1Եւ եղեւ բա՛ն Տեառն առ իս՝ եւ ասէ. 2Որդի՛ մարդոյ, կանայք երկո՛ւ էին՝ դստերք միո՛յ մօր. 3եւ պոռնկեցան յԵգիպտոս ՚ի մանկութեան իւրեանց. ա՛նդ անկան ստինք իւրեանց. ա՛նդ արկան ՚ի կուսութենէ իւրեանց։ 4Անուն դստերն երիցու Ոողա, եւ քե՛ռ նորա Ոողիբա. եւ եղեն ինձ՝ եւ ծնան ուստերս եւ դստերս, եւ անուն նոցա՝ անուն Շամրնի Ոողա, եւ Երուսաղեմի Ոողիբա։ 5Եւ պոռնկեցա՛ւ Ոողայն յինէն. եւ արձակեաց զաչս իւր զհետ հոմանեաց իւրոց, յԱսորեստանեա՛յսն որ մե՛րձ էին առ նա. 6՚ի զգեցեալ հի՛րս եւ կարմիրս, յիշխանս եւ ՚ի զօրագլուխս, յերիտասարդս, յընտրեալս յամենեսին, ՚ի սպառազէնս ՚ի հեծեալս յերիվարս։ 7Եւ տարածեաց զպոռնկութիւն առ նոսա, առ ամենայն ընտրեալս որդիսն Ասորեստանեայց. եւ առ ամենեսին զորոց չոգաւ զկնի ամենայն խորհրդովք իւրովք՝ եւ պղծեցաւ։ 8Եւ զպոռնկութիւն իւր յերկրէն Եգիպտացւոց ո՛չ եթող. զի ընդ նոսա պղծէր ՚ի մանկութենէ իւրմէ. եւ նոքա արկին զնա ՚ի կուսութենէ, եւ հեղին ՚ի վերայ նորա զպոռնկութիւնս իւրեանց։ 9Վասն այնորիկ մատնեցին զնա ՚ի ձեռս հոմանեաց իւրեանց, ՚ի ձեռս որդւոցն Ասորեստանեայց զորոց զհետ երթայր։ 10Նոքա յայտնեցին զխայտառակութիւն նորա. զուստերս եւ զդստերս նորա առին, եւ զնա սրով սպանին. եւ եղեւ խօսք կանանց, եւ խնդրեցին վրէ՛ժ ՚ի նմանէ ՚ի դստերս իւր։ 11Եւ ետես քոյր նորա Ոողիբա. եւ առաւել զանցոյց զաչարձակութիւն ապականութեան իւրոյ քան զնորայն. եւ զպոռնկութիւն իւր քան զպոռնկութիւն քեռ իւրոյ։ 12Զի չոգաւ զհետ որդւոցն Ասորեստանեայց. իշխանաց եւ զօրավարաց, որ մե՛րձ էին առ նա, զգեցելոց հանդերձս ծիրանիս ազնուականս. սպառազինաց հեծելո՛ց յերիվարս, երիտասարդաց՝ ընտրելոց ամենեցուն։ 13Եւ տեսի զի պոռնկեցան՝ եւ մի ճանապարհ էր երկոցունց։ 14Եւ յաւե՛լ ՚ի պոռնկութիւնս իւր. եւ ետես արս նկարեալս յորմս պատկերս Քաղդեացւոց՝ նկարեալս գրչաւ ՚ի նկարս. 15ածեալ պէսպէս կամարս ընդ մէջ իւրեանց, եւ խոյրս ներկեալս ՚ի գլուխս իւրեանց. երփն երփն հարկանէր յամենեցունց ՚ի նմանութիւն որդւոցն Բաբելացւոց՝ յերկրին Քաղդեացւոց՝ յաշխարհն իւրեանց։ 16Եւ ակն ե՛տ նոցա հայեցուածովք աչաց իւրեանց. եւ առաքեաց հրեշտակս առ նոսա յերկիրն Քաղդեացւոց։ 17Եւ եկին առ նա որդիքն Բաբելացւոց յանկողինս օթի, եւ պղծեցին զնա ՚ի պոռնկութեան իւրում. եւ պղծեցա՛ւ ընդ նոսա, եւ յափրացա՛ւ անձն նորա ՚ի նոցանէ։ 18Եւ յայտնեաց զպոռնկութիւն իւր, եւ առակեաց զամօթ իւր։ Եւ մեկնեցա՛ւ անձն իմ ՚ի նմանէ. որպէս եւ մեկնեցաւ անձն իմ ՚ի քեռէ՛ նորա։ 19Եւ յաճախեցեր զպոռնկութիւն քո յիշեցուցանել զաւուրս մանկութեան քոյ յորս պոռնկէիրն յԵգիպտոս. 