1Եւ ե՛լ Մովսէս յԱրաբո՛վթ Մովաբայ, ՚ի լեառն Նաբաւ, ՚ի կատարն Փոգովրայ, որ է յանդիմա՛ն Երեքոյի. եւ եցո՛յց նմա Տէր զամենայն երկիրն Գաղաադու մինչեւ ցԴան. 2եւ զամենայն երկիրն Նեփթաղիմայ, եւ զամենայն երկիրն Եփրեմի, եւ Մանասէի, եւ զամենայն երկիրն Յուդայ մինչեւ ցծո՛վն վերջին. 3եւ զանապատն, եւ շուրջ զԵրեքոյիւ, եւ զքաղաքսն Արմաւենեաց մինչեւ ցՍեգովր։ 4Եւ ասէ Տէր ցՄովսէս. Ա՛յս է երկիրն զոր երդուայ Աբրահամու եւ Սահակայ եւ Յակոբայ՝ եւ ասեմ. Զաւակի՛ քում տաց զդա. ցուցի՛ աչաց քոց, եւ անդր մի՛ մտցես։ 5Եւ վախճանեցաւ Մովսէս ծառայ Տեառն յերկրին Մովաբու ըստ բանի Տեառն։ 6Եւ թաղեցին զնա ՚ի Գայի մերձ ՚ի տունն Փոգրովրայ. եւ ո՛չ ոք գիտաց զգերեզման նորա մինչեւ ցայսօր։ 7Եւ Մովսէս էր ամաց հարեւր եւ քսանից ՚ի վախճանելն իւրում. եւ ո՛չ վատեցին աչք նորա, եւ ո՛չ խորշոմեցան ծնօտք նորա։ 8Եւ լացին որդիքն Իսրայէլի զՄովսէս յՌաբովթ Մովաբու առ Յորդանանու յանդիման Երեքոյի աւուրս երեսուն. եւ կատարեցան աւուրք սգոյ լալեացն Մովսիսի։

9Եւ Յեսու որդի Նաւեայ՝ լցա՛ւ հոգւով իմաստութեամբ. զի ե՛դ Մովսէս զձեռն իւր ՚ի վերայ նորա. եւ հնազանդեցա՛ն նմա որդիքն Իսրայէլի, եւ արարին որպէս պատուիրեա՛ց Տէր Մովսիսի։ 10Եւ ո՛չ եւս եկաց մարգարէ յԻսրայէլի իբրեւ զՄովսէս, այր զոր ծանեա՛ւ Տէր դէմ յանդիման. 11ամենայն նշանօք եւ արուեստիւք զոր առաքեա՛ց Տէր առնել յերկրին Եգիպտացւոց, ՚ի փարաւոն եւ ՚ի ծառայս նորա, եւ յամենայն երկիր նորա զնշանս մեծամեծս. 12զձեռն հզօ՛ր եւ զբազուկ բարձր՝ զոր արա՛ր Մովսէս առաջի որդւոցն Իսրայէլի։