Վասն շինուածոյ Տաճարին։ ԼԶ

Վասն շինուածոյ Տաճարին։ [631]

1Եւ եղեւ ՚ի քսաներորդի եւ ՚ի հինգերորդի ամի գերութեան մերոյ, յամսեանն առաջնում որ օր մետասան էր ամսոյն. ՚ի չորեքտասաներորդի ամի առնլոյ քաղաքին. յաւո՛ւր յայնմիկ եղեւ ՚ի վերայ իմ ձեռն Տեառն։ 2Եւ ա՛ծ զիս ՚ի տեսլեան Աստուծոյ յերկիրն Իսրայէլի, եւ եդ զիս ՚ի վերայ լերին միոյ բարձու յոյժ. եւ ՚ի վերայ նորա իբրեւ զշինուած քաղաքի դէ՛մ յանդիման. 3եւ տարաւ զիս ՚ի ներքս։ Եւ ահա ա՛յր մի, եւ տեսիլ նորա իբրեւ զտեսիլ փայլուն պղնձոյ. եւ ՚ի ձեռին նորա էր լա՛ր շինողաց, եւ ձո՛ղ չափոյ. եւ ինքն կա՛յր ՚ի վերայ դրանն։ 4Եւ ասէ ցիս այրն. Տեսե՛ր որդի մարդոյ. արդ՝ հայեա՛ց աչօք քովք, եւ լո՛ւր ակընջօք քովք, եւ հաստատեա՛ ՚ի մտի քում զամենայն զոր ես ցուցից քեզ. զի վասն ցուցանելո՛յ քեզ եկի այսր. եւ ցուցցե՛ս զամենայն զոր դո՛ւդ տեսանես՝ տանն Իսրայէլի։ 5Եւ ահա շուրջ զտաճարաւն փողոցս. եւ ՚ի ձեռին առն՝ ձո՛ղ չափոյ ՚ի վե՛ց կանգնոյ եւ թզաւ. եւ չափեաց զլայնութիւն պարսպացն հաւասար ձողոյն, եւ զբարձրութիւն նորա հաւասար ձողոյն։ 6Եւ եմո՛ւտ ընդ դուռնն որ հայէր ընդ արեւելս՝ զե՛ւթն աստիճանօք. եւ չափեաց զկոզակսն վեց վեց զկամարօք դրանն հաւասար ձողոյն. եւ զերկայնութիւն կոզակին հաւասար ձողոյն, եւ զլայնութիւն նորին հաւասար ձողոյն. եւ կամարս ՚ի մէջ կոզակացն ՚ի վեց կանգնոյ։ 7Եւ կոզակն երկրորդ հաւասա՛ր ձողոյն ՚ի լայնութիւն, եւ հաւասար ձողոյն յերկայնութիւն. եւ կամարն ՚ի հինգ կանգնոյ։ 8Եւ կոզակն երրորդ հաւասար ձողոյն յերկայնութիւն, եւ հաւասար ձողոյն ՚ի լայնութիւն. եւ կամարք դրանն 9մերձ ՚ի կոնք դրանն յութ կանգնոյ. եւ կամարք յերկուց կանգնոց, եւ կամարք ներքին դրանն։ 10Եւ կոզակք դրանն՝ դէմ յանդիման միմեանց երե՛ք աստի եւ երեք անտի. եւ չափ մի էր երեցուն. եւ չա՛փ մի կամարացն՝ աստի եւ անտի։ 11Եւ չափեաց զլայնութիւն մտից դրանն ՚ի տասն կանգնոյ, եւ զերկայնութիւն դրանն յերեքտասան կանգնոյ։ 12Եւ ՚ի մի կանգուն բովանդակեալ դէմ յանդիման կոզակացն՝ ՚ի մի կանգուն սահմանեալ յայս կոյս յայն կոյս. եւ կոզակքն աստի եւ անտի ՚ի վեց վեց կանգնոյ։ 13Եւ չափեաց զդուռնն ՚ի պարսպէ կոզակին մինչեւ յո՛րմ կոզակին, ՚ի լայնութիւն քսան եւ հինգ կանգուն. եւ ա՛յն էր դուռն ՚ի դրան վերայ։ 14Եւ զմիջոց կամարի դրանն, եւ զկոզակս նորին ՚ի վաթսուն կանգնոյ շուրջ զդրամբն. եւ զմիջոց սրահին արտաքնոյ, 15եւ զմիջոց կամարի դրանն ներքնոյ, ՚ի յիսուն կանգնոյ։ 16Եւ պատուհանք ծածուկ էին ՚ի կոզակսն, եւ ՚ի կամարսն ներքուստ դրան սրահին շո՛ւրջ շրջանակաւ. նոյնպէս եւ կամարացն, եւ պատուհանք շուրջ ներքոյ եւ արտաքոյ. եւ ՚ի վերայ կամարացն արմաւենիք աստի եւ անտի։ Եւ տարաւ զիս ՚ի ներքին սրահն. 