՚Ի վերայ լերանցն Իսրայէլի։ ԼԲ

՚Ի վերայ լերանցն Իսրայէլի։

1Եւ դու որդի մարդոյ մարգարեա՛ց ՚ի վերայ լերանցն Իսրայէլի, եւ ասասցես ցլերինսն Իսրայէլի. Լուարո՛ւք զպատգամս Տեառն. 2Ա՛յսպէս ասէ Տէր Տէր. Փոխանակ զի ասաց թշնամին ՚ի վերայ ձեր. Վա՛շ վա՛շ. աւերակք յաւիտենից ՚ի ժառանգութիւն եղեն մեզ. 3վասն այդորիկ մարգարեա՛՝ եւ ասասցես. Ա՛յսպէս ասէ Տէր Տէր. Փոխանակ զի եղէք յանարգութիւն ամենայն ազգաց որ շուրջ զձեւք են, եւ վտարանդի՛ եղէք ազգաց բազմաց, խօսք լեզուաց եւ նախատինք ազգաց. 4վասն այդորիկ լերինք Իսրայէլի՝ լուարո՛ւք զպատգամս Ադովնայի Տեառն. Ա՛յսպէս ասէ Ադովնայի Տէր Տէր ցլերինս եւ ցբլուրս եւ ցխորս եւ ցձորս եւ ցաւերակս ապականեալս եւ ցքաղաքս լքեալս՝ որ եղեն յաւեր եւ ՚ի կոխումն մնացելոց ազգացդ որ շուրջ զձեւք են։ 5Վասն այդորիկ ա՛յսպէս ասէ Տէր Տէր. Եթէ ո՛չ հրով բարկութեան իմոյ խօսեցայց ՚ի վերայ այլոց ազգացն, եւ ՚ի վերայ ամենայն Եդովմայեցւոցն, զի արարին զերկիրն իմ իւրեանց ՚ի վտարանդի. ոտնհարութեամբ անարգեցին զանձինս ապականե՛լ աւարաւ։ 6Վասն այնորիկ մարգարեա՛ց ՚ի վերայ երկրին Իսրայէլի, եւ ասասցես ցլերինս եւ ցբլուրս եւ ցձորս եւ ցդաշտս. Ա՛յսպէս ասէ Տէր Տէր. Ահաւասիկ ես նախանձո՛ւ իմով եւ բարկութեամբ խօսեցայ. փոխանակ կրելոյն ձերոյ նախատինս ՚ի հեթանոսաց։ 7Վասն այնորիկ ա՛յսպէս ասէ Ադովնայի Տէր. Ամբարձից զձեռն իմ ՚ի վերայ ազգացդ որ շուրջ զձեւքդ են. նոքա ընկալցին զանարգանս իւրեանց։ 8Բայց զձեր լե՛րինքդ Իսրայէլի՝ զխաղող եւ զարդիւնս կերիցէ ժողովուրդ իմ Իսրայէլ. զի ա՛կն ունին դառնալոյ։ 9Ահաւասիկ ես հայեցայց ՚ի ձեզ, եւ անկանիցիք ՚ի գործ. եւ սերմանիցիք, 10եւ բազմացուցից ՚ի ձեզ մարդիկ, եւ համօրէն զտունն Իսրայէլի ՚ի սպառ. եւ բնակեսցին քաղաքք, եւ աւերակք շինեսցին։ 11Եւ բազմացուցից ՚ի ձեզ զմա՛րդ եւ զանասուն. բազմասցին եւ աճեսցեն, եւ բնակեցուցից զձեզ որպէս իսկզբանէն, եւ բարի՛ արարից ձեզ որպէս եւ յառաջագոյն. եւ ծանիջիք թէ ես եմ Տէր։ 12Եւ տիրեցուցի ձեզ մարդիկ զժողովուրդն իմ Իսրայէլ. ժառանգեսցեն զձեզ, եւ եղիջիք նոցա ՚ի բնակութիւն, եւ ո՛չ եւս լինիցիք անզաւա՛կ ՚ի նոցանէն։ 13Ա՛յսպէս ասէ Տէր Տէր. Փոխանակ զի ասացին ցքեզ թէ երկիր մարդավա՛ր ես դու, եւ անզաւա՛կ յազգէ քումմէ եղեր. 14վասն այնորիկ ո՛չ եւս լինիցիս մարդավար, եւ զազգդ քո անզաւակ ո՛չ եւս արասցես, ասէ Տէր Տէր։ 15Եւ անարգանք ազգաց ՚ի ձեզ ո՛չ եւս լինիցին. եւ նախատինս ՚ի ժողովրդոց՝ այլ ո՛չ եւս կրեսցես, եւ ազգդ քո այլ ո՛չ եւս անզաւակեսցի՝ ասէ Տէր Տէր։ 16Եւ եղեւ բան Տեառն առ իս եւ ասէ. 17Որդի մարդոյ՝ տունդ Իսրայէլի բնակեցան յերկրին իւրեանց, եւ պղծեցին զնա ճանապարհօք իւրեանց՝ եւ կռովք իւրեանց՝ եւ պղծութեամբք իւրեանց, ըստ պղծութեան ապարահի. եւ եղեւ ճանապարհ դոցա առաջի իմ։ 18Եւ հեղի՛ զսրտմտութիւն իմ ՚ի վերայ դոցա վասն արեանն զոր հեղին