1Եւ այժմ Իսրայէլ՝ լո՛ւր իրաւանց եւ դատաստանաց, զոր ես ուսուցանեմ քեզ այսօր առնել. զի կեցջիք, եւ մտանիցէք ժառանգել զերկիրն՝ զոր Տէր Աստուած մեր տացէ ձեզ։ 2Մ՛ի յաւելուցուք ինչ ՚ի բանն՝ զոր ես պատուիրեմ ձեզ, եւ մի՛ հատանիցէք ՚ի նմանէ. պահեսջիք զհրամանս Տեառն Աստուծոյ մերոյ զոր ե՛ս պատուիրեմ ձեզ։ 3Աչք ձեր տեսին՝ զոր ինչ արա՛ր Տէր ընդ Բելփեգովր. զի ամենայն մարդ որ չոգաւ զհետ Բելփեգովրայ՝ սատակեա՛ց զնա Տէր Աստուած մեր ՚ի ձէնջ։ 4Բայց դուք՝ որ յարեցայք ՚ի Տէր Աստուած ձեր, կենդանի՛ էք դուք ամենեքեան յաւուրս յայսմիկ։ 5Տեսէ՛ք զի ուսուցի ձեզ զիրաւո՛ւնս եւ զդատաստանս՝ որպէս պատուիրեաց ինձ Տէր առնե՛լ զայն յերկրին յորում դուք մտանիցէք ժառանգել զնա։ 6Եւ պահեսջի՛ք եւ արասջի՛ք. զի ա՛յն է իմաստութիւն ձեր եւ հանճա՛ր առաջի ամենայն ազգացն, որ լսիցեն զամենայն իրաւունս զայսոսիկ եւ ասիցեն. Ահա ժողովուրդ իմաստո՛ւն եւ հանճարե՛ղ ա՛զգս այս մեծ։ 7Քանզի ո՞վ իցէ ազգ մեծ՝ որոյ իցէ Աստուած մօտ ՚ի նոսա. որպէս Տէր Աստուած մեր յամենայնի՝ որովք կարդասցուք առ նա. 8եւ ո՞ր ազգ մեծ՝ որոյ իցեն իրաւունք եւ դատաստանք արդա՛րք, ըստ ամենայնի իրաւանցս այսոցիկ՝ զոր ե՛ս տամ այսօր առաջի ձեր։

9Հայեա՛ց ՚ի քեզ եւ զգո՛յշ լեր անձին քում յոյժ. մի՛ մոռանայցես զամենայն բանս զայսոսիկ՝ զոր տեսին աչք քո. եւ մի՛ մերժեսցին ՚ի սրտէ քումմէ զամենայն աւուրս կենաց քոց. եւ խելամո՛ւտ արասցես որդւոց քոց, եւ որդւո՛ց որդւոց քոց, 10զօրն յորում կացէք դուք ՚ի Քորէբ առաջի Տեառն Աստուծոյ ձերոյ յաւուրն եկեղեցւոյ. յորժամ ասաց ցիս Տէր, թէ. Եկեղեցացւո՛ առիս զժողովուրդդ, եւ լուիցե՛ն զպատգամս իմ զոր ուսուցից երկնչե՛լ յինէն զամենայն աւուրս՝ որչափ կենդանի՛ իցեն դոքա ՚ի վերայ երկրի, եւ ուսուսցե՛ն զորդիս իւրեանց։ 11Եւ մատուցեալ կայիք դուք առ ստորոտով լերինն. եւ լեառնն բորբոքէր հրով մինչեւ յերկինս, եւ խաւա՛ր եւ մէգ եւ մառախո՛ւղ էր։ 12Եւ խօսեցաւ Տէր ընդ ձեզ ՚ի միջոյ հրոյն. զձայն պատգամացն լուարուք դուք, եւ նմանութիւն ինչ ո՛չ տեսէք. բայց միայն զբարբա՛ռն։ 13Եւ պատմեա՛ց ձեզ զուխտն իւր զոր պատուիրեաց ձեզ առնել, զտա՛սն պատգամսն. եւ գրեաց զնոսա ՚ի վերայ երկուց քարեղէն տախտակաց։ 14Եւ պատուիրեաց ինձ ՚ի ժամանակին յայնմիկ՝ ուսուցանե՛լ իրաւունս ձեզ եւ դատաստանս. եւ առնե՛լ ձեզ զնոսա յերկրին յոր դուք մտանիցէք ժառանգե՛լ զնա։ 15Եւ զգուշացարո՛ւք յոյժ անձանց ձերոց. զի նմանութիւն ինչ ո՛չ տեսէք յաւուրն յայնմիկ՝ յորում խօսեցա՛ւ ընդ ձեզ Տէր ՚ի Քորէ՛բ լերինն ՚ի միջո՛յ հրոյն։ 16Մի՛ անօրինիցիք, եւ առնիցէք ձեզ դրօշեալս նմանութիւն ամենայն պատկերի. նմանութիւն արուակա՛ն կամ իգական. 17նմանութիւն ամենայն անասնոց՝ որ իցեն յերկրի. նմանութիւն ամենայն հաւու թռչնոյ, որ թռչիցին ՚ի ներքոյ երկնից. 18նմանութիւն ամենայն սողնոց՝ որ սողին ՚ի վերայ երկրի. նմանութիւն ամենայն ձկանց՝ որ իցեն ՚ի ջուրս ՚ի ներքոյ երկրի։ 19Եւ մի՛ հայեցեալ ընդ երկինս տեսանիցես զարեգակն եւ զլուսին եւ զաստեղս, եւ զամենայն զարդ երկնից, եւ մոլորեալ երկի՛ր պագանիցես նոցա, եւ պաշտիցես զնոսա. զոր բաժանեա՛ց Տէր Աստուած ամենայն ազգաց որ ՚ի ներքոյ երկնից. 20եւ զձեզ ա՛ռ ՚ի ձեռն Աստուած, եւ եհա՛ն զձեզ յերկաթեղէն հնոցէն յԵգիպտոսէ, լինել նմա ժողովուրդ վիճակա՛ւ, որպէս եւ յաւուր յայսմիկ։

