Ողբ ՚ի վերայ իշխանին Իսրայէլի։ [261]

1Եւ դու որդի մարդոյ, ո՛ղբս առ ՚ի վերայ իշխանին Իսրայէլի. 2եւ ասասցես. Զի՞ է զի եղեւ մայր քո ՚ի մէջ առիւծուց. կորիւնդ ՚ի մէջ առիւծուց բազմացոյց զկորիւնս իւր։ 3Եւ զարգացաւ կորիւն մի ՚ի կորեանց նորա. եւ առիւծացա՛ւ, եւ ուսաւ յափշտակել զյափշտակութիւն, եւ եղեւ մարդախա՛նձ։ 4Լուա՛ն զնմանէ ազգք, ըմբռնեցին զնա յապականութիւն. եւ տարան զնա գայլիբերա՛ն յերկիրն Եգիպտացւոց։ 5Եւ ետես զի անջատեցաւ ՚ի նմանէ, եւ կորեա՛ւ յոյս նորա. եւ նա մի՛ւս եւս ա՛յլ կորիւն ՚ի կորեանց իւրոց առիւծացոյց. 6եւ շրջէր ՚ի մէջ առիւծուց։ Առիւծացաւ, եւ ուսաւ յափշտակել յափշտակութիւն, եւ եղեւ մարդախա՛նձ։ 7Որսայր յանդգնութեամբ իւրով. զքաղաքս կործանէր, եւ զերկիրն լրիւ իւրով ապականէր մռնչելով բարբառոյ իւրոյ։ 8Եւ յարեան ՚ի վերայ նորա ազգք յիւրաքանչիւր աշխարհաց շուրջանակի, եւ պատեցին զնա թակարդօք յապականութիւն։ 9Գայլիբերա՛ն հարին, եւ տարան գայռագղիւ առ արքայն Բաբելացւոց, եւ արկին զնա ՚ի բանտ. զի մի՛ եւս լուիցի բարբառ նորա ՚ի վերայ լերանցն Իսրայէլի։ 10Մայր քո իբրեւ զորթ, եւ իբրեւ զծաղիկ նռնենեաց տնկեալ ՚ի գնացս ջուրց. բոյս նորա եւ պտուղ նորա եղեւ ՚ի ջուրց բազմաց։ 11Եւ եղեւ նորա գաւազան զօրութեան ՚ի վերայ ազգին իշխանաց, եւ բարձրացաւ մեծութեամբ ՚ի մէջ դարաստանաց. եւ ետե՛ս զմեծութիւն իւր ՚ի բազմութեան ուռոց իւրոց. 12եւ բեկա՛ւ ՚ի բարկութեան՝ եւ յերկիր կործանեցաւ, եւ հողմ խորշակի ցամաքեցոյց զշառաւիղս նորա. խնդրեցաւ ՚ի նմանէ վրէ՛ժ, եւ ցամաքեցաւ գաւազան զօրութեան նորա. եւ հուր մաշեաց զնա։ 13Եւ անդ տնկեցին զնա յանապատի յերկրի յանջրդին. 14եւ ել հուր յընտիր ընտիր գաւազանաց նորա՝ եւ եկեր զնա. եւ ո՛չ գոյր ՚ի նմա գաւազան զօրութեան. ա՛զգ յառակս ողբոց եւ յո՛ղբս եղիցի։