՚Ի վերայ իշխանին Տիւրոսի։

1Եւ եղեւ բա՛ն Տեառն առ իս՝ եւ ասէ. 2Եւ դու որդի մարդոյ՝ ասա՛ ցիշխանդ Տիւրոսի. Այսպէս ասէ Տէր Տէր. Փոխանակ զի հպարտացաւ սիրտ քո, եւ ասացեր՝ թէ Աստուած եմ ես, եւ զբնակութիւն Աստուծոյ բնակեցի ՚ի սիրտ ծովու. մարդ ես դու՝ եւ ո՛չ Աստուած. եւ ետուր զսիրտ քո իբրեւ զսիրտն Աստուծոյ։ 3Միթէ իմաստնագո՞յն իցես քան զԴանիէլ, կամ իմաստունք խրատեցին զքեզ հանճարովն իւրեանց. 4միթէ իմաստութեամբ քով կամ խորհրդով՝ արարեր դու քեզ զօրութիւն, եւ ստացար ոսկի եւ արծաթ ՚ի գանձս քո. 5կամ բազմութեամբ իմաստութեան քոյ եւ վաճառաց՝ յաճախեցեր զզօրութիւն քո, եւ բարձրացա՛ւ սիրտ քո զօրութեամբն քով։ 6Վասն այսորիկ ա՛յսպէս ասէ Տէր Տէր. Վասն զի ետուր զսիրտ քո իբրեւ զսիրտն Աստուծոյ. 7փոխանակ այնորիկ ահաւադիկ ես ածից ՚ի վերայ քո օտարս ժանտագործս յազգաց, եւ թափեսցեն զսո՛ւր իւրեանց ՚ի քեզ, եւ ՚ի վերայ գեղո՛յ իմաստութեան քոյ, եւ տարածեսցեն զգեղ քո ՚ի կորուստ. 8եւ կործանեսցեն զքեզ՝ եւ մեռանիցիս մահու վիրաւորաց ՚ի սիրտ ծովու։ 9Միթէ ասելով ասիցես. Աստուած եմ ես՝ առաջի վիրագացն քոց. բայց դու մա՛րդ ես՝ եւ ո՛չ Աստուած. եւ ՚ի բազմութեան վիրաւորաց քոց 10մեռելոց անթլփատից մեռանիցիս ՚ի ձեռաց օտարաց. զի ես խօսեցայ ասէ Ադովնայի Տէր։ 11Եւ եղեւ բան Տեառն առ իս՝ եւ ասէ. Որդի մարդոյ՝ ո՛ղբս առ ՚ի վերայ իշխանին Տիւրոսի, 12եւ ասասցես ցնա. Այսպէս ասէ Տէր Տէր. Դո՛ւ ես կնիք նմանութեան լի՛ իմաստութեամբ՝ եւ պսակ գեղեցկութեան. 13՚ի գրգանս դրախտին Աստուծոյ եղեր, եւ զամենայն ականս պատուականս ՚ի քե՛զ կապեցեր. Զսարդիոնն. եւ զտպազիոն. եւ զզմրուխտ. եւ զկարկեհան. եւ զշափիղ՚այ. եւ զյասպիսն. զարծաթ եւ զոսկի. եւ զգոճազմն. զակատն. զմելեսիկն. զոսկեքարն. զբիւրեղն. զեղեգնաքարն. եւ ոսկւով լցուցեր զգանձս քո, եւ զշտեմարանս քո ՚ի քեզ. յօրէ յորմէ հաստատեցար եւ հանդերձեցար 14ընդ օծելոյ քրոբէին, ետու զքեզ ՚ի լեառն սուրբ Աստուծոյ, եւ եղեր ՚ի մէջ հրեղէն վիմացն։ 15Եղեր անարա՛տ յաւուրսն քո, յօրէ յորմէ հաստատեցար դու, մինչեւ գտան անիրաւութիւնք ՚ի քեզ։ 16՚Ի բազմութենէ վաճառաց քոց լցեր զշտեմարանս քո անիրաւութեամբք. մեղա՛ր՝ եւ վիրաւորեցար։ ՚Ի լեռնէն Աստուծոյ իջոյց զքեզ քերովբն վարսաւոր, ՚ի միջոյ հրեղէն վիմացն. 17եւ բարձրացաւ սիրտ քո ՚ի գեղեցկութեան քում, եւ ապականեցաւ հանճար քո հանդերձ գեղովն քո։ Վասն բազմութեան մեղաց քոց ընկեցի զքեզ յերկիր. յանդիման թագաւորաց ետու զքեզ ՚ի խայտառակութիւն։ 18Վասն բազմութեան մեղաց քոց, եւ խարդախութեան վաճառաց քոց՝ պղծեցեր զսրբութիւնս քո. հանից հուր ՚ի միջոյ քումմէ՝ եւ նոյն կերիցէ զքեզ. եւ տա՛ց զքեզ ՚ի մոխիր յերկրին քում առաջի ամենայն տեսողացն քոց։ 19Եւ ամենեքին որ ճանաչիցեն զքեզ ՚ի մէջ ազգաց տրտմեսցին վասն քո. զի եղեր ՚ի կորուստ, եւ ո՛չ եւս իցես յաւիտեան։ ՚Ի վերայ Սիդոնի։

՚Ի վերայ Սիդոնի։

20Եւ եղեւ բան Տեառն առ իս՝ եւ ասէ. 21Որդի մարդոյ՝ հաստատեա՛ զերեսս քո ՚ի վերայ Սիդովնի. մարգարէա՛ց ՚ի վերայ նորա, 22եւ ասասցես. Ա՛յսպէս ասէ Ադովնայի Տէր. Ահաւասիկ ես ՚ի վերայ քո Սիդոն, եւ փառաւորեցա՛յց ես ՚ի քեզ. եւ ծանիցես թէ ես եմ Տէր յառնել ինձ ՚ի քեզ դատաստանս, եւ սո՛ւրբ եղէց ես ՚ի քեզ։ 23Եւ առաքեցից ՚ի վերայ քո մահ, եւ արիւն ՚ի հրապարակս քո. եւ անկցին վիրաւորք ՚ի միջի քում, պատեսցին շուրջ զքեւ սրովք. եւ ծանիցեն թէ ես եմ Տէր։ 24Եւ ո՛չ եւս եղիցիս տանն Իսրայէլի խո՛չ դառնութեան, եւ փո՛ւշ ցաւոց յամենեցունց որ շուրջանակի անարգեցին զնոսա. եւ ծանիցես թէ ես եմ Ադովնայի Տէր։ 25Ա՛յսպէս ասէ Ադովնայի Տէր. Եւ ժողովեցից զտունն Իսրայէլի յազգաց ուր ցրուեցան անդր. եւ սուրբ եղէց ՚ի նոսա առաջի ազգաց եւ ժողովրդոց. եւ բնակեսցեն յերկրին իւրեանց զոր ետու ծառային իմում Յակովբու, 26եւ բնակեսցեն ՚ի նմա յուսով. շինեսցեն տունս, եւ տնկեսցեն այգիս՝ եւ բնակեսցեն յուսով. յորժամ արարից դատաստան յամենեսին որ շուրջանակի անարգեցին զնոսա։ Եւ ծանիցեն թէ ե՛ս եմ Տէր Աստուած նոցա, եւ Աստուած հարց նոցա։