Առ որդիսն Իսրայէլի։

1Եւ եղեւ բա՛ն Տեառն առ իս՝ եւ ասէ. 2Եւ դո՛ւ որդի մարդոյ, եթէ դատիցես՝ դատեսջի՛ր զքաղաքն արեանց. 3եւ խայտառակեսցես զամենայն զանօրէնութիւնս նորա՝ եւ ասասցես. Ա՛յսպէս ասէ Տէր Տէր Աստուած. Ո՛ քաղաք որ հեղու զարիւն ՚ի միջի իւրում, ՚ի հասանել ժամանակի իւրոյ. եւ խորհի խորհուրդ զանձնէ՝ պղծել զանձն իւր 4յարիւնս նոցա։ Զո՛ւր հեղեր՝ թաթաւեցար, եւ ՚ի խորհուրդսն քո զոր խորհեցար՝ պղծեցար, եւ մերձեցուցեր զաւուրս քո, եւ ածեր զժամանակ ամաց քոց։ Վասն այնորիկ ետու զքեզ ՚ի նախատինս ազգաց, եւ յայպն ամենայն աշխարհաց։ 5Որ մօտ ՚ի քեզ էին՝ եւ հեռի՛ ՚ի քէն, այպանեսցեն զքեզ՝ եւ ասասցեն, թէ անուանիդ ՚ի պղծութիւն մատնեցար. քանզի յաճախեցեր յանօրէնութիւնս։ 6Ահաւասիկ առաջնորդք տանդ Իսրայէլի, իւրաքանչիւր ընդ մերձաւորս ազգի իւրեանց խառնակէին ՚ի քեզ՝ զի հեղցե՛ն արիւն։ 7Զհայր եւ զմայր անարգէին ՚ի քեզ, եւ ընդ եկին եւ ընդ պանդխտին՝ անիրաւութեամբ գնային ՚ի քեզ. զորբն եւ զայրին բռնադատէին ՚ի քեզ. 8զսրբութիւնս իմ արհամարհէին, եւ զշաբաթս իմ պղծէին ՚ի քեզ։ 9Արք աւազակք կային ՚ի միջի քում զի հեղուցուն ՚ի քեզ արիւն. եւ ՚ի վերայ լերանց զոհէին ՚ի քեզ, եւ գործս անսուրբս գործէին ՚ի միջի քում։ 10Զամօթ հօր յայտնէին ՚ի քեզ, եւ պղծութեամբ զդաշտանն լլկէին ՚ի քեզ։ 11Եւ իւրաքանչիւր ՚ի կին ընկերի՛ իւրում պղծէին, եւ իւրաքանչիւր զնու իւր պղծէին ամպարշտութեամբ, եւ իւրաքանչիւր զքոյր իւր զդուստր հօր իւրոյ լլկէին ՚ի քեզ։ 12Կաշառս առնուին ՚ի միջի քում զի հեղուցուն արիւն, վաշխս եւ տոկոսիս առնուին ՚ի միջի քում. եւ ածից կատարեցից զվախճան չարեաց քոց ըստ բռնութեան քում. քանզի մոռացար զիս՝ ասէ Տէր Տէր։ 13Ահաւասիկ հարից ծա՛փս զծափի ՚ի վերայ գործոցն քոց զոր արարեր, եւ ՚ի վերայ արեանցն գործելոց ՚ի միջի քում։ 14Եւ եթէ ժուժկալեսցի սիրտ քո. եթէ զօրասցին ձեռք քո յաւուրսն յորս ե՛ս արարից ընդ քեզ. ե՛ս Տէր խօսեցայ՝ եւ արարից։ 15Եւ ցրուեցից զքեզ ընդ ազգս՝ եւ ցանեցի՛ց զքեզ ընդ գաւառս, եւ պակասեսցէ պղծութիւն քո ՚ի քէն. 16եւ ժառանգեցից ՚ի քեզ յանդիման ազգացն. եւ ծանիջիք թէ ե՛ս եմ Տէր։ 17Եւ եղեւ բան Տեառն առ իս՝ եւ ասէ. 