1Եւ եղիցի եթէ լսելով լուիցէք ձայնի Տեառն Աստուծոյ մերոյ, զգուշանա՛լ եւ առնել զամենայն պատուիրանս նորա, զոր ես պատուիրեմ ձեզ այսօր, տացէ զքեզ Տէր Աստուած քո ՚ի վեր քան զամենայն ազգս երկրի. 2եւ եկեսցեն ՚ի վերայ քո ամենայն օրհնութիւնքս այսոքիկ. եւ գտցե՛ն զքեզ, եթէ լուիցես ձայնի Տեառն Աստուծոյ քոյ։ 3Օրհնեա՛լ լիցիս դու ՚ի քաղաքի, եւ օրհնեա՛լ յանդի։ 4Օրհնեա՛լ լիցին ծնունդք որովայնի քոյ, եւ արա՛րք երկրի քոյ, անդեա՛յք արջառոց քոց, եւ հօտք ոչխարաց քոց։ 5Օրհնեա՛լ լիցին շտեմարանք քո, եւ համբա՛րք քո։ 6Օրհնեա՛լ լիցիս դու յելանել եւ ՚ի մտանե՛լ քում։ 7Մատնեսցէ՛ Տէր Աստուած քո զթշնամիս քո եւ զհակառակորդս քո խորտակեալս առաջի երեսաց քոց. ընդ մի ճանապարհ ելցեն առ քեզ, եւ ընդ եւթն ճանապարհ փախիցեն յերեսաց քոց։ 8Առաքեսցէ Տէր ՚ի վերայ քո օրհնութիւն, ՚ի շտեմարանս քո, եւ յամենայն ինչ ուր մխեսցես զձեռն քո ՚ի վերայ երկրին՝ զոր Տէր Աստուած քո տացէ քեզ։ 9Կանգնեսցէ՛ զքեզ Տէր Աստուած քո իւր ժողովուրդ սո՛ւրբ. որպէս երդուաւ հարցն քոց. եթէ լուիցես ձայնի Տեառն Աստուծոյ մերոյ, եւ գնասցես ՚ի ճանապարհս նորա. 10եւ տեսցեն ամենայն ազգք երկրի զի անուն Տեառն կոչեցեալ է ՚ի վերայ քո. եւ երկիցեն ՚ի քէն։ 11Եւ բազմացուսցէ՛ զքեզ Տէր Աստուած քո ՚ի բարութիւնս, ծննդեա՛մբք որովայնի քոյ, եւ արդեա՛մբք երկրի քոյ, եւ ծննդեամբք խաշանց քոց. ՚ի վերայ երկրին զոր երդուա՛ւ Տէր հարցն քոց տա՛լ քեզ, ըստ աւուրց երկնից ՚ի վերայ երկրի։ 12Բացցէ՛ քեզ Տէր զգանձսն բարութեան իւրոյ զերկինս, տալ անձրեւ՛ ՚ի ժամանակի իւրում երկրին քոյ, օրհնե՛լ զամենայն գործս ձեռաց քոց. եւ տացե՛ս փոխ ազգաց բազմաց, եւ դու ո՛չ առնուցուս փոխ. 13եւ իշխեսցե՛ս ազգաց բազմաց, եւ քեզ՝ մի՛ իշխեսցեն։ Հաստատեսցէ՛ զքեզ Տէր Աստուած քո ՚ի գլուխ եւ ո՛չ ՚ի վերջ. եւ եղիցիս ՚ի վե՛ր, եւ ո՛չ ՚ի խոնարհ. եթէ լուիցես պատուիրանաց Տեառն Աստուծոյ քոյ, զոր ես պատուիրեմ քեզ ա՛յսօր պահել եւ առնել։ 14Եւ ո՛չ անցանիցես զամենայն բանիւք զոր ես պատուիրեմ քեզ այսօր՝ ո՛չ յաջ եւ ո՛չ յահեակ. երթալ զհետ աստուածոց օտարաց պաշտել զնոսա։ 15Եւ եղիցի եթէ ո՛չ լուիցես ձայնի Տեառն Աստուծոյ քոյ, պահե՛լ եւ առնել զամենայն պատուիրանս նորա զոր ես պատուիրեմ քեզ այսօր, եկեսցեն ՚ի վերայ քո անէծքս այսոքիկ՝ եւ հասցե՛ն քեզ։ 16Անիծեա՛լ լիջիր դու ՚ի քաղաքի, եւ անիծեա՛լ յանդի։ 17Անիծեա՛լ շտեմարանք քո եւ համբարք քո։ 18Անիծեա՛լ ծնունդք որովայնի քոյ եւ արդիւնք երկրի քոյ, եւ անդեա՛յք