժամ անցանիցէք ընդ Յորդանան, կանգնեսջի՛ք զքարինս զայնոսիկ զոր ես պատուիրեմ ձեզ այսօր՝ ՚ի լերինն Գեբաղ, եւ բռեսջի՛ք զնոսա բռով։ 5Եւ շինեսցե՛ս անդ սեղա՛ն Տեառն Աստուծոյ քոյ. սեղա՛ն ՚ի քարանց. եւ մի՛ հպեսցի ՚ի նոսա երկաթ. 6բոլորա՛կ վիմօք շինեսցես զսեղանն Տեառն Աստուծոյ քոյ. եւ հանցե՛ս ՚ի վերայ նորա ողջակէզս Տեառն Աստուծոյ քում։ 7Եւ զենցե՛ս անդ զենումն փրկութեան Տեառն Աստուծոյ քում. եւ կերիցե՛ս եւ յագեսցի՛ս անդ. եւ ուրա՛խ լիցիս առաջի Տեառն Աստուծոյ քոյ. 8եւ գրեսցե՛ս ՚ի վերայ քարանցն զամենայն զօրէնս զայսոսիկ յայտնապէ՛ս յոյժ։

9Եւ խօսեցա՛ւ Մովսէս, եւ քահանայքն՝ եւ Ղեւտացիք՝ ընդ ամենայն Իսրայէլի եւ ասեն. Լո՛ւռ լեր եւ լո՛ւր Իսրայէլ։ Յաւուր յայսմիկ եղեր ժողովուրդ Տեառն Աստուծոյ քոյ. 10եւ լուիցե՛ս ձայնի Տեառն Աստուծոյ քոյ. եւ արասցե՛ս զամենայն պատուիրանս նորա եւ զիրաւունս նորա՝ զոր ե՛ս պատուիրեմ քեզ այսօր։ 11Եւ պատուիրեա՛ց Մովսէս ժողովրդեանն յաւուր յայնմիկ՝ եւ ասէ. 12Սոքա՛ կացցեն օրհնել զժողովուրդն ՚ի լերինն Գարիզին, յորժամ անցանիցէք ընդ Յորդանան։ Շմաւոն. Ղեւի. Յուդայ. Իսաքար. Յովսէփ. եւ Բենիամին։ 13Եւ սոքա՛ կացցեն ՚ի վերայ անիծիցն ՚ի լերինն Գեբաղ։ Ռուբէն. Գադ. Ասեր. Զաբուղոն. Դան. եւ Նեփթաղին։ 14Եւ պատասխանի տուեալ Ղեւտացւոցն՝ ասիցե՛ն մեծաձայն ամենայն Իսրայէլի։ 15Անիծեա՛լ լիցի մարդն, որ արասցէ դրօշեալս եւ ձուլածոյ. զի պի՛ղծ է Տեառն ձեռագործ ճարտարի, եւ դնիցէ զնա ՚ի թաքստեան։ Եւ պատասխանի տուեալ ժողովրդեանն, ասասցեն՝ եղիցի՛։ 16Անիծեա՛լ որ անարգեսցէ զհայր իւր կամ զմայր իւր։ Եւ ասասցէ ամենայն ժողովուրդն՝ եղիցի՛։ 17Անիծեա՛լ որ խոտորիցէ զիրաւունս՝ եկին եւ որբոյ եւ այրւոյ։ Եւ ասասցէ ամենայն ժողովուրդն՝ եղիցի՛։ 18Անիծեալ՝ որ փոխեսցէ զսահմանս ընկերի իւրոյ։ Եւ ասասցէ ամենայն ժողովուրդն՝ եղիցի՛։ 19Անիծեալ՝ որ մոլորեցուսցէ զկոյրն ՚ի ճանապարհի։ Եւ ասասցէ ամենայն ժողովուրդն՝ եղիցի՛։ 20Անիծեալ՝ որ ննջեսցէ ընդ կնոջ հօր իւրոյ. զի յայտնեաց զաներեւոյթս հօր իւրոյ։ Եւ ասասցէ ամենայն ժողովուրդն՝ եղիցի՛։ 21Անիծեալ՝ որ ննջեսցէ ընդ ամենայն անասնոյ։ Եւ ասասցէ ամենայն ժողովուրդն՝ եղիցի՛։ 22Անիծեալ՝ որ ննջեսցէ ընդ քե՛ռ իւրում, որ առ ՚ի հօրէ իցէ, կամ առ ՚ի մօրէ։ Եւ ասասցէ ամենայն ժողովուրդն՝ եղիցի՛։ 24Անիծեալ՝ որ հարկանիցէ զընկեր իւր նենգութեամբ։ Եւ ասասցէ ամենայն ժողովուրդն՝ եղիցի՛։ 25Անիծեալ՝ որ առնուցու կաշառ հարկանել զանձն արեան արդարոյ։ Եւ ասասցէ ամենայն ժողովուրդն՝ եղիցի՛։ 26Անիծեալ ամենայն մարդ որ ո՛չ կացցէ յամենայն բանս օրինացս այսոցիկ՝ առնել զսոսա։ Եւ ասասցէ ամենայն ժողովուրդն՝ եղիցի՛։