18Որդի մարդոյ, աւասիկ եղեն ինձ տունդ Իսրայէլի խառնակեալ, որպէս խառնակեալ իցէ պղինձ եւ երկաթ, եւ անագ, եւ կապար, եւ արծաթ ՚ի հալոցի։ 19Վասն այնորիկ ասա՛. Ա՛յսպէս ասէ Տէր Տէր. Փոխանակ զի եղերուք դուք ամենեքեան ՚ի մի խառնակութիւն, վասն այնորիկ ես ընկալայց զձեզ ՚ի մէջ Երուսաղեմի, 20որպէս ընդունիցի ոք զարծաթ եւ զպղինձ, զերկաթ եւ զկապար՝ ՚ի մէջ հալոցի փչե՛լ ՚ի նա հուր եւ ձուլել. նո՛յնպէս ընկալայց զձեզ բարկութեամբ իմով, 21եւ հաւաքեցից եւ ձուլեցի՛ց զձեզ. եւ փչեցից ՚ի ձեզ հոգւով բարկութեամբ իմով. եւ ձուլեսջիք ՚ի մէջ նորա, 22զոր օրինակ ձուլեսցի արծաթ ՚ի մէջ բովոյ, ա՛յնպէս ձուլեսջիք ՚ի միջի դորա. եւ ծանիջիք, թէ ես Տէր հեղի զսրտմտութիւն իմ ՚ի վերայ ձեր։

23Եւ եղեւ բան Տեառն առ իս՝ եւ ասէ. 24Որդի մարդոյ ասա՛ ցդա. Դու՝ ա՛յն երկիր ես որ ո՛չ թանաս. եւ ո՛չ եկն անձրեւ ՚ի վերայ քո յաւուրս բարկութեան. 25որոյ իշխանք իւր ՚ի միջի իւրում իբրեւ զառիւծունս գոչէին յափշտակել զյափշտակութիւնս. ուտեն զանձինս տնանկաց բռնութեամբ, եւ առնուն պատիւս անիրաւութեամբ. եւ բազմացան այրիք ՚ի միջի քում։ 26Եւ քահանայք նորա անարգէին զօրէնս իմ եւ պղծէին զսրբութիւնս իմ. եւ զսուրբն ՚ի պղծոյն ո՛չ ընտրէին, եւ զարատաւորն յանարատէ անտի ո՛չ զատուցանէին. եւ ՚ի շաբաթուց իմոց ծածկէին զաչս իւրեանց, եւ զշաբաթս իմ պղծէին ՚ի միջի նոցա։ 27Իշխանք նորա ՚ի միջի նորա իբրեւ զգայլք յափշտակօղք, յափշտակել յափշտակութիւնս, հեղուլ զարիւնս. կորուսանել զանձինս, զի ագահութիւն յոյժ ստասցին։ 28Եւ մարգարէք նորա՝ որ ծեփէին զնոսա անկցին. որք տեսանէին սնոտիս. ըղձային նոցա ստութիւն, եւ ասէին. Ա՛յսպէս ասէ Ադովնայի Տէր. եւ Տեառն չէ՛ր խօսեցեալ. 29զժողովուրդ երկրին տառապեցուցանէին անիրաւութեամբ, եւ յափշտակէին յափշտակութիւնս. զաղքատն եւ զտնանկն բռնադատէին, ընդ պանդխտին իրաւամբք ո՛չ գնային։ 30Եւ խնդրեցի ՚ի նոցանէ այր մի որ ուղի՛ղ գնայցէ, եւ կայցէ առաջի իմ մտադիւր ՚ի ժամանակի բարկութեան՝ զի մի՛ ջնջեցից զնոսա, եւ ո՛չ գտի։ 31Եւ հեղի ՚ի վերայ նոցա զսրտմտութիւն իմ հրով բարկութեան իմոյ կատարել ՚ի նոսա. ըստ ճանապարհաց նոցա ետո՛ւ ՚ի գլուխս նոցա ասէ Տէր Տէր։