Ողբք ՚ի վերայ Տիւրոսի։

1Եւ եղեւ բա՛ն Տեառն առ իս՝ եւ ասէ. 2Որդի մարդոյ՝ ո՛ղբս առ ՚ի վերայ Տիւրոսի. 3եւ ասասցես ցՏիւրոս. Որ բնակեալդ ես ՚ի մուտս ծովուդ վաճառաշահ ազգաց ՚ի կղզեաց բազմաց։ Ա՛յսպէս ասէ Տէր Տէր ցՏիւրոս. Դու ասէիր. Ե՛ս զարդարեցի զիս ՚ի զարդ գեղո՛յ իմոյ՝ 4՚ի սիրտ ծովու Բէէլիմայ։ Սահմանակիցք քո որդիքն քո զարդարեցին զքեզ։ 5Մայրք ՚ի Սանայիր լեռնէ շինեցան քեզ պահանգք, եւ տախտակք նոճիք ՚ի Լիբանանէ առան, առնել քեզ կայմս եղեւնափայտեայս։ 6՚Ի Բասանէ արարին զղեկս նաւաց քոց. եւ զմեհեանս քո շինեցին ՚ի փղոսկրէից. ապարանս անտառախիտս ՚ի կղզեաց Քետիմացւոց։ 7Բեհեզ ընդ դիպակի գործեցաւ քեզ. ՚ի պաստառս յԵգիպտոսէ՝ արկանելիք քեզ ՚ի փառս, եւ հանդերձ ծիրանի եւ կապուտակ ՚ի կղզեացն յԵլիմացւոց եղեն ՚ի զարդ պաճուճանաց քոց։ 8Եւ իշխանք քո բնակիչք Սիդովնացւոց. եւ եղեն Արադացիք նաւավարք քո, եւ իմաստունք քո Տիւրոս որ եղեն ՚ի քեզ. նոքա եղեն քեզ նաւապետք։ 9Եւ ծերքն մատենագէտք, եւ իմաստունք նոցա որ էին ՚ի քեզ, նոքա զօրացուցանէին զխորհուրդս քո. եւ ամենայն նաւք ծովուն եւ նաւավարք նոցա եղեն քեզ երթալ յարեւմուտս արեւմտից։ 10Լիդացիք եւ Լիբէացիք թիկունք զօրութեան քոյ՝ ա՛րք ընտիրք պատերազմօղք, որ կախեցին զվահանս եւ սաղաւարտս իւրեանց ՚ի քեզ, եւ նոքա փառաւորեցին զքեզ։ 11Որդիքն Արադացւոց զօրութեամբք իւրեանց զպարսպօք քովք պատեալ կային՝ եւ պահէին զաշտարակս քո, զկապարճս իւրեանց կախէին շուրջանակի ՚ի պարիսպս քո. եւ նոքա իսկ բովանդակեցին զգեղեցկութիւն քո։ 12Կարքեդովնացիք վաճառականք քո ՚ի բազմութենէ ամենայն զօրութեան քոյ. զարծաթ եւ զոսկի եւ զպղինձ՝ եւ զերկաթ եւ զանագ՝ եւ զկապար ետուն ՚ի վաճառս քո. 13Յո՛յնք եւ ամենայն որ շուրջ զնովաւ էին մարդավաճառք քո, եւ անօթս պղնձիս ետուն ՚ի վաճառս քո։ 14Եւ ՚ի տանէ Թորգոմայ ձիովք եւ հեծելովք եւ ջորւովք լցին զվաճառս քո։ 15Որդիք Հռոդացւոց վաճառականք քո յաճախեցին ՚ի կղզեաց զվաճառս քո, ժանեօք փղոսկրէիւք. եւ երթեւեկացն մարդի՛կ տայիր ՚ի գինս։ 16Եւ վաճառք քո բազմացեալք յաղխամաղխէ քումմէ. յԱփեկայ զտաշխն, եւ երփն երփն նարօտուց ՚ի Թարշշայ. եւ Հռամովթ եւ Կարքովդ լցին զվաճառս քո։ 17Հրէաստան եւ որդիքն Իսրայէլի՝ վաճառականք քո ցորենով՝ եւ խնկովք՝ եւ կասեաւ՝ եւ ընտիր ընտիր մեղու, եւ իւղով, եւ ռետամբ լցին զաղխամաղխեայ վաճառաց քոց։ 18Դամասկոս վաճառականք քո. եւ բազմաղխի՛ եւ ՚ի բազում զօրութենէ քումմէ. գինի ՚ի