Առ ծերս տանն Իսրայէլի։

1Եւ եղեւ յամին եւթներորդի, յամսեանն հինգերորդի որ օր տասն էր ամսոյն. եկին ա՛րք ՚ի ծերոց տանն Իսրայէլի հարցանել ՚ի Տեառնէ՝ եւ նստան առաջի իմ։ 2Եւ եղեւ բան Տեառն առ՝ իս եւ ասէ. 3Որդի մարդոյ՝ խօսեա՛ց ընդ ծերսդ տանդ Իսրայէլի՝ եւ ասասցե՛ս ցդոսա. Ա՛յսպէս ասէ Ադովնայի Տէր. Եթէ հարցանե՞լ գայք դուք առ իս. կենդանի՛ եմ ես եթէ տաց ինչ ձեզ պատասխանի՝ ասէ Ադովնայի Տէր։ 4Եթէ իցէ խնդրեցից զվրէժ նոցա որդի մարդոյ. զմեղաց հարց դոցա դի՛ր դոցա վկայութիւն. 5եւ ասասցես ցդոսա. Ա՛յսպէս ասէ Տէր Տէր Աստուած. Յօրէ յորմէհետէ ցանկացայ ես տանդ Իսրայէլի, եւ ծանուցայ զաւակի տանդ Յակոբու. եւ ծանուցայ նոցա յերկրին Եգիպտացւոց, ձե՛ռն ետու նոցա եւ ասեմ. Ե՛ս եմ Տէր Աստուած ձեր. 6յաւուր յայնմիկ ես ձեռն ետու նոցա հանել զնոսա յերկրէն Եգիպտացւոց, յերկիրն զոր պատրաստեցի նոցա. երկիր որ բղխէ զկաթն եւ զմեղր, քա՛ղցր քան զամենայն երկիր։ 7Եւ ասացի ցնոսա. Իւրաքանչիւրոք զգարշելիս իւր յաչաց իւրոց ՚ի բա՛ց ընկեսցէ, եւ ՚ի գնացսն Եգիպտացւոց մի՛ պղծիք. ե՛ս եմ Տէր Աստուած ձեր։ 8Եւ ապստամբեցա՛ն յինէն, եւ ո՛չ կամեցան լսել ինձ. իւրաքանչիւրոք զգարշելիս իւր յաչաց իւրոց ո՛չ ընկէց ՚ի բաց, եւ զգնացսն Եգիպտացւոց՝ ո՛չ թողին. եւ ասացի հեղուլ զսրտմտութիւն իմ ՚ի վերայ նոցա, կատարել զբարկութիւն իմ ՚ի նոսա ՚ի մէջ Եգիպտացւոցն։ 9Բայց ոչ արարի, զի մի անուն իմ ամենեւին մի՛ պղծեսցի առաջի ազգացն յորոց միջի իցեն նոքա. յորս ծանուցայ նոցա առաջի նոցա, հանել զնոսա յերկրէն Եգիպտացւոց։ 10Եւ հանի՛ զնոսա յերկրէն Եգիպտացւոց՝ եւ ածի զնոսա յանապատն. 11եւ ետու նոցա զհրամանս իմ. եւ զիրաւունս իմ ցուցի նոցա, զոր առնիցէ մարդ՝ եւ կեցցէ ՚ի նոսա։ 12Եւ զշաբաթս իմ ետու նոցա լինել նշանակ ընդ իս եւ ընդ նոսա. ճանաչե՛լ նոցա թէ ե՛ս եմ Տէր որ սրբեմ զնոսա։ Եւ ասացի ցտունն Իսրայէլի յանապատի անդ՝ թէ ՚ի հրամանս իմ գնացէ՛ք, եւ ո՛չ գնացին. եւ՝ զիրաւունս իմ պահեցէ՛ք, առնել զնոսա. զոր թէ առնիցէ մարդ՝ կեցցէ նոքօք։ 13Եւ դառնացուցին զիս տունն Իսրայէլի յանապատին. ըստ հրամանաց իմոց ո՛չ գնացին, եւ զիրաւունս իմ մերժեցի՛ն. զոր թէ առնիցէ մարդ՝ կեցցէ նոքօք. եւ զշաբաթս իմ պղծեցին յոյժ։ Եւ ասացի հեղուլ զսրտմտութիւն իմ յանապատին սատակե՛լ զնոսա. 