1Եւ ասէ ցՄովսէս. Ե՛լ առ Տէր, դո՛ւ եւ Ահարոն, եւ Նաբադ եւ Աբիուդ՝ եւ եւթանասուն այր ՚ի ծերոցն Իսրայէլի։ եւ երկի՛ր պագցեն Տեառն ՚ի հեռաստանէ։ 2Եւ մերձեսցի Մովսէ՛ս միայն առ Աստուած. եւ նոքա մի՛ մերձեսցին։ բայց ժողովուրդն մի՛ ելցէ ընդ նոսա։ 3Եւ եմուտ Մովսէս եւ պատմեաց ժողովրդեանն զամենայն պատգամս Աստուծոյ, եւ զամենայն իրաւունս։ Պատասխանի ետ ամենայն ժողովուրդն ՚ի մի ձայն՝ եւ ասեն. Զամենայն պատգամս զոր խօսեցաւ Տէր՝ արասցո՛ւք եւ լուիցուք։ 4Եւ գրեաց Մովսէս զամենայն զպատգամսն Տեառն։ Եւ կանխեալ Մովսիսի ընդ առաւօտն, շինեաց սեղա՛ն ՚ի ստորոտ լերինն. եւ երկոտասան վէ՛մ կանգնեաց ըստ երկոտասան ազգացն Իսրայէլի։

5Եւ առաքեաց զերիտասարդս որդւոցն Իսրայէլի, եւ հանին ողջակէզս, եւ զոհեցին զոհս փրկութեան Աստուծոյ ո՛րթս։ 6Եւ առեալ Մովսիսի զկէ՛ս արեանն արկ ՚ի խառնելիսն. եւ զկէ՛ս արեանն եհեղ առաջի սեղանոյն։ 7Եւ առեալ զգիր ուխտին ընթերցաւ յականջս ժողովրդեանն։ Եւ ասեն. Զամենայն զոր խօսեցաւ Տէր՝ արասցո՛ւք եւ լուիցուք։ 8Եւ առեալ Մովսիսի զարիւնն, ցանեաց զժողովրդեամբն՝ եւ ասէ. Ահա ա՛յս արիւն է ուխտին զոր ուխտեաց Տէր ընդ ձեզ վասն ամենայն բանիցս այսոցիկ։

9Եւ ելին Մովսէս եւ Ահարոն, եւ Նաբադ եւ Աբիուդ՝ եւ եւթանասունք ՚ի ծերոցն Իսրայէլի. 10եւ տեսին զտեղին ուր կայր Աստուած Իսրայէլի. եւ ընդ ոտիւք նորա իբրեւ զգործա՛ծ աղիւսոյ շափիղայ. եւ իբրեւ զտեսի՛լ հաստատութեան երկնից սրբութեամբ։ 11Եւ յընտրելոցն Իսրայէլի ո՛չ ծախեցաւ եւ ո՛չ մի. եւ երեւեցան ՚ի տեղւոջն Աստուծոյ. եւ կերա՛ն եւ արբին։

12Եւ ասէ Տէր ցՄովսէս. Ե՛լ առիս ՚ի լեառնն, եւ ա՛նդ լինիջիր։ եւ տա՛ց քեզ տախտակս քարեղէնս եւ օրէնս եւ պատուիրանս զորս գրեցի, լինել նոցա օրէնսդիր։ 13Յարեաւ Մովսէս եւ Յեսու պաշտօնեայ նորա, եւ ելին ՚ի լեառնն Աստուծոյ։ 14Եւ ասէ ցծերսն. Դադարեցէ՛ք այդր մինչեւ դարձցուք առ ձեզ։ եւ ահա Ահարոն եւ Ովր ընդ ձե՛զ են։ եթէ ուրուք դատաստան ինչ լինիցի, երթիցե՛ն առ նոսա։ 15Եւ ել Մովսէս ՚ի լեառնն. եւ ծածկեաց ամպն զլեառնն։ 16Եւ իջին փառքն Աստուծոյ ՚ի լեառնն Սինա. եւ ծածկեա՛ց զնա ամպն զվեց օր։ Եւ կոչեաց Տէր զՄովսէս յաւուրն եւթներորդի ՚ի միջոյ ամպոյն։ 17Եւ տեսիլ փառացն Տեառն իբրեւ զհուր բորբոքեալ ՚ի վերայ գլխոյ լերինն՝ յանդիման որդւոցն Իսրայէլի։ 18Եւ եմո՛ւտ Մովսէս ՚ի մէջ ամպոյն, եւ ել ՚ի լեառնն. եւ է՛ր Մովսէս ՚ի լերին անդ զքառասուն տիւ եւ զքառասուն գիշեր։