Տեսիլ Եզեկիելի քահանայի որդւոյ Բուզեայ. զոր ետես յերկրին Քաղդեացւոց ՚ի վերայ Քովբար գետոյ։

Տեսիլ Եզեկիելի քահանայի որդւոյ Բուզեայ. զոր ետես յերկրին Քաղդեացւոց ՚ի վերայ Քովբար գետոյ։ [1]

1Եւ եղեւ յամին երեսներորդի, յամսեանն չորրորդի, որ օր հինգ էր ամսոյն. եւ էի ես ՚ի մէջ գերութեանն առ ափն Քովբար գետոյ. եւ բացան երկինք, եւ տեսի զտեսիլ Աստուծոյ. 2որ օր հինգ էր ամսոյն. ա՛յն ամ հինգերորդ էր գերութեանն Յովաքիմայ արքայի։ 3Եւ եղեւ բա՛ն Տեառն առ Եզեկիէլ քահանայ՝ որդի Բուզեայ, յերկրին Քաղդեացւոց ՚ի վերայ Քովբար գետոյ։ Եւ ա՛նդ եղեւ ՚ի վերայ իմ ձեռն Տեառն։ 4Եւ տեսի՝ եւ ահա հողմ վերացեալ գայր ՚ի հիւսւսոյ, եւ ամպ մեծ ՚ի կողման նորա. եւ լոյս շուրջ զնովաւ, եւ հուր փայլատակէր ՚ի նմանէ. եւ ՚ի մէջ նորա իբրեւ զտեսիլ բազմագունի ականց, եւ ճառագայթք ՚ի նմա։ 5Եւ ՚ի մէջ նորա կերպարանք չորից կենդանեաց. եւ ա՛յս տեսիլ նոցա. կերպարանք մարդոյ ՚ի վերայ նոցա։ 6Եւ չորք դէմք միոյ, եւ չորք թեւք միոյ միոյ ՚ի նոցանէ։ 7Եւ բարձք նոցա բարձք ուղո՛րդք. եւ ոտք նոցա թեւաւորք էին, եւ կճղակք նոցա իբրեւ զկճղակս որթուց. եւ կայծակունք թօթափէին ՚ի նոցանէ իբրեւ ՚ի փայլատականց պղնձոյ։ Եւ թեւք իւրեանց երագո՛ւնք էին. 8եւ ձեռն մարդոյ ՚ի ներքոյ թեւոց նոցա ՚ի չորեսին կողմանս նոցա. եւ երեսք նոցա 9եւ թեւք չորեցունց ընդ միմեանս թեւակից էին խառնեալ. եւ զերեսս իւրեանց ՚ի գնալն յետս ընդդէմ ո՛չ դարձուցանէին. իւրաքանչիւր հանդէպ երեսաց իւրեանց գնային։ 10Եւ կերպարանք երեսաց նոցա՝ կերպարանք մարդոյ՝ եւ կերպարանք առիւծու յաջմէ չորեցունց. եւ կերպարանք եզին, եւ կերպարանք արծուոյ ՚ի ձախմէ չորեցունց. 11ա՛յս կերպարանք նոցա։ Եւ թեւք նոցա տարածեալ ՚ի վերուստ չորեցունց. իւրաքանչիւր երկու երկու խառնեալ ընդ միմեանս, եւ երկու երկու ծածկէին ՚ի վերուստ զմարմինս իւրեանց։ 12Եւ իւրաքանչիւր հանդէպ երեսաց իւրեանց գնային. յոր կողմն դիմէր հողմնն՝ գնային, եւ յետս ընդդէմ ո՛չ դառնային ՚ի գնացս իւրեանց։ 13Եւ ՚ի մէջ գազանացն տեսիլ իբրեւ զկայծականց հրոյ բորբոքելոյ. եւ իբրեւ զտեսիլ ղ՚ամբարաց խառնելոց ՚ի մէջ գազանացն, եւ լոյս հրոյ. եւ ՚ի հրոյ անտի փայլատակունք հատանէին. 