14եւ արարի զի անուն իմ ամենեւին մի՛ պղծեսցի առաջի ազգացն յորոց հանի զնոսա յանդիման նոցա։ 15Եւ ես համբարձի զձեռս իմ ՚ի վերայ նոցա յանապատին, համօրէն չտանե՛լ զնոսա յերկրին՝ զոր ետու նոցա. երկիր որ բղխէ զկաթն եւ զմեղր. քա՛ղցր քան զամենայն երկիր։ 16Փոխանակ զի զիրաւունս իմ մերժեցին, եւ ըստ հրամանաց իմոց ո՛չ գնացին, եւ զշաբաթս իմ պղծեցին, եւ զհետ խորհրդոց սրտից իւրեանց գնացին։ 17Եւ խնայեա՛ց ՚ի նոսա ակն իմ ջնջել զնոսա. եւ ո՛չ արար զնոսա ՚ի վախճան յանապատին։ 18Եւ ասացի ցնոսա յանապատին. Ըստ կրօնից հարցն ձերոց մի՛ գնայք, եւ զիրաւունս նոցա մի՛ պահէք. եւ ՚ի գնացս նոցա մի՛ խառնակիք եւ մի՛ պղծիք։ 19Ե՛ս եմ Տէր Աստուած ձեր, ըստ հրամանաց իմո՛ց գնացէք, եւ զիրաւունս իմ պահեցէ՛ք՝ եւ արարէ՛ք զնոսա. 20եւ զշաբաթս իմ սրբեցէ՛ք. եւ եղիցի նշանա՛կ ընդ իս եւ ընդ ձեզ, ճանաչել ձեզ թէ ես եմ Տէր Աստուած ձեր։ 21Դառնացուցին զիս եւ որդիք նոցա, ըստ հրամանաց իմոց ո՛չ գնացին, եւ օրինաց իմոց ո՛չ զգուշացան առնել զնոսա. զոր թէ առնիցէ մարդ՝ կեցցէ՛ նոքօք. եւ զշաբաթս իմ պղծեցին. եւ ասացի հեղուլ զսրտմտութիւն իմ ՚ի վերայ նոցա յանապատին, կատարել զբարկութիւն իմ ՚ի վերայ նոցա։ 22Եւ դարձուցի զձեռն իմ ՚ի նոցանէ. եւ արարի զի անուն իմ ամենեւին մի՛ պղծեսցի առաջի ազգացն՝ յորոց հանի զնոսա յանդիման նոցա։ 23Եւ ես ամբարձի զձեռն իմ ՚ի վերայ նոցա յանապատի անդ, ցրուե՛լ զնոսա ընդ ազգս, եւ ցանե՛լ զնոսա ընդ գաւառս. 24փոխանակ զի զիրաւունս իմ ո՛չ արարին, եւ զհրամանս իմ մերժեցին, եւ զշաբաթս իմ պղծեցին. եւ զհետ խորհրդոց հարցն իւրեանց էին աչք նոցա։ 25Եւ ես ետու նոցա հրամանս անբարիս, եւ իրաւունս՝ որովք ո՛չ կեցցեն։ 26Եւ պղծեցից զնոսա ՚ի պատարագս իւրեանց. ընդ անցանե՛լ ինձ ընդ ամենայն՝ որ բանայ զարգանդ, զի սատակեցից զնոսա. եւ ծանիցեն եթէ ե՛ս եմ Տէր։ 27Վասն այդորիկ խօսեա՛ց ընդ ծերս տանդ Իսրայէլի, որդի մարդոյ՝ եւ ասասցես ցդոսա. Ա՛յսպէս ասէ Ադովնայի Տէր. Մինչեւ ցա՛յսչափ բարկացուցին զիս հարքն ձեր յանցանօքն իւրեանց զոր յանցեան առ իս։ 28Եւ տարայ զնոսա յերկիրն յոր ամբարձի զձեռն իմ տալ նոցա զնա. եւ տեսին անդ զամենայն բլուրս բարձր, եւ զամենայն ծառ վարսաւոր, եւ զոհեցին անդ դիցն իւրեանց. եւ կարգեցին անդ զոհս պատարագաց իւրեանց. եւ արկին զխունկս անուշութեան իւրեանց, եւ նուիրեցին անդ զնուէրս իւրեանց։ 29Եւ ասացի ցնոսա. Զի՞նչ է աբբանա՛յդ այդ յոր դուքդ մտանէք. եւ կոչեցին զանուն նորա Աբբանա, մինչեւ ցայսօր ժամանակի։ 30Վասն այնորիկ ասա՛ ցտունն Իսրայէլի. Ա՛յսպէս ասէ Տէր Տէր Աստուած. Եթէ յանօրէնութիւն հարցն ձերոց պղծիք, եւ զհետ գարշելեացն նոցա պոռնկիք. 