արջառոց քոց, եւ հօտք ոչխարաց քոց։ 19Անիծեա՛լ լիջիր դու ՚ի մտանել՝ եւ անիծեա՛լ յելանել։ 20Առաքեսցէ՛ քեզ Տէր զնուազութիւն եւ զկարօտութիւն. եւ ծախս ՚ի վերայ ամենայնի յոր մխեսցես զձեռն քո, եւ զոր ինչ առնիցես. մինչեւ սատակեսցէ՛ զքեզ Տէր, մինչեւ կորուսցէ զքեզ վաղվաղակի վասն չարութեան գնացից քոց՝ զի թողե՛ր դու զիս։ 21Խանծեցուսցէ՛ Տէր ՚ի քեզ մահ, մինչեւ սատակեսցէ զքեզ Տէր յերկրէն յոր դու մտանելոց ես ժառանգել զնա։ 22Հարցէ՛ զքեզ Տէր տարակուսանօք, եւ ջերմամբ, եւ սարսռով, եւ խեթիւք, եւ երկիւղիւ, եւ խորշակաւ, եւ գունով. եւ հալածեսցեն զքեզ մինչեւ կորուսցեն զքեզ։ 23Եւ եղիցին ՚ի վերայ գլխոյ քոյ երկինք պղնձի՛, եւ երկիր ՚ի ներքոյ քո երկաթի՛։ 24Տացէ՛ Տէր զանձրեւ երկրի քոյ փոշի՛. եւ հո՛ղ յերկնից իջցէ ՚ի վերայ քո. մինչեւ սատակեսցէ զքեզ եւ կորուսցէ զքեզ։ 25Տացէ՛ զքեզ Տէր ՚ի պարտութիւն առաջի թշնամեաց քոց. ընդ մի ճանապարհ ելցես ՚ի վերայ նոցա, եւ ընդ եւթն ճանապարհ փախիցես յերեսաց նոցա. եւ եղիցիս ցրուեալ ընդ ամենայն թագաւորութիւնս երկրի. 26եւ եղիցին մեռեալք ձեր կերակո՛ւր թռչնոց երկնից եւ գազանա՛ց երկրի. եւ ո՛չ ոք իցէ որ ընդոստուցանիցէ։ 27Հարցէ՛ զքեզ Տէր կեղով Եգիպտացւոցն, եւ թանչի՛ւք, եւ զայրացեալ քոսով՝ եւ մնով. զի մի՛ կարասցես բժշկել։ 28Հարցէ՛ զքեզ Տէր յիմարութեամբ, եւ շլացութեամբ, եւ ապշութեամբ մտաց. 29եւ խարխափեսցե՛ս ՚ի մէջօրէի որպէս խարխափիցէ կո՛յր ՚ի խաւարի։ Եւ եթէ ո՛չ ուղղեսցես զճանապարհս քո, եղիցիս յայնժամ զրկեալ եւ յափշտակեալ զամենայն աւուրս. եւ ո՛չ ոք իցէ որ օգնիցէ քեզ։ 30Առնուցուս կին՝ եւ ա՛յլ այր հանիցէ զնա ՚ի քէն. շինեսցես տուն՝ եւ մի՛ բնակեսցես ՚ի նմա. տնկեսցես այգի՝ եւ մի՛ կթեսցես զնա։ 31Արջառ քո՝ սպանեալ առաջի քո, եւ մի՛ կերիցես ՚ի նմանէ. էշ քո՝ յափշտակեա՛լ ՚ի քէն, եւ մի՛ դարձցի առ քեզ. ոչխար քո՝ մատնեա՛լ թշնամեաց քոց, եւ ո՛չ ոք իցէ որ օգնիցէ քեզ։ 32Ուստերք քո եւ դստերք քո՝ մատնեա՛լք ազգի օտարի, եւ աչք քո կըկոցեա՛լ հայիցին ՚ի նոսա, եւ ո՛չ հասանիցէ ձեռն քո։ 33Զբերս երկրի քոյ, եւ զամենայն վաստակս քո կերիցէ՛ ազգ, զոր դու ո՛չ գիտիցես։ Եւ եղիցես զրկեալ եւ խորտակեալ զամենայն աւուրս. 34եւ եղիցես յիմարեալ վասն տեսլեանց աչաց քոց՝ զոր տեսանիցես։ 35Հարցէ՛ զքեզ Տէր չարաչար կեղով ՚ի ծունկս եւ ՚ի սրունս. եւ ո՛չ կարասցես բժշկել ՚ի թաթից ոտից քոց մինչեւ ցգլուխ քո։ 36Տարցի՛ զքեզ Տէր եւ զիշխանսն զոր կացուսցես ՚ի վերայ քո՝ յազգ որ ո՛չ գիտիցես դու՝ եւ ո՛չ հարք քո. եւ պաշտեսցե՛ս անդ զաստուածս օտարս, զփայտեղէնս եւ զքարեղէնս. 