Քեղ՚բովնայ, եւ ասր ՚ի Միլիտեայ։ 19Դան՝ եւ Յաւան ՚ի Մէովզենա՛յ բերէին քեզ գինի ՚ի վաճառս քո. յԱսելայ երկա՛թ գործեալ անի՛ւս պատրաստեալս ՚ի վաճառս քո։ 20Դեդանացիք վաճառականք քո, ածէին կառս ընտիրս ջորւովք հանդերձ։ 21Արաբացիք՝ եւ ամենայն իշխանք Կեդարու, եւ նոքա վաճառականք ընդ ձեռամբ քով՝ ուղտս, եւ խոյս, եւ որոջս՝ վաճառէին ՚ի քեզ։ 22Սաբա եւ Հռեգմա, եւ նոքա վաճառականք քո. եւղս անուշունս, եւ ականս պատուականս, եւ ոսկի, ետո՛ւն ՚ի վաճառս քո։ 23Խառան, եւ Քանան, եւ Դադան, եւ նոքա վաճառականք քո. Սաբա, եւ Ասուր, եւ Քաղման վաճառականք քո. 24որք բերեն քեզ վաճառս ընդ Մաքղիմ, եւ ընդ Գալիմ՝ հիր, եւ կարմիր, եւ կապուտակ, եւ երփն երփն նարօտուց. եւ գանձս ընտիրս վանդակեալս չուանօք. 25՚ի նաւս նոճիս, որովք էր վաճառն քո. նաւք ՚ի բազմութեան վաճառաց քոց, եւ ՚ի յաճախութենէ աղխամաղխի քոյ, լցա՛ր ծանրացար յոյժ։ ՚Ի սիրտ ծովու 26՚ի ջուրս բազումս վարեցին զքեզ նաւավարք քո. հողմ հարաւոյ խորտակեաց զքեզ ՚ի սիրտ ծովու։ 27Եւ զօրութիւն քո, եւ վարձք քո, եւ խառնաղանջիցն քոց, եւ նաւավարք քո, եւ նաւապետք քո, եւ խորհրդականք քո, եւ խառնաղանջք խառնաղանճից քոց. եւ ամենայն արք պատերազմօղք քո որ ՚ի քեզ, եւ ամենայն ժողովք որ ՚ի միջի քում անկցին ՚ի սիրտ ծովու՝ յաւուր կործանման քոյ։ 28՚Ի ձայնէ բարբառոյ քոյ նաւավարք քո երկիւղիւ զարհուրեսցին. 29եւ իջցեն ՚ի նաւաց իւրեանց. ամենայն նաւավարք քո եւ նաւամուտք քո առաջապահք նաւաց, յափն ծովուն կացցեն. 30եւ աղաղակեսցեն ՚ի վերայ քո, եւ փոխեսցեն զձայնս իւրեանց. գուժեսցին դառնապէս, հող ՚ի գլո՛ւխ լիցին, 31ընդ մոխիր թաւալեսցին. գերծցեն զգլուխս ՚ի կնդութիւն, եւ քրձազգածք լիցին, եւ լացցեն ՚ի վերայ քո դառնացեալ սրտիւք։ 32Կոծ դառնութեան առցեն որդիք նոցա ՚ի վերայ քո, ո՛ղբս առցեն եւ ողբասցեն. Ո՛վ էր իբրեւ զՏիւրոս որ լռեաց դադարեաց ՚ի մէջ ծովուն։ 33Որչափ ինչ գտեր քեզ վարձս ՚ի ծովէ այտի. լցուցեր զազգս ՚ի բազմութենէ քումմէ, եւ յաղխամաղխէ վաճառաց քոց մեծացուցեր զամենայն թագաւորս երկրի։ 34Արդ բեկա՛ր ՚ի ծովուդ ՚ի խորս ջուրց վաճառք քո. եւ ամենայն ժողովք քո ՚ի միջի քում, անկա՛ն ամենայն նաւավարք քո։ 35Ամենայն բնակիչք կղզեաց տրտմեցան ՚ի վերայ քո. եւ թագաւորք նոցա զարհուրելով զարհուրեցան. եւ հեղին արտասուք զերեսօք իւրեանց ՚ի վերայ քո։ 36Վաճառականք ազգաց շչեցին ՚ի վերայ քո. ՚ի կորուստ մատնեցար, եւ այլ ո՛չ եւս իցես յաւիտեան՝ ասէ Տէր Աստուած։