յերկրին, եւ կռովք իւրեանց պղծեցին զնա. 19եւ ցրուեցի զդոսա ընդ ազգս, եւ հոսեցից զդոսա ընդ գաւառս. ըստ ճանապարհաց դոցա, եւ ըստ մեղաց իւրեանց դատեցա՛յ զդոսա։ 20Եւ մտին յազգս. եւ ուր մտինն, եւ ա՛նդ պղծեցին զանուն իմ սուրբ, յասելն ցնոսա թէ ժողովուրդ Տեառն են դոքա, եւ յերկրէն նորա ելին։ 21Եւ խնայեցի ՚ի դոսա վասն անուան իմոյ սրբոյ, զոր պղծեցին տունդ Իսրայէլի ՚ի մէջ ազգացդ յոր մտին ՚ի նոսա։ 22Վասն այդորիկ ասա՛ ցտունդ Իսրայէլի. Ա՛յսպէս ասէ Տէր Տէր. Ո՛չ ձեզ ինչ առնեմ տունդ Իսրայէլի, այլ վասն անուան իմոյ սրբոյ զոր պղծեցէք ՚ի մէջ ազգացդ յորս մտէք ՚ի դոսա։ 23Եւ սրբեցից զանուն իմ մե՛ծ որ պղծեցաւ ՚ի մէջ ազգացդ՝ զորս դուք պղծեցէք ՚ի մէջ դոցա. եւ ծանիցեն ազգքդ եթէ ե՛ս եմ Տէր, ասէ Ադովնայի Տէր. ՚ի սրբելն իմում ՚ի ձեզ յանդիման դոցա։ 24Եւ առից զձեզ ՚ի հեթանոսաց, եւ ժողովեցից զձեզ յամենայն ազգաց, եւ տարայց զձեզ յերկիրն ձեր։ 25Եւ ցանեցից ՚ի վերայ ձեր ջուր սուրբ, եւ սրբեսջիք յամենայն պղծութեանց ձերոց, եւ յամենայն կռոց ձերոց սրբեցից զձեզ. 26եւ տա՛ց ձեզ սիրտ նո՛ր, եւ ոգի նո՛ր նորոգեցից ՚ի ձեզ. եւ հանից զսիրտն քարեղէն ՚ի մարմնոց ձերոց, եւ տա՛ց ձեզ սիրտ մարմնեղէն. 27եւ զՈգի իմ տաց ՚ի ձեզ։ Եւ արարից, զի յարդարութիւնս գնայցէք, եւ զիրաւունս իմ պահիցէք, եւ առնիցէք զնոսա. 28եւ բնակիցէք յերկրին՝ զոր ետու հարցն ձերոց. եւ եղիջիք ինձ ՚ի ժողովուրդ, եւ ես եղէց ձեզ յԱստուած։ 29Եւ զերծուցից զձեզ յամենայն պղծութեանց ձերոց. եւ կոչեցից զցորեան եւ բազմացուցից զնա, եւ ո՛չ ածից ՚ի վերայ ձեր սով։ 30Եւ բազմացուցից զպտուղ ծառոց, եւ զարդիւնս անդոց, զի մի՛ եւս ընդունիցիք զնախատինս սովոյ ՚ի մէջ ազգաց։ 31Եւ յիշեսջի՛ք զճանապարհսն ձեր չարս եւ զգնացս ձեր զանբարիս. եւ տաղտկասջիք յերեսաց անօրէնութեանցն ձերոց, եւ ՚ի գարշելեացն ձերոց։ 32Ո՛չ վասն ձեր ինչ առնեմ զայս՝ ասէ՛ Տէր Տէր, այլ յայտնի՛ լիցի ձեզ. ամաչեցէ՛ք եւ պատկառեցէք ՚ի ճանապարհաց ձերոց տունդ Իսրայէլի։ 33Ա՛յսպէս ասէ Տէր Տէր. Յաւուր յորում սրբեցից զձեզ յամենայն անօրէնութեանցն ձերոց, եւ շինեսցին աւերակք, եւ բնակեցուցից զքաղաքս. 34եւ երկիրն ապականեալ՝ գործեսցի՛. փոխանակ զի ապականեցաւ յանդիման ամենայն անցաւորաց։ 35Եւ ասասցեն. Երկիրն ապականեալ՝ եղեւ իբրեւ զպարտէ՛զ փափկութեան. եւ քաղաքքն աւերակք՝ ապականեալք եւ քանդեալք՝ ամրացեալք նստա՛ն։ 36Եւ ծանիցեն ազգք որ միանգամ շուրջ զձեւք մնացեալք իցեն, թէ ե՛ս եմ Տէր, որ շինեցի զաւերեալսն, եւ հաստատեցի զապականեալսն. ե՛ս Տէր խօսեցայ՝ եւ արարից։ 37Ա՛յսպէս ասէ Տէր Տէր. Զա՛յս եւս ա՛յց արարից տանդ Իսրայէլի առնել դոցա. եւ բազմացուցից զմարդիկ դոցա իբրեւ զխաշինս, 38եւ իբրեւ զոչխարս սուրբս. եւ իբրեւ զոչխարս Երուսաղեմի ՚ի տունս իւրեանց՝ ա՛յնպէս եղիցին քաղաքքն աւերեալք, լի՛ խաշամբք եւ մարդկաւ. եւ ծանիցեն թէ ե՛ս եմ Տէր։