37եւ եղիցես յառա՛կ եւ ՚ի ցոյց եւ ՚ի զրոյց ՚ի մէջ ամենայն ազգաց՝ յոր տանիցի զքեզ Տէր անդր։ 38Սերմն բազո՛ւմ հանցես յանդի, եւ սակա՛ւ ժողովեսցես. զի կերիցէ զայն մարախ։ 39Այգի՛ս տնկեսցես եւ գործեսցես, եւ գինի ո՛չ արբցես, եւ մի՛ ուրախ լիցիս ՚ի նմանէ. զի կերիցէ զայն՝ ո՛րդն։ 40Եւ եղիցին ձիթենի՛ք յամենայն սահմանս քո, եւ իւղով ո՛չ օծցիս, զի թափեսցի՛ն ձիթենիքն քո։ 41Ուստերս, եւ դստերս ծնցիս, եւ ո՛չ լինիցին քո. քանզի երթիցեն ՚ի գերութեան։ 42Զամենայն ծառատունկ քո եւ զարդի՛ւնս երկրի քոյ հարցէ՛ թրթուր։ 43Եկն որ ՚ի քեզ իցէ, ելցէ քան զքեզ վե՛ր ՚ի վեր, եւ դու իջցես վա՛յր ՚ի վայր. 44նա տացէ՛ քեզ փոխ, եւ դու ո՛չ տացես նմա փոխ. նա՛ եղիցի գլո՛ւխ, եւ դու եղիցիս վե՛րջ։ 45Եւ եկեսցեն ՚ի վերայ քո անէծքս այսոքիկ, եւ հալածեսցեն զքեզ. եւ հասցեն քեզ մինչեւ սատակեսցեն զքեզ, եւ մինչեւ կորուսցեն զքեզ. զի ո՛չ լուար ձայնի Տեառն Աստուծոյ քոյ, պահե՛լ զպատուիրանս նորա եւ զիրաւունս նորա զոր պատուիրեա՛ց քեզ։ 46Եւ եղիցին ՚ի քեզ նշա՛նք եւ արուե՛ստք, եւ ՚ի զաւակի քում մինչեւ ցյաւիտեան. 47փոխանակ զի ո՛չ պաշտեցեր զՏէր Աստուած քո ուրախութեամբ եւ ճշմարիտ սրտիւ. վասն բազմութեանդ ամենեցուն 48պաշտեսցե՛ս զթշնամիս քո՝ զորս առաքեսցէ ՚ի վերայ քո Տէր, ՚ի սով եւ ՚ի ծարաւ եւ ՚ի մերկութիւն՝ եւ ՚ի նուազութեան ամենայնի. եւ դիցէ անո՛ւր երկաթի ՚ի պարանոցի քում մինչեւ սատակեսցէ՛ զքեզ։ 49Ածցէ ՚ի վերայ քո ա՛զգ ՚ի հեռաստանէ ՚ի ծագաց երկրի իբրեւ զխոյանա՛լ արծուոյ. ա՛զգ՝ զորոյ ո՛չ լսիցես զձայն նորա. 50ազգ՝ ժպի՛րհ երեսօք. որ ո՛չ աչառիցէ երեսաց ծերոց, եւ ո՛չ ողորմեսցի տղայոյ. 51եւ կերիցէ՛ զծնունդս խաշանց քոց, եւ զարդի՛ւնս երկրի քոյ. եւ ո՛չ թողուցու քեզ ցորեա՛ն, գինի՛, ե՛ւղ, զանդեա՛յս արջառոց քոց, եւ զհօ՛տս ոչխարաց քոց, մինչեւ կորուսցէ՛ զքեզ։ 52Եւ նեղեսցէ զքեզ յամենայն քաղաքս քո, մինչեւ կործանեսցին պարիսպք քո բարձրացեալք եւ ամուրք՝ յորս դուն յուսացեալ իցես յամենայն երկրին քում. եւ նեղեսցէ՛ զքեզ յամենայն քաղաքս քո՝ զորս ետ քեզ Տէր Աստուած քո։ 53Եւ կերիցե՛ս զծնունդս որովայնի քոյ. զմիս ուստերաց քոց եւ զդստերաց քոց՝ զոր ե՛տ քեզ Տէր, յանձկութեան քում եւ ՚ի նեղութեան քում, որով նեղեսցէ՛ զքեզ թշնամին քո։ 54Գիրգն որ ՚ի քեզ եւ փափուկն յոյժ, չարակնեսցէ՛ յեղբայր իւր եւ ՚ի կին ծոցոյ իւրոյ, եւ ՚ի մնացեալ որդիսն՝ որ մնայցեն նմա, 55տա՛լ միում ՚ի նոցանէ ՚ի մարմնոյ որդւոց իւրոց յորոց ուտիցէ. վասն չմնացելոյն նմա ինչ. յանձկութեանն քում եւ ՚ի նեղութեան, որով նեղիցեն զքեզ թշնամիքն քո յամենայն քաղաքս քո։ 56Եւ գիրգն որ ՚ի քեզ եւ փափուկն յոյժ, որոյ ո՛չ իցէ ոտին իւրոյ առեալ զփո՛րձ գնալոյ ՚ի վերայ երկրի վասն փափկութեան իւրոյ եւ գրգութեան, չարակնեսցէ յա՛յր ծոցոյ իւրոյ. եւ զուստրն իւր, եւ զդուստր. 57եւ զա՛ղտն ելեալ ՚ի միջոյ իւրմէ, եւ զծնունդն զոր ծնանիցի՝ խորովեսցէ՛ ՚ի նոցանէ՝ եւ կերիցէ. եւ վասն նուազութեանն յամենայնէ թաքուսցէ յանձկութեանն եւ ՚ի նեղութեանն. որով նեղիցէ զքեզ թշնամին յամենայն քաղաքս քո։ 58Եւ եթէ ո՛չ լուիցէք առնել զամենայն բանս օրինացս այսոցիկ, զգրեալս ՚ի գիրս յայսմիկ, երկնչե՛լ ՚ի պատուական եւ ՚ի սքանչելի՛ անուանէ Տեառն Աստուծոյ քոյ. 59նորանշա՛ն արասցէ Տէր զհարուածս քո, եւ զհարուածս զաւակի քոյ, զհարուածս մեծամեծս եւ զարմանալիս, եւ զցաւս չարաչարս եւ զկարեւորս։ 60Եւ ածցէ՛ ՚ի վերայ քո զամենայն ախտս չարաչարս զԵգիպտացւոցն՝ յորմէ սոսկայի՛րն յերեսաց նոցա, եւ մխեսցի՛ն ՚ի քեզ։ 61Եւ զամենայն հիւանդութիւնս. եւ զամենայն հարուածս գրեալս ՚ի գիրս օրինացս այսոցիկ, ածցէ՛ Տէր ՚ի վերայ քո՝ մինչեւ սատակեսցէ զքեզ։ 62Եւ մնասջիք թուով սակա՛ւք. փոխանակ զի էիք դուք իբրեւ զաստեղս երկնից բազմութեամբ. եւ ո՛չ լուարուք ձայնի Տեառն Աստուծոյ ձերոյ։ 63Եւ եղիցի որպէս ուրախ եղեւ ՚ի ձեզ Տէր բարի՛ առնել ձեզ, եւ բազմացուցանել զձեզ, նո՛յնպէս ուրախ լինիցի Տէր ՚ի ձեզ՝ սատակել զձեզ. եւ բարձջի՛ք յերկրէն յոր մտանելոց էք ժառանգել զնա։ 64Եւ ցրուեսցէ՛ զքեզ Տէր Աստուած քո ընդ ամենայն ազգս, ՚ի ծագա՛ց երկրի մինչեւ ՚ի ծագս երկրի. եւ ծառայեսցե՛ս անդ աստուածոց օտարաց, փայտից եւ քարանց՝ զորս ո՛չ գիտէիր դու եւ հարք քո։ 65Այլեւ յազգսն յայնոսիկ ո՛չ հանգուսցէ զքեզ, եւ ո՛չ լինիցի կա՛յ թաթից ոտից քոց. եւ տացէ քեզ անդ սի՛րտ տրտմեալ, եւ աչս սորեա՛լս, եւ անձն հարեալ։ 66Եւ եղիցին Կեանք քո կախեա՛լ առաջի աչաց քոց, եւ զարհուրեսցի՛ս զցայգ եւ զցերեկ. եւ ո՛չ հաւատասցեն կենացն քոց։ 67Ընդ առաւօտս ասիցես թէ՝ Ե՞րբ լինիցի երեկոյ. եւ ընդ երեկոյս ասիցես թէ՝ Ե՞րբ լինիցի առաւօտ, ՚ի զարհուրանա՛ց սրտի քոյ զոր երկնչիցիս, եւ ՚ի տեսլեանց աչաց քոց զոր տեսանիցես։ 68Եւ դարձուսցէ զքեզ Տէր անդրէն յԵգիպտոս նաւօք հազարաւոր զօրօք. եւ ընդ ճանապարհ ընդ նոյն՝ ո՛չ յաւելեցուք տեսանել զնա. եւ վաճառեսջի՛ք անդ թշնամեաց ձերոց ՚ի ծառա՛յս եւ յաղախնայս. եւ ո՛չ ոք իցէ որ գնիցէ։