21Եւ Տէր բարկացա՛ւ ինձ վասն բանիցն ասացելոց ՚ի ձէնջ, եւ երդուաւ զի մի՛ անցից ընդ այդ Յորդանան. եւ զի մի՛ մտանիցեմ յերկիրն՝ զոր Տէր Աստուած քո տացէ քեզ ՚ի ժառանգութիւն։ 22Եւ արդ՝ ես աւասիկ մեռանի՛մ յերկրիս յայսմիկ, եւ ո՛չ անցանեմ ընդ Յորդանան. բայց դուք անցանէ՛ք եւ ժառանգէ՛ք զերկիրն բարի։ 23Զգո՛յշ լերուք գուցէ մոռանայցէք զուխտն Տեառն Աստուծոյ մերոյ՝ զոր ուխտեա՛ց ընդ ձեզ, եւ առնիցէք ձեզ դրօշեալ նմանութիւն յամենայնէ՝ յորոց պատուիրեա՛ց քեզ Տէր Աստուած քո։ 24Զի Տէր Աստուած քո հո՛ւր ծախիչ է. Աստուած նախանձո՛տ։ 25Եւ եթէ ծնանիցիս որդի՛ս, եւ զորդի՛ս որդւոց քոց, եւ յամիցէք յերկրին. եւ անօրինիցիք, եւ առնիցէք դրօշեալ նմանութիւն ամենայնի. եւ առնիցէք չա՛ր առաջի Տեառն Աստուծոյ ձերոյ բարկացուցանե՛լ զնա։ 26Ունիմ ձեզ վկա՛յս այսօր զերկինս եւ զերկիր, զի կորստեամբ կորնչիցի՛ք յերկրէն, յոր դուք անցանէք ընդ Յորդանան ժառանգե՛լ զնա. եւ ո՛չ բազմացուցանիցէք զժամանակս աւուրց ՚ի վերայ նորա. այլ սատակելով սատակեսջի՛ք։ 27Եւ ցրուեսցէ՛ Տէր զձեզ ընդ ամենայն ազգս. եւ մնայցէք սակա՛ւք թուով ՚ի մէջ ազգացն՝ յորս տարցի զձեզ Տէր անդր։ 28Եւ պաշտիցէք անդ զաստուածս օտարս զձեռագործս մարդկան. զփայտեղէնս եւ զքարեղէնս. որք ո՛չ տեսանիցեն եւ ո՛չ լսիցեն, եւ ո՛չ ուտիցեն, եւ ո՛չ հոտոտիցեն։ 29Եւ խնդրիցէք անդ զՏէր Աստուած ձեր. եւ գտանիցէք յորժամ խնդրիցէք զնա յամենայն սրտէ ձերմէ, եւ յամենայն անձնէ ձերմէ, ՚ի նեղութեան ձերում. 30եւ գտանիցե՛ն զքեզ ամենայն բանքս այսոքիկ ՚ի վախճանի աւուրց։ Եւ դարձցի՛ս դու առ Տէր Աստուած քո, եւ լուիցե՛ս ձայնի նորա. 31զի Աստուած ողորմա՛ծ է, ո՛չ թողցէ զքեզ եւ ո՛չ սատակեսցէ զքեզ. եւ ո՛չ մոռասցի զուխտ հարցն քոց, զոր երդուաւ նոցա։

