1Եւ դո՛ւ որդի մարդոյ, ա՛ռ դու քեզ աղիւս մի, եւ դիցես զնա առաջի երեսաց քոց. եւ նկարեսցես ՚ի նմա զքաղաքն Երուսաղեմի. 2եւ տացես շուրջ զնովաւ պաշարումն. եւ շինեսցես շուրջ զնովաւ մարտկոցս. եւ պատեսցես շուրջ զնովաւ պատնէշ. եւ տացես շուրջ զնովաւ բանա՛կս, եւ ածցես շուրջ զնովաւ նետակա՛լս։ 3Եւ առցես դու քեզ տապա՛կ երկաթի, եւ կանգնեսցես զնա իբրեւ զպարի՛սպ երկաթի ընդ քեզ եւ ընդ քաղաքն. եւ պատրաստեսցես զերեսս քո ՚ի վերայ նորա, եւ եղիցի ՚ի պաշարումն, եւ պաշարեսցես զնա. զի ա՛յն նշանակ է որդւոցն Իսրայէլի։ 4Եւ դու ննջեսցես ՚ի ձախակողմն քո, եւ դիցես զանիրաւութիւնս տանն Իսրայէլի ՚ի վերայ դորա. ըստ թուոյ աւուրց զոր ննջեսցես ՚ի վերայ դորա հարե՛ւր եւ յիսուն օր. եւ առցես զանիրաւութիւնս նոցա։ 5Եւ ես ետու քեզ զերկուս անիրաւութիւնս նոցա ՚ի թիւ աւուրց՝ հարեւր եւ իննսուն օր. եւ առցես զանիրաւութիւնս տանն Իսրայէլի, 6եւ բովանդակեսցես ՚ի միասին զամենայն։ Եւ դարձեալ ննջեսցես յաջակողմն քո, եւ առցես զանիրաւութիւն տանն Յուդայ զքառասուն օր. զի օր ընդ տարւոյ եդի՛ քեզ։ 7Եւ ՚ի պաշարումն Երուսաղեմի պատրաստեսցես զերեսս քո, եւ զօրացուսցես զբազուկս քո, եւ մարգարէասցի՛ս ՚ի վերայ նորա։ 8Եւ ես ահա ետու ՚ի վերայ քո կապանս, եւ մի՛ փոխեսցես կողմն ՚ի կողմանէ մինչեւ կատարեսցին աւուրք արգելանին քոյ։ 9Եւ դո՛ւ ա՛ռ քեզ ցորեան, եւ գարի, ոսպն, եւ ոլոռն, եւ կորեակ, եւ հաճար, եւ արկցես զայն յամա՛ն մի խեցեղէն, եւ արասցես դու զայն քեզ հաց. եւ ըստ թուոյ աւուրցն զոր ննջեսցես դու ՚ի կողմն քո, հարեւր եւ իննսուն օր կերիցես զայն։ 10Եւ զկերակուրն քո կերիջիր կշռո՛վ. քսան սիկղ յաւուր, ժամէ ՚ի ժամ կերիջիր անտի. 11եւ ջուր չափո՛վ արբջիր. զվեցերորդ մասն դորակի միոյ՝ ժամէ՛ ՚ի ժամ արբջիր։ 12Եւ նկան գարեղէն արկեալ կերիցես անտի. յա՛ղբ մարդոյ եփեսջիր զայն առաջի երեսաց նոցա։ 13Եւ ասասցես. Ա՛յսպէս ասէ Տէր Աստուած Իսրայէլի. Ա՛յսպէս կերիցեն որդիքն Իսրայէլի զհաց իւրեանց պղծութեամբ ՚ի մէջ ազգա՛ց ուր ցրուեցից զնոսա անդր։ 14Եւ ասեմ. Քա՛ւ լիցի Տէր Աստուած Իսրայէլի, եթէ պղծեալ իցէ երբէք անձն իմ ՚ի պղծութիւնս. եւ մեռելոտի՝ եւ ՚ի գազանաբեկ ո՛չ երբէք կերայ ՚ի ծննդենէ իմմէ մինչեւ ցայժմ. եւ ո՛չ եմուտ ՚ի բերան իմ ամենայն միս պիղծ։ 15Եւ ասէ ցիս. Ահա ետու քեզ քակոր արջառոյ փոխանակ աղբոյն մարդոյ, եւ նովա՛ւ արասցես զհաց քո։ 16Եւ ասէ ցիս Տէր. Որդի՛ մարդոյ, ահաւանիկ ես բեկանեմ զհաստատութիւն հացի յԵրուսաղէմ. եւ կերիցեն հաց կշռով՝ եւ կարօտանաց, եւ ջուր չափով՝ եւ կարօտութեամբ արբցեն. 17զի եղիցին կարօտեալք ՚ի հացէ եւ ՚ի ջրոյ. եւ ապականեսցի մարդ եւ եղբայր իւր, եւ հաշեսցին յանիրաւութիւնս իւրեանց։