1Եւ եղեւ բա՛ն Տեառն առ իս՝ եւ ասէ. 2Որդի մարդոյ, դի՛ր վկայութիւն Երուսաղեմի զանօրէնութեանց նորա, 3եւ ասասցես. Ա՛յսպէս ասէ Ադովնայի Տէր ցԵրուսաղէմ. Արմատ քո եւ ծնունդ քո յերկրէն Քանանացւոց. եւ հայր քո Ամովրհացի, եւ մայր քո Քետացի. 4եւ ծնունդն քո յորում աւուր ծնար՝ ո՛չ ոք եհար զպորտ քո, եւ ո՛չ պնդեցին զստինս քո. եւ ջրով ո՛չ լուացար ՚ի փրկութիւն, եւ աղիւ ո՛չ յաղեցար, եւ ՚ի խանձարուրս ո՛չ պատեցար։ 5Եւ ո՛չ խնայեաց ՚ի քեզ ակն իմ, եւ ո՛չ արարի քեզ ինչ մի յայսմ ամենայնէ զգուշանալ, թէ գուցէ՛ անցանիցէ ինչ ընդ քեզ. եւ ընկեցեալ դնէիր ընդ երեսս դաշտին վասն խոտորնակ մտաց քոց. յաւուրն յորում ծնար 6անցի՛ առ քեւ, եւ տեսի արեամբ թաթաւեալ. եւ ասացի ցքեզ. Կենդանասջի՛ր յարենէ քումմէ, եւ կեանք քո յարենէ բազմասջի՛ր. 7քանզի իբրեւ զբո՛յս ագարակի ետու զքեզ. եւ բազմացար՝ եւ մեծացար, եւ եկիր մտե՛ր դու ՚ի քաղաքս քաղաքաց. ստինք անկան քո՝ եւ մազք արձակեցան. եւ դու էիր մե՛րկ խայտառակ։ 8Եւ եկի հասի ՚ի վերայ քո, եւ տեսի զքեզ զի հասեալ էր ժամանակ քո, եւ ժամանակ խախտողաց քոց. տարածեցի զթեւս իմ ՚ի վերայ քո եւ ծածկեցի՛ զխայտառակութիւն քո. եւ երդուայ քեզ երդումն, եւ յուխտ մտի ընդ քեզ. ասէ Ադովնայի Տէր։ Եւ եղեր ինձ։ 9Եւ լուացի զքեզ ջուրբ, եւ սրբեցի զքեզ յարենէ քումմէ, եւ օծի զքեզ իւղով. 10եւ զգեցուցի զքեզ պէսպէսս, եւ ագուցի քեզ զերկնագոյնն, եւ ածի ընդ մէջ քո բեհեզ, եւ արկի զքեւ սնդուս. 11եւ զարդարեցի զքեզ զարդու, եւ եդի ապարանջանս ՚ի ձեռս քո, եւ քառամանեա՛կ ՚ի պարանոց քո. 12եդի քեզ գինդս, եւ գորշապահանգս յականջս քո. եւ պսակ պարծանաց ՚ի գլուխ քո. 13եւ զարդարեցար ՚ի զարդ ոսկւոյ եւ արծաթոյ։ Եւ հանդերձ քո բեհեզ եւ զառնաւուխտ եւ ճաճանչանաւուխտ. եւ կերար նաշիհ եւ եւղ եւ մեղր, եւ եղեր գեղեցիկ յոյժ յոյժ. եւ գրգեցար ՚ի գրգանս թագաւորութեան։ 14Եւ ել անուն գեղեցկութեան քոյ ընդ ամենայն ազգս. զի է՛ր կատարեալ վայելչութիւն գեղոյ քոյ զոր յօրինեցի ՚ի վերայ քո, ասէ Ադովնայի Տէր։ 15Եւ դու գեղապա՛նծ եղեր ՚ի գեղ քո, եւ պոռնկեցար ՚ի հոմանիսն քո. եւ տարածեցեր զպոռնկութիւն քո առ ամենայն անցաւորս, որոց ո՛չ լինէր այնպիսի ինչ։ 16Եւ առեր ՚ի հանդերձիցն քոց եւ արարեր քեզ կուռս կարկատունս, եւ պոռնկեցար ընդ նոսա. եւ մի՛ մտցես անդր, զի ո՛չ էին՝ եւ ո՛չ լիցին։ 17Եւ առեր զսպաս պարծանացն քոց յոսկւոյն իմոյ եւ յարծաթոյն զոր ետու քեզ, եւ արարեր քեզ պատկերս արուականս, եւ պոռնկեցար ընդ նոսա։ 18Եւ առեր զհանդերձն գեղեցիկ քո՝ եւ արկե՛ր զնոքօք. եւ զեւղսն իմ եւ զխունկսն եդիր առաջի երեսաց նոցա. 19եւ զհացն իմ զոր ետու քեզ՝ եւ զնաշիհն եւ զեւղ եւ զմեղր զոր ջամբեցի քեզ՝ եդիր առաջի երեսա՛ց նոցա ՚ի հոտ անուշից։ Եւ եղեւ յետ այնորիկ՝ ասէ Ադովնայի Տէր, 20առեր զուստերսն քո եւ զդստերս զոր ինձ ծնար՝ զոհեցեր նոցա ՚ի սատակումն։ Իբրեւ զփոքր ինչ համարեցար զպոռնկութիւնն. 21եւ զեներ զորդիսն իմ, եւ արարեր զնոսա նոցա ջնջոցս։ 22Եւ այն անհնարի՛ն եղեւ քան զամենայն պոռնկութիւնս եւ պղծութիւնս քո. եւ ո՛չ յիշեցեր զաւուրս տղայութեան քոյ, ՚ի ժամանակի յորում էիր մերկ եւ խայտառակեալ, եւ թաւալեալ յարեան քում, ուստի կենդանացարն. 23եւ եղեւ յետ ամենայն չարեացն քոց՝ վա՛յ վա՛յ քեզ՝ ասէ Ադովնայի Տէր։ 24Եւ շինեցե՛ր դու քեզ տուն պոռնկութեան, եւ արարեր քեզ բագինս յամենայն հրապարակս քո։ 25Եւ ՚ի գլուխս ամենայն ճանապարհաց քոց շինեցեր զպոռնկոցս քո, եւ ապականեցեր զգեղ երեսաց քոց, եւ լայնեցա՛ր ամենայն անցաւորաց ճանապարհի՝ եւ յաճախեցեր զպոռնկութիւնս քո։ 26Եւ պոռնկեցար ընդ որդիսն Եգիպտացւոց սահմանակիցս քո ընդ մեծանդամս. եւ բազմապատիկ պոռնկեցար՝ զի զի՛ս բարկացուսցես։ 27Արդ՝ ես ձգեցից զձեռն իմ ՚ի վերայ քո եւ բարձի՛ց զիրաւունս քո, եւ մատնեցից զքեզ ՚ի ձեռս ատելեաց քոց դստերաց այլազգեացն, որք թիւրէին զքեզ ՚ի ճանապարհէ քումմէ։ 28Ամպարշտեցար եւ պոռնկեցար ընդ որդիսն Ասորեստանեայց, սակայն եւ ա՛յնպէս ո՛չ յագեցար. յաճախեցեր ՚ի պոռնկութիւնս քո, սակայն եւ ա՛յնպէս ո՛չ յագեցար։ 29Յաճախեցեր դաշինս ընդ երկիրն Քանանու եւ Քաղդեացւոց, համայն եւ ա՛յնպէս ո՛չ յագեցար։ 30Զի՞նչ արարից ընդ դստերս քո. ասէ Ադովնայի Տէր. յետ գործելոյ քո զայդ ամենայն գործս կնոջ պոռնկի. զի պոռնկեցար բազմապատի՛կ ընդ դստերսն քո։ 31Եւ շինեցե՛ր զպոռնկոցս ՚ի գլուխս ամենայն ճանապարհաց, եւ կոթո՛ղս կոթողէիր յամենայն հրապարակս. եւ ո՛չ եղեր իբրեւ զկին մի պոռնիկ որ ժողովէ զկապէնս. 32զի ամենայն կին պոռնիկ նմանօղ քո, որ շնայցէ ընդ արամբ իւրով, ո՛չ առնու գանձս յառնէ իւրմէ՝ եւ տայ վարձս հոմանեա՛ց իւրոց։ 33Ամենայն պոռնիկք կապէ՛նս առնուն անձանց իւրեանց, եւ դու տայիր վա՛րձս սիղեխաց քոց, եւ աւղերձէիր զնոսա գա՛լ առ քեզ յամենայն կողմանց ՚ի պոռնկութիւնս քո։ 34Եւ եղեւ քեզ ՚ի խոտորնակի քան զամենայն կանանց ՚ի պոռնկութեան քում. եւ յե՛տ քո ո՛չ պոռնկեցան. զի նոքա կապէ՛նս առնուն յարանց, եւ դու տայիր վարձս սիղեխաց. եւ եղեւ քեզ այն ՚ի խոտորնակի։ 35Վասն այդորիկ պոռնիկ՝ լո՛ւր զպատգամս Տեառն. 