1Եւ դու որդի մարդոյ մարգարեա՛ ՚ի վերայ Գովգայ՝ եւ ասասցես. Ա՛յսպէս ասէ Տէր Տէր. Ահաւասիկ ե՛ս ՚ի վերայ քո Գովգ՝ իշխանդ Ռովսմեսովքայ եւ Թոբելայ. 2եւ ժողովեցից զքեզ եւ առաջնորդեցից քեզ. եւ հանից զքեզ ՚ի ծագաց հիւսւսոյ, եւ ածից զքեզ ՚ի վերայ լերանցն Իսրայէլի։ 3Եւ կորուսից զաղեղն քո ՚ի ձախմէ ձեռանէ քումմէ, եւ զնետս քո յաջմէ ձեռանէ քումմէ. եւ կործանեցից զքեզ 4՚ի վերայ լերանցն Իսրայէլի. եւ անկանիցիս դո՛ւ եւ ամենեքին որ զքեւ իցեն. եւ ազգքն որ ընդ քեզ իցեն, մատնեսցին ՚ի կերակուր հաւո՛ւց եւ ամենայն թռչնոց. եւ ամենայն գազանաց անապատի ետու զքեզ ՚ի կերակուր. 5ընդ երեսս դաշտին անկցիս. զի ե՛ս խօսեցայ՝ ասէ Տէր Տէր։ 6Եւ առաքեցից հո՛ւր ՚ի վերայ Մագովգայ. եւ բնակեսցեն կղզիք ՚ի խաղաղութեան. եւ ծանիցեն թէ ե՛ս եմ Տէր Տէր։ 7Եւ անուն իմ սուրբ ծանիցի ՚ի մէջ ժողովրդեան իմոյ Իսրայէլի. եւ մի՛ եւս պղծեսցի անուն իմ սուրբ. եւ ծանիցեն ամենայն ազգք երկրի՝ թէ ե՛ս եմ Տէր Սուրբն Իսրայէլի։ 8Ահաւասիկ հասեալ է. եւ ծանիցես թէ լինիցի՝ ասէ Տէր Տէր. ա՛յս է օրն զորմէ խօսեցայ։ 9Եւ ելցեն բնակիչք քաղաքաց Իսրայէլի. եւ այրեսցեն զզէնս, զնիզակաբեկս, զասպարաբեկս, զնետս, զբեկորս աղեղանց, զտիգաբունս, զսըւնակոթս, եւ այրեսցեն իւրեանց այրելիս եւթն ամի. 10եւ մի՛ առցեն փայտ ՚ի վայրաց, եւ յատցեն փայտ յանտառաց. այլ զզէնսն այրեսցեն ՚ի կրակի. եւ առցեն յաւարի զաւարառուս իւրեանց, եւ կողոպտեսցեն զկողոպտիչս իւրեանց՝ ասէ Տէր Տէր։ 11Եւ եղիցի յաւուր յայնմիկ՝ տաց Գովգայ տեղի անուանի գերեզման յԻսրայէլի. զշիրիմ եկելոցն ՚ի կողմանց ծովուն, եւ շինեսցեն շուրջ զափամբք ձորոյն եւ թաղեսցեն անդ զԳովգ, եւ զամենայն ժողովս նորա. եւ կոչեսցի Գե՛հ գերեզման Գովգայ։ 12Եւ թաղեսցեն զնոսա տուն Իսրայէլի, զի սրբեսցի երկիրն. զեւթն ամիս 13թաղեսցեն զնոսա ամենայն ժողովուրդք երկրին. եւ եղիցի նոցա անուանի օրն յորում փառաւորեցայց՝ ասէ Տէր Տէր։ 14Եւ ա՛րս նմին իրի գումարեսցեն երթալ շրջել ընդ երկիրն, եւ թաղե՛լ զմնացորդս ՚ի վերայ երեսաց երկրին. եւ սրբել զնա յետ եւթն ամսոյ։ 15Եւ խնդրեսցէ ամենայն որ անցանիցէ ընդ երկիրն. եւ յորժամ տեսանիցէ ոսկր մարդոյ՝ շինեսցէ առ նովաւ նշանակ ինչ, մինչեւ թաղեսցեն զայն որք թաղենն ՚ի Գեհ ՚ի գերեզմանին Գովգայ. 16զի եւ անուն քաղաքին Գերեզման կոչեսցի. եւ սրբեսցի երկիրն։ 17Եւ դու որդի մարդոյ՝ ա՛յսպէս ասէ Տէր Տէր. Ասա՛ դու ցամենայն հաւս թռչունս, եւ ցամենայն գազանս դաշտի. Ժողովեցարո՛ւք եւ եկա՛յք, ժողովեցարո՛ւք յամենայն կողմանց երկրի ՚ի զենումն իմ զոր ես զենի ձեզ՝ զենումն մեծ ՚ի վերայ լերանցն Իսրայէլի. կերէ՛ք միս եւ արբէ՛ք արիւն. 18կերէք զմիս սկայից, եւ արբէ՛ք զարիւն իշխանաց երկրին, զխոյս՝ եւ զզուարակս՝ զնոխազս. զի զուարակք պարարեալք են ամենեքեան. 19եւ կերիջիք ճարպ ցյագ, եւ արբջիք արիւն ցարբենալ ՚ի զենլեաց իմոց զոր զենի ձեզ. 20եւ յագեսջիք ՚ի սեղանոյ իմմէ. ՚ի հեծելոց, եւ յերիվարաց, եւ ՚ի սկայից, եւ յամենայն արանց պատերազմողաց՝ ասէ Տէր Տէր։ 21Եւ տաց զփառս իմ ՚ի ձեզ. եւ տեսցեն ամենայն ազգք զդատաստանն իմ զոր արարի, եւ զձեռն իմ զոր ածից ՚ի վերայ նոցա։ 22Եւ ծանիցեն տունն Իսրայէլի թէ ե՛ս եմ Տէր Աստուած նոցա, յօրէ յայնմանէ եւ առ յապայ։ 23Եւ ծանիցեն ամենայն ազգք, թէ վասն մեղաց իւրեանց գերեցան տունն Իսրայէլի. փոխանակ զի անարգեցին զիս, դարձուցի զերեսս իմ ՚ի նոցանէ, եւ մատնեցի զնոսա ՚ի ձեռս թշնամեաց իւրեանց. եւ անկա՛ն ամենեքեան ՚ի սուր. 24վասն պղծութեան նոցա՝ եւ անօրէնութեանց՝ արարի նոցա զայն. եւ դարձան երեսք իմ ՚ի նոցանէ։ 25Վասն այնորիկ ա՛յսպէս ասէ Տէր Տէր. Ա՛րդ դարձուցից զգերութիւնն Յակովբայ, եւ ողորմեցայց տանն Իսրայէլի, եւ նախանձեցայց վասն անուան իմոյ սրբոյ։ 26Եւ ընկալցին զանարգանս իւրեանց եւ զանիրաւութիւնս զոր անիրաւեցան. ՚ի բնակեցուցանել զնոսա յերկրին իւրեանց խաղաղութեամբ, եւ ո՛չ ոք իցէ որ զարհուրեցուցանիցէ՝ 27՚ի դարձուցանել ինձ զնոսա յազգաց, եւ ժողովել զնոսա ՚ի գաւառաց հեթանոսաց։ Եւ սուրբ եղէ՛ց ՚ի նոսա առաջի ազգաց. 28եւ ծանիցեն թէ ես եմ Տէր Աստուած նոցա, յերեւել ինձ նոցա ՚ի մէջ ազգաց. եւ ժողովեցից զնոսա յերկրին իւրեանց, եւ ո՛չ եւս թողից ՚ի նոցանէ ուրեք. 29եւ ո՛չ եւս դարձուցից զերեսս իմ ՚ի նոցանէ. փոխանակ հեղլոյ զսրտմտութիւն իմ ՚ի վերայ տանն Իսրայէլի. ասէ Տէր Տէր։