31եւ ՚ի պտուղս պատարագացն ձերոց, եւ յընծայս որդւոցն ձերոց. եւ ՚ի զատուցանել որդւոցն ձերոց ածել զբոցով. պղծիք յամենայն խորհուրդս ձեր մինչեւ ցա՛յսօր ժամանակի. եւ ես տայցե՛մ ձեզ պատասխանի՞ տունդ Իսրայէլի։ Կենդանի՛ եմ ես՝ ասէ Ադովնայի Տէր, եթէ տաց ձեզ պատասխանի։ 32Եւ եթէ անկցի յոգիս ձեր այդ, եւ ոչ լիցի որպէս դուքդ ասէք, եթէ եղիցուք մեք իբրեւ զհեթանոսս, եւ իբրեւ զազգս երկրի պաշտել զփայտս՝ եւ զքարինս։ 33Վասն այդորիկ կենդանի՛ եմ ես՝ ասէ Ադովնայի Տէր, եթէ ոչ հզօր ձեռամբ եւ բարձրացեալ բազկաւ. եւ հեղեալ ցասմամբ թագաւորեցից ՚ի վերայ ձեր։ 34Եւ հանից զձեզ յազգաց, եւ ընկալայց զձեզ յաշխարհաց ուր ցրուեալ իցէք ՚ի նոսա, հզօ՛ր ձեռամբ եւ բարձրացեալ բազկաւ, եւ հեղեալ ցասմամբ. 35եւ ածից զձեզ յանապատ ազգացն. եւ դատեցից ընդ զձեզ անդ դէմ յանդիման։ 36Զոր օրինակ եդի դատ ընդ հարսն ձեր յանապատի անդ՝ յորժամ հանի զնոսա յերկրէն Եգիպտացւոց. ա՛յնպէս դատեցայց ընդ ձեզ՝ ասէ Տէր Տէր Աստուած։ 37Եւ անցուցից զձեզ ընդ ցպո՛վ իմով, եւ մուծից զձեզ ընդ թուով ուխտի իմոյ։ 38Եւ որոշեցից ՚ի ձէնջ զամպարիշտս եւ զապստամբս. զի ՚ի բնակութենէ նոցա հանից զնոսա, եւ յերկիրն Իսրայէլի ո՛չ մտցեն. եւ ծանիջիք թէ ե՛ս եմ Տէր Աստուած։ 39Եւ դուք տունդ Իսրայէլի՝ ա՛յսպէս ասէ Տէր Տէր Աստուած. Նախ՝ ՚ի բա՛ց ընկեցէք զիւրաքանչիւր զգնացս ձեր. եւ ապա թէ լսիցէք ինձ, եւ զանուն իմ սուրբ ո՛չ պղծիցէք պատարագօք ձերովք՝ եւ գնացիւք ձերովք։ 40Զի ՚ի վերայ լերին սրբոյ իմոյ, եւ ՚ի վերայ լերին բարձու Իսրայէլի՝ ասէ Տէր Տէր. ա՛նդ ծառայեսցեն ինձ ամենայն տունդ Իսրայէլի ՚ի սպառ, եւ ա՛նդ ընկալայց, եւ անդ ա՛յց արարից ընծայից ձերոց, եւ զպտուղս երախայրեաց ձերոց յամենայն սրբութիւնս ձեր. 41՚ի հոտ անուշից ընկալայց, հանել զձեզ ՚ի ժողովրդոց, եւ ընդունել զձեզ յաշխարհաց ուր ցրուեալն էիք ՚ի նոսա. եւ սո՛ւրբ եղէց ՚ի ձեզ յանդիման ժողովրդոց։ 42Եւ ծանիջիք թէ ես եմ Տէր, ՚ի տանել զձեզ յերկիրն Իսրայէլի, յերկիրն յոր ամբարձի զձեռն իմ տա՛լ զնա հարցն ձերոց։ 43Եւ յիշեսջիք անդ զճանապարհս ձեր եւ զգնացս ձեր, որովք պղծեցայք ՚ի նոսա. եւ կոծեսջիք զերեսս ձեր ՚ի վերայ ամենայն անիրաւութեանցն զոր արարէք։ 44Եւ ծանիջիք թէ ե՛ս եմ Տէր, առնել ձեզ զայն ա՛յնպէս. զի մի՛ անուն իմ պղծեսցի ըստ ճանապարհաց ձերոց չարաց. եւ ըստ ապականեալ գնացից ձերոց. ասէ Ադովնայի Տէր։

45Եւ եղեւ բան Տեառն առ իս՝ եւ ասէ. 46Որդի մարդոյ՝ հաստատեա՛ զերեսս քո ՚ի Թեման, եւ հայեա՛ց ՚ի Դագովն. եւ մարգարէա՛ ՚ի վերայ անտառի իշխանին Նագեբայ. 47եւ ասասցես ցանտառն Նագեբայ. Լո՛ւր զպատգամս Տեառն. Ա՛յսպէս ասէ Տէր Տէր Աստուած. Ահաւասիկ ես հարից զքէն հուր, եւ կերիցէ ՚ի քեզ զամենայն փայտ դալար եւ զամենայն փայտ չոր, եւ ո՛չ շրջիցի բոցն բորբոքեալ. եւ այրեսցին ՚ի նմա ամենայն դէմք յարեւելից մինչեւ ՚ի հիւսւսի։ 48Եւ ծանիցէ ամենայն մարմին, եթէ ե՛ս Տէր վառեցի զնա՝ եւ ո՛չ շիջցի։ 49Եւ ասեմ. Քա՛ւ լիցի Տէր Տէր։ Եւ նոքա ասեն ցիս. Ո՞չ ապաքէն առա՛կ է ա՛յդ որ ասիդ։