36Ա՛յսպէս ասէ Ադովնայի Տէր. Փոխանակ զի հեղեր արկեր զպղինձ քո. եւ յայտնեսցի ամօթ պոռնկութեան քոյ առաջի հոմանեաց քոց. եւ յամենայն խորհուրդս անօրէնութեանց քոց, եւ յարիւնս որդւոց քոց զորս տայիր նոցա։ 37Վասն այնորիկ ահաւասիկ ես ժողովեցի՛ց ՚ի վերայ քո զամենայն հոմանիս քո, ընդ որս դո՛ւ խառնակէիր. եւ յարուցից ՚ի վերայ քո զամենայն սիրելիս եւ զատելիս քո. եւ ժողովեցի՛ց պատեցից զնոսա շուրջ զքեւ. եւ յայտնեցից զչարիս քո առաջի նոցա, եւ տեսցեն զամենայն խայտառակութիւնս քո։ 38Եւ խնդրեցի՛ց ՚ի քէն զվրէժ շնացելոյ եւ արիւնահեղի. եւ եդից զքեզ յարիւն քո, եւ եդից զքեզ յարիւն սրտմտութեան եւ նախանձու։ 39Եւ մատնեցից զքեզ ՚ի ձեռս նոցա. եւ կործանեսցեն զպոռնկոցս քո, եւ քակեսցեն զկոթողս քո, եւ մերկասցեն ՚ի քէն զհանդերձս քո, եւ առցեն զպսակս պարծանաց քոց. եւ թողցեն զքեզ մե՛րկ խայտառակեալ. 40եւ ածցեն ՚ի վերայ քո ամբոխ, եւ քարկոծեսցեն զքեզ վիմօք. եւ կոտորեսցեն զքեզ սրով իւրեանց. 41եւ այրեսցեն զտունս քո հրով՝ եւ արասցեն ՚ի քեզ վրէժխնդրութիւն առաջի կանանց բազմաց. եւ դարձուցից զքեզ ՚ի պոռնկութենէ քումմէ, եւ վարձս ո՛չ եւս տացես նոցա։ 42Եւ արձակեցի՛ց զսրտմտութիւն իմ ՚ի վերայ քո, եւ բարձցի նախանձն իմ ՚ի քէն. եւ հանգեա՛յց՝ եւ ո՛չ եւս հոգացայց. 43փոխանակ զի ո՛չ եւս յիշեցեր զօր տղայութեան քոյ. եւ տրտմեցուցանէիր զիս ՚ի վերայ ամենայնի այդորիկ. եւ ես ահաւասիկ ըստ ճանապարհացն քոց ետու ՚ի գլուխ քո. ասէ Ադովնայի Տէր. եւ ա՛յնպէս արարեր ամպարշտութիւնս ՚ի վերայ ամենայն անօրէնութեանց քոց։ 44Ա՛յս ամենայն է զոր մրմնջէին զքէն առակօք՝ եւ ասէին, եթէ որպէս մայրն՝ նո՛յնպէս եւ դուստրն։ 45Արդ՝ դուստր մօրն դո՛ւ ես, որ մերժեաց զայր իւր եւ զորդիս իւր, եւ քոյր քերցն քոց որք մերժեցին զարս իւրեանց՝ եւ զորդիս իւրեանց։ Մայր ձեր Քետացի, եւ հայր ձեր Ամովրհացի. 