20եւ արձակեցեր զաչս քո առ Քաղդեացիսն՝ յիշանդամս եւ ՚ի ձիանդամս։ 21Եւ ա՛յց արարից անօրէնութեան մանկութեան քոյ՝ զոր գործէիրն յերկրին Եգիպտացւոց յօթեվանս քո. ուր անկա՛ն ստինք քո եւ լուծա՛ւ կուսութիւն քո։ 22Վասն այնորիկ Ո՛ողիբա՝ այսպէս ասէ Ադովնայի Տէր. Ահաւասիկ ես յարուցից ՚ի վերայ քո զհոմանիսն յորոց յափրացա՛ւ անձն քո, եւ ածից պատեցից զնոսա զքեւ 23զորդիսն Բաբելացւոց, եւ զամենայն Քաղդեացիսն, զՓակուդ եւ զՍուէ եւ զԿուէ, եւ զամենայն որդիսն Ասորեստանեայց ընդ նոսա. զերիտասարդս ընտիրս, զիշխանս, զզօրավարս, զսպառազէնս զանուանիս՝ զհեծեալս յերիվարս։ 24Ամենեքին եկեսցեն ՚ի վերայ քո ՚ի հիւսւսոյ. կառք եւ անիւք ազգաց բազմութեան, սաղաւարտաւորք եւ վահանաւորք. եւ արկցեն շուրջ զքեւ պահ. եւ տաց առաջի երեսաց նոցա դատաստանս, եւ խնդրեսցեն ՚ի քէն վրէժս դատաստանօք իւրեանց։ 25Եւ տաց զնախանձ իմ ՚ի քեզ, եւ արասցեն ընդ քեզ ըստ բարկութեան սրտմտութեան իմոյ. եւ զունչս եւ զականջս քո կտրեսցեն. եւ զմնացորդս քո սրով կոտորեսցեն, եւ զուստերս քո եւ զդստերս քո առցեն, եւ զմնացորդս քո հրով սատակեսցեն. 26եւ մերկասցեն ՚ի քէն զհանդերձս քո, եւ առցեն զզարդ պարծանաց քոց։ 27Եւ դարձուցից զամպարշտութիւնս քո ՚ի քեզ, եւ զպոռնկութիւնս քո որ յերկրին Եգիպտացւոց. եւ ո՛չ ամբառնայցես զաչս քո ՚ի նա, եւ ո՛չ եւս յիշեսցես զԵգիպտոս։ 28Վասն այդորիկ ա՛յսպէս ասէ Տէր Տէր. Ահաւադիկ ե՛ս մատնեցից զքեզ ՚ի ձեռս ատելեաց յորոց յարփացաւ անձն քո ՚ի նոցանէ։ 29Եւ գնասցեն ընդ քեզ ատելութեամբ, եւ առցեն զամենայն վաստակս քո եւ զերկս քո. եւ եղիցես մե՛րկ եւ խայտառակեալ. եւ յայտնեսցի ամօթ պոռնկութեան քոյ. ամպարշտութիւնն քո եւ պոռնկութիւն քո 30արարին քեզ զայդ, ՚ի պոռնկելն քում զհետ ազգաց, ուր պղծէիր ՚ի խորհուրդս նոցա։ 31Զճանապարհս քեռ քո գնացեր. եւ տա՛ց զբաժակ նորա ՚ի ձեռս քո։ 32Ա՛յսպէս ասէ Տէր Տէր. Զբաժակն քեռ քո արբցես, զխորն եւ զլայնն. ※ եւ եղիցես ՚ի ծաղր եւ ՚ի կատականս. յաճախել կատարել զարբեցութիւն. 