՚Ի վերայ որդւոցն Ամովնայ։

1Եւ եղեւ բա՛ն Տեառն առ իս՝ եւ ասէ. 2Որդի՛ մարդոյ՝ հաստատեա՛ զերեսս քո ՚ի վերայ որդւոցն Ամովնայ. մարգարէա՛ց ՚ի վերայ նոցա, 3եւ ասասցես ցորդիսն Ամովնայ. Լուարո՛ւք զպատգամս Ադովնայի Տեառն. Ա՛յսպէս ասէ Ադովնայի Տէր. Փոխանակ զի ոտնհա՛ր եղերուք ՚ի վերայ սրբութեանց իմոց որ պղծեցան, եւ ՚ի վերայ երկրին Իսրայէլի որ ապականեցաւ, եւ ՚ի վերայ տանն Յուդայ որ գնաց ՚ի գերութիւն։ 4Վասն այնորիկ ահաւադիկ ե՛ս մատնեմ զձեզ որդւոցն Կեդեմայ ՚ի ժառանգութիւն, եւ բնակեսցեն մեղօքն իւրեանց ՚ի քեզ, եւ կանգնեսցեն զխորանս իւրեանց ՚ի քեզ. նոքա կերիցեն զպտուղ քո, եւ նոքա արբցեն զպարարտութիւն քո։ 5Եւ տաց զքաղաքն Ամովնացւոց յարօտս ուղտուց, եւ զորդիսն Ամովնայ յարօտս հօտից, եւ ծանիցեն թէ ես եմ Տէր։ 6Զի ա՛յսպէս ասէ Տէր Տէր. Փոխանակ զի կայթեցե՛ր դու ձեռամբ քով, եւ տոփեցեր ոտամբ քով, եւ ուրա՛խ եղեր անձամբ քով ՚ի վերայ երկրին Իսրայէլի. 7վասն այնորիկ ահաւադիկ ե՛ս ձգեցից զձեռն իմ ՚ի վերայ քո, եւ տաց զքեզ ՚ի յափշտակութիւն ՚ի մէջ ազգաց, եւ սատակեցի՛ց զքեզ ՚ի ժողովրդոց, եւ կորուսից զքեզ ՚ի գաւառաց կորստեամբ. եւ ծանիցես թէ ե՛ս եմ Տէր։ ՚Ի վերայ Մովաբու։

՚Ի վերայ Մովաբու։

8Ա՛յսպէս ասէ Ադովնայի Տէր. Փոխանակ զի ասացին Մովաբ եւ Սէիր, թէ ահա որպէս ամենայն ա՛զգ են, նո՛յնպէս եւ տունն Իսրայէլի եւ Յուդայ։ 9Վասն այդորիկ ահաւադիկ ես քակեցի՛ց զթիկունս Մովաբու ՚ի բարձուանդակաց քաղաքաց իւրոց, զընտիր ընտիր երկիրն՝ զտո՛ւն Բեթայ եւ զԱսերովթայ, ՚ի վերոյ քան զաղբեւր քաղաքին առ ծովեզերբն. 10զորդիսն Կեդեմայ ՚ի վերայ որդւոցն Ամոնայ՝ ետու նմա ՚ի ժառանգութիւն. զի մի՛ եղիցի յիշատակ որդւոցն Ամովնայ ՚ի մէջ ազգաց. 11եւ ՚ի Մովաբայ վրէ՛ժ խնդրեցից։ Եւ ծանիցեն թէ ե՛ս եմ Տէր։ ՚Ի վերայ Եդոմայ։

՚Ի վերայ Եդոմայ։

12Ա՛յսպէս ասէ Ադովնայի Տէր. Փոխանակ զի խնդրեաց վրէ՛ժ Եդոմ ՚ի տանէն Յուդայ, եւ ոխակալ եղեն՝ եւ պահանջեցին վրէժս։ 13Վասն այդորիկ ա՛յսպէս ասէ Ադովնայի Տէր. Ձգեցից զձեռն իմ ՚ի վերայ Եդովմայ, եւ սատակեցից ՚ի նմանէ զմա՛րդ եւ զանասուն, եւ եդից զնա անապատ. եւ հալածեալք ՚ի Թեմանայ անկցին ՚ի սուր։ 14Եւ խնդրեցից վրէժս յԵդովմայ ՚ի ձեռն ժողովրդեան իմոյ Իսրայէլի. եւ արասցեն ընդ Եդովմ ըստ բարկութեան սրտմտութեան իմոյ։ Եւ ծանիցեն զվրէժխնդրութիւն իմ, ասէ Ադովնայի Տէր։ ՚Ի վերայ Փղշտացւոցն։

՚Ի վերայ Փղշտացւոցն։

15Վասն այդորիկ ա՛յսպէս ասէ Ադովնայի Տէր. Փոխանակ զի ոխակալ եղեն այլազգիքն, եւ յարուցին վրէժխնդրութիւն սրտի մտօք յոտնհարութիւն՝ սատակել մինչեւ յաւիտեան։ 16Վասն այնորիկ ա՛յսպէս ասէ Ադովնայի Տէր. Ահաւադիկ ես ձգեցի՛ց զձեռն իմ ՚ի վերայ այլազգեացդ, եւ սատակեցից զԿրետացիսդ, եւ կորուսից զմնացորդս ծովեզերեայցդ. 17եւ խնդրեցից ՚ի նոցանէ վրէժս մեծամեծս կշտամբութեա՛մբ եւ բարկութեամբ։ Եւ ծանիցեն թէ ե՛ս եմ Ադովնայի Տէր, ՚ի պահանջել զվրէժխնդրութիւն իմ ՚ի նոցանէ։