46եւ քոյր ձեր երէց Շամրնի, ի՛նքն եւ դստերք իւր, որ բնակեալ է ՚ի ձախմէ քումմէ. եւ քոյր քո կրսեր, որ բնակեալ է ընդ աջմէ քումմէ, Սոդոմ եւ դստերք իւր։ 47Սակայն ո՛չ եւս ըստ ճանապարհաց նոցա գնացեր, եւ ո՛չ ըստ անօրէնութեանց նոցա արարեր. զի փոքր մի առաւե՛լ գտար քան զնոսա յամենայն ճանապարհս քո։ 48Կենդանի՛ եմ ես՝ ասէ Ադովնայի Տէր՝ եթէ արար ինչ աւելի Սոդոմ քոյրն քո, ի՛նքն եւ դստերք իւր, քան զոր արարեր դո՛ւ եւ դստերք քո։ 49Բայց ա՛յս է անօրէնութիւն Սոդոմայ քեռ քոյ. ամբարտաւանութիւն, ՚ի լիութեան հացի եւ յըղփութեան գինւոյ՝ փափկանայր ինքն եւ դստերք իւր. այնո՛ւ առաւել էր ինքն եւ դստերք իւր։ Եւ ձեռն յաղքատն եւ ՚ի տնանկն ո՛չ կարկառէին. 50մեծամտէին եւ գործէին զանօրէնութիւն առաջի իմ. իբրեւ զայն տեսի՝ բարձի զնոսա։ 51Նա՝ եւ Շամրին զկէս յանցանաց քոց ո՛չ յանցեաւ. եւ յաճախեցեր զանօրէնութիւնս քո առաւել քան զնոսա, եւ արդարացուցեր զքորս քո յամենայն անօրէնութիւնս քո զոր արարեր։ 52Եւ արդ ընկա՛լ զտանջանս քո որ ապականեցեր զքորսն քո, անօրէնութեամբքն զոր անօրինեցար առաւել քան զնոսա. եւ արդարացուցեր զնոսա յո՛յժ քան զքեզ. եւ արդ յամօ՛թ լեր եւ կրեա՛ զանարգանս ՚ի յարդարացուցանել զքորսն քո քան զքեզ։ 53Եւ դարձուցից զդարձուածս նոցա, զդարձուածս Սոդոմայ՝ եւ զդստերաց իւրոց. եւ դարձուցից զդարձուածս Շամրնի, եւ զդստերաց նորա. եւ դարձուցից զդարձուածս քո ՚ի միջի քո. 54զի ընկալցիս զտանջանս քո, եւ անարգեսցիս յամենայնէ զոր արարեր ՚ի բարկացուցանե՛լ զիս։ 55Եւ քոյր քո Սոդոմ, եւ դստերք իւր անդրէ՛ն հաստատեսցին, որպէս եւ էինն իսկզբանէ. եւ Շամրին՝ եւ դստերք իւր հաստատեսցին անդրէն որպէս եւ էինն իսկզբանէ. եւ դու եւ դստերք քո հաստատեսջիք ՚ի նոյն՝ որպէս եւ էիք իսկզբանէ։ 56Եւ եթէ ո՛չ էր Սոդոմ քոյր քո համբաւ ՚ի բերան քո՝ յաւուրս հպարտութեան քոյ. 57մինչչեւ յայտնեալ էին չարիքն քո, որպէս այժմդ նախա՛տ եղեր դստերացն Ասորւոց, եւ ամենեցուն որ շուրջ զնովաւ էին դստերք այլազգեաց, եւ պատեալ շուրջ զքեւ։ 58Արդ՝ կրեա՛ զամպարշտութիւնս քո եւ զանօրէնութիւնս քո՝ ասէ Տէր։ 59Զի ա՛յսպէս ասէ Ադովնայի Տէր. Եւ արարից ընդ քեզ՝ որպէս արարե՛րն, որպէս անարգեցեր զայն ամենայն անցանել զուխտիւ իմով։ 60Եւ յիշեցի՛ց զուխտն իմ որ ընդ քե՛զն էր յաւուրս տղայութեան քոյ. եւ կանգնեցից ինձ ուխտ յաւիտենական. 61եւ յիշեցից զճանապարհսն քո՝ եւ անարգեսցիս, յորժամ զմտա՛ւ ածիցես զքորսն քո՝ զերիցունսն հանդերձ կրսերօքն. եւ տաց զնոսա քեզ ՚ի փորձ, եւ ո՛չ ՚ի դաշնաւորս։ 62Եւ կանգնեցի՛ց ես զուխտ իմ որ ընդ քեզ, եւ ծանիցես թէ ե՛ս եմ Տէր. 63զի յիշեսցես՝ եւ ամաչեսցես, եւ մի՛ եւս լիցի քեզ բանալ զբերան քո առաջի անարգանաց քոց, ՚ի քաւել ինձ զամենայն գործս քո զոր գործեցեր. ասէ Ադովնայի Տէր։