1Եւ եհա՛ն զիս ՚ի սրահն արտաքին ընդ արեւելս դէմ յանդիման դրանն հիւսւսոյ. եւ տարաւ զիս ՚ի ներքս։ Եւ ահա պատշգամք հինգ առանցիւք եւ խորշիւք ընդ կո՛ղմ հիւսւսոյ. 2հարեւր կանգուն յերկայնութիւն, եւ յիսուն կանգուն ՚ի լայնութիւն. 3նկարեալք ըստ օրինակի դրան սրահին ներքնոյ, եւ ըստ օրինակի շրջանակիւ սեանցն սրահին արտաքնոյ. դէ՛մ ընդ դէմ կարգեալ երեք սրահեա՛ն։ 4Եւ դէմ ընդ դէմ պատշգամացն գնացք ՚ի տասն կանգնոյ լայնութիւն, եւ հարեւր կանգուն յերկայնութիւն. եւ ներգսագոյն կողմ ճանապարհին կանգուն մի. եւ դրունք նոցա ընդ հիւսւսի։ 5Եւ գնացք ՚ի վերնատունսն նոյնպէս, զի խառնեալ էին սիւնքն շրջանակաւ ՚ի ներքուստ մինչեւ ՚ի վեր. եւ անջրպետն նոյնպէս. եւ սիւնքն շրջանակօք, եւ անջրպետք եւ մոյթք. 6քանզի երեքսրահեանք էին. եւ սիւնք ո՛չ գոյին իբրեւ զսիւնս պատշգամացն. վասն այնորիկ առանցք էին ՚ի ներքոյ կողմանէն. եւ ՚ի միջնայարկացն ՚ի գետնոյ կողմանէ յիսուն։ 7Եւ լոյս արտաքուստ, որպէս եւ պատշգամք սրահին արտաքնոյ որ հային դէմ յանդիման պատշգամացն՝ որ ընդ հիւսւսոյ՝ յերկայնութիւն յիսուն կանգուն։ 8Քանզի երկայնութիւն պատշգամացն որ հայէին ՚ի սրահն արտաքին՝ է՛ր ՚ի յիսուն կանգնոյ. եւ նոքա էին դէմ յանդիման միմեանց. ընդ ամենայն հարեւր կանգուն։ 9Եւ դրունք պատշգամացն որ ընդ մուտս արեւելից՝ վասն մտանելոյ ընդ նոսա յարտաքին սրահին անտի. 10ըստ լուսամտին առաջի՛ն գնացին որ ընդ կողմն հարաւոյ՝ դէմ յանդիման հարաւոյ, եւ ընդդէմ անջրպետացն, եւ հանդէպ խորշիցն։ Եւ պատշգամքն, 11եւ գնացն հանդէպ նոցուն ըստ չափոյ պատշգամացն ճանապարհին՝ որ ընդ հիւսւսի. եւ ըստ երկայնութեան նոցա՝ եւ ըստ լայնութեան նոցա՝ եւ ըստ ելից նոցա. եւ ըստ շրջանակաց նոցին, եւ ըստ լուսանցուցաց. 12եւ ըստ մտից պատշգամացն՝ որ ընդ հիւսւս, եւ ըստ մտից պատշգամացն որ ընդ հարաւ. եւ ըստ մտից առաջին գնացիցն առ ՚ի զլոյսն տալոյ անջրպետութեան ձողոյն, եւ հանդէպ արեւելից գնա՛լ ընդ նոսա։ 13Եւ ասէ ցիս. Պատշգամք որ են ընդ հիւսւսի, եւ պատշգամքդ որ են ընդ հարաւ՝ հանդէպ բացատանցն, դոքա են պատշգամք սրբութեանն ուր ուտեն քահանայքն որդիքն Սադովկայ մերձաւորք տանն զսրբութիւն սրբութեանցն. եւ ա՛նդ դիցեն զսրբութիւն սրբութեանցն, եւ զզոհսն, եւ զվասն մեղացն, եւ զվասն անգիտութեանն. քանզի սո՛ւրբ է տեղին։ 14Եւ մի՛ ոք մտցէ անդր, բա՛ց ՚ի քահանայիցն։ Եւ ո՛չ ելանիցեն ՚ի սրբութենէ անտի ՚ի սրահն արտաքին. զի յամենայն ժամանակի որ մերձենանն՝ սո՛ւրբ կացցեն. եւ մի՛ մատչիցին ՚ի պատմուճանս իւրեանց որով պաշտիցինն, զի սո՛ւրբ է այն. եւ զգեցցին ա՛յլ հանդերձ յորժամ մերձենայցեն ՚ի ժողովուրդն։ 15Եւ կատարեցաւ չափ տաճարին ներքնոյ։ Եւ եհան զիս ընդ ճանապարհ դրանն որ հայէր ընդ արեւելս. եւ չափեաց զձեւ տանն շուրջանակի ըստ յօրինուածոյ։ 16Եւ եկն եկաց առ հարաւային դրանն որ հայէր ընդ արեւելս, եւ չափեաց հինգ հարեւր չափով ձողոյն։ Եւ դարձաւ ՚ի կողմ հիւսւսոյ. 17եւ չափեաց հանդէպ հիւսւսոյ, հինգ հարեւր չափով ձողոյն։ 18Եւ դարձաւ ՚ի ծովակողմն, եւ չափեաց հանդէպ ծովուն, հինգ հարեւր չափով ձողոյն։ 19Եւ դարձաւ ՚ի կողմն հարաւոյ, եւ չափեաց հանդէպ հարաւոյ հինգ հարեւր չափով ձողոյն։ 20Եւ զփողոցս նորա շուրջանակի ՚ի չորեսին կողմանսն նովին չափով. եւ յօրինեաց զնա եւ զփողոցս նորա շուրջանակի, ՚ի հինգ հարեւր կանգնոյ հանդէպ արեւելից, եւ ՚ի հինգ հարեւր կանգնոյ զլայնութիւնն՝ անջրպետել ՚ի մէջ սրբութեանցն, եւ ՚ի մէջ պարսպացն յօրինուածոյ տաճարին։