՚Ի վերայ Գովգայ՝ եւ Մագովգայ։ ԼԵ

՚Ի վերայ Գովգայ՝ եւ Մագովգայ։ [602]

1Եւ եղեւ բա՛ն Տեառն առ իս՝ եւ ասէ. 2Որդի մարդոյ՝ հաստատեա՛ զերեսս քո ՚ի վերայ Գովգայ, եւ երկրին Մագովգայ, իշխանին Ռովսմեսովքայ եւ Թոբելայ. եւ մարգարեա՛ ՚ի վերայ նորա, 3եւ ասասցես ցնա. Ա՛յսպէս ասէ Տէր Տէր. Ահաւասիկ ես ՚ի վերայ քո իշխանդ Ռովսմեսովքայ եւ Թովբելայ. 4եւ պաշարեցից զքեզ, եւ արկից դանդանաւանդ ՚ի կզակս քո, եւ ժողովեցից զքեզ եւ զամենայն զօրութիւնս քո. զհեծեալս եւ զերիվարս, զվառեալս եւ զսպառազէնս ազգաց բազմաց. վահանաւորս եւ սաղաւարտաւորս, եւ սուսերաւորս. եւ ամենեքին սոքա ընդ նոսա։ 5Պարսիկք եւ Եթւովպացիք, Լիբէացիք եւ Լիդացիք, ամենեքին սաղաւարտեալք՝ եւ վահանաւորք. 6Գոմեր՝ եւ ամենեքին որ շո՛ւրջ են զնովաւ. եւ տունն Թորգոմայ ՚ի ծագացն հիւսւսոյ, եւ ամենեքին որ շուրջ զնովաւ, եւ ազգք բազումք ընդ քեզ։ 7Պատրաստեա՛ց, պատրաստեա՛ զանձն քո՝ դո՛ւ եւ ամենայն ժողովք որ ժողովեալ են ընդ քեզ. եւ եղիցես ինձ յառաջապահ։ 8Յաւուրց բազմաց պատրաստեսցի, եւ ՚ի վախճան ժամանակաց եկեսցէ՛ եւ հասցէ յերկիրն յապահով ՚ի սրոյ. ժողովեալ յազգաց բազմաց յերկիրն Իսրայէլի, որ եղեւ աւերակ համօրէն. եւ նոյն յազգաց ժողովեալ՝ եւ բնակեն խաղաղութեամբ ամենեքին։ 9Եւ ելցես իբրեւ զանձրեւ, եւ հասցես իբրեւ զամպ եւ ծածկեսցես զերկիրն. եւ եղիցես դու՝ եւ ամենայն ազգք բազումք՝ որ շուրջ զքեւ՛ իցեն ընդ քեզ։ 10Ա՛յսպէս ասէ Տէր Տէր. Եւ եղիցի յաւուր յայնմիկ անկանիցին բանք ՚ի սիրտ քո, եւ խորհեսցիս խորհուրդս չարս. 11եւ ասասցես. Ելի՛ց ՚ի վերայ յապահով երկրին. հասի՛ց ՚ի վերայ հանդարտացելոցն յանհոգութեան, եւ բնակեցելոցն ՚ի խաղաղութեան, ամենեցուն որ բնակեալ են յերկրին. որոց ո՛չ պարիսպք եւ ո՛չ նիգք եւ ո՛չ դրունք, 12աւարել զաւար, կողոպտել զկապուտ նոցա. արկանել զձեռն իմ ՚ի վերայ երկրին աւերելոյ՝ եւ բնակեցելոյ, եւ ՚ի վերայ ազգին ժողովելոյ յազգաց բազմաց. ստացելոց ինչս եւ դաստակերտս, բնակելոց ՚ի սիրտ երկրի։ 13Սաբա եւ Դեդան, եւ վաճառականք Կարքեդովնացւոց, եւ ամենայն աւանք նորա ասիցեն ցքեզ. Յա՛ռ յաւա՛ր արշաւեալ գաս. ժողովեցեր զժողովս քո առնուլ զարծաթ եւ զոսկի, վարե՛լ ՚ի գերութիւն զստացուածս, եւ կողոպտել զկապուտ մեծ։ 14Վասն այնորիկ մարգարեա՛ց որդի մարդոյ, եւ ասասցես ցԳովգ. Ա՛յսպէս ասէ Տէր Տէր. Ոչ ապաքէն յաւուր յայնմիկ յորում բնակեսցէ ժողովուրդ իմ Իսրայէլ խաղաղութեամբ, զարթիցես 15եւ եկեսցես ՚ի տեղւոջէ քումմէ ՚ի ծագաց հիւսւսոյ, դո՛ւ եւ բազում ազգք ընդ քեզ հեծեալ յերիվարս. ամենեքին ընդ գունդս բազումս զօրաց բազմաց։ 16Եւ ելանիցես ՚ի վերայ ժողովրդեան իմոյ Իսրայէլի՝ իբրեւ զա՛մպ ծածկեալ զերկիրն. ՚ի յետին ժամանակի եղիցի այն. եւ ածից զքեզ յերկիր իմ, զի ծանիցեն զիս ամենայն ազգք, ՚ի լինել ինձ սուրբ ՚ի միջի քում առաջի նոցա։ 17Ա՛յսպէս ասէ Տէր Տէր ցԳովգ. Դո՛ւ ես վասն որոյ խօսեցայ յաւուրցն առաջնոց ՚ի ձեռն ծառայիցն իմոց մարգարէիցն Իսրայէլի յաւուրսն յայնոսիկ՝ եւ յամսն, ածել զքեզ ՚ի վերայ նոցա։ 18Եւ եղիցի յաւուր յայնմիկ յորում եկեսցէ Գովգ ՚ի վերայ երկրիդ Իսրայէլի՝ ասէ Տէր Տէր. Ելցէ սրտմտութիւն իմ բարկութեամբ, 19եւ նախա՛նձ իմ հրով բարկութեան իմոյ. խօսեցայ թէ ո՛չ յաւուր յայնմիկ եղիցի շարժումն մեծ ՚ի վերայ երկրին Իսրայէլի. 20եւ խռովեսցին յերեսաց իմոց ձկունք ծովու, եւ թռչունք երկնից, եւ գազանք դաշտաց, եւ ամենայն սողունք երկրի, եւ ամենայն մարդիկ որ ՚ի վերայ երեսաց երկրի. լերինք պատառեսցին, եւ ձորք տապալեսցին, եւ ամենայն պարիսպք երկրին կործանեսցին։ 21Եւ կոչեցից զա՛հ սրոյ ՚ի վերայ նորա՝ ասէ Տէր Տէր. սո՛ւր առն ՚ի վերայ եղբօր իւրոյ լինիցի. 22եւ դատեցայց զնա արեամբ եւ մահու. եւ հեղեղօք անձրեւաց, եւ վիմօք կարկտի. եւ հուր եւ ծծումբ տեղացից ՚ի վերայ նորա, եւ ՚ի վերայ ամենեցուն որ ընդ նմա իցեն, եւ ՚ի վերայ ազգաց բազմաց որ ընդ նմա։ 23Եւ մեծացա՛յց եւ սուրբ եղէց, եւ փառաւորեցայց եւ ծանուցայց առաջի ազգաց բազմաց. եւ ծանիցեն թէ ե՛ս եմ Տէր։