32Հարցէ՛ք զաւուրսն զառաջինս զեղեալս յառաջագոյն քան զձեզ. յօրէ յորմէ հաստատեաց Աստուած զմարդ ՚ի վերայ երկրի. ՚ի ծագաց երկրի մինչեւ ՚ի ծագս երկնից, եթէ եղեա՞լ իցէ ըստ բանիս մեծի այսորիկ. եթէ ազդեա՞լ իցէ լուր այսպիսի. 33եթէ լուեա՞լ իցէ ազգի զձայն Աստուծոյ կենդանւոյ բարբառելոյ ՚ի միջոյ հրոյ. որպէս լուա՛ր դու՝ եւ կեցեր. 34եթէ յօժարեա՞լ իցէ Աստուծոյ մտանե՛լ առնուլ իւր ա՛զգ ՚ի միջոյ ազգի, փորձութեամբ եւ նշանօք եւ արուեստիւք եւ պատերազմաւ, հզօ՛ր ձեռամբ եւ բա՛րձր բազկաւ, եւ մեծամե՛ծ տեսլեամբք. ըստ ամենայնի զոր արա՛ր Տէր Աստուած մեր յԵգիպտոս՝ յանդիման քո՛ իսկ տեսանելով։ 35Զի գիտասցես թէ Տէր նա՛ է Աստուած, եւ չի՛ք այլ ոք բա՛ց ՚ի նմանէ։ 36Յերկնի՛ց լսելի եղեւ բարբառ նորա խրատել զքեզ. եւ յերկրի եցո՛յց քեզ զհուր իւր զմեծ, եւ զպատգամս նորա լուար ՚ի միջոյ հրոյ, 37վասն սիրելոյ նորա զհարսն քո։ Եւ ընտրեաց զզաւակ նոցա յետ նոցա զձեզ քան զամենայն ազգս. եւ եհան զձեզ ինքնի՛ն զօրութեամբ իւրով մեծաւ յԵգիպտոսէ. 38սատակել քեզ զազգս մեծամեծս եւ հզօրագո՛յնս քան զքեզ յերեսաց քոց. տանե՛լ զքեզ եւ տա՛լ քեզ զերկիր նոցա ՚ի ժառանգութիւն. որպէս ունի՛ս իսկ այսօր։ 39Եւ ծանիցե՛ս այսօր եւ դարձցիս մտօք. զի Տէր Աստուած քո՝ նա՛ է Աստուած յերկինս ՚ի վեր եւ յերկիր ՚ի խոնարհ. եւ չի՛ք ա՛յլ ոք բաց ՚ի նմանէ։ 40Եւ պահեսցե՛ս զիրաւունս նորա, եւ զպատուիրանս նորա զոր ե՛ս պատուիրեմ քեզ այսօր, զի բարի լինիցի քեզ եւ որդւոց քոց յետ քո. եւ երկայնակեա՛ց լինիցիս յերկրին՝ զոր Տէր Աստուած տացէ քեզ զամենայն աւուրս։

41Յայնժամ զատոյց Մովսէս երիս քաղաքս յայնկոյս Յորդանանու յարեւելից կողմանէ, 42փախչե՛լ անդր սպանողին, որ ոք սպանանիցէ զընկեր իւր եւ ո՛չ գիտութեամբ. եւ ինքն ո՛չ ատեայր զնա յերէկն եւ յեռանդ, անկցի՛ ՚ի մի ՚ի քաղաքացն այնոցիկ՝ եւ կեցցէ։ 43ԶԲոսոր յանապատին, ՚ի դաշտին յերկրին Ռուբինի. եւ զՌամովթ ՚ի Գաղաադ զԳադայ. եւ զԳաւղովն ՚ի Բասա՛ն զՄանասէի։

44Եւ ա՛յս օրէն է՝ զոր ե՛դ Մովսէս առաջի որդւոցն Իսրայէլի։ 45Եւ ա՛յս են վկայութիւնք եւ իրաւունք եւ դատաստանք, զոր խօսեցաւ Մովսէս ընդ որդիսն Իսրայէլի յելանե՛լ նոցա յերկրէն Եգիպտացւոց. 46յա՛յն կոյս Յորդանանու. ՚ի ձորն որ է մերձ ՚ի տունն Փեգովրայ. յերկրին Սեհոնի արքայի Ամովրհացւոց՝ որ բնակեա՛լ էր յԵսեբոն. զորս եհա՛ր Մովսէս եւ որդիքն Իսրայէլի յելանել իւրեանց յերկրէն Եգիպտացւոց։ 47Եւ ժառանգեցի՛ն զերկիրն նոցա. եւ զերկիր Ովգայ թագաւորին Բասանու. զերկո՛ւց թագաւորացն Ամովրհացւոց՝ որ էին յա՛յն կոյս Յորդանանու ընդ արեւելս. 48յԱրոերայ՝ որ է՛ առ եզե՛րբ ձորոյն Առնովնայ, մինչեւ ցլեառնն Սեհոնի՝ որ է՛ առ Հերմոն։ 49Զամենայն զԱրաբիա՝ որ է յա՛յնկոյս Յորդանանու ընդ արեւելս, մինչեւ ցծո՛վն Արաբացւոց ՚ի ներքոյ Ասեդովթայ կոփածոյին։