17եւ ահա դահլիճք, եւ սի՛ւնք շրջանակօք, շուրջ զսրահիւքն յօրինեալք. երեսուն դահլիճք ՚ի մէջ սեանցն շրջանակաց։ 18Եւ սիւնք դէմ յանդիման դրանցն ըստ երկայնութեան դրանցն, 19եւ սիւնք շրջանակաւ ՚ի ներքոյ։ Եւ չափեաց զլայնութիւն սրահին ՚ի միջոցէ դրանն արտաքնոյ մինչեւ ցմիջոց դրանն ներքնոյ որ հայէր ընդ արեւելս. հարե՛ւր կանգուն։ 20Եւ տարաւ զիս ՚ի կողմն հիւսւսոյ, եւ ահա դուռն մի որ հայէր ընդ հիւսւսի սրահին արտաքնոյ. եւ չափեաց զնա յերկայնութիւն եւ ՚ի լայնութիւն. 21եւ զկոզակս նորա աստի եւ անտի, եւ զկամարն, եւ զկոնքն, եւ զարմաւենիս։ Եւ եղեւ ըստ չափոյ դրանն որ հայէր ընդ արեւելս, յիսուն կանգուն յերկայնութիւն, եւ քսան եւ հինգ կանգուն ՚ի լայնութիւն։ 22Եւ պատուհանք նորա, եւ կամարք. եւ արմաւենիք ըստ դրանն որ հայէր ընդ արեւելս. եւ ընդ եւթն սանդուխս ելանէին ՚ի նա. եւ էր կամարակապ ՚ի ներքոյ։ 23Եւ դուռն ներքին սրահին հայէր ընդ դուռն հիւսւսոյ, ըստ օրինակի դրանն որ հայէր ընդ արեւելս. եւ չափեաց զսրահն դրանէ ՚ի դուռն՝ հարե՛ւր կանգուն։ 24Եւ տարաւ զիս ընդ կողմն հարաւոյ, եւ ահա դուռն մի որ հայէր ընդ հարաւ. եւ չափեաց զնա եւ զկոզակս նորա, եւ զկոնքս, եւ զկամարս ըստ նմին չափոյ։ 25Եւ պատուհանք նորա եւ կամարք շրջանակաւ, ըստ օրինակի պատուհանիցն եւ կամարացն առաջնոցն, յիսուն կանգուն յերկայնութիւն՝ եւ քսան եւ հինգ կանգուն ՚ի լայնութիւն։ 26Եւ եւթն սանդուխք ՚ի նմա. եւ կամարք ՚ի ներքս, եւ արմաւենիք աստի եւ անտի ՚ի վերայ կոնքիցն. 27եւ դուռն ներքոյ հանդէպ դրան սրահին՝ որ հայէր ընդ հարաւ։ Եւ չափեաց զսրահն դրանէ ՚ի դուռն ՚ի լայնութիւն՝ հարեւր կանգուն ՚ի կողմն հարաւոյ։ 28Եւ տարաւ զիս ՚ի սրահն ներքին դրանն որ հայէր ընդ կողմն հարաւոյ. եւ չափեաց զդուռնն որ ընդ հարաւ ըստ նմին չափոյ։ 29Եւ զկոզակսն, եւ զկամարս եւ զկոնքս նովին չափով. եւ պատուհանք նորա եւ կամարք շուրջ շրջանակաւ. յիսուն կանգուն յերկայնութիւն, եւ քսան եւ հինգ ՚ի լայնութիւն։ 30Եւ շուրջ զնովաւ կամարք՝ յիսուն կանգուն յերկայնութիւն եւ քսան եւ հինգ ՚ի լայնութիւն։ 31Եւ կամարք ՚ի յարտաքնում սրահին, եւ արմաւենի՛ք ՚ի կամարսն. եւ եւթն սանդուխք ելանելիք նորա։ 32Եւ տարաւ զիս ՚ի դուռնն որ հայէր ընդ ճանապարհ արեւելից, եւ չափեաց զնա ըստ առաջին չափոյն. 