33եւ լցցիս լքմամբ. զբաժակն ապականութեան, զբաժակն քեռ քո Շամրնի, 34արբցես՝ եւ քամեսցես. եւ զհերս քո խզեսցես, եւ զստինս քո կոծեսցես. եւ զտօնս քո եւ զամսագլուխս քո դարձուցից ՚ի քէն. զի ե՛ս խօսեցայ՝ ասէ Ադովնայի Տէր։ 35Վասն այդորիկ ա՛յսպէս ասէ Ադովնայի Տէր. Փոխանակ զի մոռացա՛ր զիս, եւ ընկեցեր զիս զկնի մարմնոյ քոյ. եւ դու ընկա՛լ զամպարշտութիւնս քո եւ զպոռնկութիւնս քո։ 36Եւ ասէ ցիս Տէր. Որդի մարդոյ, եթէ դատեսցիս զՈողայն եւ զՈողիբայն, եւ պատմեսցես նոցա զանօրէնութիւնս իւրեանց։ 37Զի շնացան՝ եւ արի՛ւն է ՚ի ձեռս նոցա եւ ՚ի խորհուրդս նոցա. շնային՝ եւ զորդիս իւրեանց զոր ինձ ծնան՝ ածէին զբոցով։ 38Մինչ ցայնչափ եւս արարին ինձ. զի զսրբութիւնս իմ պղծէին ՚ի նմին աւուր, եւ զշաբաթսն իմ ապականէին՝ 39՚ի զոհե՛լ նոցա զորդիս իւրեանց կռոցն իւրեանց. եւ մտանէին ՚ի նմին աւուր ՚ի սրբութիւնս իմ եւ պղծէին զնոսա. եւ այսպէս առնէին ՚ի մէջ տան իմոյ։ 40Զի եւ արանց եկելոց ՚ի հեռաստանէ, առ որս հրեշտակս արձակէին. իսկ եւ իսկ իբրեւ գային, ՚ի բաղանիս մտանէիր. ՚ի ծարիր եւ ՚ի սնգոյր շպարէիր. եւ զարդարէիր զարդու, 41եւ նստէիր ՚ի գահոյս զարդարեալս. եւ սեղա՛ն յօրինեալ՝ եւ դնէիր առաջի. եւ զխունկս իմ եւ զեւղսն առնուիր՝ եւ ուրա՛խ լինէիր ընդ նոսա. 42եւ ՚ի ձայն արուեստականաց նուագէին։ Եւ առ այն արամբք, ա՛յլ եւս բազմութիւն արանց գինեմոլաց եկելոց յանապատէ, տայի՛ր ապարանջանս ՚ի ձեռս նոցա եւ պսակ պարծանաց ՚ի գլուխս նոցա։ 43Եւ ասացի՝ թէ մի՛ շնասցի ընդ նոսա զգո՛րծ պոռնկութեան. եւ նա պոռնկէր։ 44Եւ մտանէին առ նա՝ որպէս մտանիցեն առ կի՛ն պոռնիկ. նոյնպէս մտանէին առ Ոողայն եւ առ Ոողիբայն՝ գործել զանօրէնութիւն։ 45Եւ արք արդարք էին նոքա, եւ խնդրեսցեն վրէ՛ժս ՚ի նոցանէ, զվրէժ շնացելոց եւ զվրէժ արեան. զի շնացօղք էին, եւ արիւն ՚ի ձեռս նոցա։ 46Զի՝ ա՛յսպէս ասէ Տէր Տէր. Ա՛ծ ՚ի վերայ զօր՝ եւ ա՛րկ զնոքօք խռովութիւն եւ յափշտակութիւն։ 47Եւ քարաձի՛գ լեր ՚ի նոսա քարամբք զօրաց, եւ խոցոտեա՛ զնոսա սրովք նոցա. ուստերք նոցա եւ դստերք կոտորեսցին, եւ զտունս նոցա հրձի՛գ արասցեն։ 48Եւ դարձուցից զամպարշտութիւնս յերկրէ. եւ խրատեսցին ամենայն կանայք, եւ մի՛ եւս արասցեն ըստ ամպարշտութեան նոցա։ 49Եւ տացի ամպարշտութիւն ձեր ՚ի վերայ ձեր, եւ ըստ խորհրդոց ձերոց ընկալջիք. եւ ծանիջիք թէ ե՛ս եմ Տէր Տէր։