14եւ գազանքն երագս ընթանային, եւ թեթեւս դառնային ՚ի նմանութիւն արեգական։ 15Եւ տեսանէի եւ ահաւասիկ անիւ մի յերկրի զհետ գազանացն չորեցունց. եւ կերպարանք անուոցն եւ արա՛ր նոցա՝ իբրեւ զտեսիլ ականց Թարշշի. 16եւ կերպարանք չորեցունց՝ եւ տեսիլ նոցա, եւ գործուած իւրեանց, որպէս թէ շրջիցի անիւ ՚ի մէջ անուոյ։ 17՚Ի չորեսին կողմանս իւրեանց գնային, եւ յետս ընդդէմ ո՛չ դառնային ՚ի թիկունս իւրեանց. 18եւ բարձունք էին. Հայէի ընդ նոսա՝ եւ տեսանէի զի լի էին աչօք թիկունք նոցա շուրջ զչորեքումբք. 19եւ ՚ի գալ գազանացն, գնային եւ անիւքն ընդ նոսա, եւ ՚ի վերանալ գազանացն յերկրէ՝ վերանային եւ անիւքն։ 20Ընդ որ կողմ դիմէր ամպն եւ հողմն, երթային գազանքն՝ եւ անիւքն ընդ նոսին վերանային. զի ոգի կենդանի՛ գոյր յանիւսն։ 21՚Ի գնալն նոցա գնային, եւ ՚ի կալն նոցա՝ զտեղի առնուին, եւ ՚ի վերանալ նոցա յերկրէ, եւ անիւքն ընդ նոսին վերանային. զի ոգի կենդանի՛ գոյր յանիւսն։ 22Եւ նմանութիւն հաստատութեան ՚ի վերայ գլխոյ գազանացն իբրեւ զտեսի՛լ ական վանի՝ տարածեալ ՚ի վերայ թեւոց նոցա ՚ի վերուստ։ 23Եւ ՚ի ներքոյ հաստատութեանն թեւք իւրեանց տարածեալ սաւառնէին ընդ միմեանս. եւ իւրաքանչիւր երկու երկու ծածկէին զմարմինս իւրեանց։ 24Եւ լսէի զձայն թեւոց նոցա ՚ի սաւառնելն իբրեւ զձայն ջուրց բազմաց, եւ իբրեւ զձայն Աստուծոյ Սադայի. եւ ՚ի գնալն իւրեանց ձայն պատգամաց իբրեւ զձայն բանակի. եւ ՚ի կալն իւրեանց յանկչէին թեւք իւրեանց։ 25Եւ ահա բարբառ ՚ի վերուստ քան զհաստատութիւնն որ է՛ր ՚ի վերայ գլխոց նոցա ՚ի կալն իւրեանց, եւ յամբառնալն զթեւս իւրեանց։ 26Եւ ՚ի վերոյ քան զհաստատութիւնն որ ՚ի վերայ գլխոց նոցա իբրեւ զտեսիլ ական շափիղ՚այ. եւ նմանութիւն աթոռոյ ՚ի վերայ նորա. եւ ՚ի վերայ աթոռոյն՝ նմանութիւն կերպարանաց մարդոյ։ 27Եւ տեսանէի իբրեւ զտեսիլ ական բազմագունի, եւ իբրեւ զտեսիլ հրոյ ՚ի ներքոյ քան զնա շուրջանակի. միջովք չափ ՚ի վեր՝ նմանութիւն արեգական, եւ միջովք չափ ՚ի խոնարհ՝ նմանութիւն հրոյ. եւ լոյսն որ շուրջ զնովաւ բա՛կ ունէր, 28իբրեւ տեսիլ աղեղանդ որ ձգի յամպս յաւուրս անձրեւաց. եւ ա՛յսպէս ահագին տեսիլ լուսոյ շուրջ զնովաւ։