33զկոզակսն, եւ զկամարսն, եւ զկոնքսն՝ ըստ նմին չափոյ. եւ պատուհանք ՚ի նմա, եւ կամարք շուրջանակի. յիսուն կանգուն յերկայնութիւն, եւ քսան եւ հինգ ՚ի լայնութիւն։ 34Եւ կամարք ՚ի ներքնում սրահին, եւ արմաւենիք ՚ի վերայ կամարացն աստի եւ անտի, եւ եւթն սանդուխք ՚ի նմա։ 35Եւ տարաւ զիս ՚ի դուռնն որ ընդ հիւսւսի. եւ չափեաց ըստ նմին չափոյ, 36զկոզակսն եւ զկամարսն եւ զկոնքս. եւ պատուհա՛նք ՚ի նմա շուրջանակի, եւ կամարք յիսուն կանգուն յերկայնութիւն, եւ քսան եւ հինգ կանգուն ՚ի լայնութիւն։ 37Եւ կամարք արտաքոյ դրանն. եւ արմաւենիք կամարացն աստի եւ անտի, եւ ութ սանդուխք ՚ի նմա։ 38Եւ դահլիճք նորա՝ եւ լայնութիւնք նորա՝ եւ կամարք նորա հանդէպ երկրորդ դրանն՝ ուր լուանային զողջակէզսն։ 39Եւ ՚ի կամարի դրանն երկու սեղանք յայսկոյս, եւ երկու սեղանք յա՛յնկոյս. զի զենուցուն ՚ի նմա զողջակէզսն՝ եւ զվասն մեղացն՝ եւ զվասն անգիտութեանն։ 40Եւ ընդ հարաւակողմն խողուակի ողջակիզացն ՚ի մուտս դրանն որ հայէր ընդ հիւսւսի, երկու սեղանս որ հայէր ընդ արեւելս. եւ ՚ի հարաւակողմ կուսէ երկրորդի դրանն՝ հանդէպ կամարաց դրանն երկու սեղանք։ Եւ ընդ արեւելս ութ սեղանք. 41չորք սեղանք յայսկոյս, եւ չորք սեղանք յայնկոյս, հանդէպ հարաւոյ դրանն. եւ անդ զենուցուն զզոհսն եւ զողջակէզսն, յանդիման ութից սեղանոց ողջակիզացն։ 42Եւ չորք սեղանք ողջակիզացն քարեղէնք կոփածոյք. կանգնա՛ւ եւ կիսով երկայնութիւն, եւ կանգնաւ եւ կիսով ՚ի լայնութիւն, եւ կանգնաւ եւ կիսով ՚ի բարձրութիւն. զի ՚ի վերայ նոցա դիցեն զգործին՝ որով զենուցուն անդ զողջակէզսն եւ զզոհսն։ 43Եւ ծնօտս ուղկեանս քանդակագործս ունիցին ՚ի ներքուստ շուրջանակի. եւ ՚ի վերայ սեղանոյն յա՛րկ առ ՚ի ծածկել յանձրեւոյ եւ յերաշտութենէ։ 44Եւ տարաւ զիս ՚ի սրահն ներքին. եւ ահա երկու պատշգամք ՚ի ներքոյ սրահին, մի ընդ հարաւո՛յ դրանն որ հայէր ընդ հիւսւսի, եւ հանէր ընդ հարաւ. եւ մի ընդ հիւսւսոյ դրանն որ հայէր ընդ հարաւ, եւ հանէր ընդ հիւսւսի։ 45Եւ ասէ ցիս. Ա՛յս պատշգամ, որ հայի ընդ կողմանս հարաւոյ՝ քահանայիցն եղիցի որ պահեն զպահպանութիւնս տանն։ 46Եւ պատշգամն որ հայի ընդ հիւսւսի՝ քահանայիցն եղիցի որ պահեն զպահպանութիւն սեղանոյն. նոքա են որդիք Սադովկայ՝ որ մերձենան ՚ի Ղեւտացւոց անտի պաշտել զՏէր։ 47Եւ չափեաց զսրահն յերկայնութիւն հարեւր կանգուն, եւ ՚ի լայնութիւն հարեւր կանգուն, զչորեսին կողմանս նորա, եւ ՚ի սեղան՝ յանդիման տաճարին։ 48Եւ տարաւ զիս ՚ի կո՛նք տաճարին, եւ չափեաց զլայնութիւն կոնքին, ՚ի միոջէ կողմանէ հինգ կանգուն, եւ ՚ի միւսմէ կողմանէ հինգ կանգուն, եւ զլայնութիւն մտին՝ չորեքտասան կանգուն. եւ զխոյակս ուսոց դրան կոնքին յա՛յսկոյս յայնկոյս՝ երիս երիս կանգունս։ 49Եւ զբարձրութիւն կոնքին քսա՛ն կանգուն. եւ զլայնութիւն նորին՝ մետասան կանգուն. եւ ընդ տասն աշտիճան ելանէին ՚ի նա, եւ սիւնք երկո՛ւ էին աստի եւ անտի։