1Եւ եթէ տարցի զքեզ Տէր Աստուած քո յերկիրն՝ յոր դո՛ւ մտանիցես ժառանգել, եւ բարձցէ՛ զազգսն մեծամեծս եւ զբազումս յերեսաց քոց։ ԶՔետացին, եւ զԳերգեսացին, եւ զԱմովրհացին, եւ զՔանանացին, եւ զՓերեզացին, եւ զԽեւացին, եւ զՅեբուսացին. եւթն ազգս մեծամեծս եւ զօրագո՛յնս քան զձեզ։ 2Եւ մատնեսցէ՛ զնոսա Տէր Աստուած քո ՚ի ձեռս քո. հարցե՛ս զնոսա, եւ եղծանելով եղծցե՛ս զնոսա. մի՛ դնիցես ընդ նոսա ուխտ, եւ մի՛ ողորմեսցիս նոցա։ 3Եւ մի՛ առնիցէք խնամութիւն ընդ նոսա. զդուստր քո մի՛ տացես ուստեր նորա, եւ զդուստր նորա մի՛ առնուցուս ուստեր քում. 4զի մի ապստամբեցուցանիցէ զորդին քո յինէն, եւ պաշտիցէ զաստուածս օտարս. եւ բարկասցի՛ սրտմտութեամբ Տէր ՚ի ձեզ, եւ սատակեսցէ՛ զձեզ վաղվաղակի։ 5Այլ ա՛յսպէս արասջիք նոցա. զբագինս նոցա կործանեսջի՛ք, եւ զարձանս նոցա փշրեսջի՛ք, եւ զանտառս նոցա կոտորեսջի՛ք, եւ զդրօշեալս նոցա այրեսջի՛ք հրով։ 6Զի ժողովուրդ սո՛ւրբ ես դու Տեառն Աստուծոյ քում. եւ զքե՛զ ընտրեաց Տէր Աստուած քո, լինել նմա ժողովուրդ սեպհական քան զա՛զգս ամենայն որ ՚ի վերայ երեսաց երկրի։ 7Ո՛չ զի բազում էք դուք քան զամենայն ազգս, հաճեցա՛ւ Տէր ընդ ձեզ՝ եւ ընտրեաց զձեզ. զի դուք սակաւո՛ր էք քան զամենայն ազգս. 8այլ վասն սիրելո՛յ զձեզ Տեառն, եւ պահելո՛յ զերդումնն զոր երդուաւ հարցն ձերոց, եհա՛ն զձեզ Տէր հզօր ձեռամբ եւ բարձր բազկաւ. եւ փրկեա՛ց զձեզ ՚ի տանէ ծառայութեան, ՚ի ձեռաց փարաւոնի արքային Եգիպտացւոց։ 9Եւ ծանիցե՛ս զի Տէր Աստուած քո նա՛ է Աստուած, Աստուած հաւատարիմ։ Որ պահէ զուխտ եւ զողորմութիւն սիրելեաց իւրոց, եւ որոց պահեն զպատուիրանս նորա ՚ի հազա՛ր ազգս. 10եւ հատուցանէ ատելեաց իւրոց յանդիման սատակե՛լ զնոսա. եւ ո՛չ յամեցուսցէ յատելեաց, այլ յանդիմա՛ն հատուսցէ նոցա։

11Եւ պահեսցե՛ս զպատուիրանս եւ զիրաւունս եւ զդատաստանս՝ զոր ես պատուիրեմ քեզ առնել։ 12Եւ եղիցի յորժամ լուիցէք զամենայն իրաւունս զայսոսիկ, եւ պահիցէ՛ք եւ առնիցէք զնոսա, պահեսցէ՛ քեզ Տէր Աստուած քո զուխտն եւ զողորմութիւն՝ որպէս երդուաւ հարցն մերոց։ 13Եւ սիրեսցէ՛ զքեզ եւ օրհնեսցէ՛ զքեզ, եւ բազմացուսցէ՛ զքեզ. եւ օրհնեսցէ՛ զծնունդս որովայնի քոյ՝ եւ զպտուղ երկրի քոյ. եւ զցորեան քո, եւ զգինի քո, եւ զեւղ քո. զանդեայս արջառոց քոց, եւ զհօտս ոչխարաց քոց, յերկրին զոր երդուաւ Տէր հարցն քոց տա՛լ զնա քեզ։ 14Օրհնեա՛լ լիցիս դու քան զազգս ամենայն. մի՛ լիցի ՚ի ձեզ ամուլ, եւ անծնունդ, եւ մի՛ յանասուն քո. 15եւ բարձցէ՛ ՚ի քէն Տէր զամենայն ախտ, եւ զամենայն ցաւս չարաչարս Եգիպտացւոցն զորս տեսերն եւ զորս գիտացեր. եւ մի՛ ածցէ զնոսա ՚ի վերայ քո, այլ ածցէ՛ զնոսա ՚ի վերայ թշնամեաց քոց, եւ ՚ի վերայ ամենայն ատելեաց քոց։ 16Եւ կերիցես զամենայն զկապուտ ազգացն՝ զոր Տէր Աստուած քո տացէ քեզ. եւ մի՛ խնայեսցէ ա՛կն քո ՚ի նոսա, եւ ո՛չ պաշտեսցես զդիս նոցա. զի խո՛չ է այն քեզ։

17Ապա թէ ասիցես ՚ի մտի քում. զի բազո՛ւմ է ազգն այն քան զիս, զիա՞րդ կարացից սատակել զնոսա։ 18Մի՛ երկնչիցիս ՚ի նոցանէ. յիշելով յիշեսցե՛ս զոր ինչ արար Տէր Աստուած քո ընդ փարաւոն եւ ընդ ծառայս նորա, եւ ընդ ամենայն Եգիպտացիսն. 19զփորձանս մեծամեծս զոր տեսին աչք քո. զնշանս եւ զարուեստս մեծամեծս, զձեռնն հզօր՝ եւ զբազուկն բարձր. որպէս եհա՛ն զքեզ Տէր Աստուած քո անտի, նո՛յնպէս արասցէ Տէր Աստուած մեր ընդ ամենայն ազգսն յորոց դու երկնչիցիս յերեսաց նոցա։ 20Եւ զձիաստա՛ցն առաքեսցէ Տէր Աստուած քո ՚ի նոսա, մինչեւ սատակեսցին մնացորդքն եւ թաքուցեալքն ՚ի քէն։ 21Մի՛ զանգիտիցես յերեսաց նոցա. զի Տէր Աստուած քո ՚ի միջի՛ քում է, մեծ եւ հզօր. 22եւ ծախեսցէ՛ Տէր Աստուած քո զազգսն զայնոսիկ յերեսաց քոց առ սակաւ սակաւ։ Ո՛չ կարասցես սատակե՛լ զնոսա վաղվաղակի. զի մի՛ լիցի երկիրն աւերակ, եւ բազմանայցեն ՚ի վերայ քո գազանք անապատի։ 23Եւ մատնեսցէ՛ զնոսա Տէր Աստուած քո ՚ի ձեռս քո, եւ կորուսցէ՛ զնոսա կորստեամբ մեծաւ. մինչեւ սատակեսցէ զնոսա։ 24Եւ մատնեսցէ՛ զթագաւորս նոցա ՚ի ձեռս ձեր. եւ կորուսջի՛ք զանուն նոցա ՚ի տեղւոջէն յայնմանէ. եւ մի՛ ոք կացցէ ընդդէմ քո, մինչեւ սատակեսցես զնոսա։ 25Զդրօշեալ դից նոցա այրեսցե՛ս հրով, եւ մի՛ ցանկանայցես արծաթոյ եւ ոսկւոյ ՚ի նոցանէ, եւ մի՛ առնուցուս քեզ. եւ մի՛ յանցանիցես նովաւ. զի գարշելի՛ է այն Տեառն Աստուծոյ քում։ 26Եւ մի՛ տանիցիս զգարշելին ՚ի տուն քո, եւ լինիցիս ՚ի նզովս իբրեւ զնոյն. այլ գարշելո՛վ գարշեսցես, եւ պղծելով պղծեսցե՛ս զնոսա՝ զի նզովեա՛լ է։